Daniel

11 ”Media nacionmanta Darío kamachiyta qallarisqan watapin+ noqaqa payta* yanaparqani kallpacharqani ima. 2 Kay nisqaykunaqa junt’akunqapunin:

”Persia nacionpiqa kinsa reykunapiwanraqmi sayarinqa, tawa kaq reyqa llapa reykunamantapas aswan qhapaqmi kapunqa. Astawan qhapaq kapuspataq atiyniyoqman tukupunqa, jinaspa Grecia nación contra jatarinqa.+

3 ”Chaymantataq juj atiyniyoq reyñataq lloqsimunqa. Chay reyqa atiywanmi kamachikunqa,+ ima munasqantataqmi ruwanqapas. 4 Chay rey kamachikuyta qallariqtinmi kamachikuyninqa tawaman t’aqasqa kanqa, janaq pacha tawantin wayrakuna ladomanmi ch’eqechisqa kanqa,+ ichaqa manan mirayninkunapaqchu kanqa, manataqmi pay jinañachu atiywan kamachinqakupas. Chay reypa kamachikuyninqa saphinmantan t’irasqa kanqa, paypa rantinpiqa jujkunan kamachipunqaku.

5 ”Paypa juj kaq umallin uray lado reymi atiyniyoqman tukupunqa. Ichaqa jujmi chay umalli contra jatarinqa, jinaspa aswan atiywan kamachikunqa.

6 ”Watakuna pasasqan qhepamantaq paykunaqa rimanakunqaku. Uray lado reypa ususinmi wichay lado reywan rimanakuq rinqa. Ichaqa pisi kallpayapunqan, reypas pisi kallpayapunqan. Chay ususipas, payta pusaqkunapas, papanpas, chay tiempopi yanapaqninkunapas jujkunamanmi entregasqa kanqaku. 7 Paypa* rantinpin ususinpa familianmanta juj rey sayarimunqa. Chay reymi soldadokunantin wichay lado rey contra maqanakuq rinqa, jinaspa paykunata atipanqa. 8 Chaymantapas payqa Egiptomanmi apapunqa diosninkunata, metalmanta idolonkunata, qolqemanta qorimanta valorniyoq cosasninkunata, runakunatapas. Chay reyqa unaymi wichay lado reyman mana rinqachu. 9 Wichay lado reyqa uray lado reywan maqanakuqmi jamunqa, ichaqa kutiripunqan llaqtanman.

10 ”Paypa wawankunan ichaqa maqanakunankupaq askha soldadokunata juñunqaku. Jinan paykunamanta jujninqa* maqanakuq rinqa, paypa soldadonkunaqa lloqlla jinaraqmi mast’arikunqa. Chaymantataq payqa allin perqasqa llaqtanman chayanankama maqanakuspa muyurinqa.

11 ”Uray lado reytaq sinchita phiñakuspa wichay lado rey contra maqanakuq lloqsimunqa. Paytaq* askha soldadokunata juñunqa, ichaqa juj kaq reymanmi* entregasqa kanqa. 12 Chay reymi paykunataqa apapunqa. Chaywanmi payqa jatunchakunqa. Chaymantapas waranqa-waranqanpi runakunatan wañuchinqa. Ichaqa atiyniyoqña kanqa chaypas manan atiyninwanqa imatapas ruwanqachu.

13 ”Wichay lado reyqa ñaupaq kutipi juñusqan soldadokunamantapas aswan askha soldadokunatan juñunqa. Jinan payqa watakuna qhepaman askha soldadokunantin askha armakunantin jamunqa. 14 Chay p’unchaykunapiqa askhan jatarinqaku uray lado rey contra.

”Ch’aqwa jatarichiq* llaqtamasiykikunapas rijuriypi rikukusqantan junt’ayta munanqaku, ichaqa manan piensasqankuman jinachu kanqa.*

15 ”Wichay lado reyqa allin perqasqa llaqtaman jaykunanpaqmi perqa k’uchuman jallp’ata montonqa. Uray lado reypa soldadonkunaqa manan atipanqakuchu, manan allin soldadonkunapas atipanqakuchu. Paykunaqqa manan kallpanku kanqachu aguantanankupaq. 16 Uray lado rey contra jatariqqa* ima munasqantan ruwanqa, manan pipas atipayta atinqachu. Payqa* Munay Jallp’a nisqapin sayaykunqa,+ atiyniyoqtaqmi kanqa pitapas chinkachinanpaq. 17 Llapa soldadonkunawanmi mana iskayaspa lloqsimunqa, ichaqa juj acuerdotan chay reywan ruwanqa, jinan payqa imachus yuyaykusqanta ruwanqa. Warmikunaq ususinqa paypa chinkachisqanmi kanqa. Chay ususiqa manan aguantanqachu, manan paypañachu kapunqa. 18 Lamar-qocha ladopi kaq llaqtakunamanmi phawaykunqa, jinaspan askha llaqtakunata jap’ikapunqa. Ichaqa juj comandanten pay contra jatarinqa, chhaynapin manaña pitapas sarunchanqachu. Aswanmi imachus ruwasqanta payman kutichinqa. 19 Chaymantataq chay reyqa allin perqasqa llaqtankunaman kutipunqa, chaypin payqa urmanqa, manataqmi pipas tarinqachu.

20 ”Paypa rantinpin juj rey jatarinqa, jinaspa ancha munay jallp’api impuesto cobraqta churanqa. Ichaqa pisi tiempollamantan chinkachisqa kanqa. Payqa manan k’araq phiñakuypichu ni guerrapichu wañunqa.

21 ”Paypa rantinpin juj millay rey rijurimunqa, chay reyqa manan rey jinachu respetasqa kanqa. Payqa thaj kay kashaqtinmi* jamunqa, jinaspa sumaqllata engañaspa kamachikuq jaykunqa. 22 Paymi unu jinaraq jamuq soldadokunata chinkachinqa, lliutan ch’usaqyachinqa. Chinkachinqan rimanakuypa+ umallintapas.+ 23 Paywan rimanakusqankuraykun engañowan imatapas ruwanqa. Juch’uy nacionpa yanapayninwanmi atiyniyoqman tukupunqa. 24 Thaj kay kashaqtinmi* provinciapi allin mijuykunaq* kasqanman jaykunqa, jinaspa ñaupa taytankunaq mana jayk’aq ruwasqanta ruwanqa. Qechusqankunata qhapaq kaykunatawanmi runakunaman rakinqa. Chaymantapas allin perqasqa llaqtakuna contran mana allinkunata yuyaykunqa, ichaqa pisi tiempollan chayta ruwanqa.

25 ”Payqa uray lado rey contra maqanakunanpaqmi kallpachakunqa, jinaspa askha soldadokunata juñunqa. Uray lado reypas paywan maqanakunanpaqmi ancha askha soldadokunata juñunqa, ichaqa manan atipanqachu, pay contra mana allinkunata rimanakusqankuraykun mana atipanqachu. 26 Paywan kuska sumaq mijunata mijuqkunan paytaqa urmachinqaku.

”Jinan soldadonkunaqa chinkachisqa* kanqaku, askhan wañunqaku.

27 ”Chay iskay reykunan mana allinkunata ruwanankupaq yuyaykunqaku, iskayninkun mesapi tiyaykuspa engañanakunqaku. Ichaqa manan ima rimasqankupas junt’akunqachu, tukukuyqa señalasqa tiempopiraq chayamunan kasqanrayku.+

28 ”Wichay lado reyqa askha qhapaq kaykunata aparikuspan llaqtanman kutipunqa, payqa Diospa ch’uya rimanakuynin contran jatarinqa. Imachus sonqonpi yuyaykusqantan ruwanqa, jinaspa llaqtanman kutipunqa.

29 ”Chaymantapas jayk’aqchus kutinan tiempopin uray lado rey contra maqanakuq rinqa, ichaqa manan ñaupaqpi jinachu imapas kanqa. 30 Pay contran jamunqa Kitin ladomanta+ barcokuna, chhaynapin pisichasqa kanqa.

”Jinan kutipuspa ch’uya rimanakuy contra sinchita phiñakunqa,+ imachus yuyaykusqantataq ruwanqa. Payqa kutipunqan, jinaspa ch’uya rimanakuyta saqepuqkunata yanapanqa. 31 Chaymantapas paypa soldadonkunan juñukuspa Diospa allin perqasqa ch’uya wasinta qhellichanqaku,+ jark’anqakun sapa p’unchay jaywana sacrificiotapas.+

”Chaypitaq churanqaku millakunapaq ch’usaqyachiq kaqta.+

32 ”Wichay lado reymi rimanakuyta mana respetaqkunata sumaqllata engañanqa Dios contra jatarinankupaq. Diosninta reqsiq runakunan ichaqa qaqata sayanqaku, imachus ruwanankutapas ruwashallanqakun. 33 Allin reparaq runakunan+ askha runakunata yachachinqaku. Paykunaqa askha p’unchaykunan ñak’arichisqa kanqaku guerrapi ninapi ima, presotan apapunqaku, kaqninkutapas qechupunqakun. 34 Ñak’arishaspankun ichaqa juj chhikan yanapayta chaskinqaku. Askhan engañollawan paykunaman qayllaykamunqaku. 35 Wakin allin reparaq runakunan urmachisqa kanqaku, chhaynapi runakuna ch’uyanchasqa limpiasqa kananpaq,+ chayqa tukukuy tiempokaman ruwakunqa. Kayqa señalasqa tiempopaqraqmi kashan.

36 ”Wichay lado reyqa munasqantan ruwanqa. Payqa kay pachapi kaq dioskunamantapas aswan atiyniyoqpaqmi qhawarikunqa, dioskunaq Diosninmantapas sinchi mana allinkunatan rimanqa.+ Chay reypa ruwasqankunaqa tukuymi allin kanqa Diospa phiñakuynin p’unchay chayamunankama. Diospa imachus nisqanqa junt’akunqapunin. 37 Chay reyqa manan respetanqachu ñaupa taytankuq Diosnintapas, manan respetanqachu warmikunaq munasqantapas nitaq respetanqachu mayqen dioskunatapas, payqa llapankumantapas aswan allinpaqmi qhawarikunqa. 38 Payqa allin perqasqa wasikunata waqaychaq diostan jatunchanqa. Ñaupa taytankuq mana reqsisqan diostan qoriwan, qolqewan, ancha munay rumikunawan, valorniyoq cosaskunawan ima jatunchanqa. 39 Payqa juj dioswan kuskan* allin perqasqa llaqtakunata imachus munasqanta ruwanqa. Yanapaqninkunatan jatunchanqa, askha llaqtakunatan qonqa kamachinankupaq. Allin pagaq runakunamanmi jallp’ata rakinqa.

40 ”Tukukuy p’unchaypin uray lado reyqa paywan maqanakuq jamunqa.* Wichay lado reypas paywan maqanakuqmi jamunqa carretakunantin, caballopi sillaykusqa soldadokunantin, barcokunantin ima. Paymi suyukunaman unu jinaraq junt’aykunqa. 41 Munay Jallp’a nisqamanpas phawaykunqan.+ Askha suyukunatan urmachinqa. Ichaqa paymantan ayqekunqaku Edom runakuna, Moab runakuna, allin reqsisqa Anmón runakunapiwan. 42 Payqa juj suyukunamanwanmi phawaykunqa. Egipto nacionpas manan paymantaqa ayqekunqachu. 43 Egiptopi pakasqa qoripas, qolqepas, ancha valorniyoq kaqkunapas paypa makinpin kapunqa. Libia runakunapas Etiopía runakunapas paytan qatikunqaku.*

44 ”Ichaqa inti lloqsimuy ladomanta wichay ladomanta willakuykunan paytaqa llakichinqa. Chaymi payqa sinchi phiñasqa maqanakuq lloqsimunqa, jinaspa askha runakunata ch’usaqyachinqa. 45 Paymi karpakunqa jatun lamar-qochawan Munay Jallp’a nisqapi kaq ch’uya orqowan tupaypi.+ Chaymantaqa chinkachisqan kanqa, manataqmi pipas yanapaqnin kanqachu.