Deuteronomio

5 Chaymantataq Moisesqa llapa Israel runakunata juñuspa nirqan: “Israel runakuna, uyariychis kay willasqay kamachikuykunata leykunatapas. Llapantan chaykunataqa allinta yachankichis, allintan junt’ankichispas. 2 Jehová Diosninchismi Horeb orqopi noqanchiswan rimanakurqan.+ 3 Jehová Diosqa manan ñaupa taytanchiskunawanchu rimanakurqan aswanpas noqanchiswanmi, llapa kaypi kashaqkunawan. 4 Chay orqopin Jehová Diosqa nina ukhumantapacha qankunawan uya-uyapura rimarqan.+ 5 Chay kutipin noqaqa Jehová Dioswan qankunawan chaupipi kasharqani+ Jehová Diospa imachus nisqanta qankunaman willanaypaq. Ninata manchakuspan qankunaqa mana chay orqoman wichayta munarqankichischu.+ Paymi nirqan:

6 ”Noqan Jehová Diosniyki kani, noqan Egiptopi esclavo kasqaykimanta orqomurqayki.+ 7 Amapunin noqamanta waj diosniykikunaqa kanqachu.+

8 ”Aman ima idolotapas ni ima imagentapas* ruwakunkichu,+ janaq pachapi kaqman rijch’akuqtapas, kay pachapi kaqman rijch’akuqtapas, ni unu ukhupi kaqman rijch’akuqtapas. 9 Aman chaykunaman k’umuykunkichu, amallataqmi aysachikunkichu chaykuna serviymanqa.+ Noqa Jehová Diosniykiqa noqallata yupaychawanankutan munani.+ Cheqnikuwaqniy taytakunataqa castigasaqmi juchankumanta. Chay castigoqa chayanqan wawankunaman, nietonkunaman, nietonkunaq wawankunamanpas.+ 10 Munakuwaqniykunaman, kamachisqaykunata kasukuqkunamanmi ichaqa waranqa-waranqa miraykama mana tukukuq munakuyta* rikuchishallani.

11 ”Aman noqa Jehová Diosniykiq sutiytaqa yanqapaq oqarinkichu.+ Noqa Jehová Diosqa castigasaqmi pipas sutiyta yanqapaq oqariqtaqa.+

12 ”Samana p’unchayqa noqapaq t’aqasqa p’unchaymi, noqa Jehová Diosniykiq kamachisqayman jinan chay p’unchaytaqa waqaychanki.+ 13 Soqta p’unchayllan llank’anki, soqta p’unchayllan ima ruwanaykitapas ruwanki.+ 14 Qanchis kaq p’unchayqa noqa Jehová Diosniykipaq t’aqasqa p’unchaymi.+ Chay p’unchayqa aman imapipas llank’ankichu.+ Aman churiykipas, ususiykipas, qhari kamachiykipas ni warmi kamachiykipas llank’anqachu. Aman toroykipas, asnoykipas ni ima uywaykipas llank’anqachu. Amallataqmi llaqtaykipi tiyaq forastero runapas llank’anqachu.+ Qhari kamachiykipas, warmi kamachiykipas qan jinan samanqa.+ 15 Aman qonqankichu Egipto jallp’api esclavo kasqaykita, chaymanta noqa Jehová Diosniykiqa atiyniywan* kallpaywan orqomusqaytapas.+ Chayraykun noqa Jehová Diosqa kamachirqayki samana p’unchayta waqaychanaykipaq.

16 ”Tayta-mamaykitan sumaqta qhawarinki,+ noqa Jehová Diosniykiq kamachisqayman jinan chaytaqa ruwanki, chhaynapin noqa Jehová Diosniykiq qonay jallp’api unayta kausanki, allillanmi imapas kasunki.+

17 ”Aman pitapas wañuchinkichu.+

18 ”Aman jujwan pantankichu.+

19 ”Aman suwakunkichu.+

20 ”Aman runamasiykimantaqa llullakuspa testigankichu.+

21 ”Aman runamasiykiq warminta munapayankichu.+ Aman runamasiykiq wasinta, jallp’anta, qhari kamachinta, warmi kamachinta, toronta, asnonta, ni imantapas munapayankichu,+ nispa.

22 ”Chay kamachikuykunatan Jehová Diosqa kunkayoqta llapaykichisman orqopi willarqasunkichis. Chaykunatan payqa rimamurqan nina ukhumanta, manchay yana phuyu ukhumanta.+ Chaykuna nimusqanmanqa manan imatapas yaparqanchu. Chay kamachikuykunatan iskay p’alta rumikunapi qelqarqan, jinaspa noqaman qomuwarqan.+

23 ”Chay tutayaq ukhumanta Diospa kunkanta uyarispa jinan orqopi nina raurashaqtin,+ aylluykichiskunapi umallikunaqa, umalliqkunapas* noqaman jamurqanku. 24 Jinaspa niwarqanku: Ñan rikuykuña Jehová Diosninchispa lliflli kayninta jatun atiynintapas, uyariykuñan nina ukhumanta rimamusqantapas.+ Kunanmi kayta yachayku, Diosqa rimasqamá runakunawanpas, manamá runaqa Diospa kunkanta uyarispaqa wañusqachu.+ 25 Chaywanpas manchakushaykun chay nina ruphawanankumanta. Jehová Diosninchispa kunkanta uyarishallasaqku chayqa paqtapas wañuykuman. 26 Manan pipas kausanmanchu nina ukhumanta kausaq Dios rimapayamuqtinqa. 27 Chayrayku qan asuykuy Jehová Diosninchispa llapa imachus nisqanta uyariq. Qanña willawankiku Jehová Diosninchispa imachus nisqanta, noqaykutaq qanta uyarispa kasukusaqku,+ nispa.

28 ”Jehová Diosqa uyarisharqanmi qankunaq niwasqaykichista, chaymi Jehová Diosqa niwarqan: Uyarinin chay runakunaq imachus nisqankuta, allintan paykunaqa rimashanku.+ 29 ¡May allinchá kanman tukuy tiempo chhayna sonqollayoq kankuman chayqa! Maytan munayman tukuy tiempo manchakuwanankuta,+ kamachisqaykunata kasukunankutapas.+ Chayta ruwankuman chayqa tukuy tiempon allillan kankuman paykunapas wawankunapas.+ 30 Phaway paykunata nimuy: Karpaykichisman kutipuychis, nispa. 31 Qan ichaqa kayllapi noqawan qhepakunki, qanmanmi qosayki llapa kamachikuykunata leykunatapas, chaykunatan paykunaman willanki, chay kamachikuykunata kasukuspan jap’ikapunanku jallp’apiqa tiyanqaku, nispa. 32 Chhaynaqa Jehová Diosniykichispa llapa imachus kamachisqanman jinapunin imatapas ruwankichis,+ aman pañamanpas lloq’emanpas rinkichischu.+ 33 Jehová Diosniykichispa ñannillanpin tukuy yuyaywan purinkichis,+ chhaynapin jap’ikapunaykichis jallp’apiqa allillan kankichis, unaytataqmi kausankichispas.+