Lucas

10 Chaykuna qhepamantaq Señorqa discipulonkuna ukhumanta qanchis chunkatawan ajllaspa iskay-iskaymanta ñaupachirqan+ lliu maymanchus rinan karqan chay llaqtakunaman ayllukunamanwan. 2 Paykunatan nirqan: “Cosechanaqa askhapunin kashan, llank’aqkunan ichaqa pisilla kanku, chayrayku cosecha oqarichiq dueñota rogakuychis cosechanman llank’aqkunata kachamunanpaq.+ 3 Riychis, noqan qankunata lobokuna* chaupipi ovejakunata jina kachashaykichis.+ 4 Aman apankichischu qolqeta* ni qoqawatapas ni usut’atapas,+ amallataq pitapas ñanpiqa napaykunkichischu.* 5 Maypipas juj wasiman jaykuspaykichisqa ñaupaqtan ninkichis: Thaj kay kachun kay wasipaq,+ nispa. 6 Pillapas chay wasipi thaj kausay kananta munaq kanqa chayqa, thaj kayniykichismi paywan qhepakunqa; mana kaqtintaq thaj kayniykichis qankunaman kutimpusunkichis. 7 Chay wasipin qhepakunkichis*+ imachus qosqasuykichista mijuspa ujaspa ima,+ llank’aqqa chaskinanpunin pagontaqa.+ Aman juj-juj wasikunapiqa alojakunkichischu.

8 ”May llaqtaman jaykuqtiykichispas chaypi allinta chaskisunkichis chayqa, imatachus jaywarisqasuykichistan mijunkichis. 9 Chaymantapas chay llaqtapi onqosqakunatan qhaliyachinkichis, ninkichistaq: Diospa gobiernonmi qankunaman qayllaykamunña,+ nispa. 10 Ichaqa may jaykusqaykichis llaqtapipas mana chaskisunkichischu chayqa, llaqtankupi jatun callekunaman lloqsispan ninkichis: 11 Llaqtaykichis polvo chakiykuman k’askakuqtawanpas qankuna contran chhafchirpariyku;+ ichaqa yachaychis, Diospa gobiernonmi qayllaykamunña, nispa. 12 Niykichismi: Juicio p’unchaypiqa* chay llaqtan aswan castigasqa kanqa Sodoma llaqtamantaqa.+

13 ”¡Ay qanmanta, Corazín llaqta! ¡Ay qanmanta, Bejsaida llaqta! Qankunapi jinachus Tiro llaqtapi Sidón llaqtapipas milagrokunata ruwakunman karqan chayqa, mayñachá juchankumanta pesapakunkuman karqan qhasqa telawan churakuspa usphapi tiyaykuspa+ ima. 14 Chayraykun juicio p’unchaypiqa qankuna aswan castigasqa kankichis Tiro llaqtamanta Sidón llaqtamantapas. 15 Qanri, Capernaún llaqta, ¿janaq pachakamachu oqarisqa kanki? ¡Manapunin! Aswanpas Sepulturamanmi* uraykunki.

16 ”Pipas qankunata uyariqqa noqatawanmi uyariwan,+ pipas qankunata mana uyariyta munaqmi ichaqa noqatapas mana uyarishawanchu. Pipas noqata mana uyariyta munaqtaq kachamuwaqniytapas mana uyarishanchu”,+ nispa.

17 Jesuspa qanchis chunka discipulonkunan kusisqa kutimuspa nirqanku: “Señor, sutiykipi kamachiqtiykuqa supaykunaraqmi kasukuwanku”,+ nispa. 18 Chayta niqtinkun Jesusqa paykunata nirqan: “Satanastan rikuni cielomanta chayamuq llifllikiy jinaraq urmaykuqta.+ 19 Noqan qankunaman atiyta qoykichis mach’aqwaykunata, alacrán kurukunata, enemigoq lliu atiynintawan saruykachanaykichispaq,+ manan ni imapas imanasunkichispaschu. 20 Ichaqa ama espiritukunaq kasukusqasuykichisraykuchu kusikuychis, aswanpas sutiykichis janaq pachapi qelqasqa kasqanrayku kusikuychis”,+ nispa. 21 Chay ratun Jesusqa santo espirituq junt’aykusqan kaspa ancha kusikuywan nirqan: “Taytáy, janaq pachaq kay pachaq Señornin, llapa runakunaq ñaupanpin jatunchayki, qanmi kaykunata pakarqanki yachayniyoq, allin umayoq runakunamanta,+ jinaspa wawa jina kaqkunaman entiendechirqanki. Arí, Taytáy, chhayna ruwayqa munasqaykiman jinan karqan”,+ nispa. 22 Jesusqa nillarqantaqmi: “Taytayqa tukuy imaymanatan noqaman qowan; manan pipas yachanchu pichus Churi kasqantaqa, aswanpas janaq pacha Taytallan; manallataqmi pipas yachanchu pichus janaq pacha Tayta kasqantaqa, aswanpas Churillan,+ pimanchus Churi reqsichiyta munan chayllapiwanmi yachan”,+ nispa.

23 Discipulonkunaman kutirispataq Jesusqa sapaqllapi paykunata nirqan: “Kusisqan kanku rikusqaykichista rikuq ñawikunaqa.+ 24 Cheqaqtan niykichis: Askha profetakuna reykuna iman imakunachus rikusqaykichista rikuyta munarqanku, ichaqa manan rikurqankuchu;+ imakunachus uyarisqaykichistapas uyariyta munarqanku, ichaqa manallataqmi uyarirqankuchu”, nispa.

25 Chayllamanmi kamachikuy simita allinta yachaq runa sayarispa Jesusta pruebaman churananpaq nirqan: “Yachachikuq, ¿imatan ruwanay wiñay kausayta chaskinaypaq?”,+ nispa. 26 Jinan Jesusqa payta tapurqan: “¿Iman kamachikuy simipi qelqasqa kashan? ¿Imatan entienderqanki?”, nispa. 27 Chay runataq nirqan: “Jehová* Diosniykitan munakunki tukuy sonqoykiwan, tukuy almaykiwan,* tukuy kallpaykiwan, tukuy yuyayniykipiwan,+ runamasiykitapas qan kikiykita jinan munakunki,+ ninmi”, nispa. 28 Jesustaq nirqan: “Allintan ninki; chayta ruwamushallay, jinan wiñay kausayta chaskinki”,+ nispa.

29 Paytaq ichaqa chanin runapaq qhawarichikuyta munaspa+ Jesusta tapurqan: “¿Pipunitaq runamasiyri?”, nispa. 30 Jinan Jesusqa nirqan: “Juj runan Jerusalenmanta Jericó llaqtaman uraykamusharqan, jinan paytaqa suwakuna jap’ispa lliuta ch’utipurqanku maqaykurqanku ima, wañunayashaqta wijch’uspataq pasapurqanku. 31 Chayllamanmi juj sacerdote chay ñanninta uraykamurqan, chay runata rikuspataq chimpallanta pasaykurqan. 32 Kaqllataq juj Leví runapas chayman chayaspa chay runata rikuruspa juj ladollanta pasaykurqan. 33 Chaynintan rishallarqantaq Samaria llaqtayoq runapas,+ paymi ichaqa chay runata rikuspa mayta khuyapayaykurqan. 34 Payman qayllaykuspataq aceitewan vinowan ima k’irinkunata jampispa wataykurqan. Jinaspan asnonman churaykuspa alojakuna wasiman aparqan, chaypin paytaqa cuidarqan. 35 Qhepantin p’unchaytaq iskay denario qolqeta* alojakuna wasipi dueñoman qorqan, jinaspa nirqan: Payta qhawariykapuwanki. Astawan gastanki chayqa, kutimuspayña pagapusayki, nispa. 36 Chay kinsantinkumanta, ¿mayqentaq karqan suwakunaq jap’isqan runaq runamasinri?”,+ nispa. 37 Jinan payqa nirqan: “Payta khuyapayaqmi”,+ nispa. Chaymi Jesusqa nirqan: “Phaway qanpas chhaynallatataq ruwamuy”,+ nispa.

38 Chaymanta rishaspankun paykunaqa juj aylluman jaykurqanku. Chaypin Marta+ sutiyoq warmiqa wasinpi sumaqta Jesusta chaskirqan. 39 Paypan karqan juj ñañan María sutiyoq, paymi Señorpa ñaupanpi tiyaykuspa yachachisqanta uyarisharqan. 40 Martataq ichaqa imaymana ruwaykunapi afanasqa kasharqan. Jinan payqa Jesusman asuykuspa nirqan: “Señor, ñañaymi sapallayta saqerparimuwan imaymana ruwanakunantinta, ¿manachu imaninkipas mana yanapawasqanmanta? Niykapuwayyá yanapawananpaq”, nispa. 41 Señortaq payta nirqan: “Marta, Marta, imaymanakunawanmi nishu afanasqa kashanki. 42 Manan imaymanakunatachu necesitakun, aswanpas pisillatan otaq jujllata. Mariaqa aswan allin kaqtan ajllakun,+ manataqmi pipas chaytaqa qechunqachu”, nispa.