¿Imaynatam tukuy rurasqayki allinta lloqsinman?

TUKUY rurasqaykim allin lloqsinqa. ¡Ima sumaqmi chay uyariyqa! Llamkaypi ñawpariqkunaqa kallpanchakunkum apu kanankupaq chaynataq ancha reqsisqa kanankupaqpas. Arí, chayna kaytaqa achkam munanku, ichaqa manam lliwchu haypayta atinku.

Tukuy rurasqanchik allin lloqsinanpaqqa kaykunatam rurana: ima ruray munasqanchiktam allinta akllana, allintapunim tiemponchiktawan kallpanchikta servichikuna hinaspa imatapas tantearispam rurana.

Achka cristianokunam predicaspanku ancha kusikuyta tarinku. Arí, chaynam tarikunku mozo-sipaskunawan yuyaqkunapas tukuy tiemponkuwan predicaspanku. Wakinkuqa predicaytam aminapaq hina qawanku hinaspam huk ruraykunataraq haypayta munaspanku predicayta saqenku. ¿Imanasqam chayna kanku? ¿Imatam mozo-sipas rurawaq allin kaqta mana saqenaykipaq? ¿Imatam rurawaq ‘tukuy rurasqayki allin kananpaq’? (Jos. 1:8.)

Estudiasqayki hora pasayta huk ruraykuna

Mozo-sipas cristianokunaqa manam imawanpas harkachikunankuchu Dios serviyninkutaqa. ¿Chaynatachu rurachkanki? Chayna kaptinqa alabaykikum, imapas rurasqaykiqa allinpim tukunqa.

Wakinkum ichaqa estudiasqanku hora pasayta huk ruraykunaman qokunku, chaytaqa ruranku estudiasqanku lawpi otaq huk lawkunapipas. Rurasqanku mana hucha kaptinpas tapukunankum: “¿Hayka tiempotam qechuwan? ¿Pikunawan, maypi hinaspa imakuna ruranaypaqmi tanqawanman? ¿Chay rurayllatañachu munachkani?”, nispa. Pipas munasqallanmanña qokuruspanqa Diosta servinanpaqqa manam tiemponpas nitaq kallpanpas kanmanñachu. Chaymi yachananchikpuni ima ruray aswan allin kasqanta (Efe. 5:15-17).

Victorpaa rurasqanpi piensasun, paymi nin: “12 wataypi kachkaspaymi pelota laqyaypi pukllaqkunaman hukllawakururqani. Achka kutitam premiokunata chaskirqani hinaspam ancha reqsisqa karqani”, nispa. Ichaqa musyakururqam iñiyninpi hukmanyasqanta. Wakinpiqa Bibliata leespanmi puñuywan aysachikuq. Chaymantapas manañam kusikuywanñachu predicarqa. Nintaqmi: “Pukllasqaymi mana kallpayoqtaña saqewaq, chaymi Dios serviyniypi chiryachkarqani. Musyakurqanim mana tukuy sonqoywan servisqayta”, nispa.

¿Rinaykichu universidadman?

Bibliaqa sutillam nin cristianoqa familianta mantienenanmanta (1 Tim. 5:8). Ichaqa ¿Universidadmanraqchu rinayki chay kamachikuyta kasukunaykipaq?

Allintam tanteanayki universidadman yaykuptiki Dioswan amistadniki imayna kananmanta. Bibliapi kaq huk willakuymi chaypaqqa allinta yanapasunki.

Diosta servisqanpim Barucpa huk sumaq llamkaynin karqa: Jeremiastam yanaparqa. Ichaqa tiempopa risqanman hinam chay llamkayninta manaña chanincharqachu hinaspa kikillanpaq munaq runaña rikurirurqa. Jehová Diosmi imayna kasqanta qawarqa, hinaspam Jeremiasnintakama kaynata nirqa: “¿Kikikipaqchum maskachkanki admirakuypaq kaqkunata? Chaykunataqa amañayá maskaychu”, nispa (Jer. 45:5).

¿Ima ‘admirakuypaq kaqkunatam’ maskachkarqa? Ichapas ancha reqsisqa kayta munarqa. Otaq ancha kapuqniyoq kayta munarqa. Imayna kaptinpas qonqarurqam Dios serviypi allin kaq rurayta (Fili. 1:10). Payqa Diospa nisqantam kasukurqa chaymi Jerusalen puchukachisqa kaptin kawsarqa (Jer. 43:6).

¿Imatam yachanchik Barucman Diospa ima nisqanmanta? Yuyarisun, Barucqa admirakuypaq kaqkunatam maskachkarqa. Chaymi tapukuwaq: “Imapipas llamkayta yachaspayqa, ¿educakuspay qollqeyta, kallpayta hinaspa tiempoyta servichikunayraqchu? ¿Aylluykunapa, tayta-mamaypa hinaspa ñoqapa munasqayta haypanallaypaqchu educakunay?”, nispa.

Kunanñataq Gregoriomanta rimasun, payqa computadoramanta allinta yachaqmi. Llamkaqmasinkunam hikutarurqa computadoramanta astawanraq yachananpaq. Musyakuruptinqa manañam tiempon karqachu Dios serviypi rurayninkunapaq. Paymi nin: “Mana tiempoyoqllañam tarikurqani. Concienciaymi hukmanyachiwarqa Dios serviypi ruray munasqaykunata mana haypaptiy”, nispa.

Llamkayman qokuqkuna

Bibliam llamkaqkunatawan patronkunata kallpanchan allin llamkaq kanankupaq. Chaychá apostol Pabloqa kaynata qellqarqa: “Tukuy ima rurasqaykichiktaqa ruraychik Señorninchikpaq rurachkaq hinayá”, nispa (Col. 3:22, 23). Ichaqa allin llamkaq kaymantapas, Dioswan amistad kaymi aswan allinqa (Ecl. 12:13). Llamkayllamanña qokuruspanchikqa Dios serviyninchiktam qepapi saqeruchwan.

Chaymantapas pisipasqallañam tarikuchwan congregacionpi rurayninchikkunatawan familianchikta qawanapaqpas. Salomonmi nirqa llumpay llamkayman qokuruyqa ‘wayrata hapirunapaq qatikachachkaq runa’ hina kanamanta. Chayna kaq cristianoqa llumpay pisipasqam tarikun. Hinaptinqa manach llamkayninmanta kusikuytaqa tarinqachu (Ecl. 3:12, 13; 4:6). Aswanraqmi kallpanpas pisinqa familianmanta nanachikunanpaq hinaspa Dios serviypi rurayninkunapaqpas.

Europa lawmanta Danielmi, plantakuna rantikuyman qokururqa. Paymi kaynata yuyarin: “Runakunam admirawaq cumpleq hinaspa imatapas tantearispa ruraq kasqayrayku, ichaqa iñiyniypim chiryarurqani. Puntataqa predicaytam saqerurqani, chaymantañataq huñunakuykunaman riytapas. Ancianokuna rimapayawaptinpas manam kasukurqanichu hatun tukuqña kasqayrayku. Chaymi congregacionmanta karunchakururqani”, nispa.

Ima rurasqaykipas allinpim tukunqa

Qawarunchikñam kimsa ruraykuna iñiyninchikta yanqacharunanmanta. ¿Musyankichu mayqan sasachasusqaykita? Chayna kaptinqa kallpanchaykikum qatiqninpi textokunata, tapukuykunata hinaspa willakuykunata leenaykipaq, chaykunam yanapasunki sichum imapas rurasqayki allinpi tukunanmanta.

Estudiasqayki hora pasayta huk ruraykuna: ¿Chaykunamanchu qokurunki? ¿Diosta servisqayki tiempotachu chaykunamanña qorunki? ¿Manañachu iñiqmasinchikkunawan kayta munanki? Chayna kaptinqa allinmi kanman rey Davidta qatipakuyniki, paymi Diosta kaynata mañakurqa: “Imaynam kawsanayta yachaykachillaway”, nispa (Sal. 143:8).

¿Imam pasarqa ñawpaqpi rimasqanchik Victorta? Congregacionta watukuq ancianom nirqa: “Sonqoykimantaraqmi rimanki pelota laqyaymantaqa ¿aw?”, nispa. Victormi nin: “Chayna niwasqanmi llumpayta piensarachiwarqa. Chayman llumpayta qokurusqaytam musyakurqani. Pukllaqmasiykunamantam chaylla karunchakururqani hinaspam congregacionpi amistadkunataña maskarqani”, nispa. Kunanqa kusikuywanñam Diosta servin, hinaspam kaynata nin: “Tapukuy amistadnikikunata, tayta-mamaykita otaq ancianokunata sichu pukllaykunarayku otaq huk ruraykunarayku Diosmanta karunchakusqaykita”, nispa.

¿Imanasqataq congregacionnikipi ancianokunata ninkichu iñiqmasikikunata imapipas yanapay munasqaykita? ¿Manachu yuyaq iñiqmasinchikkunata yanapawaq rantipamuypi otaq wasinpi ima ruraypipas? Atiwaqtaqmi mozo-sipas kasqaykipi tukuy tiempoykiwan Diosta serviyta chaynapi runakunaman allin noticiata apanaykipaq.

Universidadman rinamanta: Jesusmi nirqa “kikin alabasqa” kayta munaqqa pantaypim kachkan nispa (Juan 7:18). Hinalla educakunaykipaq manaraq tanteachkaspaykim kayta yuyarinayki: Diosmi suyan imam ‘allin kaqkunata reqsinaykita’ (Fili. 1:9, 10). ¿Chaynatachu rurarqanki?

Computadoramanta allinta yachaq rimamusqanchik Gregoriom willakun ima rurasqanmanta, ninmi: “Ancianokunapa nisqantam kasukurqani hinaspam tukuy imayoq kay munasqayta saqerurqani. Entienderqanim yanqapaq astawan educakuy munasqaytaqa. Chaywanqa tiempoytawan kallpaytach usuchiyman karqa”, nispa. Chaymantapacham payqa kusikuywan congregacionpa rurayninkunapi yanapakurqa. Tiempopa risqanman hinam payqa Solterokunapaq Bibliamanta Escuelaman rirqa. Kaymi qawachin ‘tiempota ama usuchinanpaq’ consejota chaylla kasukusqanta (Efe. 5:16).

Llamkaymanta. ¿Llamkayllamanñachu qokurunki? ¿Manañachu anchata familiaykiwan rimanki? ¿Yanapasunkichu Diosta allinta servinaykipaq? ¿Kallpanchakunkichu huñunakuypi tupasusqaykikunata allinta ruranaykipaq? ¿Rimasqaykiwanqa kallpanchankichu? Yuyariy kay consejota: “Diostayá respetay qamqa. Paypa kamachikuyninkunatayá kasukuy qamqa”. Sichum chayta ruraspaqa achka bendicionkunatam Jehová Diosninchikmanta chaskisun (Ecl. 2:24; 12:13).

¿Imapim tukurqa Jaimepa rurasqan? Manam allinpichu. Imapas rurasqan allinpi tukunanmantaqa mana qollqeyoq hinaspa manuyasqallañam tukururqa. Hinaspam Jehová Diosman kutinanpaq tantearurqa. Rurasqankunata allicharuspanmi kunanqa precursor regular hinaspa anciano kachkan. Paymi nin: “Kapuqllaywan kusisqa kasqayrayku hinaspa hukkunata Diosmanta yachachinaypaq kallpanchakusqayraykum hawka hinaspa kusisqa kawsakuni”, nispa (Fili. 4:6, 7).

Mozo-sipas imarayku hinaspa imakuna munasqaykikunapi yuyaymanay. Yuyariy imata ruraspallam tukuy ima rurasqayki allinpi tukunanmanta. Jehová Dios yupaychaymi vidaykipiqa imamantapas puntapi kanan.

Yaqapaschá mana ancha yanapasuqniki kaqkunata saqenayki kanqa. Chayta ruraspam qawachinki “Diospa munasqanta [. . .], imam agradonpaq kasqanta hinaspa imam allinpuni kasqanta”, chaymi Diospa bendicionninkunata chaskinki (Rom. 12:2). Arí, Jehová Diosta tukuy sonqoykiwan serviptikiqa ‘tukuy rurasqaykim’ allinpi tukunqa.

[Willakuy]

[31 kaq paginapi dibujo hinaspa recuadro]

¿Imam yanapasunki ‘tukuy rurasqaykikuna allin’ lloqsinanpaq?

Achka ruranapaq kaptin, ¿imatam rurawaq allin kaqkunata mana yanqacharunaykipaq? Tiempochakunaykim imarayku hinaspa imakuna munasqaykipi yuyaymananaykipaq. Ichapas qatiqnin tapukuykuna yanapasunkiman:

ESTUDIASQAYKI HORA PASAYTA HUK RURAYKUNA

▪ ¿Imayna kanaypaqmi tanqawan?

▪ ¿Hayka tiempoytam qonay kanqa?

▪ ¿Chay ruraykunallatañachu puntaman churachkani?

▪ ¿Diosta servinaypaq tiempoytachu qechuwachkan?

▪ ¿Pikunawantaq kuskanchakuni?

▪ ¿Diosta mana reqsiqkunapa amistadnintachu munachkani icha iñiqmasiykunapatachu?

UNIVERSIDADMAN RINAMANTA

▪ Imapipas llamkayta yachaspayqa, ¿educakuspay qollqeyta, kallpayta hinaspa tiempoyta servichikunayraqchu?

▪ ¿Universidadpiraqchu estudianay llamkayta tarinaypaq?

▪ ¿Sasachawanqachu huñunakuyman rinaypaq?

▪ ¿Imam ‘allin kaqkunata reqsinichu’?

▪ ¿Astawanchu confianay Diosqa yanapakuq kasqanpi?

LLAMKAYMANTA

▪ ¿Tiempota tarinichu ‘llamkasqaymanta kusikunaypaq’?

▪ ¿Pisipasqallañachu tarikuni Dios serviyniytawan familiayta qawanaypaq?

▪ ¿Llamkayllamanña qokurusqayraykuchu familiaypaq manaña tiempochakuni?

▪ ¿Llamkayllamanña qokurusqayraykuchu Dios serviyniyta saqechkani?

▪ ¿Manañachu kallpanchakuchkani huñunakuypi tupawasqankunata allinta ruranaypaq?

[30 kaq paginapi dibujo]

Diosmi Baructa nirqa kikillanpaq munaq kasqanta saqenanpaq