Diospaq kinsa tapuykuna

SUSANQA amigon Al onqoqtinmi qanchis watayoq kashaspa Diosmanta tapukurqan, chay amigonqa isqon watayoq kashaspan polio onqoywan karqan, paytaqa hospitalpin kawsachirqanku “pulmón de acero” nisqa máquina ukhupi. Susanmi chayta willakurqan The New York Times nisqa periodicopi 6 enero 2013 watapi.

Amigonta visitasqan qhepamanmi Susanqa mamanta tapurqan: “¿Imaraykun Dios khaynata sufrichin?”, nispa.

Mamanqa nirqanmi: “Sacerdoteqa nisunkin: ‘Diosllan yachan imarayku chhaynapi tarikusqanta’, nispa; ichaqa imaraykuchá kanmanpas”, nispa.

Iskay wata qhepamanmi 1954 watapi poliomielitis onqoypaq vakuna karqan, chaytan ruwarqan Jonas Salk doctor. Hinan mamanqa Susanta nirqan: “Dioschá yanaparqan chay vacunata tarinanpaq”, nispa.

Susanqa nirqanmi: “Diosqa ñawpaqtaraqchá yanapanman karqan riki doctorkunata, chhaynapi amigoy Alqa mana chhaynatachu sufrishanman karqan”, nispa.

Susanqa nirqanmi: “Al amigoyqa pusaq wata qhepamanmi wañupurqan, chay tiempopaqqa ñoqaqa ateañan kapurqani”, nispa.

Askha runakunan sufrinku otaq rikunku hukkunaq sufrisqanta, paykunapas Susan hinan mana tarinkuchu Diosmanta tapukusqankuq kutichiyninta. Chaymi wakinqa ateo kapunku otaq creenkuña Dios kasqanpi chaypas manaña confiankuchu.

Ateokunapas “cheqaq yachachikuyqa manan kanchu” niqkunapas yachankun religionmantaqa. Paykunaqa religionkunapi mana allinkunata rikusqankuraykun Diosmanta t’aqakapurqanku. Repararqankun importante tapuykunata religionkuna mana kutichiy atisqanta. Chay tapuykunataqa Diospi creeqkunapas tapukullankutaqmi. Qatiqninpin yachasun kinsa tapuykunamanta, imaynata Biblia kutichisqantapas.

¿Imaraykun chayta tapukunku?

Askha runakunan ninku: “Munakuq Diosqa manachá dejanmanchu sufrimiento kanantaqa”, nispa.

KAYPI PIENSAY: Sapanqa nacionmi huk costumbreyoq kanku, yaqapaschá hayk’aqllapas mana allinpaqchu qhawarirqanki huk hina costumbreyoq kasqankuta. Ejemplopaq, wakin nacionkunapiqa piwanpas rimaspaqa ñawinta qhawaspan rimanku, wakin nacionkunapin ichaqa chayta ruwayqa mana respetoyoq kay. ¿Mayqen nacionpa costumbrenmi mana allin kashan? Manan mayqenpapas, aswanpas allintan reqsinanchis chay runakunata.

Sufrimientoq kasqanta hinallata Dios qhawasqanta entiendenapaqqa Diostan reqsinanchis. Askha runakunan ninku: “Sufrimientoq kasqanqa rikuchinmi Dios mana kasqanta”, nispa. Ichaqa askha runakunan seguro kashanku Dios kasqanmanta, entiendenkutaqmi imarayku hinallata sufrimientota qhawasqantapas.

¿IMA NINMI BIBLIA? Diospa piensasqanpas ruwasqanpas hukniraymi ñoqanchismantaqa (Isaías 55:8, 9). Chayraykun hukniraqta qhawarisunman ima decidisqantapas mana usqhaylla ruwasqantapas.

Wakin religionkunaqa ninkun: “Señorpa ruwasqankunaqa mana entiendenan”, nispa. Biblian ichaqa Diosta reqsichiwanchis, entiendechiwanchismi imarayku imatapas ruwasqanta.a Dioswanqa amigontin kaytapas atisunmanmi (Santiago 4:8).

¿Imaraykun chayta tapukunku?

Askha runakunan ninku: “Sichus Diospaq importante kanman allin kaqta ruway chayqa, manachá adoraqninkunaqa mana allinkunata ruwankumanchu”, nispa.

KAYPI PIENSAY: Taytakunaqa kallpachakunkun allinta wawankuta uywanankupaq, ichaqa wakin wawakunaqa mana kasukuspan wasinkumanta ripunku ima munasqankutapas ruwamunankupaq. Manaña tayta allinpaqchu chayta qhawarin chaypas dejallanmi. ¿Qhepaman razonwanchu runakuna ninkuman, “mana allin taytayoqchá karqan” otaq “mana taytayoqchá wiñarqan” nispa? Pantashankumanmi chayta nispaqa. Religionkunapi runakunaq mana allinkuna ruwasqanpas rikuchinmi Diosqa sapanka runata decidikunanpaq dejasqanta.

¿IMA NINMI BIBLIA? Diosqa cheqnikunmi religionkunapi mana allinkuna ruwasqankuta (Jeremías 7:29-31; 32:35). Ichaqa dejanmi sapanka runa ima ruwanantapas decidinanta. Diospi creenkuña chaypas askha runakunan akllakunku runakunaq pantasqa yachachisqanta kasukunankupaq manataq Bibliaq nisqantachu, paykuna kikinkutaqmi decidinku imayna kawsaytapas (Mateo 15:7-9).

Ichaqa Diosta cheqaqtapuni serviqkunaqa manan mana allinkunataqa ruwankuchu.b Jesucriston nirqan: “Chhaynapin ñoqaq yachachisqaykuna kasqaykichista llapa yachanqaku qankuna munanakuqtiykichis”, nispa (Juan 13:35). Biblian willan munakuyninchis mana hawa sonqollachu kananta (Romanos 12:9). Askha religionkunapin rikukun mana munanakusqanku. Ejemplopaq, 1994 watapin Ruanda nacionpin askha runakuna wañuchirqanku kikin religionninpi kaqkunata huk llaqtamanta kasqankuraykulla. Jehová Diospa testigonkunan ichaqa manapuni chay wañuchinakuypi participarqankuchu, wakinqa kawsayninkutaraqmi peligropi churarqanku compañeronkurayku otaq huk religionniyoq runakunaraykupas. Chaymi rikuchin religionqa allin kaqkuna ruway atisqanta.

¿Imaraykun chayta tapukunku?

Wakinqa kaytan ninku: “¿Imaraykun 80 otaq 90 watakunalla kawsanchis? Yanqamá pisi tiempolla kawsayqa”, nispa.

KAYPI PIENSAY: Kay pachapas hanaq pachapas yachaywan ruwasqan kashan, chaymi Diospi mana creeqkunapas ninku “kayqa manan yanqapaq ruwasqachu kanman karqan” nispa. Reparankun kay pachapas, huk planetakunapas, killapas kawsay kananpaq hina churasqa kasqanta, chaykuna huk chhikallanpipas varianman chayqa manan kawsay kanmanchu.

¿IMA NINMI BIBLIA? Wakin runakunaqa pisi watakunalla kawsasqanchisraykun ninku “Diosqa manan kanchu” nispa. Ichaqa tukuy kamasqankunan rikuchin Dios kasqanta (Romanos 1:20). Jehová Diosqa kay pachatapas runatapas munayninta hunt’ananpaqmi kamarqan. Diosqa wiñaypaq kusisqa kawsananchispaqmi kamawarqanchis, chay munasqanqa manan cambianchu (Salmo 37:11, 29; Isaías 55:11).

Kamasqankunata rikuspan yachanchis Dios kasqanta. Ichaqa munayninta entiendenapaqpas imarayku kawsasqanchista entiendenapaqpas pay kikinpunin Bibliapi willawanchis, chayqa fácil entiendeyllan.c Jehová Diospa testigonkunan invitaykiku Bibliapi chaykunamanta yachanaykipaq.