Judas
1 Jesucristoq kamachin Santiagoq* wayqen+ noqa Judasmi qelqamushaykichis qankuna Taytanchis Diospa munakusqan wajasqakunaman,+ arí, qankuna Jesucristopaq waqaychasqa kaqkunaman:+
2 Diospa khuyapayakuynin, thaj kaynin, munakuyninpas qankunapi astawanraq yapakuchun.
3 Munasqa wayqe-panaykuna, maytapunin kallpachakusharqani imaynatachus Dios salvawasunchis chaymanta qelqamunaypaq.+ Ichaqa obligasqan rikukuni iñiyniykichisrayku anchatapuni kallpachakunaykichismanta qelqamunaypaq,+ chay iñiyqa juj kutillatan ch’uya runakunaman wiñaypaq qosqa karqan. 4 Diospa simin qelqan ñaupaqmantaña willarqan wakin runakuna juzgasqa kanankumanta, chay runakunan mana reparaylla qankuna ukhuman jaykumushanku; chay runakunaqa manan manchakunkuchu Diosta, aswanmi paykunaqa Diospa khuyapayakuyninta q’ewispa mana p’enqarikuspa juchallapi* purishanku,+ chhaynapin sapallan dueñonchis Señor Jesucristotapas neganku.+ Chaymi kay cartata qelqamushaykichis.
5 Imakunatachus nimusaykichis chaykunata allintaña yachankichis chaypas, yuyarichiytan munaykichis. Jehová* Diosmi Egipto llaqtamanta askha runakunata orqomurqan,+ mana iñiq runakunatan ichaqa qhepaman ch’usaqyachipurqan.+ 6 Maypichus kanankuta, maypichus tiyanankuta saqepuq angelkunatapas+ laqhayaq* ukhupin wiñaypaq watarqan, chhaynapi jatun p’unchaypi juzgasqa kanankupaq.+ 7 Chay angelkuna jinan Sodoma Gomorra llaqtakuna, muyuriqninpi kaq llaqtakunapas sinchi qhelli jucha* ruwayman qokurqanku, aychankuq munasqanman jinan paykunaqa millay mana ruwana kaqkunatawanraq ruwarqanku.+ Chay llaqtakunapas ch’usaqyachisqan karqanku, arí, paykunaqa ninawanmi wiñaypaq ch’usaqyachisqa karqanku, chhaynapi chaykunata yachaspa ama paykuna jinachu kananchispaq.+
8 Chaykunata yachashaspapas pantasqa yuyaynillankupin musphashanku chay runakunaqa. Paykunaqa aychata qhellichaspan purinku, autoridadtapas* pisichankun, Diospa jatunchasqan runakunamantapas millaytan rimanku.+ 9 Arcángel*+ Miguelmi+ ichaqa Moisespa cuerponmanta+ Saqrawan churanakushaspa mana paychu jatunchakuspa juchacharqan, nitaqmi millay simikunawanchu imatapas nirqan,+ aswanmi nirqan: “Jehová* Diosmi anyasunki”,+ nispa. 10 Chay runakunan ichaqa imachus mana entiendesqankumantapas millayta rimanku.+ Paykunaqa animalkuna jina mana yuyayniyoqkunan kanku, animalkuna jinallataqmi imatapas entiendenku,+ chayman jina imatapas ruwaspataq qhellichakushanku.
11 ¡Ay imaraqmi paykunamanta kanqa! Paykunaqa Cainpa ñanninmanmi jaykupunku,+ pagota chaskinankuraykun usqhaylla Balaampa pantasqa ñanninmanpas jaykupunku,+ Coré jinataqmi+ mana kasukuspa rimapakushankupas,+ chaymi pay jina ch’usaqman tukuchisqa kanqaku. 12 Paykunaqa wayqe-panantin mijusqaykichispin qankunawan kusirikushanku, ichaqa unu ukhupi rumikuna jinan kanku.+ Chaymantapas mana manchakuspa paykuna kikinkuta michikuqkuna;+ kayman jaqayman wayraq apakachasqan mana unuyoq phuyukuna;+ tiemponpi mana ruruq, iskay kutita wañuq,* saphinmanta t’irasqa sach’akuna iman kanku. 13 Phiñasqa lamar-qochaq phoqchiriynin jinan paykunaqa p’enqay ruwasqankutapas phosoqota jinaraq aqtumushanku,+ kayman jaqayman phawakachaq ch’askakunan kankupas, chaymi paykunaqa sinchi laqhayaqman wiñaypaq wijch’uykusqa kanqaku.+
14 Adanmantapacha qanchis kaq miray Enocpas+ ñaupaqmantaraqmi paykunamanta nirqan: “Jehová* Diosmi chunkay-chunka waranqa ch’uya angelninkunawan jamurqan+ 15 llapa runakunata juzgananpaq,+ payta mana manchakuqkunata castigananpaqwan. Diosqa chayta ruwanqa sinchi millay kaqkunata ruwasqankurayku, pay contra millayta rimaq juchasapakuna kasqankurayku iman”,+ nispa.
16 Chay runakunaqa rimapakuqkunan kanku,+ quejakushallankun vidankumantapas, imachus munasqallankutan ruwanku,+ sinchi alabakuqmi kankupas, imatapas chaskinankuraykullataqmi jujkunatapas alabanku.+
17 Qankuna ichaqa, munasqa wayqe-panaykuna, yuyariychis ñaupaqmantapacha Señorninchis Jesucristoq apostolninkuna* imachus nisqasuykichista, 18 paykunan niq kasunkichis: “Tukukuy tiempopiqa millay asipayakuq runakunan rijurimunqaku, paykunan Diosta mana manchakuspa munasqankuman jina imatapas ruwanqaku”,+ nispa ¿riki? 19 Paykunaqa t’aqanachiqkunan kanku,+ animalkuna jinan imatapas ruwanku, manataqmi Diospa espiritunpas paykunapi kanchu. 20 Qankuna ichaqa, munasqa wayqe-panaykuna, ch’uyay-ch’uya iñiyniykichispi wiñaychis, santo espirituq yanapayninwantaq Diosmantapas mañakuychis,+ 21 chhaynapi paypa munakuynillanpi kashanaykichispaq;+ chaymantapas Señorninchis Jesucristoq wiñay kausayman apaq khuyapayakuyninta suyakushallaychis.+ 22 Jinaspapas khuyapayashallaychis+ iskayaqkunata,+ 23 paykunata salvaychis+ ninamanta orqorparispaykichis. Ichaqa jujkunatapas khuyapayashallaychis kikiykichista cuidakuspaykichis, aychankuq qhellichasqan p’achatapas millakuspaykichis.+
24 Diosqa atiyniyoqmi urmanaykichismanta cuidanasuykichispaq, lliflli kayninpa ñaupanpi ancha kusisqata mana k’iñasqata sayachinasuykichispaqpas.+ 25 Pay sapallanmi salvawaqninchisqa,* chayrayku Señorninchis Jesucristowan paypaq kachun qhapaq kaypas, jatunchaypas, atiypas, kamachikuq kaypas, wiñay-wiñaymanta, kunanpas, wiñay-wiñaypaqpas. Amén.*