Mateo

22 Wajmantan Jesusqa rijch’anachiykunata* willarqan, nirqanmi: 2 “Janaq pacha gobiernoqa kaymanmi rijch’akun: Juj reymi casarakuy fiestata+ churinpaq ruwarqan. 3 Chay reymi kamachinkunata kacharqan casarakuy fiestaman invitasqa runakunata wajamunankupaq, paykunan ichaqa mana jamuyta munarqankuchu.+ 4 Juj kamachinkunatan wajmanta kachallarqantaq, paykunatan nirqan: Invitasqakunata nimuychis: Wayk’uchiniñan mijunata, toroykunapas wirayachisqa uywaykunapas ñak’asqañan kashan, tukuy imapas listoñan kashan. Jamuychis casarakuy fiestaman, nispa. 5 Invitasqakunan ichaqa mana uyariqpas tukurqankuchu, aswanmi ripurqanku wakin chajrankuman, wakintaq negocionkuman;+ 6 wakintaqmi reypa kamachinkunata jap’ispa millayta k’amiykurqanku maqaykurqanku ima, jinaspa wañuchipurqanku.

7 ”Chaywanmi reyqa sinchita phiñakurqan, chaymi soldadonkunata kacharqan, paykunataq chay wañuchiqkunata wañuchipurqanku, llaqtankutapas kanaykapurqanku.+ 8 Chaymantataq reyqa kamachinkunata nirqan: Casarakuy fiestapaqqa tukuy imapas listoñan kashan, invitasqakunan ichaqa mana chaypaq jinachu karqanku.+ 9 Chayrayku, jatun ñankunaman riychis, jinaspa llapa tarimusqaykichis runakunata kay casarakuy fiestaman wajamuychis,+ nispa. 10 Chaymi chay kamachikunaqa ñankunaman lloqsispa llapa tarisqanku runakunata juñumurqanku, allin runakunaña mana allin runakunaña karqanku chaypas; chhaynapin casamiento wasiqa invitasqakunawan* junt’a kasharqan.

11 ”Invitasqa runakunata qhawaq jaykuspanmi reyqa chaypi rikurqan casarakuy p’achawan mana p’achasqa runata. 12 Chaymi reyqa nirqan: Amigo, ¿imaynapitaq kaymanri jaykumurqanki casarakuy p’achawan mana p’achasqa?, nispa. Paytaq ch’inlla karqan. 13 Jinan reyqa kamachinkunata nirqan: Makintawan chakintawan wataruspa tutayaq jawaman wijch’umuychis. Chaypin payqa waqanqa, mana imanakuyta atispataq kiruntaraq k’achachachinqa, nispa.

14 ”Askhan invitasqakunaqa, pisillataqmi ajllasqakunaqa”, nispa.

15 Chaymantataq fariseokunaqa rispa rimanakurqanku Jesusta rimasqanpi pantachinankupaq.+ 16 Jinaspan paykunaqa qatikuqnin runakunata Herodespa t’aqanmanta*+ kaqkunatawan kacharqanku khaynata nimunankupaq: “Yachachikuq, yachaykun cheqaq rimaq kasqaykita, Diospa ñanninmantapas cheqaqta yachachisqaykita, qanqa manan jujkunaq allin qhawarinantachu maskhanki, manataqmi runakunaq jawallantachu qhawankipas. 17 Chayrayku, ¿imaniwaqtaq? ¿Allinchu Roma reyman* impuesto pagay, icha manachu?”, nispa. 18 Jesustaq mana allin piensasqankuta yachaspa paykunata nirqan: “Yau iskay uyakuna, ¿imaraykun pruebaman churawankichis? 19 Impuesto pagana qolqeta qhawachiwaychis”, nispa. Jinan paykunaqa juj denario qolqeta* jaywarqanku. 20 Jesustaq paykunata nirqan: “¿Piqpa uyanmi kaypi kashan? ¿Piqpan kay sutipas?”, nispa. 21 Paykunataq nirqanku: “Roma reypan”, nispa. Jinan Jesusqa nirqan: “Chhaynaqa, Roma reypa kaqtaqa Roma reyman qopuychis, Diospa kaqtataq Diosman qopuychis”,+ nispa. 22 Chayta uyarispan anchata admirakurqanku; Jesusta saqespataq ripurqanku.

23 Chay p’unchaypin “kausarimpuyqa manan kanchu” niq saduceokunaqa+ Jesusman qayllaykuspa nirqanku:+ 24 “Yachachikuq, Moisesmi nirqan: Pipas manaraq wawayoq kashaspa wañukapunman chayqa, wayqenmi chay wañuqpa esposanwan casarakapunqa, chhaynapi wawata churiyapunanpaq,+ nispa. 25 Noqayku ukhupin karqan qanchis runakuna wayqentinkama. Ñaupaq kaqmi casarakurqan, chaymantataq wañukapurqan, mana wawayoq wañupusqanraykutaq wayqenqa viudawan casarakapurqan. 26 Chhaynallataqmi karqan iskay kaqwan, kinsa kaqwan, llapan qanchisnintinwanpas. 27 Chay qhepamanqa chay warmipas wañukapullarqantaqmi. 28 Qanchisninkutaq chay warmiwan casarakurqanku chayqa, ¿mayqenninkuq esposantaq kanqa kausarimpuy kaqtinri?”, nispa.

29 Jinan Jesusqa paykunata nirqan: “Qankunaqa manan entiendenkichischu Diospa simin qelqatapas ni imaynachus Diospa atiynin kasqantapas,+ chaymi pantashankichis. 30 Kausarimpuy kaqtinqa manan qharikunapas casarakunqakuchu, ni warmikunapas casarachisqachu kanqaku, aswanpas paykunaqa janaq pachapi angelkuna jinan kanqaku.+ 31 Wañupuqkunaq kausarimpunanmantaqa, ¿manachu leerqankichis Diospa imachus nisqasuykichista? Paymi nirqan: 32 Noqan kani Abrahanpa Diosnin, Isaacpa Diosnin, Jacobpa Diosnin,+ nispa. Payqa manan wañusqakunaq Diosninchu, aswanpas kausaqkunaq Diosninmi”,+ nispa. 33 Chayta uyarispan runakunaqa anchata admirakurqanku imayna yachachisqanmanta.+

34 Saduceokunata Jesuspa upallachisqanta yacharuspan fariseokunaqa juñunakuspa Jesusman jamurqanku. 35 Paykunamanta jujninmi karqan kamachikuy simita allinta yachaq, paymi pruebaman churayta munaspa Jesusta tapurqan: 36 “Yachachikuq, kamachikuy simipi kaq kamachikuykunamanta, ¿mayqenmi aswan jatun?”,+ nispa. 37 Jinan Jesusqa nirqan: “Jehová* Diosniykitan munakunki tukuy sonqoykiwan, tukuy almaykiwan,* tukuy yuyayniykipiwan.+ 38 Chaymi ñaupaq kaq aswan jatun kamachikuyqa. 39 Chay kamachikuy jina iskay kaq kamachikuytaq kay: Runamasiykitan munakunki qan kikiykita jina,+ nisqa. 40 Chay iskaynin kamachikuykunamantan paqarimun llapa kamachikuy simipas profetakunaq qelqasqanpas”,+ nispa.

41 Fariseokuna chayllapiraq juñunasqa kashaqtinkun Jesusqa paykunata tapurqan:+ 42 “¿Imaniwaqchistaq Cristomanta? ¿Piqpa Churintaq payri?”, nispa. Paykunataq nirqanku: “Davidpa Churinmi”,+ nispa. 43 Jinan Jesusqa paykunata nirqan: “Chhaynaqa, ¿imaynapitaq Davidri Diospa yuyaychasqan* kaspa,+ Señor nispa nirqan? Davidmi nirqan: 44 Jehová* Diosmi Señorniyta nirqan: Paña ladoypi tiyaykuy, enemigoykikunata chaki sarunaykiman churanaykama,+ nispa. 45 Chhaynaqa, Davidtaq Cristota Señor nirqan chayqa, ¿imaynapitaq payri churin kanman?”,+ nispa. 46 Manan pipas ni juj simillatapas paymanqa kutichiyta atirqanchu, manataqmi chay p’unchaymantaqa pipas tapuyta munarqanñachu.