29 YACHACHIKUY
¿Wañusqakuna maypipas kausashankumanraqchu?
¡Sonqo nanaymi pi familianchispas pi amigonchispas wañupuqtinqa! Mayqen familiaykipas wañupurqan chayqa, yaqapaschá nirqanki: “¿Maypipas pay kausashanmanraqchu? ¿Jayk’aqllapas paywan tupaymanraqchu?”, nispa. Chaykunamantan yachasunchis kaypi, qatimuq yachachikuypipas.
1. ¿Maypin kashanku wañupuqkuna?
Jesusqa secota puñuywanmi wañuyta tupanachirqan. Secota puñuspaqa manan imatapas reparanchischu ¿riki? Chhaynallataqmi wañusqa runapas mana imatapas reparanchu; manan kusikunkupaschu ni sufrinkupaschu. Biblian nin: “Wañusqakunaqa manan imatapas yachankuchu”, nispa (leey Eclesiastés 9:5).
2. ¿Imaraykun allinta yachananchis imaynachus wañusqakuna kashanku chayta?
Wakin runakunaqa manchakunkun wañuytapas wañusqakunatapas. Qanpas manchakunki chayqa, Bibliaq yachachisqanta entiendeymi yanapasunki amaña manchakunaykipaq. Jesuspa nisqan jina Cheqaq yachachikuymi kacharichisunki (Juan 8:32). Wakin religionkunapi runakunan pipas wañupuqtin ninku: “Alman purishan”, nispa. Chay wañuq kausashanallanpaqmi piensanku. ¿Chhaynatachu Biblia yachachinman? Manan. Wañusqakunaqa manan maypichu kashanku, nitaqmi maypichu ñak’arishanku. Paykunaqa manan imatapas yachankuchu, manataqmi imatapas ruwawasunmanchu. Yanqan kanman wañusqakunapaq mañakuypas, paykunapaq imata ruwaypas.
Manataq wañusqakuna imatapas yachankuchu ni rimankupaschu chayqa, ¿imaraykun wakin runakuna ninku: “Noqaqa rimanin wañusqakunawanqa”, nispa? Chayta niqkunaqa yaqapaschá supaykunawan rimashanku. Supaykunaqa runakunata engañanankupaqmi wañusqakunamanta pasachikunku. Sichus layqakunaman rispa, imata ruwaspapas wañusqakunawan rimayta munasunman chayqa, supaykunaq makinmanmi urmashasunman. Chayraykun Jehová Diosqa Bibliapi kamachikurqan ama pipas wañusqakunawan rimananpaq (leey Deuteronomio 18:10-12).
ASTAWAN YACHASUNCHIS
¿Imatan Biblia yachachin wañusqakunamanta? ¿Imaynatan munakuq Diosninchispi tukuy sonqo confiasunman? Chaykunamanta astawan yachasun.
3. ¿Iman pasawanchis wañupuqtinchis?
Runakunaqa imaymanatan piensanku imachus wañupuqtinchis pasawanchis chaymantaqa. Ichaqa, imaninmanña runa chaypas manan chayqa cheqaqchu.
¿Imaninkun tiyasqayki llaqtapi runakuna wañupuqkunamanta? ¿Maypi kashanankupaqmi piensanku?
Imaninchus Biblia chayta yachanapaq VIDEOTA qhawaychis.
Leeychis Eclesiastés 3:20 textota, jinaspa jamuq tapuykunaman jina parlariychis:
Chaypi leesqanchis jina, ¿imaynan wañusqakuna kashanku?
Juj runa wañupuqtin, ¿kausashanmanraqchu almanpas espiritunpas?
Bibliapin willan Jesuspa amigon Lázaro wañupusqanmanta. ¿Imanirqanmi Jesús Lázaroq wañupusqanmanta? Leeychis Juan 11:11-14 textota, jinaspa jamuq tapuykunaman jina parlariychis:
¿Imawanmi Jesús wañuyta tupanachirqan?
¿Imaraykun Jesús wañuyta puñuywan tupanachirqan?
¿Imaninkin wañuymanta Bibliaq yachachisqanmanta?
4. Wañusqakunamanta sut’inta yachayqa imaymanamantan librawanchis
Wañusqakunamanta Bibliaq yachachisqanmi yanapawasun wañusqakunata ama manchakunanchispaq. Leeychis Eclesiastés 9:10 textota, jinaspa jamuq tapuyman jina parlariychis:
¿Imatapas wañusqakuna ruwawasunmanchu?
Bibliaq yachachisqanmi yanapawallasuntaq amaña juj runakuna jina wañusqakunapaq imatapas ruwashananchispaq, wakinqa yupaychanku imaraqmi wañusqakunataqa. Leeychis Isaías 8:19; Apocalipsis 4:11 textokunata, jinaspa jamuq tapuyman jina parlariychis:
¿Allinpaqchu Jehová Dios qhawarinman wañusqakuna yupaychayta, paykunaq yanapaynin mañakuytapas?
Wañusqakunamanta Bibliaq yachachisqanmi yanapawasun ama Diospa mana munasqan costumbrekunata ruwananchispaq.
5. Wañusqakunamanta sut’inta yachayqa sonqonchistan thaj nichin
Wakin religionkunapi yachachisqankuman jinaqa juchasapa runakunaqa wañuspas ñak’arinku. Ichaqa, ¿chhaynatachu Biblia yachachin? Manan. Juj runa ima juchataña ruwarqan chaypas, manan wañusqan qhepamanqa sufrinqachu. Leeychis Romanos 6:7 textota, jinaspa jamuq tapuyman jina parlariychis:
Bibliaq nisqan jina, runakunaqa wañuywantaq ima juchankutapas paganku chayqa, ¿ñak’arishankumanchu wañupuqkuna maypipas?
Jehová Diosqa ancha munakuqmi, payqa manapunin pi wañusqatapas ñak’arichinmanchu. Diosta astawan reqsisunchis chayqa, aswan allintan entiendesunchis munakuq kasqanta. Leeychis Deuteronomio 32:4; 1 Juan 4:8 textokunata, jinaspa jamuq tapuykunaman jina parlariychis:
¿Ñak’arichinmanchu wañusqakunata chhayna munakuq chanin Dios?
¿Sonqochawasunmanchu wañusqakunamanta cheqaqta yachay? ¿Kallpachawasunmanchu llakikuyninchispi?
WAKIN RUNAKUNAN NINKU: “Wañupuq familiayqa maypichá ñak’arishan”, nispa.
¿Imaniwaqmi chhayna niqkunata? ¿Bibliapi ima textotan qhawachiwaq?
IMATAN YACHAMURQANCHIS
Pipas wañupuqtinqa chaypin vidan tukupun. Wañusqakunaqa manan ñak’arishankuchu, manataqmi imatapas ruwawasunmanchu.
Yuyarisun
¿Imaynan kashanku wañusqakuna?
¿Ima manchakuymantan librawasunman wañusqakunamanta allinta yachay?
¿Imaynatan sonqochawasunman wañusqakunamanta sut’inta yachay?
ASTAWAN YACHANAYKIPAQ
Kaypin astawan yachanki imaninsi Biblia almamanta chayta.
¿Infiernopichu kashanku millay runakuna? Chaymantan kay videopi yachanki.
¿Manchakunanchischu wañusqakunata?
¿Kanchu wañusqakunaq espiritun? ¿Yanapawasunmanchu? ¿Imatapas ruwawasunmanchu? (Folleto)
Wañusqakunamanta Bibliaq yachachisqanta yachaymi juj runata yanaparqan amaña nishuta wañupuq familianmanta llakikunanpaq. Chaymantan kay qelqapi yachanki.
“¡Bibliaqa sut’intan tapuyniykunaman kutichiwarqan!” (Qhawaq, 2015 watapi 1 mayo)