Mosoqmanta naceyqa ¿salvakunapaqchu kanman?

“¿MOSOQMANTA nacerqankichu?”, nispa pipas tapusuptiki, ¿ima niwaqtaq? Millonninpi runakunam, arí ninmanku. Paykunataqa mosoqmanta naceyqa piensachinmi cheqap cristianokuna kasqankuta hinaspa salvasqa kasqankutapas. Piensankutaqmi wakin religioso runakuna hina, Robert Sproul religiosom nirqa: “Mosoqmanta mana naceqqa [. . .] manam ninmanchu cristiano kasqanmantaqa”, nispa.

¿Paykuna hinachu qampas piensanki? Chaynaqa munankichá aylluykikunawan amistadnikipas salvasqa kanankuta. Ichaqa puntatam yachananku mosoqmanta naceq runaqa, mana mosoqmanta naceq runawanqa mana chaynalla kasqankuta. Hinaptinqa, ¿kaykunamanta yachachiyta atiwaqchu?

Achka runakunam piensanku mosoqmanta naceq runaqa Diosta hinaspa Jesucristota servinankupaq entregakuspanku Diospa favornin chaskisqankuta. Huk diccionariopas mosoqmanta naceq cristianomantam nin: “Sonqonman Dios chayaruptinmi Jesusta chaskispan Diosman entregakun”, nispa.

Ichaqa, ¿yacharqankichu Biblia chaynata mana yachachisqanta? ¿Yachayta munankichu Bibliapa ima yachachisqanta? Kaymanta yachaynikiqa allinnikipaqmá kanqa. ¿Imanasqa? Kaykunamanta cheqaptapuni yachaynikiqa yanapasunkim kunan kawsakuynikipi chaynataq hamuq tiempopipas.

Bibliapa ima yachachisqanmanta

Mosoqmanta nacey niq palabraqa Bibliapim rikurin Juan 3:1-12, nisqa textokunallapi. Chaypim willawanchik religionniyoq Nicodemo runawan Jesuspa rimasqanmanta. Kallpanchaykikum qatiqnin paginapi Jesuspa Nicodemowan rimasqanta leenaykipaq.

Chay rimasqankunapim Jesusqa sumaqta entiendechin ‘mosoqmanta nacey’ ima ninan kasqanta.a Chaymantapas, Jesuspa nisqankunam yanapawasun kay pichqa tapukuykunata kutichinapaq:

◼ ¿Ancha allinchu mosoqmanta naceyqa?

◼ ¿Kikinchikmantachu kanman?

◼ ¿Imapaqtaq mosoqmanta nacena?

◼ ¿Imaynataq mosoqmanta naceyqa?

◼ ¿Imaynatam runapa vidanta cambian?

Sapakama tapukuykunamantayá yachasunchik.

[Willakuy]

[4 kaq paginapi dibujo hinaspa recuadro]

“Mosoqmantam nacenayki”

‘Nicodemo sutiyoq fariseom karqa judiokuna kamachikuq. Paymi tutallan Jesusman watukuq hamuspan nirqa: “Yachachikuq, yachanikum yachachiwanaykikupaq Dios kachamususqaykita, manam pipas atinmanchu qam hina kay milagrokuna ruraytaqa Dios paywan mana kaptinqa”, nispa. Jesusmi nirqa: “Cheqaptapunim niki, pipas mana mosoqmanta nacespaqa manam rikunqachu Diospa munaychakusqanta”, nispa. Chaymi Nicodemo tapurqa: “¿Imaynataq runaqa machuña kachkaspaqa mosoqmantaqa nacemunman? ¿Icha atinmanchu mamanpa wiksanman kutiykuspa kasqallan nacemuyta?”, nispa. Jesusñataqmi nirqa: “Cheqaptapunim niki, yakumantawan espiritumanta pipas mana naceqqa Diospa munaychakusqanmanqa manam yaykunmanchu. Runamanta nacemuqqa hina runallam, espiritumanta nacemuqñataqmi espirituña. Amayá admirakuychu ‘Mosoqmantam nacenayki’ nisqaywanqa. Wayraqa maylawmantapas wayramunmi chaymi uyarinki qaparisqanta, ichaqa manam yachankichu maymanta hamusqantapas nitaq mayman risqantapas, chaynam espiritumanta llapallan nacemuqkunaqa”, nispa. Chaymi Nicodemo mosoqmanta nirqa: “¿Imaynataq chaykunaqa kanman?”, nispa. Jesusñataqmi nirqa: “Qamqa kanki Israel casta runakuna yachachiqmi ¿hinachkaspachum kaykunata mana yachanki? Cheqaptapunim rimaniku yachasqaykumanta, willakunikuñataqmi rikusqaykumanta hinaptinmi qamkuna mana creenkichikchu nisqaykuta. Kay pachapi kaqkunallamanta niptiymi mana creenkichikchu, chaynaqa ¿imaynataq creewaqchik hanaq pachapi kaqkunamanta willaptiyqa?”’, nispa (Juan 3: 1-12).

Mosoqmanta naceyqa ¿ancha allinchu kanman?

NICODEMOWAN rimasqanpim Jesusqa qawachirqa mosoqmanta naceyqa ancha allin kasqanta. ¿Imaynata?

Jesusmi nirqa: “Pipas mana mosoqmanta nacespaqa manam rikunqachu Diospa munaychakusqanta”, nispa (Juan 3:3). Chaynata nispanmi Jesusqa nichkarqa mosoqmanta naceyqa ancha allinpuni kasqanta. Imaynam pipas ninman: “Inti mana kaptinqa, manam kay Pachapi achkiqa kanmanchu”, nispa. Chayna kaqllatam Jesuspas nichkarqa mosoqmanta mana naceqqa manam “Diospa munaychakusqanta” rikunqachu nispa.

Chaymantapas Jesusqa ninraqtaqmi “Mosoqmantam nacenayki”, nispa (Juan 3:7). Hinaptinqa, rimasqankunaqa sutillatam qawachichkarqa ‘Diospa munaychakusqanman’ yaykunapaq mosoqmanta naceyqa allinpuni kasqanta (Juan 3:5).

Señorninchik Jesucristopaq mosoqmanta nacey ancha allin kaptinqa, llapallanchikmi seguro kananchik imapaq mosoqmanta nacey kasqanta. Hinaptinqa, ¿mosoqmanta naceytaqa kikinchikchu tanteakunanchik?

[5 kaq paginapi suti rikuylla kaq willakuy]

“Inti mana kaptinqa, manam kay Pachapi achkiqa kanmanchu”

Mosoqmanta naceytaqa ¿kikinchikchu tanteakunanchik?

¿PIMANTATAQ kanman mosoqmanta naceyqa? Jesusmi nirqa: “Mosoqmantam nacenayki”, nispa. Chayta leespankum wakin religiosokunaqa runankunata hikutanku mosoqmanta nacenankupaq (Juan 3:7). Paykunaqa Jesuspas kamachichkanman hinam kaynata leenku: “¡Mosoqmanta naceychik!”, nispanku. Chaymi yachachinku sapa cristiano Jesuspa kamachisqanta kikinkumanta kasukuspanku mosoqmanta nacenankupaq. Nisqankuman hinaqa mosoqmanta naceytaqa sapakamam tanteakunanku. Kay nisqankuqa, ¿tupanchu Nicodemoman Jesuspa nisqanwan?

Kaymanta astawan yachaspaqa musyakusunmi mosoqmanta nacenapaq Jesuspa rimasqanqa mana kikinchikmanta kasqanta. ¿Imanasqataq chaynata ninchikmam? Griego rimaypi ‘mosoqmanta nacenapaq’ Jesuspa rimasqanqa tikrakunmantaqmi “hanaymanta nacemuq”, nispapas (Juan 3:3).a Chayraykum nichwan mosoqmanta naceyqa “hanaymanta” otaq ‘Diosmanta’ kasqanta (Juan 19:11; Santiago 1:17). Chaynaqa Diosmantam mosoqmanta naceyqa, manam ñoqanchikmantachu (1 Juan 3:9).

Kaykunawanmi nichwan mosoqmanta naceyqa mana kikillanchikmanta kasqanta. Kayta allinta entiendenapaqqa tupachisunchik manaraq naceq wawawan. Manaraq naceq wawaqa, ¿kikinmantachu tanteanman rikurinanpaq hinaspa nacenanpaqpas? Manamá. Llapallanchikmi rikurirqanchik tayta-mamanchik munasqankurayku. Chaynallataqmi ñoqanchikpas mosoqmantaqa nacechwan unanchaqninchik Dios munaptillan (Juan 1:13). Chaymi Apostol Pablo nirqa: “Dios Taytatayá alabasunchik. Señorninchik Jesucristopa Taytan Diosmi hatun kuyapayakuyninman hina mosoqmanta nacechiwarqanchik”, nispa (1 Pedro 1:3).

¿Kamachikuychu karqa?

Wakinkuqa ninmankum: “Mosoqmanta nacey mana ñoqanchikmanta kachkaptinqa, ¿imanasqataq Jesusqa nirqa: ‘Mosoqmantam nacenayki’, nispaqa?” Chayna tapukuyqa allinmi. Jesuspa rimasqan kamachikuy kaptinqa, Jesusqa mañawachkanchikmanchá mana ruray atinanchikta, chaytaqa manamá ruranmanchu. Hinaptinqa imaynatam chayta entiendenanchik?

Sichu Griego rimaypi Jesuspa rimasqanta leespanchikqa musyasunmi rimasqanqa mana kamachikuy kasqanta, aswanmi willaylla-willachkarqa. Hinaptinqa, ‘mosoqmantam nacenayki’, nispanqa Jesusqa manam kamachichkarqachu. Chaymi Jesuspa nisqantaqa wakin Bibliakuna kaynata tikranku: “Allinmi kanman mosoqmanta naceyqa”, nispa (Juan 3:7, Reina-Valera, 1960).

Kaymanta aswan allinta entiendenapaq kaypi piensarisunchik. Huk tayta-mamapa uywakusqan wakcha warmacham yuyayniyoqña kaspan, chay familiamanta herenciata chaskiyta munan. Hinaptinmi uywaqnin familiaqa payta nin herenciata chaskinanpaq ima rurananmanta pitapas tapurikunanpaq. Chaymi abogadota tapukuptin, abogadoñataq kaynata nin: “Churinmi kanayki”, nispa. Chaynata nispanqa manamá nichkanchu “¡Churin kay!” nispaqa. Astawanmi nichkan herenciata chaskinanpaq ima rurananmanta. Chayna kaqllatam Jesuspas nichkarqa. Payqa niyllam-nichkarqa ‘Diospa munaychakuyninman’ yaykunapaq ima ruranamanta.

Chaynaqa, ¿imapitaq ‘Diospa Munaychakuyninqa’ tupan mosoqmanta naceywanqa? Chayta entiendenapaqqa kay tapukuytam kutichinanchik: ¿imapaqtaq mosoqmanta nacena? Kaytam qatiqnin yachachikuypi qawasunchik.

[Willakuy]

[6 kaq paginapi dibujo]

¿Imapim tupan wawapa nacesqan ‘mosoqmanta naceywanqa’?

Mosoqmanta naceyqa ¿imapaqtaq?

ACHKA runakunam ninku, salvacionta chaskinapaqqa mosoqmantam nacena nispa. Ichaqa, ¿yuyachkankichu imapaqmi mosoqmanta nacena? Jesusmi nirqa: “Cheqaptapunim niki, pipas mana mosoqmanta nacespaqa manam rikunqachu Diospa munaychakusqanta”, nispa (Juan 3:3). Hinaptinqa Jesusqa manam salvakunapaqchu nichkarqa, aswanmi nirqa Diospa munaychakuyninman yaykunapaq. Chaynaqa, ¿manachu Diospa munaychakuyninman yaykuyqa salvakuywan tupan? Manamá. Chayta allinta yachaykunapaqqa, puntata rimasunchik “Diospa munaychakuynin”, ima kasqanmanta.

Munaychakuyqa gobierno ninanmi, chaymi ‘Diospa munaychakuyninmanta’ nispaqa, rimachkanchik Diospa churasqan gobiernomanta. Bibliapa nisqanman hinaqa, Jesucristom chay gobiernopa kamachiqnin Reyqa, kachkantaqmi kamachiqmasinkunapas (Daniel 7:1, 13, 14; Mateo 26:63, 64). Apostol Juanpa revelacionpi rikusqanman hinam Jesucristopa kamachiqmasinkunaqa kanku “llapallan llaqtakunamanta, tukuy idioma rimaqkunamanta, ayllukunamanta hinaspa nacionkunamanta”, hinaspam ‘kay pachata gobiernanqaku’ (Apocalipsis 5:9, 10; 20:6). Bibliaqa nintaqmi kay gobiernaqkuna aslla kasqankumanta, paykunaqa kanku “kay pachamanta rantisqa” 144.000 runakunallam (Lucas 12:32; Apocalipsis 14:1, 3).

Hinaptinqa, ¿maypitaq kachkan Diospa Munaychakuyninqa? Wakin Bibliakunapim ‘Diospa munaychakuyninta’, ninku “hanaq pachapi gobierno”, nispa. Kaymi qawachiwanchik chay gobiernoqa hanaq pachapi kasqanta (Lucas 8:10; Mateo 13:11, NM). Hinaptinqa, Diospa Munaychakuyninqa hanaq pachamanta gobiernom, chaypim kachkanku Jesucristowan kay pachamanta akllasqa qatiqninkunapas.

Hinaptinqa, ¿imatam Jesusqa nichkarqa mosoqmantam nacenayki Diospa Munaychakuyninman yaykunaykipaq nispaqa? Nichkarqam hanaq pachapi Jesuswan kamachinapaq mosoqmanta nacenamanta. Chaynaqa, mosoqmanta naceyqa hanaq pachamanta aslla runakuna kamachimunankupaqmi.

Kunankamaqa yacharunchikmi mosoqmanta naceyqa ancha allin kasqanta, chaymantapas Diosmi chaytaqa tantean, hinaspapas hanaq pachamanta kamachimunankupaqmi. Qatiqninpim qawasunchik mosoqmanta naceyqa imayna kasqanta.

[7 kaq paginapi suti rikuylla kaq willakuy]

Mosoqmanta naceyqa hanaq pachamanta aslla runakuna kamachimunankupaqmi

[7 kaq paginapi dibujo]

Diospa munaychakuyninpi kamachiqkunaqa kanku Jesucristowan kay pachamanta akllasqa qatiqninkunam

Mosoqmanta naceyqa ¿imaynataq?

NICODEMOWAN Jesus rimaspanqa, manam mosoqmanta nacey ancha allin kasqallanmantachu, pi tanteasqallanmantachu nitaq imapaq kasqallanmantachu rimarqa. Nirqataqmi imayna chay kasqanmantapas. Paymi nirqa: “Yakumantawan Espiritumanta pipas mana naceqqa Diospa munaychakusqanmanqa manam yaykunmanchu”, nispa (Juan 3:5). Chaynaqa, yakumantawan espiritumantam mosoqmantaqa nacena. ¿Imaynataq chayqa?

¿Ima ninantaq ‘yakumantawan espiritumanta’, nisqanqa?

Nicodemoqa Diospa palabranmanta allin yachaq runam karqa. Chaymi payqa hebreo rimaypi ‘Diospa espiritun’, nisqa rimaytaqa entienderqa Diospa atiynin kasqanta, chay atiytam Diosqa serviqninkunaman qon munayninta ruranankupaq (Genesis 41:38; Exodo 31:3; 1 Samuel 10:6). Chaymi ‘espiritumanta’ Jesuspa rimasqanta Nicodemo uyarispanqa, yacharqaña Diospa kallpanmanta otaq chuya espiritunmanta rimasqanta.

¿Ima nichwantaq yakumanta rimasqanmantaqa? Kaymanta allinta yachanapaqqa musyarinanchikmi kay textopa ñawpaqninkunapiwan qepankunapi ima nisqanta. Chaypim willakun Bautizaq Juan hinaspa Jesuspa qatiqninkunapas yakupi bautizasqankumanta (Juan 1:19, 31; 3:22; 4:1-3). Kay bautizakuyqa Jerusalenpiqa ancha reqsisqam karqa, chaymi Nicodemoqa yacharqa Jesuspa rimasqan yakuqa, yakupi bautizakuy kasqanta.a

‘Chuya espirituwan bautizakuymanta’

Yakumanta nacey, yakupi bautizakuy kaptinqa, ¿ima ninantaq ‘espiritumanta’ naceyqa? Manaraq Jesus Nicodemowan rimachkaptinmi Bautizaq Juanqa rimarqaña chuya espirituwan bautizakuypas ancha allin kasqanmanta. Nirqam: ‘Ñoqaqa yakullawanmi bautizarqaykichik, [Jesusmi] ichaqa chuya espirituwan bautizasunkichik’, nispa (Marcos 1:7, 8). Marcosmi chayna bautizakuy chayllaraq qallarisqanmanta kaynata nirqa: ‘Chay punchawkunapim Jesus lloqsirqa Galilea lawpi Nazaret llaqtamanta hinaptinmi Jesusta Juan bautizarqa Jordan Mayupi. Yakumanta lloqsimuchkaspanmi Jesus qonqayta rikururqa hanaq pacha kicharikuchkaqta hinaspa Diospa espiritunta paloma hina payman uraykamuchkaqta’, nispa (Marcos 1:9, 10). Jordan mayupi lliw cuerponta chinkaykachispanmi Jesusqa yakupi bautizakurqa. Hanaq pachamanta espirituta chaskispanñataqmi, chuya espirituwan bautizakurqa.

Bautizakusqanmanta yaqa kimsa wata pasaruptinmi Jesusqa qatiqninkunata nirqa: ‘Kaykay punchawmi chuya espirituwan Dios bautizasunkichik’, nispa (Hechos 1:5). ¿Haykapitaq kay rimasqanqa cumplikurqa?

Chayqa cumplikurqa wañukusqan qepa Pentecostes 33 watapim. Jesuspa 120 qatiqninkuna Jerusalenpi huñunasqa kachkaptinkum, ‘qonqayllamanta cielomanta qapariyllawanña wayra hina hamuqta uyarirurqaku, chaymi tiyasqanku wasitapas qapariyninwan huntariykurqa. Hinaptinmi sapakamapaq nina hina lenguachkaq [. . .] rikuriramurqa’. Chaymi ‘llapallankuman chuya espiritu huntaykurqa’ (Hechos 2:1-4). Chay punchawllapim apostol Pedro runakunata yakupi bautizakunankupaq nirqa: ‘Huchaykichikmanta wanakuspaykichik Jesucristopa sutinpi bautizachikuychik Dios pampachasunaykichikpaq, chaynapim chuya espiritutapas qosunkichik’, nispa. ¿Imatataq runakunaqa rurarqaku? “Kasukuqkunam bautizachikurqaku”, hinaspam ‘iñiqkunaman chay punchaw yapakurqaku yaqa kimsa waranqa runakuna’ (Hechos 2:38, 41).

Yakumantawan chuya espiritumantam nacenanku

Kayna bautizakuykuna, ¿imatam yachachiwanchik mosoq naceymanta? Yachachiwanchikmi yakumantawan chuya espiritumanta nacena kasqanta. Jesuspas puntatam yakupi bautizakurqa hinaspañataq chuya espirituta chaskirqa. Chaynataqmi karqa punta qatiqninkunawanpas: Bautizaq Juanmi wakinkuta yakupi bautizarqa, hinaptinmi chuya espirituta chaskirqaku (Juan 1:26-36). Chaynallataqmi karqa 3.000 mosoq qatiqninkunawanpas, puntatam yakupi bautizakurqaku chuya espirituta chaskinankupaq.

Chay Pentecostes punchawpi pasakusqanmanta piensaspa, ¿imaynataq kanman kunan tiemponchikpi mosoqmanta naceyqa? Jesuspa apostolninkunapa chaynataq wakin qatiqninkunapa hinam. Puntataqa pipas huchanmantam wanakunan, mana allin kawsasqantam saqenan, Diosta servinanpaqmi entregakunan hinaspam yakupi bautizakunan. Chaymantapas chay cristianota Jehová Dios hanaq pachapi kamachinanpaq akllaruptinmi, chayllaraq chuya espirituwan bautizasqa kanman. Yakupi bautizakunanpaqqa kikin runam tanteakun, chuya espirituwan bautizasqa kananpaqñataq Jehová Dios. Yakuwan hinaspa chuya espirituwan bautizakuqkunallam ninmanku mosoqmanta nacesqankuta.

Hinaptinqa, ¿imanasqataq Jesusqa ‘yakumantawan espiritumantam’ nacena nirqa? Chaytaqa nirqa pipas yakuwan hinaspa espirituwan bautizakuqkunaqa, vidankupi cambianankumanta qawachinanpaqmi. Qatiqninpim astawan kaymanta yachasunchik.

[Willakuy]

[9 kaq paginapi dibujo]

Juanmi huchankumanta wanakuq israelitakunata bautizarqa

Mosoqmanta naceyqa ¿imaynatam runapa vidanta cambian?

¿IMANASQATAQ Jesusqa ‘espiritumanta naceyta’ tupachirqa chuya espirituwan bautizakuywan? (Juan 3:5.) Naceymanta rimayqa piensachiwanchikmi chayllaraq imapas “qallarisqanmanta”. Chaynallataqmi “mosoqmanta nacey” rimayqa tupan qallariywan. Chaynam chuya espirituwan bautizasqa kaqkunapas Jehová Dioswan sapaq amistadta chayllaraq qallarinku. Chaynaqa, ¿imaynataq chay sapaq amistadqa qallarin?

Apostol Pablom kayta tupachirqa pitapas uywanapaq churichakuywan. Wakin runakunata hanaq pachapi kamachimunankupaq Jehová Dios imayna akllasqanmanta rimaspanmi nirqa, ‘churinkunata hina Dios chaskisqanta’, chaymi paykunaqa Diospa ‘churinkuna’ hinaña rikurinku (Galatas 4:5; Hebreos 12:7). Kay tupachikuymi yanapawanchik chuya espirituwan bautizakuq runa Dioswan imayna kasqanmanta. Chayta allinta entiendenapaq yuyarisunchik rimasqanchik wakcha warmamanta, paymi uywasqan familiamanta herenciata chaskiyta munarqa.

Diospa churin kayqa vidatam cambian

Rimasqanchik wakcha warmam, uywaqnin familiamanta mana herenciata chaskiyta atirqachu mana churinpuni kasqanrayku. Ichaqa, ¿imaynataq tarikunman uywaqnin familia apellidonta qospan warmapa partidanta horqoruptin? Hina chay warmalla kaspanpas kunanqa atinmanñam uywaqnin familiapa wakin churinkuna hina herencia chaskiytaqa. Chaymantapas herenciata chaskinanpaqqa autoridadkunapa nisqanman hinam mosoq partidata uywaqnin familiapa apellidonwan horqonan karqa, ichaqa manayá kikillanmantaqa atinmanchu karqa.

Chayna kaqllataqmi pasan mosoqmanta naceq runawanpas. Hanaq pachapi Diospa gobiernonpi kamachinanpaqqa mosoq partidata horqochkanmanpas hinam mosoqmanta nacenan. Ichaqa manamá pipas kikillanmantaqa chaytaqa atinmanchu, Jehová Dioslla mosoqmanta nacenanpaq akllaq kasqanrayku.

Hinaptinqa, ¿imataq warmapa vidanpi cambiarun? Imayna kasqan hinalla kaptinpas runapa churinñam rikurirun. Arí, uywaqnin tayta, warmapa partidanta horqoruptinqa chay warmaqa mosoqmanta nacechkaq hinam churinpiña rikurirun. Chayraykum warmaqa churinña kaspan derechonpi kachkan uywaqnin familiamanta herenciata chaskinanpaq.

Chaynatam Jehová Diospas kay pachamanta huchayoq runakunata akllarun churinkunaña kanankupaq. Apostol Pablom chayna suyakuyniyoq-masinkunaman kaynata nirqa: ‘Chuya espiritutaqa chaskirqankichik [. . .] Diospa churinña kanaykichikpaqmi chaymi Diosta ninchik: “Taytalláy” nispa. Hina chuya espiritutaqmi sonqonchikpi willawaspanchik Diospa churinña kasqanchikta yachachiwanchik’, nispa (Romanos 8:15, 16). Chayna kaspankum chay cristianokunaqa Diospa kuyasqan ‘churinkunaña’ rikurirunku hinaspam hanaq pachapi angelkunawan huk sonqolla kanku (1 Juan 3:1; 2 Corintios 6:18).

Chay cristianokuna chayna kaptinkupas, kay pachapi kaspankuqa pantaq runakunaraqmi karqaku (1 Juan 1:8). Ichaqa apostol Pablopa nisqanman hinam Diospa churinña rikuriruptinku vidankuqa cambiarun. Chuya espiritupas allintapunim yachachin paykuna hanaq pachapi Jesucristowan kuska kanankumanta (1 Juan 3:2). Chayna tarikusqankuwanmi hanaq pachaman rinankupaq suyakuyniyoq kanku (2 Corintios 1:21, 22). Huk rimaypiqa mosoqmantam nacenku.

Bibliaqa niwanchikmi hanaq pachaman riqkunaqa ‘Diospa hinaspa Cristopa sacerdotenkuna’ kanankumanta hinaspa Cristowan kuska waranqa wata kamachimunankumantapas (Apocalipsis 20:6). Arí, Jesucristo hinam Diospa Munaychakuyninpi kamachinqaku. Apostol Pedropas hanaq pachapi chaskinanku waqaychasqa herenciankumantam kaynata nirqa: “Chayqa manam tukunqachu nitaqmi qachachakunqachu, manataqmi waytakuna hinaqa chakinqachu”, nispa (1 Pedro 1:3, 4). ¡Mayna kusikunapaqchá chayqa!

Ichaqa kanraqtaqmi kay tapukuypas: ¿pikunatataq kay mosoqmanta naceq cristianokunaqa hanaq pachamanta kamachimunqaku? Qatiqnin yachachikuypim kaymanta rimachkasunchik.

[10 kaq paginapi dibujo]

¿Imatam apostol Pablo nirqa Diospa churinña kaymanta?