Tukuy sonqowan Diosman sacrificiota haywasun

“Tukuy imatapas [...] ruwaspaykichisqa tukuy sonqowan ruwaychis, Señorpaq hinapuni.” (COL. 3:23.)

1-3. a) Jesús k’aspipi wañusqanrayku, ¿manañachu Diosman ima sacrificiotapas qonanchis? Willay. b) ¿Imatan yachananchis Diosman sacrificiota qospa?

ÑAWPAQ siglopin Jehová Dios llaqtanman willarqan Kamachikuy Simi Jesuspa sacrificionwan chinkapusqanta (Col. 2:13, 14). Chayraykun judiokunaqa uywankuta, mikhuykunatapas manaña Diosman ofrendata haywanankuñachu karqan unay tiempoña chayta ruwasharqanku chaypas. Wawata ‘uywaq’ hinan Kamachikuy Simiqa judiokunata Cristoman pusasqanta hunt’arqanña (Gál. 3:24).

² Ichaqa mana chayraykuchu cristianokunaqa sacrificiokunata manaña ruwananchis. Apóstol Pedron nirqan: ‘Jesucristowan Diospa sonqonman chayaqtapuni espiritual sacrificiokunata haywananchismanta’ (1 Ped. 2:5). Apóstol Pablopas sut’itan willarqan Diosta servinapaq imapas ruwasqanchisqa huk ‘ofrenda’ hina kasqanta (Rom. 12:1).

³ Cristianokunaqa imatapas Diosman qospa otaq imatapas saqesparaq payta servisqanchismi sacrificiokuna haywasqanchisqa. Chayraykun israelitakuna hina allinta yachananchis ima sacrificiokuna Diospaq hina kasqanta, chay sacrificiokuna imayna kanantapas.

SAPA P’UNCHAY SACRIFICIO HAYWASQANCHIS

 4. ¿Imatan yuyarinanchis sapa p’unchay imatapas ruwaspa?

⁴ Sapa p’unchay ima ruwasqanchispas Diosman sacrificio haywaymi, mayninpin chayqa sasa entiendey. Yaqapaschá mana espiritual ruwaykunata hinachu qhawarinchis wasipi ruwasqanchista, estudiasqanchista, llank’asqanchista, rantisqanchista huk ruwaykunatapas. Ichaqa sichus Diosman qokurqanchis otaq chayta ruwayta munashanchis chayqa, cristiano hinan allin yuyaywan chaykunata qhawarinanchis. Tuta-p’unchaypas cristianon kanchis, chayraykun kallpachakunanchis Diospa kamachikuyninkunaman hina imay ratopipas kawsanapaq. Pablon nirqan: “Tukuy imatapas [...] ruwaspaykichisqa tukuy sonqowan ruwaychis, Señorpaq hinapuni, ama runakunapaq hinallachu”, nispa (leey Colosenses 3:18-24).

5, 6. Imayna kawsasqanchista p’achakusqanchistapas qhawarikuspa, ¿imatan yuyarinanchis?

⁵ Sapa p’unchay ruwayninchiskunaqa manan Diosta servinanchispaq ruwaykuna ukhupichu kashan. Ichaqa Pablon kallpachawanchis “tukuy sonqowan” Diospaq hinapuni chaykunata ruwananchispaq, chaymi yuyaymanananchis imayna kawsasqanchismanta. Tapukunanchismi: “¿Allintachu kawsani p’achakunipas? Icha, ¿imayna kawsasqayrayku otaq imayna p’achakusqayraykuchu mayninpi p’enqakuni Jehová Diospa testigon hina reqsichikuyta?”, nispa. ¡May llakikunapaqmi chayqa kanman! Diosta serviqkunaqa manapunin munanchischu sutin mana allin qhawarisqa kananta (Isa. 43:10; 2 Cor. 6:3, 4, 9).

⁶ Kawsayninchispi imaymana ruwaykunapiqa Diospaq hinapunin “tukuy sonqowan” llank’ananchis. Chaykunata t’aqwirispa yuyarisun Diosqa aswan allin kaqta israelitakunata sacrificio mañasqanta (Éxo. 23:19).

KAWSAYNINCHISPI SACRIFICIOKUNA

 7. ¿Iman Diosman qokuy?

⁷ Diosman qokuspaqa kawsayninchistan payman qorqanchis, otaq imaynapiña tarikuspapas prometerqanchismi payta ñawpaqta servinanchispaq (leey Hebreos 10:7). Chay decidisqanchisqa imamantapas aswan allinmi karqan. Chaymantapas repararqanchischá Diospa munayninman hina imatapas ruwanapaq kallpachakuqtinchisqa allinpipuni tukusqanta (Isa. 48:17, 18). Ñoqanchisqa ch’uya, kusisqa llaqtanpin kashanchis, hanaq-pacha Yachachiwaqninchis hina kanapaq kallpachakusqanchisrayku (Lev. 11:44; 1 Tim. 1:11).

 8. ¿Imatan yachanchis israelitakunaq sacrificio haywasqanta ch’uyapaq Dios qhawarisqanmanta?

⁸ Jehová Diosqa ch’uyapaqmi qhawarirqan israelitakunaq sacrificio haywasqankuta (Lev. 6:25; 7:1). Hebreo rimaypi “ch’uya” nisqa simiqa imatapas Jehová Diosllapaq sapaqchaymi otaq t’aqaymi. Chayrayku, sacrificio haywasqanchis Diospa allin qhawarisqan kananpaqqa, mana kay pachaq millay ruwayninkunawan qhellichasqachu kanan. Diospa cheqnisqan ruwaykunataqa manan munakunanchischu (leey 1 Juan 2:15-17). Ejemplopaq, manan chaqrukunanchischu Diospa mana allin qhawarisqan organizacionkunapiqa (Isa. 2:4; Apo. 18:4). Manan qhawananchischu mana allin kaqta qhelli ruwaykunatapas, nitaqmi chaykunapi yuyayninchis musphashananchu (Col. 3:5, 6).

 9. ¿Imaraykun allinta runamasinchista qhawarinanchis?

⁹ Pablon iñiqmasinkunata nirqan: “Amataq allinkaqta ruwaytapas yanapakuytapas qonqaychischu, chay hina sacrificiokunawanmi Diosqa kusikun”, nispa (Heb. 13:16). Diosqa sacrificiota hinan chaskin munaynin hunt’akunanpaq, hukkunata yanapanapaqpas ruwasqanchiskunata. Chaywanmi rikuchinchis Jesuspa cheqaq qatikuqninkuna kasqanchista (Juan 13:34, 35; Col. 1:10).

DIOS SERVIYNINCHISPI SACRIFICIOKUNA

10, 11. ¿Imaynatan Dios qhawarin predicayninchista payta yupaychasqanchistapas? ¿Ima ruwananchispaqmi chay tanqawananchis?

¹⁰ Hukkunapaq allinkuna ruwasqanchisqa ‘suyakuyninchismanta’ ‘willasqanchismi’. ¿Maypi tarikuspapas willanchischu iñiyninchismanta? Pablon willarqan chay ruway ancha importante kasqanta, cristianokunaqa Diosmanmi ‘yupaychay sacrificiota qonchis, chay sacrificioqa Diospa sutinta sut’ita siminchiswan rimariyninchismi’ (Heb. 10:23; 13:15; Ose. 14:2). Askha horakunatan Diospa Reinonmanta predicanchis, chay llank’ayta allinta hunt’ananchispaqtaq Predicayta Yachanapaq Huñunakuypi yanapayta chaskinchis. Ichaqa Dios serviyninchispi sapallanchis otaq iñiq t’aqawan kuska predicasqanchisqa ‘Diosman yupaychay sacrificio’ qoymi, chayraykun kallpachakunanchis aswan allinta predicananchispaq. Sapankanchispas imaynapiña tarikunchis chaypas, hayk’a horachus predicasqanchiswanmi rikuchisun chay llank’ayta valorasqanchista.

¹¹ Cristianokunatan Dios kamachiwanchis sapallanchispi otaq iñiq t’aqawanpas yupaychananchispaq, chaypaqmi sapa semana tiempota t’aqanchis. Kunanqa manañan sábado p’unchayta waqaychanchischu nitaqmi sapa watan fiestamanpas Jerusalén llaqtamanchu rinanchis. Chaywanpas ñawpaq tiempopi Diosta servinankupaq imakunachus ruwasqankuta hinan kay tiempopipas ruwashanchis. Diosqa kunanpas munanmi wakin ruwananchiskunata saqespa Bibliata estudiananchista, mañakunanchista, huñunakunanchistapas. Chaymantapas munanmi familiapi umalliqkuna yupaychana ch’isi aparinankuta (1 Tes. 5:17; Heb. 10:24, 25). Tapukunanchismi: “¿Kallpachakuymanchu aswan allinta Dios serviyniyta hunt’anaypaq?”, nispa.

12. a) ¿Diosman ima qosqanchismi altarpi ruphachisqa incienso hina? b) ¿Imaynatan Diosman mañakuyninchista qhawarinanchis incienso hina kasqanrayku?

¹² Rey Davidmi Diosman kayta takirqan: “Mañakamusqay ñawpaqeykiman incienso q’apay hina wicharimuchun”, nispa (Sal. 141:2). Huk rato kay tapuykunapi yuyaymanasun: ¿Imaynatan Diosmanta mañakuni? ¿Sapa kutillachu? ¿Sonqomantachu mañakuni? Apocalipsis qelqan willan ‘santo kaqkunaq mañakuyninta’ incienso q’apayta hina Dios chaskisqanta (Apo. 5:8). Israelitakunataqa Diosmi kamachirqan altarpi sapa p’unchay ruphachinapaq inciensota imayna preparanankuta. Mana chhaynata ruwaqtinkuqa manan chaskiqchu (Éxo. 30:34-37; Lev. 10:1, 2). ¿Imatan yachanchis chaymanta? Mañakusqanchista Dios chaskinanpaqqa respetowanmi rimananchis, munayninman hinataqmi kanan.

QONCHIS, CHASKINCHIS

13, 14. a) ¿Imaynatan Epafrodito, Filipos llaqtapi iñiq t’aqapas Pablota yanaparqanku, imaynatan pay chayta qhawarirqan? b) ¿Imaynatan qatikusunman Epafroditota, Filipos llaqtapi iñiq t’aqatapas?

¹³ Kay pachantinpi predicakunanpaq askhataña otaq pisitaña qolqeta churanchis chaypas, ofrenda hinan chay ruwasqanchisqa (Mar. 12:41-44). Qallariy siglopin Filipos iñiq t’aqamanta cristianokuna Epafroditota Romaman kacharqanku Pablota yanapamunanpaq, apachirqankutaqmi qolqetapas. Manan chay kutillapiraqchu chhayna yanapaytaqa ruwarqanku. Chaytaqa qorqanku qolqemanta ama llakikuspa tukuy tiemponwan Pablo predicananpaqmi. ¿Imaynatan chay regalota qhawarirqan? Paypaqqa huk “sumaq q’apay ofrenda hinan karqan, Diospa sonqonman chayaq sacrificio hina” (leey Filipenses 4:15-19). Diospas Pablopas ancha sumaqpaqmi qhawarirqanku chay ruwasqankuta.

¹⁴ Kunanpas Diosqa ancha sumaqpaqmi qhawarin pachantinpi predicakunanpaq qolqe churasqanchista. Hinaspapas Diospa Reinonta ñawpaqman churaqtinchisqa prometewanchismi imakunachus necesitasqanchista yanapawananchispaq, iñiyninchispi ama pisipanapaqpas (Mat. 6:33; Luc. 6:38).

AGRADECIDO KASUN

15. ¿Imakunamantan Diosta agradecekunki?

¹⁵ Ñoqanchisrayku Dios imaymana ruwasqanta willanapaqqa tiemporaqchá faltawasunman. Sapa p’unchaymi agradecekunanchis kawsay qowasqanchismanta. Paymi tukuy necesitasqanchista qowanchis: mikhunata, p’achata, wasita, kawsananchispaq airetapas. Chaymantapas yachay qowasqanchismi sumaq suyakuypi iñinanchispaq yanapawanchis. Dios imayna kasqanpi, ñoqanchisrayku ruwasqankunapi yuyaykuspaqa kallpachakunchismi payllata hatunchanapaq siminchiswan yupaychanapaqpas (leey Apocalipsis 4:11).

16. ¿Imata ruwanapaqmi kallpachawanchis Cristoq sacrificio ruwasqan?

¹⁶ Ñawpaq estudiopi yachasqanchis hina, Cristoq sacrificakusqanqa ancha chaniyoq Diospa regalonmi. Chaymi rikuchin anchata Dios munakuwasqanchista (1 Juan 4:10). ¿Imaynatan agradecekusunman chhayna munakuyninmanta? Pablon nin: “Cristoq munakuyninpunin kawsayninchispiqa anchata kallpachawanchis, Cristoq ñoqanchisrayku wañusqanta yachaspaqa, [...] kawsaqkuna amaña paykuna kikinkupaq kawsanankupaq, aswanpas paykunarayku wañuspa kawsarimpuq Cristopaqña kawsanankupaq”, nispa (2 Cor. 5:14, 15). Chaywanmi niwashanchis Diospa chay sumaq regalonta allinpaq qhawarisun chayqa, kawsayninchistan qosun Diosta Churintapas hatunchanapaq. ¿Imaynapin agradecido kasqanchista rikuchinchis Diosman Wawanmanpas? Kasukuspa, tukuy sonqowan predicacionpi yanapakuspa ima (1 Tim. 2:3, 4; 1 Juan 5:3).

17, 18. ¿Imakunatan ruwaspan askha cristianokuna Diosman yupaychay sacrificiota haywanku? Ejemplota willay.

¹⁷ ¿Kallpachakusunmanchu yupaychay sacrificio haywasqanchis aswan allin kananpaq? Askha cristianokunan paykunarayku Dios imaymana ruwasqanpi yuyaymanaspa, tiemponkuta t’aqarqanku astawan payta predicacionpi huk ruwaykunapipas servinankupaq. Wakinqa huk killa otaq askha killakunan precursor auxiliar kanku. Wakintaqmi precursor regular kanku otaq Huñunakuna Wasikuna ruwaypi yanapakunku. Chaykunata ruwaspan rikuchishanku ancha sumaqpaq chay llank’aykuna qhawarisqankuta. Agradecido kaspa chaykunata ruwaqtinkuqa sumaqtan Jehová Dios chaskinqa.

¹⁸ Askha cristianokunan paykunarayku Dios imaymana ruwasqanta qhawarispa, kallpachakunku astawan servinankupaq. Yachasunchis Morena sutiyoq cristianamanta. Payqa Católica religionpin uywasqa karqan chaypitaqmi maskharqan askha tapukuyninkunaq kutichiyninta, hinallataq filosofía oriental nisqapipas, ichaqa manan tarirqanchu. Aswanpas Testigokunawan estudiaspallan tarirqan. Anchatan valorarqan imaymana tapukuyninkunaman Bibliapi tarisqanta, chaymi decidikurqan payta servispa chaykunamanta agradecekunanpaq. Bautizakusqan qhepallamanmi payqa precursora auxiliar karqan, chaymantataq precursora regular. Payqa 30 watañan tukuy tiempo Diospaq llank’ashan.

19. ¿Imaynatan llapanchispas yapasunman Diosman yupaychay sacrificio qoyta?

¹⁹ Ichaqa askha cristianokunan imaynapi tarikusqankurayku mana atinkuchu precursor kayta. Chaywanpas sapankanchispas atisunmanmi Diosta servispa sonqonpaq hina allin sacrificiokuna ruwayta. Chaykunan kaykuna. Kawsayninchiswan: Diospa chanin kamachikuyninkunata kasukuspa, manataqmi qonqananchischu Jehová Diospaq hina imay ratopas kawsasqanchista. Iñiyninchiswan: Diospa promesankunapi tukuy sonqowan confiaspa. Allin ruwayninchiswan: astawanqa allin willakuykunata willaspa. Imachus sonqopi hunt’a kashan chaytan simiqa riman. Imaymana chaskisqanchisraykun sonqonchisqa ancha agradecesqa kashan, chaymi Diosman sacrificiota haywashallasun tukuy almanchiswan Reinonmanta willaspa.

[25 paginapi willakuy]

Diospa sumaq sonqo kasqan, ¿kallpachawanchischu aswan allin yupaychay sacrificiota qonapaq?

[23 paginapi foto]

¿Tukuy tiempochu iñiyninchismanta rimanchis?