Dios kuyawasqanchikmanta mana iskayrayaspaqa manam imatapas manchakusunchu

 1. ¿Imakunamantataq preocupakuchwan?

YACHAYKUSUN iñiqmasinchikkunata imakuna preocupasqanmanta. Nestorwan Mariam munarqaku karu llaqtachakunapi Diosmanta willakuyta.b Chaypaqqa saqinankum karqa allin llamkayninkuta. Chaymi hukmanyasqa karqaku as qullqillawan kawsakuspa imayna tarikunankupi piensaspanku. Iñiqmasinchik Biniamñataqmi testigokunata chiqnisqanku nacionmanta. Payqa yacharqam bautizakuruptinqa paytapas sasachanankumanta. Chayta manchakuspanpas bautizakurusqanta yachaspanku ayllun ima ninanmantam astawanqa manchakurqa. Valeriamanñataqmi niykurqaku cancerwan unqusqanmanta. Chaywanqa llumpay llakisqam tarikullarqa wañurunanta piensaspan. Chaywanpas Diosta kasukuspanmi yawarta mana churachikuspallan operachikuyta munarqa chaypaq doctorta sasa tariy kaptinpas.

 2. ¿Imanasqataq imamantapas llumpaytaqa mana preocupakunachu?

² Yaqapaschá kay iñiqmasinchikkuna hina imamantapas preocupasqa utaq hukmanyasqa tarikurqanchik. Llumpay hukmanyasqa kaspaqa manam Jehova Diospa munasqanman hinachu imatapas tantiasun. Satanasqa chaytamá munachkan. Payqa munachkanmi hukmanyaspanchik hinaspa manchakuspanchik Jehova Diospa kamachiwasqanchikta manaña kasukunanchikta, chayna tarikuspaqa manañam Diosmantapas willakuyta atisunchu (Apoc. 12:17). Satanasqa mana llakipayakuqmi, mana allin ruwaqmi, atiyniyuqmi. Chayna kaptinpas, ¿imataq yanapawachwan chaykunawan mana manchakunapaq?

 3. Llumpayta mana hukmanyanapaqqa, ¿imamantam mana iskayrayananchikchu?

³ Jehova Dios kuyawasqanchikmanta chaynataq yanapawasqanchikmanta mana iskayrayaptinchikqa satanasqa manam imawanpas hukmanyachiwasunchu nitaq manchachiwasunchu (Sal. 118:6). Salmos 118 capitulota qillqaqmi sasachakuykunapi tarikullarqa. ¿Imakunawan? Achka runakunam chiqnirqaku, wakinqa karqaku autoridadkunam (9, 10 versiculo). Wakinpiqa tukuywanmi llumpay hukmanyasqa tarikullarqa (13 versiculo). Jehova Diospas corregiykurqam mana allinta ruwasqanmanta (18 versiculo). Ima sasachakuypiña kaspanpas takispanmi payqa nirqa: ‘Manam manchakusaqchu’, nispa. Chaynataqa nirqa corregiykuspanpas Jehova Dios anchata kuyasqanmanta mana iskayrayasqanraykum. Payqa manamá iskayrayarqachu imaña pasaptinpas Jehova Dios yanapaykunanmantaqa (Sal. 118:29).

 4. Jehova Dios kuyawasqanchikmanta mana iskayrayaspaqa, ¿imakunamantam mana llumpaytaqa preocupakusunchu?

⁴ Jehova Dios sapakamata kuyawasqanchikmantaqa manam iskayrayananchikchu. Mana iskayrayaspanchikqa manam llumpaytaqa llakikusunchu imaynata ayllunchikta mantienenapaqqa, chiqniwaqninchik runakunatapas manam manchakusunchu, manataqmi wañuytapas manchakusunchu. Punta parrafopi yachamusqanchik iñiqmasinchikkunapas manam iskayrayarqakuchu paykunata Jehova Dios kuyasqanmantaqa, chaymi manaña llumpaytaqa preocupakurqakuchu nitaq manchakurqakuchu.

 5. ¿Imakunamantataq taytakunaqa llakikunku? (Qaway qaranpi kaq fotota).

⁵ Diosman sunqu taytakunaqa munankum wasinkupi kaqkunapaq imankupas mana pisipunanta (1 Tim. 5:8). Coronavirus unquy kasqanrayku ichapas llakikurqanki mana llamkayniyuq qiparunaykimanta. Llakikurqankichikpaschá imata mikunaykichikmanta, wasikichikmanta utaq arriendota paganaykichikmanta, hinaspa mana llamkayniyuq qiparuspa huk llamkayta mana tarinaykichikmanta. Utaq Nestorwan Maria hinapaschá piensarqankichik as qullqillawanqa sasachakuypi tarikunaykichikmanta. Chaykunawan llumpayta hukmanyanankupaq satanas intusqanraykum wakin iñiqmasinchikkunaqa Jehova Diosta serviyta saqirunku.

 6. ¿Ima piensananchiktataq satanasqa munan?

⁶ Satanasqa munanmi Jehova Diosqa ñuqanchikmanta mana preocupakusqanta piensananchikta, chaynataq ayllunchikta mantienenapaq mana yanapawananchikmanta piensananchikta. Chaynata piensaspaqa llamkayninchikmanta mana qarqurachikunapaqmi tukuyta ruwayta qallaykuchwan, wakinpiqa Diospa mana munasqan kaqkunatam ruwaruchwan.

 7. ¿Imatam Jesusqa Jehova Diosmanta nirqa?

⁷ Jesusqa Jehova Dios imayna kasqanta yachaspanmi nirqa: “Taytaykichik Diosqa yachanñam imam pisipususqaykichiktaqa manaraqpas mañakuchkaptikichik”, nispa (Mat. 6:8). Jesusqa yachantaqmi imapas pisipuwaptinchikqa Jehova Dios chaylla quwananchikmanta. 1 Timoteo 5:8 nisqanpim Jehova Diosqa taytakunata kamachin churinkuta mantienenankupaq. Chaynaqa, Jehova Diosqa taytanchik kasqanraykum churinkunataqa mana imamantapas usuchiwasunchu.

 8. (1) ¿Imamantam mana iskayrayananchikchu ayllunchikta mantienenapaq llakikuspaqa? (Rimarimuytaq Mateo 6:31-33 nisqanmantapas). (2) Fotopi warmi-qari iñiqmasinchikkuna hina, ¿imatataq ñuqanchikpas ruwachwan?

⁸ Jehova Dios kuyawasqanchikmanta chaynataq ayllunchikta kuyasqanmanta mana iskayrayaspaqa manam iskayrayasunchu imapas pisipuwaqninchikta quwananchikmantaqa (leey Mateo 6:31-33). Jehova Diosqa kuyawasqanchikraykum imanchiktapas mana pisichipuwasunchu, aswanqa achkanpim quykuwasunchik. Kay allpa pachanchikta unanchaspanpas manam papatawan sarallatachu unancharqa, aswanqa tukuy rikchaq kawsaykunatam, chayta mikuspa kusisqa kawsakunanchikpaq (Gen. 2:9). Mikuyninchik wakinpi aslla kaptinpas chayta quykuwasqanchikmantam agradecekunanchik. Jehova Diosqa mana qunqawaspanchikmi chay ‘punchawpaq tantanchikta’ quwasunchik (Mat. 6:11). Diosta servinanchikpaq tantiakusqanchikrayku imanchikpas pisiptinqa manam llakikunanchikchu, payqa quykuwasunmi, hamuq tiempopiqa astawanraqmi quwasun. Nestortawan Mariatapas manam imankumantapas usuchirqachu (Is. 65:21, 22).

 9. ¿Imapaqmi yanapasunki Nestorpawan Mariapa willakusqanku?

⁹ Colombia nacionniyuq Nestorwan Mariaqa tukuy imayuqmi kawsakurqaku. Paykunam ninku: “Llamkayniykuta saqispayku Jehova Diosmanta astawan willakuyta munaspaykupas, piensarqanikum as qullqillawan kawsaspaykuqa mana kusisqa kanaykumanta”, nispa. ¿Imataq yanaparqa manaña iskayrayanankupaq? Paykunaqa yuyarirqakum Jehova Dios achka kutipi yanapaykusqanta. Chaymi Dios yanapananmanta mana iskayrayaspa llamkayninkumanta lluqsikururqaku, wasinkuta rantikururqaku, hinaspam Diosmanta astawan willakunankupaq karu llaqtachaman pasakurqaku. Chaypaq tantiakusqankuwan, ¿imaynataq tarikunku? Nestormi nin: “Mateo 6:33 nisqanman hinam Jehova Diosqa mana imaykutapas pisichipuwankuchu. Kunanqa astawan kusisqaraqmi kawsakuniku”, nispa.

10. ¿Imanasqataq runakunaqa runamasinkuta manchakunku?

¹⁰ Runakunaqa tukuy imawanmi ñakarichinakunku (Ecl. 8:9). Wakinqa autoridad kasqanraykum runamasinta ñakarichin, warmakunapas warmamasinkutam kamispa manchachinku, hukkunañataqmi ayllunkuta maqaspa, kamispa ñakarichinku. Chaymi runakunaqa runamasinkuta manchakunku. ¿Imaynatam satanasqa runata manchakusqanchikwan iskayrayachiwanchik?

11, 12. Runakunata manchakuspa, ¿imakunata manaña ruwananchiktam satanasqa munan?

¹¹ Satanasqa munanmi runakunata manchakuspanchik Diosmanta manaña willakunanchikta chaynataq kamachikuynintapas manaña kasukunanchikta. Chaymi wakin nacionkunapiqa autoridadkunata umachan Diosmanta willakunanchikta harkakunankupaq (Luc. 21:12; Apoc. 2:10). Achka runakunataqmi satanaspa umachasqan kasqanrayku Jehova Diospa testigonkunamanta llullakunata rimanku. Chaykunata creeruspankum wakinkuqa asipayawanchik, kamiwanchik. Wakinqa iñiqmasinchikkunatam maqanku (Mat. 10:36). Satanasqa ñawpaqtapas chaynatam iñiqmasinchikkunata sasacharqa (Hech. 5:27, 28, 40).

¹² Satanasqa manam autoridadkunapa harkakusqallankuwanchu manchachiwanchik. Wakiqninchikqa ñakariymantapas astawanqa manchakunchik testigo kasqanchikta yacharuspanku ayllunchik piñakunankumantam. Ayllunchiktam anchata kuyanchik, hinaspam munanchik paykunapas Diosmanta yachanankuta, ichaqa Diosmanta hinaspa serviqninkunamanta mana allinkunata rimaptinkum hukmanyasqa tarikunchik. Chaywanpas wakin ayllunchikqa puntata mana munachkaspankupas Jehova Diosmantam yachayta qallaykurqaku. Testigo kasqanchikrayku ayllunchik qalaypaq chiqniruwaptinchikpas, ¿imataq yanapawasun?

13. Ayllunchik chiqniwaptinchikqa, ¿imanasqataq Jehova Dios kuyawasqanchikmantaqa mana iskayrayananchikchu? (Rimarimuytaq Salmos 27:10 nisqanmantapas).

¹³ ¡Anchatam kallpanchawanchik Salmos 27:10 nisqanqa! (Leey). Jehova Dios kuyawasqanchikmanta mana iskayrayaspaqa runakuna chaynataq ayllunchikkuna chiqniwaptinchikpas manam hukmanyasunchu, manataqmi iskayrayasunchu Jehova Dios payman sunqu kasqanchikrayku bendeciwananchikmantaqa. Payqa manataqmi imanchiktapas pisichipuwasunchu, yanapawasunchikmi hawka, kusisqa kananchikpaq hinaspa payman astawan asuykunanchikpaq. Chaynatam yanapaykurqa iñiqmasinchik Biniamtapas.

14. ¿Imapaqmi yanapasunki Biniampa willakusqanqa?

¹⁴ Autoridadkuna sasachananmanta yachaspanpas Biniamqa testigo kananpaqmi bautizakurqa. Paymi nin: “Piensasqaymantapas astawanraqmi autoridadkunaqa ñakarichiwarqaku. Ichaqa astawanmi manchakurqani taytay piñakuwananmanta hinaspa aylluykuna testigo kasqayrayku manaña qawariwanankumanta”, nispa. ¿Imataq Biniamta yanaparqa chaywan mana hukmanyarunanpaq? Jehova Dios kuyasqanmanta hinaspa yanapananmanta mana iskayrayasqanmi. Paymi nin: “Piensarqanim qullqimanta sasachakuq chaynataq runakunapa chiqnisqan iñiqmasinchikkunata Jehova Dios imaynata yanapasqanpi. Chaywanmi mana iskayrayarqanichu Jehova Diospi hapipakuptiyqa yanapawananmanta. Achka kutitam carcelman apawarqaku, wakinpiqa llumpaytam maqawarqaku. Chayna sasachakuypi kaspaymi cuentata qukurqani Diosman sunqu kaptinchikqa pay yanapaykuwasqanchikmanta”, nispa. Biniampaqqa Jehova Diosqa kuyakuq taytanmi, iñiqmasinchikkunañataqmi ayllunkuna.

15. ¿Imanasqataq wañuytaqa mana manchakunanchikchu?

¹⁵ Bibliapiqa ninmi wañuyqa enemigonchik kasqanta (1 Cor. 15:25, 26). Ayllunchik utaq ñuqanchik unquruspaqa manam munanchikchu wañuytaqa. ¿Imanasqataq wañuytaqa mana munanchikchu? Jehova Dios wiñaypaq kawsakuy munaqta unanchawasqanchikraykum (Ecl. 3:11). Wañuyta mana munaspam allinta mikunchik, ejerciciota ruwanchik, imanchikpas nanaptinqa doctorman rinchik chaynataq imamantapas cuidakunchik.

16. Wañuyta manchakuspa, ¿imakuna ruwarunanchiktam satanasqa munan?

¹⁶ Satanasqa yachanmi wañuyta mana munasqanchikta. Chaymi nin vidanchikraykuqa Jehova Diostapas qipancharunanchikmanta, ichaqa manamá chaynachu (Job 2:4, 5). “Pitapas wañuchinanpaq atiyniyuq” kasqanraykum satanasqa wañuywan manchachiwanchik Jehova Diosta qipanchananchikpaq (Heb. 2:14, 15). Chaymi wakinpiqa runakunawan manchachiwanchik manaña Diospa testigon kananchikpaq. Wakinpiñataqmi qunqayllamanta imapas pasaruwaptinchik doctorkunawan utaq mana testigo kaq ayllunchikkunawan hikutachiwanchik yawarta churachikunanchikpaq.

17. Romanos 8:37-39 nisqanman hinaqa, ¿imanasqataq wañuytaqa mana manchakunanchikchu?

¹⁷ Manamá mayqinninchikpas wañuruytaqa munanchikchu, ichaqa wañuruptinchikpas Jehova Diosqa hinallam kuyawasunchik (leey Romanos 8:37-39). Jehova Diosqa payman sunqu kaqkunataqa wañuptinkupas manam qunqarunchu, paypaqqa hinallaraqpas kawsachkanmanku hinam kachkanku (Luc. 20:37, 38). Payqa munachkanmi paykuna kawsariykachiyta (Job 14:15). Diosqa churinta kachamuspam wañuymanta librawarqanchik wiña-wiñaypaq kawsakunanchikpaq (Juan 3:16). Jehova Diosqa anchatam kuyawanchik, chaymi unquspapas utaq wañuchiwananchikpaq manchachiwaptinchikpas Diostaqa mana qipanchananchikchu. Astawanmi payman asuykunanchik sunqunchikta tiyaykachispa kallpanchaykuwananchikpaq hinaspa yachayta quykuwananchikpaq. Chaynatam ruwarqaku Valeriawan qusanpas (Sal. 41:3).

18. ¿Imapaqmi yanapasunki Valeriapa willakusqanqa?

¹⁸ Valeria 35 watanpi kachkaptinmi niykurqaku cancerwan kasqanta. Payqa wañuyta manchakuspanpas Dios kuyasqanmantaqa manam iskayrayarqachu. Paymi nin: “Cancer unquyniyuq kasqayta yacharuspaykum llumpayta hukmanyarurqaniku. Allinyanaypaqqa operachikunaymi karqa. Achka doctorkunamanmi rirqani, ichaqa yawarta churawaspankum operawayta munarqaku. Wañuyta manchakuspaypas Diosta kasukuyta munaspaymi yawarta churachikuytaqa mana munarqanichu. Warmacha kasqaymantam Jehova Diosqa kuyawaspan yanapawarqa, chaymi ñuqapas kuyasqayrayku payman sunqu kayta munarqani. Doctorkuna aswanyasqaymanta niwaptinkupas, aswan kallpanchasqam tarikurqaniku satanasta qipanchanaykupaq. Ñuqapas chaynataq qusaypas munarqanikumá Jehova Diosta kusichiyta. Punchawkuna pasasqanman hinam operawarqaku yawarta mana churawaspallanku. Kunanqa manañam ñawpaqta hina sanoñachu kani, ichaqa Jehova Diosqa imapipas hinallam yanapawachkanku. Chaynatam yanapawarqa cancerwan unqusqaymanta manaraq niwachkaptinkupas. Huñunakuypim yacharqaniku ‘Qarinchakuspayá sasachakuykunata atipasun’ niq yachachikuyta.c Chayqa allintam yanapawarqaku, chaymi kuti-kutirispa leerqaniku. Chayna yachachikuykunam chaynataq bibliata sapa punchaw leesqaykum imapaqpas hawkalla tantiakunaykupaq yanapawarqaku”, nispa.

19. ¿Imam kanqa manapas unaymanta?

¹⁹ Achka iñiqmasinchikkunam Jehova Diospa yanapakuyninwan ima sasachakuytapas atipaspanku satanaspa contranpi churakuchkanku (1 Ped. 5:8, 9). Qampas chaytaqa atiwaqmi. Manapas unaymantam Jehova Diosqa Jesusta chaynataq paywan kamachiqkunata ninqa ‘diablopa ruwasqankunata chinkachinankupaq’ (1 Juan 3:8). Chaymanta qipamanqa Diospa serviqkunaqa manchakuywanqa manañam hukmanyasunñachu (Is. 54:14; Miq. 4:4). Chaykamaqa kallpanchakusunyá mana manchakuq kanapaq.

20. ¿Imamantam mana iskayrayananchikchu?

²⁰ Mana manchakunapaqqa manam iskayrayananchikchu Jehova Dios serviqninkunata kuyasqanmantaqa chaynataq yanapasqanmantaqa. Chaypaqqa yuyarinanchikmi serviqninkunata Jehova Dios imaynata yanapasqanta, hinaspam hukkunaman willananchik. Yuyarinanchiktaqmi ñuqanchiktapas sasachakuykunapi kaptinchik imayna yanapawasqanchikta. Jehova Diospa yanapakuyninwanqa manam imatapas manchakusunchu (Sal. 34:4).