¿Wañusqakuna kawsarimunmankuchu?

“Kawsariymanta” griego rimaypi rimaspanqa nichkanmi “kaqmanta pipas hatarinanmanta”, arí pipas kaqmanta kawsarispanqa hina chayna yuyayniyuqllam kaqmanta kawsarimunqa (1 Corintios 15:12, 13).

Bibliapiqa achka kutikamam riman wañuqkuna kawsarimunankumanta. Jehova Diosqa serviqnin Oseaswanmi kaynata qillqachirqa: “Ñuqaqa wañukuqkunapa kasqanmantam hurquykusqaykichik, wañuymantam hurqusqaykichik”, nispa (Oseas 13:14, TNM; Job 14:13-15a; Isaias 26:19; Daniel 12:2, 13).

¿Maypitaq wañuqkunaqa kawsarinqaku? Wakinqa Jesuswan kuska kamachimunankupaqmi hanaq pachapi kawsarinqaku (2 Corintios 5:1; Apocalipsis 5:9, 10). Bibliam paykunata nin ‘punta kawsariqkuna’, nispa (Apocalipsis 20:6; Filipenses 3:11). Chaymantapas Bibliaqa ninmi kay pachapipas achkallaña runakuna kawsarimunankumanta, paykunaqa wiñay-wiñaypaqmi kay allpa pachapi kawsakunqaku (Salmos 37:29).

¿Imayna cuerpoyuqtaq kawsarinqaku? Jehova Diosmi Jesusman atiyta quykun wañuqkunata kawsarichinanpaq (Juan 11:25). Chay atiywanmi Jesusqa sepulturapi llapallan kaqkunata kawsarichinqa. Paykunataqa hina chaynallatam hinaspa chayna piensayniyuqllatam kawsarichinqa (Juan 5:28, 29). Haykam kay allpa pachapi kawsakuqkunaqa aychayuq tulluyuqmi kawsarimunqaku, hinaspapas sanoy-sanoyñam kawsakunqaku (Isaias 33:24; 35:5, 6). Hanaq pachapi kawsariqkunam ichaqa ‘mana rikuna cuerpoyuqña’ kawsarinku, angelkuna hinañam paykunaqa kanku (1 Corintios 15:42-44, 50).

¿Pikunataq kawsarimunqaku? Bibliam nin kay allpa pachapi ‘allin ruwaq hinaspa mana allin ruwaq runakuna’ kawsarimunankumanta (Hechos 24:15). Chay allin ruwaqkunamanta wakinkum Noe, Abrahan hinaspa Sara (Genesis 6:9; Hebreos 11:11; Santiago 2:21). Mana allin ruwaq runakunañataqmi kanku Jehova Diosmanta manaraq yachachkaspa wañukuqkuna.

Chaymantapas achka runakunam kanku Jehova Diosta mana kasukuy munaqkuna, paykunaqa Jehova Diospa kamachikuyninkunamanta yachachkaspankupas huchamanmi qukurunku, paykunaqa manañam kawsarimunqakuñachu (Mateo 23:33; Hebreos 10:26, 27).

¿Haykapitaq wañukuqkunaqa kawsarimunqaku? Bibliam willawanchik 1914 watapi Jesus kamachiyta qallaykusqanmanta. Chay watamantam hanaq pachapaq akllasqakunapas kawsariyta qallaykurqaku (1 Corintios 15:21-23). Jesus waranqa wata kamachimuwaptinchikñataqmi kay allpa pachapi kawsariy kanqa. Allpa pachanchikpas sumaq huertañam kanqa (Lucas 23:43; Apocalipsis 20:6, 12, 13).

¿Imanasqataq mana iskayrayananchikchu kawsariy kananmanta? Kikin bibliapim willawanchik isqun runakuna kawsarisqankumanta, chaytaqa achka runakunamá rikurqaku (1 Reyes 17:17-24; 2 Reyes 4:32-37; 13:20, 21; Lucas 7:11-17; 8:40-56; Juan 11:38-44; Hechos 9:36-42; 20:7-12; 1 Corintios 15:3-6). Hukninmi karqa Lazaro, paytam Jesusqa tawa punchawña wañusqa kasqanmanta achka runakunapa qayllanpi kawsarirachirqa (Juan 11:39, 42). Jesusta chiqniqkunapas chaytaqa rikurqakum, chayraykum Jesustawan Lazarota wañurachiyta munarqaku (Juan 11:47, 53; 12:9-11).

Bibliapa nisqanman hinaqa Jehova Diosqa ancha atiyniyuqmi wañuqkunata kawsarichinanpaq, payqa yuyanmi wañukuq runataqa manataqmi qunqanchu imayna kasqantapas. Chaymantapas tukuy atiyniyuq kasqanraykum lliw wañukuqkunata kawsarichinqa. Manamá chay ruwanantaqa pipas harkanqachu (Job 37:23; Mateo 10:30; Lucas 20:37, 38). Payqa anchatam munachkan wañuqkunata kawsarichiyta, chaymi bibliapipas nin munayllawanña wañuqkunata kawsarichiyta suyasqanta (Job 14:15). Arí, Jehova Diosqa anchatamá kusikunqa kay allpa pachapi wañukuqkunata kawsarichispanqa.

Kawsarimuymanta runakunapa ima nisqanku

Runakunam ninku: “Pipas kawsariptinqa chay runamanmi alman kutiykun”, nispanku.

¿Chaynachu? Manam. Bibliapa nisqanman hinaqa, ñuqanchikmi almaqa kanchik, manam ukunchikmanta imapas lluqsiqchu (Genesis 2:7; Ezequiel 18:4). Pipas kawsariptinqa manam animanchu kutiykun aswanqa hina chay cuerpollanmi sanoy-sanoyña kawsarin.

Runakunam ninku: “Kawsariqkunaqa chayllam chinkachisqa kanqaku”, nispanku.

¿Chaynachu? Manam. Bibliam willawanchik mana allin ruwaq runakunaqa juiciopaq kawsarimunankumanta (Juan 5:29). Chay runakunaqa kawsarirusqanku qipaman ruwasqankumantam juzgasqa kanqaku, manam manaraq wañukuchkaspanku mana allinkunata ruwasqankunamantachu. Jesusmi nirqa: “Wañuqkuna Diospa churinpa qayakusqanta uyarinankupaq hinaspa chay uyariqkunamanta kasukuqkuna kawsanankupaq”, nispa (Juan 5:25). Kawsariqkuna Jesusta uyarispanku kasukuptinkuqa sutinkum qillqasqa kanqa ‘wankusqa qillqapi’ (Apocalipsis 20:12, 13).

Runakunam ninku: “Wañukuqkunaqa hina chayna cuerpoyuqllam kawsarimunqaku”, nispanku.

¿Chaynachu? Manam. Bibliapim nin pipas wañukuptinqa allpallaman cuerpon kutiykusqanta (Eclesiastes 3:19, 20).