Tayta-mamakuna, ¿yanapachkankichikchu warmaykichikta bautizakunankupaq?

 1. ¿Imatam tayta-mamakunaqa yachayta munanku warmanku manaraq bautizakuchkaptinku?

BLOSOM BRANT iñiqmasinchikmi bautizakusqanmanta kaynata willakun: “Achka killakunam tayta-mamayta nirqani bautizakuyta munasqaymanta, hinaptinmi paykuna achka kutikama ñuqawan rimarqaku. Munarqakum bautizakuyqa mana pukllay hinalla kasqanta entiendenayta. Hinaptinmi 1934 watapa 31 diciembre killanpi bautizakurqani”, nispa. Kunanpas Diosta yupaychaq tayta-mamakunaqa warmankutam yanapanku allinta tanteanankupaq. Yachankum warmanku bautizakunankuta yanqamanta harkakuptinkuqa warmankupa iñiynin chiriyarunanmanta (Sant. 4:17). Ichaqa warmanku manaraq bautizakuchkaptinmi tayta-mamakunaqa yachayta munanku sichu Jesuspa qatiqnin kanankupaq listoña kasqankuta.

 2. (1) ¿Imatam llaqtan-llaqtan watukuq wakin iñiqmasinchikkuna qawarqaku? (2) ¿Imamantam kay yachachikuypi yachasunchik?

² Llaqtan-llaqtan watukuq wakin iñiqmasinchikkunam riqsinku achka mozo-sipaskunata, wakinkum 20 watayuq kaspankupas hinaspa Diosta yupaychaq tayta-mamanku kaptinpas manaraq bautizakunkuchu. Yaqa llapankum huñunakuykunaman hinaspa Diosmanta willakuqpas rinku, chaynataq Jehova Diospa testigon kasqankuwanpas riqsichikunku. Ichaqa Diosllapaqña kawsanankupaqmi mana tanteakunkuchu nitaq bautizakunkuchu. ¿Imanasqam chaykunataqa mana ruwankuchu? Wakinpiqa, tayta-mamakunam warmankuta ninku qipa punchawtaña bautizakunankupaq. Kay yachachikuypim yachasunchik imanasqam wakin tayta-mamakuna manaraq munankuchu warmanku bautizakunankuta.

 3. Blosom iñiqmasinchikpa tayta-mamanqa, ¿imatam yachayta munarqaku?

³ Blosom iñiqmasinchikpa tayta-mamanmi yachayta munarqaku sichu warmachan bautizakuymanta allinta entiendesqanta hinaspa chayta ruwayqa mana pukllay hinalla kasqanmantapas. ¿Imaynatam tayta-mamakuna yachanmanku warmanku bautizakunankupaq hinaña kasqankuta?

 4. ¿Imaynatam Mateo 28:19, 20 versiculokunapi Jesuspa kamachisqan tayta-mamakunata yanapan?

⁴ (Qaway Mateo 28:19, 20). Pasaq yachachikuypi yachamusqanchikman hinam, bibliaqa mana ninchu hayka watanchikpi bautizakunanchikmanta. Chayna kaptinpas, tayta-mamakunaqa yuyaymananmankum Mateo 28:19 versiculopa nisqanpi, chaypim nin “yachachimuychik qatiqniykunaña kanankupaq” nispan, griego rimaypi “yachachimuychik” nispanqa rimachkanmi pipapas qatiqnin kanankupaq runakunaman yachachiymanta. Jesuspa qatiqninkunaqa paypa yachachisqantam entiendenku hinaspa kasukunku. Chaymi tayta-mamakunaqa kallpanchakunanku warmankuman uchuychankumanta yachachinankupaq, chaynapi bautizakunankupaq hinaspa Jesuspa qatiqnin kanankupaq. Arí, wawachakunaqa manamá bautizakunanpaq hinaraqchu kachkanku. Ichaqa bibliam nin wakin warmachakuna bibliata allinta entiendesqankumanta hinaspa kasukusqankumantapas.

5, 6. (1) Timoteomanta bibliapa ima nisqanta qawaspanchik, ¿ima nichwantaq bautizakuymanta? (2) ¿Imatam tayta-mamakunaqa mana ruwanankuchu hinaspa imapaqmi astawan kallpanchakunanku?

⁵ Timoteoqa mozollaraq kachkaspanmi Jehova Diosta yupaychananpaq tanteakurqa. Apostol Pablom nirqa Timoteoqa ‘warmachallaraq kasqanmantapacha’ Diospa palabranmanta yachasqanta. Timoteopa taytanqa manam Diostaqa yupaycharqachu, ichaqa mamanwan abuelanmi Timoteota yachachirqaku Diospa palabranta kuyananpaq. Chaymi Timoteoqa allin iñiyniyuq karqa (2 Tim. 1:5; 3:14, 15). Yaqa 20 watanpi kachkaspanmi Timoteoqa Diospa llaqtanpi yanapakurqaña (Hech. 16:1-3).

⁶ Warmakunaqa manam chaynallachu kanku. Wakinkum warmallaraq kaspanku allin yuyayniyuq kanku, hinaspam bautizakuyta munanku. Wakinkuñataqmi astawanraq suyananku bautizakunankupaqqa. Chayta allinta yachaq tayta-mamakunaqa manam warmankutaqa hikutankuchu bautizakunankupaqqa, aswanmi hinalla yanapanku ñawparinankupaq. Tayta-mamakunaqa kusisqam tarikunku Proverbios 27:11 (qaway) nisqanta warmanku allinta entiendeptinku. Ichaqa manam qunqanankuchu Jesuspa qatiqnin kanankupaq warmankuta yanapanankumantaqa. Chaymi allin kanman kaynata tapukuyninku: “¿Warmayqa allintachu bibliamanta hinaspa Diosmanta yachan bautizakunanpaq?”, nispa.

 7. ¿Bibliapi lliw yachachikuykunataraqchu yachana Diosllapaqña kawsakuyta tanteakunapaq hinaspa bautizakunapaqpas? ¿Imanasqa?

⁷ Tayta-mamakunaqa munankum warmankuna bibliapa ima nisqanta allintapuni yachanankuta, chaymi yachachinankupaq kallpanchakunku. Bibliamanta yachasqankum warmankutaqa kallpanchanqa Diosllapaqña kawsakuyta tanteanankupaq. Chaynaqa, ¿bibliapi lliw yachachikuykunataraqchu yachanan Diosllapaqña kawsakuyta tanteakunanpaq hinaspa bautizakunanpaqpas? Manam, bautizakusqanchik qipatapas hinallam kallpanchakunanchik bibliamanta yachananchikpaq (qaway Colosenses 1:9, 10). Hinaptinqa, ¿haykatam pipas yachanan bautizakunanpaq?

8, 9. ¿Imatam yachanchik carcel cuidaqta ima pasasqanmanta?

⁸ Chay tapukuymanta yachanapaqqa apostolkunapa tiemponpi huk ayllupa ima ruwasqanmanta yuyarisunchik (Hech. 16:25-33). Yaqa 50 kaq watapim Filipos llaqtata apostol Pablowan Silas watukurqaku. Chay llaqtapi kachkaspankum Pablowan Silasqa yanqamanta presochasqa karqaku. Chay tutam hatun terremoto karurqa, chaymi carcelpa cimientonkuna katkatatarqa, hinaspam punkunkunapas chaylla kichakururqa. Presokuna lluptikurusqankuta piensaspanmi chaypi carcel cuidaq wañurachikuyta munarqa. Hinaptinmi Pabloqa harkakurqa mana wañuchikunanpaq. Pablowan Silasmi carcel cuidaqman hinaspa ayllunman Jesusmanta willakurqaku. Jesusmanta yachasqankuta anchata chaninchasqankuraykum chaylla bautizakurqaku. ¿Imatam kayqa yachachiwanchik?

⁹ Chay carcel cuidaqqa ichapas ñawpaqtaqa Roma nacionpa tropankunapi karqa, chayrayku ichapas Diospa palabranmantaqa mana imatapas yacharqachu. Chaymi Jesuspa qatiqnin kananpaqqa yachanan karqa bibliapa wakin yachachikuyninkunata, Jehova Dios paymanta ima munasqanta, hinaspapas Jesuspa yachachikuyninkunatam kasukunan karqa. Chay runaqa chayllam bibliapa wakin yachachikuyninkunata yacharurqa hinaspa yachasqankuna sunqunman chayarurqa, chaymi bautizakururqa. Ichaqa, bautizakusqan qipatapas hinallam Diospa palabranmantaqa yachanan karqa. Chaynaqa, ¿imatam tayta-mamakunaqa ruwanmanku Diosta kuyasqankurayku warmanku bautizakuyta munaptinkuqa? Warmankutam ninmanku iñiqkunapi punta apaqkunawan rimanankupaq, chaynapi punta apaqkuna tanteanankupaq.a Bautizasqa lliw iñiqmasinchikkuna hinam warmaykichikkunapas hinalla Jehova Diosmanta yachananku kanqa wiña-wiñaypaq (Rom. 11:33, 34).

10, 11. (1) ¿Imatam wakin tayta-mamakunaqa piensanku? (2) ¿Imatam tayta-mamakunaqa imamantapas puntapi churananku?

¹⁰ Wakin tayta-mamakunam piensanku warmanku manaraq bautizakuchkaspanku allin estudioyuq hinaspa allin llamkayniyuqraq kanankuta. Ichapas chaynataqa piensanku allinninkuta munaspanku. Ichaqa tapukunankum: “Chaywanqa, ¿yanapasaqchu warmayta sunqumanta kusisqa kananpaq? ¿Chaytachu bibliaqa yachachin? ¿Ima ruwananchiktam Jehova Diosqa munan?”, nispa (qaway Eclesiastes 12:1).

¹¹ Kay pachapi imapas kaqkunaqa manam Jehova Diospa munasqanman nitaq piensasqanman hinachu (Sant. 4:7, 8; 1 Juan 2:15-17; 5:19). ¿Imataq warmakunata yanapanqa kay pachapi imapas kaqkunawan, mana allinkunawan hinaspa satanaswan mana intuchikunankupaq? Jehova Dioswan kuyachikusqankum. Tayta-mamakuna allin educacionniyuq kayta utaq imapas kapuqniyuq kayta imamantapas puntapi churaptinkuqa, warmankunam piensanqaku Jehova Dioswan kuyachikunankumantaqa chaykuna aswan allin kasqanta. Chayqa manamá allinchu kanman, hinaspapas manachá Diosta yupaychaq tayta-mamakunaqa munanmankuchu warmankupas wakin runakuna hina imayna kusisqa kaymanta piensanankutaqa ¿aw? Kusisqaqa kasunchik Jehova Diosta kuyaspallanchikmi hinaspa imamantapas puntapi payta churaspallanchikmi (qaway Salmo 1:2, 3).

12. ¿Imanasqataq wakin tayta-mamakunaqa warmankuta nirqaku amaraq bautizakunankupaq?

¹² Huk iñiqmasinchikmi warmi wawanta nirqa amaraq bautizakunanpaq, ¿imanasqa? Paymi nin: “Qipa punchawkuna Diospa llaqtanmanta waway qarquchikunanta piensaspaymi bautizakunantaqa mana munarqanichu, chay ruwasqaymantaqa anchatam pinqakuni”, nispa. Kay iñiqmasinchik hinam achka tayta-mamakuna piensanku warmanku bautizakunankupaq suyanankumanta, warmallaraq kaspanku mana tanteowan imatapas ruwasqankurayku (Gen. 8:21; Prov. 22:15). Ichapas piensanku warmanku manaraq bautizasqa kasqanrayku mana allinta ruwaruptin Diospa llaqtanmanta mana qarquchikunanmanta. Ichaqa chaynata piensayqa manam allinchu, ¿imanasqa? (Sant. 1:22).

13. Pipas manaraq bautizasqa kaptinqa, ¿nichwanchu chayrayku Jehova Diosman cuentata mana qunanmanta?

¹³ Allin yuyayniyuqña warmanku bautizakunankuta tayta-mamakunapa munasqankuqa allinmi. Ichaqa, manam piensanankuchu warmanku mana bautizasqa kasqanrayku paykunata Jehova Dios cuentata mana mañananmantaqa. Diospaq imam allin utaq mana allin kasqanmanta yachasqankumantapacham warmankunataqa Jehova Dios cuentata mañanqa (qaway Santiago 4:17). Chaynaqa, manaraq bautizakunanpaq ninankumantaqa, Diosta kuyaq tayta-mamakunaqa warmankutam uchuychankumanta yachachinku Diospa kamachikuyninkunata sunqumanta kasukunankupaq. Hinaspapas tayta-mamakunaqa qatipakunapaq hinam kanku (Luc. 6:40). Warmakuna Diosta kuyaspankuqa manam mana allinkunataqa ruwanqakuchu, paykunaqa Diospa kamachikuyninkunatam kasukuyta munanqaku (Is. 35:8).

14. ¿Imaynatam iñiqkunapi punta apaqkunaqa tayta-mamakunata yanapanmanku?

¹⁴ Iñiqkunapi punta apaqkunapas yanapanmankum tayta-mamakunataqa, ¿imaynata? Diospaq astawan llamkay ancha allin kasqanmanta warmakunata rimapayaspanku. Huk iñiqmasinchikmi willakun: “Suqta watachaypi kachkaptiymi iñiqmasinchik Russell 15 minuto ñuqawan rimarqa hinaspa kallpanchawarqa astawan Diospaq llamkanaypaq”, nispa. Chaymi kay iñiqmasinchikqa 70 wata masnin precursora karqa. Kaymi yachachiwanchik Diospaq astawan ruwananpaq pitapas kallpanchaykuyqa allinninpaq kasqanta (Prov. 25:11). Punta apaqkunaqa ninmankutaqmi tayta-mamakunata churi-wawantin kuska huñunakusqanchik wasipi atisqankuman hina imapas ruwaypi yanapakunankupaq.

15. ¿Imaynatam wakiqninchikpas mozo-sipaskunata kallpanchachwan?

¹⁵ Hinaspapas, ¿imaynatam wakin iñiqmasinchikkunapas yanapakunmanku? Mozo-sipas iñiqmasinchikkunata kallpanchaspankum. Ichapas chaytaqa ruwanmanku iñiyninkupi imayna ñawparisqankuta qawaspanku. Mozo-sipasqa, ¿sunqumantachu huñunakuypi rimarirqa? Puntamanta rimarinanpaq tupaptin, ¿allinta yachachinanpaqchu kallpanchakurqa? Mana allinkunata ruwananpaq hikutasqa kaspan, ¿hinallachu Diosman sunqu karqa? ¿Kallpanchakurqachu escuelanpi warmamasinkunaman Diosmanta willakunanpaq? Chaykunata ruwaptinqa sunqumantayá kallpanchaykusun. Chaymi allin kanman huñunakuy manaraq qallarichkaptin utaq huñunakuy tukuyta mozo-sipaskunawan rimayninchik. Kayna ruwasqanchikmi yanapanqa paykunapas Diospa llaqtanpi kusisqa kanankupaq (Sal. 35:18).

16, 17. (1) ¿Imanasqataq ancha allin churi-wawakunapa bautizakuyninkuqa? (2) ¿Imawanmi Diosta yupaychaq tayta-mamakunaqa kusikunqaku? (Qaway 9 kaq paginapi fotota).

¹⁶ Churi-wawakunata “Jehova Diospa kamachisqanman hinaspa yachachisqanman hina” uywayqa ancha allinmi Diosta yupaychaq tayta-mamakunapaqqa (Efes. 6:4; Sal. 127:3). Ñawpaq Israel nacionniyuq churi-wawakunaqa Diospa llaqtanpiñam nacerqaku. Ichaqa kunan tiempopi Diosta yupaychaq tayta-mamakunapa warmankuqa manam chaynachu kanku. Manam tayta-mamanku Diosta kuyasqankuraykuchu warmankupas Jehova Diostaqa kuyanqaku. Chaymi churi-wawakuna nacesqanmantapacha tayta-mamakunaqa yanapananku Jesusta qatipakunankupaq, Diosllapaqña kawsakunankupaq hinaspa bautizakunankupaqpas. Kay ruwaymi imamantapas aswan allinqa. ¿Imanasqa? Diosllapaqña kawsananpaq tanteakusqan, bautizakusqan hinaspa tukuy sunquwan Diosta yupaychasqanmi yanapanqa llumpa-llumpay ñakariy punchawpi salvasqa kananpaq (Mat. 24:13).

¹⁷ Qallariyllapim rimarqanchik Blosom Brant iñiqmasinchikmanta. Bautizakuy munasqanmanta tayta-mamanta niptinmi, paykunaqa yachayta munarqaku sichu bautizakunanpaq hinaña kasqanta. Diosllapaqña kawsakuyta munasqanta yacharuspankum bautizakunanpaq kallpancharqaku. Manaraq bautizakuchkaptinmi taytanpa ima ruwasqanmanta Blosom iñiqmasinchik willakun: “Llapaykuta qunqurachiwaspankum Jehova Diosta mañakuspan taytay nirqa Diosllapaqña kawsakunaypaq tanteakusqaymanta ancha kusisqa kasqanta”, nispa. Chaymanta 60 wata masnin qipatam nirqa: “Manam haykapipas qunqasaqchu taytaypa chayna ruwasqantaqa”, nispa. Tayta-mamakuna, qamkunapas kusisqam tarikunkichik churi-wawaykichik Jehova Diosta yupaychanankupaq tanteakusqankuta hinaspa bautizakusqankuta qawaspaykichikqa.