Jueces

20 Chay jawan Israel runakunaqa Dan ayllu+ wichaymantapacha Ber-Seba uraykama llapanku Mizpá llaqtaman juñukamurqanku,+ Galaad+ chimpakunamantapas llapankun jamurqanku. Paykunaqa juj nisqallan Jehová Diospa ñaupanman juñukamurqanku. 2 Israel llaqta ayllukunapi umallikunapas llapallankun chaypi kasharqanku. Llapanpiqa tawa pachaj waranqa soldadokunan espadantinkama+ chaypi kasharqanku.

3 (Benjamín ayllu runakunan Israel runakuna Mizpá llaqtapi juñukusqankuta yacharurqanku).

Israel runakunan Leví ayllu runata nirqanku: “Willawayku, ¿imaynapin chay sinchi mana allin ruway pasarqan?”,+ nispa. 4 Jinan wañuq warmiq qosan Leví ayllu runaqa+ nirqan: “Tiyaqmasiy warmiwan kuskan Benjamín ayllupi kaq Guibeá+ llaqtaman alojakuq chayarqayku. 5 Jinaspan chay llaqta runakunaqa alojakusqayku wasiman tutallapi jamurusqaku. Paykunaqa noqatan wañuchiyta munashawarqanku, ichaqa noqata dañota ruwawanankumantaqa tiyaqmasiytan violarqanku. Chayraykun payqa wañukapurqan.+ 6 Jinan noqaqa tiyaqmasiy warmiq cuerponta kuchuspa Israel llaqtapi sapanka aylluman apachimurqani,+ kay Israel llaqtapi khayna mana allin ruway pasasqanrayku. 7 Kunanqa qankunayá Israel llaqta runakuna allinta chayta qhawariychis, chayman jina imatapas ruwanapaq”,+ nispa.

8 Chaymi Israel llaqta runakunaqa juj nisqalla jatarispa nirqanku: “Ama noqanchismanta jujpas karpanchisman ni wasinchismanpas kutisunchu. 9 Aswanpas sorteasun pikunachus Guibeá llaqta runakunawan maqanakuq rinqaku chaypaq.+ 10 Llapa Israel ayllukunamanta runakunata ajllasun mijunata apamunankupaq pachajmanta chunkata, waranqamanta pachajta, chunka waranqamanta waranqata. Chhaynapi llapa soldadokuna Benjamín ayllupi kaq Guibeá llaqta runakunawan maqanakuq rinankupaq, manan jinataqa qhawasunmanchu Israel llaqtapi kay mana allin ruwaytaqa”, nispa. 11 Jinan Israel llaqta runakunaqa juj nisqalla juñukurqanku Guibeá llaqta contra maqanakunankupaq.

12 Israel llaqta runakunan Benjamín ayllu runakunaman willachimurqanku: “¿Imaraykun llaqtaykichispi chay sinchi mana allin ruway pasarqan? 13 Kunanqa chay Guibeá llaqtapi mana valeq runakunata entregawayku+ wañuchinaykupaq, chhaynapi Israel llaqtamanta chinkachisun mana allin ruwaykunata”,+ nispa. Benjamín ayllu runakunan ichaqa mana kasukurqankuchu wayqenkunaq imachus nisqanta.

14 Jinan Benjamín ayllupi kaq llaqtakunamanta runakunaqa llapallanku Guibeá llaqtapi juñukurqanku Israel llaqta runakunawan maqanakunankupaq. 15 Chay p’unchaymi Benjamín ayllupi llaqtakunamanta runakunaqa iskay chunka soqtayoq waranqa juñukurqanku, paykunaqa llapallankun espadantinkama kasharqanku. Chaymantapas kallarqantaqmi Guibeá llaqtamanta qanchis pachaj allin maqanakuq kallpasapa soldadokunapas. 16 Chay ejercitopin karqan qanchis pachaj allin lloq’enchu soldadokuna. Paykunaqa allin warak’aqkunan karqanku, warak’aspaqa juj chujchatapas jap’irachillankumanmi karqan.

17 Israel llaqtapi wakin ayllukunataq tawa pachaj waranqa soldadokunata+ juñurqanku, paykunaqa allin experienciayoq soldadokunan karqanku. 18 Paykunan Betel llaqtata rispa Diosta tapurqanku:+ “¿Pin Benjamín ayllu runakunawan maqanakunaykupaq ñaupaykuta rinqa?”, nispa. Jehová Diostaq nirqan: “Judá ayllu runakunan ñaupaykichista rinqa”, nispa.

19 Chay qhepamantaq Israel llaqta runakunaqa tutallamanta sayarispa Guibeá llaqta qayllapi karpakurqanku paykunawan maqanakunankupaq.

20 Jinan Israel llaqta runakunaqa Benjamín ayllu runakunawan maqanakuq rirqanku, jinaspa Guibeá llaqtaq chimpanpi guerrapaq listo formakurqanku. 21 Chay p’unchaymi Benjamín ayllu runakunaqa Guibeá llaqtamanta lloqsimuspanku iskay chunka iskayniyoq waranqa Israel runakunata wañuchirqanku. 22 Israel runakunan ichaqa ñaupaq p’unchay formakusqanku lugarpi jujmanta mana manchakuspa guerrapaq formakullarqankutaq. 23 Chaymantapas Israel runakunaqa Betel llaqtata rispankun Jehová Diospa ñaupanpi tutakama waqaykurqanku, jinaspa Jehová Diosta nirqanku: “¿Risaqkuchu wayqeyku Benjamín runakunawan maqanakuq, icha amañachu?”,+ nispa. Jehová Diostaq nirqan: “Rillaychis”, nispa.

24 Jinan Israel runakunaqa iskay kaq p’unchaypi jujmanta Benjamín ayllu runakunawan maqanakuq rirqanku. 25 Benjamín ayllu runakunapas jujmantan iskay kaq p’unchaypi Guibeá llaqtamanta lloqsimurqanku, jinaspa wañuchirqanku chunka pusaqniyoq waranqa espadawan armasqa Israel soldadokunata.+ 26 Jinan Israel llaqta runakunaqa llapanku Betel llaqtaman rispanku Jehová Diospa ñaupanpi tiyaykuspa waqaykurqanku+ ayunarqanku+ ima, chaytan ruwarqanku tutakama. Chaymantapas ruphachina ofrendata,+ sumaq kausay ofrendata+ iman Jehová Diosman jaywarqanku. 27 Chay tiempopaqqa Betel llaqtapin Jehová Diospa rimanakuynin arcaqa kasharqan, jinan Israel llaqta runakunaqa Diosta chaypi tapurqanku:+ 28 “¿Risaqkuchu wayqeyku Benjamín ayllu runakunawan maqanakuq, icha amañachu?”,+ nispa. Jehová Diostaq nirqan: “Riychis, paqarinqa qankunawanmi atipachimusaykichis”, nispa. Chay p’unchaykunaqa Eleazarpa wawan Finehasmi+ sacerdote kasharqan, payqa Aaronpa nietonmi karqan. 29 Israel llaqta runakunan Guibeá llaqta muyuriqman runakunata churarqanku chay llaqtaman qonqaylla phawaykunankupaq.+

30 Kinsa kaq p’unchaymi Israel llaqta runakunaqa jujmanta lloqsimullarqankutaq Benjamín ayllu runakunawan maqanakuq, jinaspa ñaupaq kutikunapi jina Guibeá llaqtaq chimpanpi guerrapaq formakurqanku.+ 31 Benjamín ayllu runakuna guerraman lloqsimuqtintaq Israel runakunaqa ayqerikurqanku, jinan Benjamín ayllu runakunaqa ñaupaq kutikunapi jina Israel runakunata qatiparqanku, chhaynapin llaqtankumanta karunchakurqanku.+ Chaymantapas wakin runakunatan wañuchirqanku Betelman riq ñankunapi Guibeaman riq ñankunapi ima, yaqa kinsa chunka runakunatan wañuchirqanku.+ 32 Benjamín ayllu runakunan nisharqanku: “Ñaupaq kutikunapi jinan atiparushanchis”,+ nispa. Israel runakunataq nisharqanku: “Jaku jatun ñankunaman ayqekusunchis, chhaynapi llaqtankumanta karunchakunankupaq”, nispa. 33 Jinaspan Israel llaqta runakunaqa llapanku maypichus kasqankumanta lloqsimuspa Baal-Tamar nisqapi guerrapaq formakurqanku. Guibeá llaqta cercapi pakakuq Israel runakunapas pakakusqankumanta lloqsimuspan phawaykullarqankutaq. 34 Israelmanta chunka waranqa allin maqanakuq soldadokunan Guibeá llaqtaq chimpanman chayamurqanku, chaypin sinchita maqanakurqanku. Benjamín ayllu runakunaqa manan reparakurqankuchu lliu ch’usaqyachisqa kanankuta.

35 Chay p’unchaypin Israel llaqta runakunaqa iskay chunka pisqayoq waranqa pachaj Benjamín ayllu runakunata wañuchirqanku.+ Chhaynapin Jehová Diosqa Israel runakunaq ñaupanpi atiparqan Benjamín ayllu runakunata.+

36 Israel llaqta runakunaq ayqekusqanta rikuspan Benjamín ayllu runakunaqa atipanankupaq piensasharqanku.+ Israel runakunan ichaqa ayqekusharqanku Guibeá llaqta muyuriqpi pakakuq soldadokuna phawaykamunanpi confiaspa.+ 37 Chay pakakuq soldadokunaqa usqhayllan Guibeá llaqtaman phawaykamurqanku, jinaspa chay llaqtapi tiyaq runakunata espadawan wañuchiyta qallarirqanku.

38 Israel runakunaqa ñan rimanakusqakuña pakakuq soldadokuna Guibeá llaqtaman jaykuspa señalta jina q’osñita sayarichimunankupaq.

39 Israel runakuna ayqekuqtinmi Benjamín ayllu runakunaqa qatipaspa yaqa kinsa chunka Israel runakunata wañuchirqanku.+ Paykunan nisharqanku: “¡Qhawariychis! Ñaupaqpi jinan atipashanchis”,+ nispa. 40 Chayllamanmi Guibeá llaqtamanta q’osñi sayarimurqan, chaymi rimanakusqankuman jina señal karqan. Benjamín ayllu runakuna qhepankuta qhawarikunankupaqtaq llaqtankuqa rauraripushasqaña, q’osñipas altomanraqmi jatarishasqa. 41 Jinan ayqekuq Israel runakunaqa kutirimurqanku, Benjamín ayllu runakunataq chaykunaq pasasqanta rikuspa sinchita mancharikurqanku. 42 Jinaspa ch’inneq ladokunaman ayqekurqanku, ichaqa manan maymanpas ayqeyta atirqankuchu. Llaqtamanta jamuq runakunapas paykunata wañuchispan jamusharqanku. 43 Benjamín ayllu runakunaqa manapuniñan maymanpas ayqekuyta atirqankuchu. Israel runakunaqa mana samaspan paykunata qatikacharqanku. Jinan Guibeá llaqtaq chimpanpi, inti lloqsimuy ladopi paykunata atipapurqanku. 44 Chaypiqa chunka pusaqniyoq waranqa Benjamín ayllu runakunan wañurqanku, paykunaqa allin maqanakuq kallpasapa soldadokunan karqanku.+

45 Wakin Benjamín ayllu runakunataq kutirispanku ch’inneq ladoman ayqekurqanku, Rimón qaqa-qaqaman.+ Chaypin Israel runakunaqa jatun ñankunapi pisqa waranqa runakunata wañuchirqanku. Wakintataq Guidon ladokama qatirqanku, chaypin iskay waranqa soldadokunata wañuchillarqankutaq. 46 Llapanpiqa iskay chunka pisqayoq waranqa Benjamín ayllu soldadokunan chay p’unchaypi wañurqanku,+ paykunaqa llapankupas allin maqanakuq kallpasapa soldadokunan karqanku. 47 Soqta pachaj runakunan ichaqa ch’inneq ladoman ayqekuspa Rimón qaqa-qaqapi pakakamurqanku, chaypin paykunaqa tawa killa kasharqanku.

48 Chay qhepamanpas Israel llaqta runakunaqa Benjamín ayllupi kaq llaqtakuna contran kutirimurqanku, jinan chay llaqtakunapi runakunatapas uywakunatapas, llapa qhepaqkunatapas lliuta espadawan wañuchirqanku. Chaymantapas llapa tarisqanku llaqtakunatan ninawan kanaykurqanku.