Carta qelqaymanta

MILLONNINPI runakunan cartakunarayku allinta kawsanku. Griego Rimay Qelqakunaqa yaqa llapanmi cartakuna karqan. Cartakunawanmi mosoq iñiqkunata kallpachanchis, amigonchiskunawan napaykunakunchis tapurinakunchis ima; Diospa llaqtanpi allin llank’aypi tarikuqkunatapas hinallataq sasachakuypi kaqkunatapas cartata qelqaspan kallpachanchis, chaymantapas cartakunapin chayamuwanchis iñiq t’aqapi imatapas ruwananchispaq kamachikuykuna (1 Tes. 1:1-7; 5:27; 2 Ped. 3:1, 2).

Chaymantapas allintan predicasunman cartakunata qelqaspa. Wakin runakunaqa allin cuidasqa wasikunapin tiyanku, wakintaq maynillanpi wasinkupi kanku, wakinñataq karupi tiyanku, sasa chayana cheqaskunapi. Sasan kanman paykunawan tupay, chayraykun carta apachiyqa allinpuni kanman.

Mayninpiqa manan wasinchismanta lloqsiyta atisunmanchu onqosqa kaqtinchis, sinchita paramuqtin, otaq gobiernokuna huk horamanta manaña pipas wasinmanta lloqsinanpaq kamachikuqtinpas. Chaykuna kaqtinqa qelqasunmanmi cartakunata familianchiskunaman otaq pi predicasqanchis runakunamanpas. Mayqen estudiantenchispas huk wasiman astakurqan chayqa, kallpachasunmanmi cartapi. Chaymantapas qelqakunatan apachisunman chayllaraq casarakuqkunapaq, wawayoq kapuqkunapaq, wañuqniyoqkunapaqpas.

Mana reqsisqaykiman qelqashanki chayqa, ñawpaqtan willanayki pi kasqaykita. Chaymantataq willawaq kay llank’ayqa pachantinpi aparikusqanta, manataq qolqepaqchu kasqanta. Munaspaqa willawaqmi Jehová Diospa testigon kasqaykita, imarayku cartata apachishasqaykita, manataq qan kikiykichu risqaykitapas. Uya-uya purapas parlashawaq hinan qelqanayki. Ichaqa manan tukuytachu willanayki pi kasqaykimanta. Biblian niwanchis: “Mach’aqwaykuna hina yuyaysapa kaychis, ichaqa palomakuna hina mana tupapakuq kaychis”, nispa (Mat. 10:16).

Wasinta rispa imamantas rimapayawaq chayman hinan cartapi qelqawaq, chaypaqmi yanapachikuwaq Razonamiento librowan otaq Diosmanta Willasunchis nisqa hojawanpas. Huk tapuytan qelqawaq yuyaymanananpaq. Wakin iñiqmasinchiskunaqa mana qolqellapaq Bibliamanta yachachisqanchismantan qelqanku, hinaspa chaypi churanku estudio qosqanchis qelqakunamanta wakin capitulokunaq titulonkunata. 73 paginapi kaq cartatan qhawawaq imayna qelqanaykita yachanaykipaq, ichaqa manan kaqtachu qelqanayki aswanmi huk yachachikuykunata churanayki. Chhaynapin wasiyoqkuna mana kaq willakuytachu chaskinqaku.

Mana reqsisqakunapaq cartata qelqashaspaqa manan nishu askhatachu qelqananchis, mana chayqa manapaschá leeyta munanqakuchu mana tukurikuqta hina qhawarispanku. Cartapiqa churasunmanmi huñunakuykunaman hamunankupaq invitacionta, huk tratadota, huk folletota otaq huk revistanchistapas. Willallasunmantaqmi pay munaqtinqa astawan apachinanchista. Tapusunmantaq: “¿Munawaqchu hamunayta astawan rimananchispaq?” nispa.

Qhaway 73 paginapi kaq cartata. 1) Munay allichasqan kashan, manataq nit’i-nit’ichu rikukun. 2) Wichaypin rikukushan qelqaqpa sutin, carta chaskina direccionninpas. 3) Ñawpaq parrafopin sut’ita willakushan imapaqchus chay carta qelqakusqanta. 4) Manan kaqmantachu sapanka parrafopi willakushan. 5) Mana reqsisqa runapaqtaq qelqakun chayqa, manan amigontapas rimapayashanman hinachu kashan, ichaqa manataqmi manchakuywan rimaq hinachu.

Iñiq t’aqapi secretario sucursalman cartata apachinan kaqtinqa, churananmi iñiq t’aqaq sutinta, qelqaqpa sutinta, carta chaskina direccionninta, hayk’aqchus qelqasqanta, pipaqchus chay carta kasqantawan. Chaymantataq respetowan napaykunan. Tukunanpaqtaq churanman “Tupananchiskama” “Huk p’unchaykama” nisqata, hinaspa firmanta churanan.

Cartakunataqa allintan qelqananchis, manan letrakuna rimaykunapas faltananchu; chaymantapas coma, punto, tilde chaykunataqa maychus churanapin churananchis; papelpas limpion kanan manataqmi q’aphñu-q’aphñuchu. Chhaynapin allinpaq qhawarinqaku cartanchista willakusqanchistapas.

Sobre nisqapiqa churanaykipunin carta chaskina direccionniykita. Manchakunki mana reqsisqakunaman direccionniyki willayta chayqa, umallikunata tapuwaq Huñunakuy Wasiq direccionninta churanaykipaq. Manan hayk’aqpas churanachu sucursalpa direccionnintaqa, mana chayqa “paykunachá apachimuwashanku” ninkumanmi. Sichus mana sutiyoqta cartata apachisunman, churasunmantaq wakin qelqanchiskunata chayqa, kaqllatataqmi ninkuman.

Qelqayta tukuspaqa wakmantan leenanchis, hinaspa qhawarinanchis respetowan rimaq hinachu kashan, sumaqchu kashan chayta. Cristianokunaqa munakuywan sumaq sonqowanpunin rimananchis (Gál. 5:22, 23). Chhaynaqa, qelqasqanchispi ima willakuypas q’ayma otaq llakichiq hina kaqtinqa cambiananchismi.

Cartakunaqa mana chayasqanchiskunamanmi chayanman, chaymi allinpuni predicanapaq. Chaykunaqa rantinchispin riman, chayraykun tukuy yuyaywan qhawarinanchis allin qelqasqachu kashan, munay allichasqachu kashan, sumaqchu kashan chayta. Chaykunawanmi askha runakunata kallpachasunman wiñay kawsay ñanman hamunankupaq.