‘Diospa lliw sumaqllaña kayninta’ qawasun

Sasachakuykunaqa yuyayninchikta, kallpanchikta hinaspa vidanchiktam hukmanyachinman. Chaynam rey David karqa sasachakuykunapi tarikuspan. ¿Imam yanaparqa chaykunata atipananpaq? Kikinmi kaynata qellqarqa: “Qaparispaymi Tayta Diosta mañakuni. Qaparispaymi Tayta Diosta ruegakuni. Paypa qayllanpim quejakullani. Paypa qayllanpim ñakarisqaymanta willakullani. Hukmanyasqa kaspaymi willakullani. Diosnilláy, qamllam purinay ñantaqa reqsinki”, nispa. Davidqa humillakuspanmi Diospa yanapakuyninta mañakurqa (Sal. 142:1-3).

Qellqarqataqmi: “Ñoqallaypam kapullawachkan imam mañakusqay. Chaytam ñoqallayqa maskallachkani. Tayta Diospa templollanpiña wañukunaykama kawsakuytañam munallachkani. Tayta Diospa lliw sumaqllaña kaynin qawaykuytam ñoqaqariki munallachkani. Tayta Diospa templollanpiña yuyaymanaykuytam ñoqaqariki munallachkani”, nispa (Sal. 27:4). Piensariy, Davidqa manam Leviy castamantachu karqa, chaychá Diospa karpanpa pationtaqa hawallamanta qawaq. Chayna kaptinpas anchata agradecekuspanmi wañukunankama templopi yachayta hinaspa ‘Diospa lliw sumaqllaña kayninta’ qawayta munarqa.

Sumaqllaña ninanqa ancha allin hinaspa kusikunapaq ninanmi. Davidqa anchatam chanincharqa yupaychanankupaq Jehova Diospa ruwasqantaqa. ¿Ñoqanchikpas David hinachu chaninchanchik?

Diospa hatun templonmi otaq payman asuykunanchikpaq tukuy ima ruwasqanmi yanapawanchik kunan tiempopi payta yupaychananchikpaq.a Kaykunata chaninchaspanchikqa ñoqanchikpas David hinam ‘Diospa lliw sumaqllaña kayninta’ qawasunchik.

Yuyaymanasun ofrendata kañanapaq cobremanta altarpi, kayqa karpapa punkunpa ñawpaqninpim karqa (Ex. 38:1, 2; 40:6). ¿Imapaqmi kayqa karqa? Kaymi qawachirqa Jesuspa wañukusqanta Dios chaskisqanta (Heb. 10:5-10). ¿Imapaqmi chayqa yanapawanchik? Apostol Pablom qellqarqa: “Diospa contranpi kachkaptinchikpas wañuspam Churin Jesus allinyanaykachiwarqanchik”, nispa (Rom. 5:10). Jesuspa wañukusqanpi iñispaqa, atisunmi Diospa amistadnin kayta (Sal. 25:14).

Huchanchik pampachasqa kasqanraykum atisun Diospa ‘hawkayayninpi samariyta’ (Hech. 3:19). Imayna tarikusqanchiktaqa tupachichwanmi wañunanpaq sentenciasqa runaman. Kay runa wanakuptinqa hinaspa imapas mana allin ruwasqanta saqeptinqa, llakipayakuq juezqa imapas ruwasqanmantam pampachaykunman hinaspapas manaña wañuchinankupaqmi ninman. ¡Mayna kusisqachá chay runaqa tarikunman! Jehova Diosqa chay juez hinam huchankumanta wanakuq runakunata pampachan hinaspa wañuymanta salvaykun.

Davidqa Jehova Dios imayna yupaychasqankutam templopi qawarqa. Qawarqachá Leyta yachachiptinku, leeptinku, huñunakuptinku chaynataq sacerdotekunawan levitakuna inciensota kañaptinkupas (Ex. 30:34-38; Num. 3:5-8; Deut. 31:9-12). Kunanpas yaqa chaynatam ruwanchik.

“¡Mayna allinmi wawqe-panikunapa huk sonqolla kawsakuyninqa!” Kayqa ñawpaqpi hinam kunanpas qawakun (Sal. 133:1). Enteron Pachapi ‘iñiqmasinchikkunam’ kunanqa astawan yapakurun (1 Ped. 2:17). Chaymantapas huñunakuyninchikpim Bibliata leenku hinaspa yachachinku. Diospa llaqtanqa qowanchiktaqmi Bibliamanta achka yachachikuykunatapas. Kaykunatam servichikuchwan familiawan Diosta yupaychaspa hinaspa sapanchikpi estudiaspapas. Diospa Llaqtanpi Punta Apaqkunamanta huk kaqninmi nirqa: “Diospa Palabranpi yuyaymanay hinaspa chaymanta astawan yachasqaymi yanapawarqa kusisqa kawsanaypaq”, nispa. Arí, ¡Diosmanta yachayqa vidanchiktam anchata kusichinman! (Prov. 2:10.)

Ñawpaq tiempopi hinam, Jehova Diospa serviqninkunapa mañakuyninqa kunanpas incienso hina payman chayan (Sal. 141:2). ¡Anchatamá kusikunchik humildadwan mañakusqanchikta Jehova Dios uyarisqanmanta yachaspanchikqa!

Moisesmi Diosta mañakuspan nirqa: “Diosnillayku, favorecewaykuyá tukuy rurasqayku allin lloqsinanpaq”, nispa (Sal. 90:17). Tukuy sonqomanta Diosmanta willakusqanchikraykum payqa yanapawanchik (Prov. 10:22). Yaqapaschá pitapas yanaparqanchik Diosta reqsinanpaq otaq hinalla kallpanchakurqanchik Diosmanta willakunapaq runakuna manaña uyariwaptinchikpas hinaspa onqoywan chaynataq imawanña ñakarispanchikpas (1 Tes. 2:2). Chayna kaptinpas, Jehova Diospa sumaq kayninkunatam qawarqanchik hinaspapas kallpanchakusqanchikmantam kusikun.

Davidmi kaynata takirqa: “Dios Taytalláy, qowarqankim tocawaqniytaqa. Qowarqankim favornikitaqa. Takyachinkim kapuqnillaytaqa. Chakra tupuykapullawasqanmi tocaruwan allin sitiopiraq”, nispa (Sal. 16:5, 6). Payqa Jehova Diostam anchata agradecekurqa servinanpaq saqesqanmanta hinaspa favorecesqanmantapas. Yaqapaschá wakinpiqa David hina sasachakuykunapi tarikusun, ichaqa pay hinam achka bendicionkunata chaskisun. Chaynaqa, hinallayá chaninchasun cheqap yupaychayta hinaspa asuykunanchikpaq Diospa tukuy ima ruwasqantapas.