¿Imataq Juicio punchaw?

¿IMAYNATAQ kanman qampaq Juicio punchaw? Achka runakunam ninku achka wara-waranqantin almakuna huk hukllamanta Diospa trononpa qayllanpi juzgasqa kanankuta. Ninkutaqmi wakinkuna hanaq pachapi kusisqa kawsanankupaq akllasqa kanankuta, wakinkunañataq ñakasqa kaspanku wiñaypaq ñakarinankutapas. Bibliaqa yachachinmi Juicio Punchawqa mana puraminti manchakunapaq kasqanta, aswanqa suma-sumaq suyakuypaq chaynataq tukuy mana allinkunapas allichakunanpaq kasqanta.

Apocalipsis 20:11, 12 nisqapim apostol Juan Juicio Punchawmanta kaynata qellqarqa: “Hinaptinmi rikurqani huk hatu-hatun yuraq tiyanata, rikurqanitaqmi hawanpi tiyaqtapas. Paypa ñawpaqninmantam cielopiwan kay pacha chinkarurqa hinaptinmi mana karqachu maypas paykunapa kananpaq. Chaymantam rikurqani hatunpas, taksapas ñawpaq wañuqkunata, paykunaqa hatun tiyanapa qayllanpim sayachkasqaku hinaptinmi librokuna kichasqa karqa. Wiñay kawsay libropas kichasqa kaptinmi wañuqkuna juzgasqa karqa rurasqankuman hina hinaspa librokunapi qellqasqaman hina”, nispa. ¿Pitaq chay tiyanapi tiyaq Juezqa?

Jehová Diosmi tukuy kay pachapi kaq runakunapa Juezninqa. Ichaqa hukpa makinpim juzgaynintaqa saqerqa. Hechos 17:31 nisqapim apostol Pablo nirqa: “Diosmi akllarun huk runata, paymi akllasqan punchawpi allin arregloman hina kay pachata juzganqa”, nispa. Chay akllasqa Juezqa kawsarimuq Jesucristom (Juan 5:22). ¿Haykapitaq Juicio Punchaw qallarinqa, haykapikamataq kanqa?

Apocalipsis sutichasqa librom willakun Armagedon sutichasqa Diospa guerran qepata Juicio Punchaw qallarinanta, chaynapim kay pachapi Satanaspa munaychakusqanwan tukunqa (Apocalipsis 16:14, 16; 19:19–20:3).a Armagedon qepatam Satanasqa demoniontinkunawan waranqa watapaq uku pozoman otaq uku pachaman wischusqa kanqaku. Chay waranqa watantinmi 144.000 sapaqchasqakuna mosoq pachapi kaq runakunata juzganqaku hinaspam ‘waranqa wata Cristowan gobiernanqaku’ (Apocalipsis 14:1-3; 20:1-4; Romanos 8:17). Chaynaqa manam huk punchawllachu chay Juicio Punchawqa kanqa aswanqa waranqa watapunim kanqa.

Chay waranqa watantinpim Jesucristo ‘wañuqkunatapas hinaspa kawsaqkunatas juzganqa’ (2 Timoteo 4:1). Kay ‘kawsaqkunamanta’ willaspanqa Armagedon guerrapi wañuymanta kawsaq ‘achkallaña’ runakunamantam rimachkan (Apocalipsis 7:9-17). Apostol Juanqa rikurqataqmi ‘wañuqkuna [. . .] hatun tiyanapa qayllanpi sayachkaqta’ juzgasqa kanankupaq. Jesuspa prometesqanman hinam “Diospa Churinpa qayasqanta uyarispanku llapallan wañuqkuna [sepulturapi kaqkuna] kawsarimunqaku” (Juan 5:28, 29; Hechos 24:15). ¿Imamantam juzgasqa kanqaku?

Apostol Juanpa revelacionninpi qawasqanpim ‘librokunata kichakurqa’ hinaspam “wañuqkuna juzgasqa karqa rurasqankuman hina hinaspa librokunapi qellqasqaman hina”. ¿Runakunapa ñawpaq kawsasqankupi rurasqankunachu kay librokunapi qellqasqa kachkan? Manam. Manaraq wañukuspa tukuy rurasqankuman hinachuqaya juzgasqaqa kanqaku. ¿Imaynanpitaq chaynata ninchik? Bibliam niwanchik pipas “wañukuspaqa huchapa kamachikusqanmantam librakurunña”, nispa (Romanos 6:7). Kawsarimuqkunaqa huchankumanta pampachasqañam kawsarimunqaku. Chaynaqa chay librokunaqa Diospa mosoq kamachikuyninkunam. Kawsarimuqkunapas Armagedonpi wañuymanta kawsaqkunapas Diospa kamachikuyninkunatam kasukunanku wiñaypaq kawsayta munaspankuqa. Waranqa watantinpaq kaq mosoq kamachikuyninkunatapas kasukunankum. Chaynapim sapakama juzgasqa kanqa chay Juicio Punchaw tiempopi rurasqankuman hina.

Achka wara-waranqantin runakunam Juicio Punchawpiqa chayraq yachanqaku imam Diospa munaynin kasqanta chaynataq chayman hina kawsakuytapas. Chaypaqqa enteron pachapim Diospa munayninmanta yachachikunqa. Cheqappunim, “allinkuna ruraytam yachanqaku kay pachapi yachaqkunaqa” (Isaias 26:9). Ichaqa, manam lliw runakunachu Diospa munaynin ruraytaqa munanqaku. Isaias 26:10 nisqam nin: “Mana allin ruraq runakunata llakipayaptikipas paykunaqa manam yachanqakuchu allin ruraytapas. Honrado runakunapa nacionninpipas hina mana allin runakunallam kanqakupas. Manam cuentata qokunkuchu ancha atiyniyoq kasqaykimantapas”, nispa. Chayna clase runakunam Juicio Punchaw tiempopiqa wiñaypaq puchukanqaku (Isaias 65:20).

Juicio Punchaw tukuytam chaypi kaq runakunaqa chayraq cheqaptapuniqa ‘kawsanqaku’ chuyaña kasqankurayku (Apocalipsis 20:5). Chaynaqa, Juicio Punchaw tiempopim runakunaqa qallariypi kasqanman hina pisi-pisillamanta chuyay-chuyay kasqankuman kutiykunqaku (1 Corintios 15:24-28). Waranqa wata tukuytataq hatu-hatun prueba kanqa. Satanasmi preso kayninmanta kacharisqa kanqa huktawanraq runakunata pruebananpaq (Apocalipsis 20:3, 7-10). Satanasta qepanchaq runakunam qawanqaku imaynam Salmo 37:29 nisqapi kay sumaq promesa cumplikusqanta: “Allin ruraq runakunam allpataqa dueñoyanqaku. Paykunaqa chaypimiki wiñaypaqraq kawsakunqaku”, nispa. Cheqappunimá Juicio Punchawqa Diosman llapallan sonqo kaq runakunapaq sumaq bendicionkunata apamunqa.