Zoom nisqantakamam huñunakuchkanchik

Achka nacionkunapim autoridadkunaqa nirqaku runakunaqa mana kuska kanankupaq. Chaymi autoridadkunata kasukusqaykurayku Jehova Diospa testigonkunaqa manaña kuskaqa huñunakunikuñachu. Aswanqa internetnintakamallam huñunakuchkaniku, Zoom nisqantakama.

Huñunakuyniyku hinalla kananpaqmi Diospa llaqtanpi punta apaqkuna tantiarurqaku sunqumanta qusqanchik qullqichanchikwan Zoom nisqata rantinankupaq, chaynapi mana sasachakuspalla chaynintakama iñiqmasinchikkuna huñunakunankupaq. Kay tantiasqankuqa achka nacionkunapi iñiqmasinchikkunatam yanapachkan. Aswanraqmi wakcha iñiqmasinchikkunata yanapachkan. Wakin iñiqmasinchikkunam internetpi kaq mana qullqillapaq kaqkunawan huñunakuyta ruwachkarqaku. Ichaqa manam sumaqtaqa uyariqkuchu nitaq allintaqa qawanakuqkuchu. Chaymi Diospa llaqtanpi punta apaqkunapa Zoom nisqanta rantinankupaq tantiasqankuqa allin karqa. Chaymanmi achka runakuna yaykuyta atinmanku. Kunankamaqa achkallay-achka iñiqmasinchikkunam 170 masnin nacionkunapi chaywan huñunakuchkanku.

Indonesia nacionpa Manado llaqtanpi huñunakuq iñiqmasinchikkunam Zoom nisqawanña huñunakuyta qallaykurqaku. Hadi Santoso sutiyuq iñiqmasinchikmi nin: “Kaypi iñiqmasinchikkunaqa achka kutikamam internetman yaykuqku huñunakuyta uyarinankupaq. Zoom nisqawanmi ichaqa qallariyninmanta tukunankama huñunakuyta qawayta hinaspa uyariyta atinku”, nispa.

Ecuador nacionpa Guayaquil llaqtanpi huñunakuq Léster Jijón sutiyuq punta apaqmi nin: “Kaypi iñiqmasinchikkunaqa wakcham kallanku, chayraykum mana atinmankuchu karqa huñunakunankupaq Zoom nisqata sapa killa pagayta. Chaymi Diospa llaqtanpi punta apaqkunapa Zoom nisqata rantisqanku ancha allin. Kunanqa iñiqmasinchikkuna hinaspa bibliamanta yachaqkunapas mana sasachakuspallankum chayman yaykuyta atinku”, nispa.

Zambia nacionpa Lusaka llaqtachanpi huñunakuq Johnson Mwanza sutiyuq iñiqmasinchikmi nin: “Achka kutikamam iñiqmasinchikkunaqa niwarqaku: ‘Zoom nisqawan huñunakusqanchikmi iñiqmasinchikkunawan huk sunqulla kanapaq yanapawanchik. Qawachiwanchiktaqmi Jehova Diosninchik anchata kuyawasqanchiktapas’”, nispa.

Sasachakuy kaptin yanapakunapaq sapaqchasqa qullqiwanmi Zoom nisqata Diospa llaqtanpi punta apaqkuna rantirunku. Arí, qullqichanchiktaqa apachinchik internetpi donate.jw.org nisqantakamam. Anchatam agradecekuykiku qullqichaykichik qusqaykichikmanta. Chaywanmi ima sasachakuyña kaptinpas yanapakuchkanchik (2 Corintios 8:14).