¿Imatan yachasunman bolsa qolqemanta willakuypi?

1, 2. ¿Imapaqmi Jesús bolsa qolqemanta willarqan?

JESUSMI bolsa qolqemanta willarqan akllasqa cristianokuna imachus ruwanankuta yachanankupaq. Ichaqa llapallanchismi chay willakuymanta yachasunman. Chaypaqmi allinta entiendenanchis chay willakuyta.

² ¿Imaynapin Jesús bolsa qolqemanta willarqan? Chaytaqa willarqan pay rey kaqtin imakunachus sucedenanta willashaspan, chaykunaqa tukukuy pˈunchaykunapin huntˈakunan karqan (Mat. 24:3). Chay willakuypas tukukuy pˈunchaykunapaqmi karqan.

 3. ¿Imatan yachasunman Mateo 24, 25 textokunapi 4 willakuykunamanta?

³ Tukukuy pˈunchaykunamanta rimashaspan Jesusqa willarqan 4 willakuykunata, chaykunawanmi yachachisharqan imatachus chay tiempopi cristianokuna ruwanankuta. Chaykunan tarikun Mateo 24:45 textomanta Mateo 25:46 textokama. Ñawpaqtaqa willarqan huntˈaq kamachimantan, chayqa representan Diospa llaqtanta pusariq akllasqa cristianokunatan. Chaywanmi Jesusqa chay akllasqa cristianokunata yachachisharqan huntˈaq sonqo, allin yuyayniyoq kanankupaq.a Chaymantataq willarqan 10 sipaskunamanta. Chaywanmi akllasqa cristianokunata anyasharqan paypa chayamunanpaq listollapuni makilla kanankupaq.b Hinamantaq willarqan bolsa qolqemanta. Chaywanmi Jesusqa akllasqa cristianokunata nisharqan kamachisqanta allintapuni huntˈanankupaq. Willallarqantaqmi ovejakunamanta cabrakunamantapas. Chaywanmi yachachisharqan kay pachapi kawsay munaqkunata huntˈaqllapuni kanankupaq, akllasqa cristianokunata yanapanankutapas.c Kay estudiopin yachasun bolsa qolqe willakuymanta.

4, 5. a) ¿Pitan representan willakuypi runa? b) ¿Haykˈan huk bolsa qolqe karqan? (Willakuyta qhaway.)

⁴ (Leey Mateo 25:14-30). Bolsa qolqemanta willaspan Jesusqa nirqan huk runa karu llaqtaman viajasqanta. Huk kutipitaq Jesusqa willallarqantaq rey kananpaq huk runa karu llaqtata viajasqanta (Luc. 19:12).d Unayñan qelqanchiskunaqa willawanchis chay iskaynin willakuykunapi runaqa Jesusta representasqanta, paymi 33 watapi hanaq pachaman rirqan, ichaqa manan kaq ratochu rey kapurqan. Aswanpas 1914 watakaman suyakurqan, chay watapin ‘awqankuna chaki sarunanman churasqa’ karqan (Heb. 10:12, 13).

⁵ Manaraq viajashaspanmi chay runaqa kamachinkunaman qorqan 8 bolsa qolqeta.e Chay qolqetan llankˈachinanku karqan, chay hinapi patronninku astawan ganananpaq. Chay qolqeqa ancha valorniyoqmi chay runapaqqa karqan. ¿Iman Jesuspaq chay bolsa qolqe hina ancha valorniyoq? Kay pachapi llankˈay aparisqanmi.

6, 7. ¿Imatan bolsa qolqe representan?

⁶ Jesusqa ancha valorniyoqpaqmi predicacionta qhawarirqan. Paymi askha runakunaman predicarqan, chay hinapin qatikuqninkuna kapurqanku (leey Lucas 4:43). Ichaqa yachallarqantaqmi astawanraq predicakunan kasqanta. Chaymi qatikuqninkunata nirqan: “Chakrakunata allinta qhawariychis, ichhunapaqmi poqosqaña kashan”, nispa (Juan 4:35-38). Jesusqa predicaciontan cosechawan igualachisharqan, payqa chakrata allin llankˈaq runa hinan tukuy imata ruwarqan cosechan hoqarikunanpaq. Chaymi manaraq hanaq pachaman ripushaspa qatikuqninkunaman encargarqan predicacionta aparinankupaq (2 Cor. 4:7). Nirqanmi: “Chayrayku, rispa llapa suyu runakunata yachachimuychis, yachachisqaykuna kanankupaq”, nispa (Mat. 28:18-20).

⁷ Imaynan chay willakuypi runaqa kamachinkunaman bolsa qolqekunata encargarqan, chay hinatan Jesuspas akllasqa cristianokunaman predicacionta encargarqan (Mat. 25:14). Chaymi bolsa qolqekunaqa predicacionta representan, Diospa llaqtanman runakuna pusamuytawan.

 8. ¿Kamachinkuna ima ruwanankutan munarqan bolsa qolqemanta willakuypi runa?

⁸ Willakuypi runaqa, huknin kamachinmanmi phisqa bolsa qolqeta qorqan, hukninmantaq iskay bolsata, hukkaqmantaq huk bolsata (Mat. 25:15). Rikusqanchis hina, manan llapankumanchu kaqllata qorqan, chaywanpas kinsantinku chay qolqeta llankˈachinankutan munarqan, chhaynapi astawan ganananpaq. Jesuspas tukuy atisqankuta akllasqa cristianokuna predicanankutan munarqan (Mat. 22:37; Col. 3:23). Chaymi Jesuspa qatikuqninkunaqa 33 watapi Pentecostés fiestapi askha nacionkunamanta runakunaman predicayta qallarirqanku, Bibliapi Hechos libropas willanmi predicaypi anchatapuni llankˈasqankuta (Hech. 6:7; 12:24; 19:20).f

 9. a) ¿Imatan iskaynin huntˈaq kamachikuna ruwarqanku? b) ¿Imatan ruwasqankumanta yachasunman? c) ¿Imatan ruwananku kay pachapi kawsayta suyakuqkuna?

⁹ Bolsa qolqemanta Jesuspa willasqanpiqa 2 kamachikunan sinchita llankˈaspa qolqeta ganarqanku. Ichaqa manan chayqa 2 clase huntˈaq akllasqa cristianokunaq kanantachu representan. Aswanpas representan tukukuy pˈunchaykunapi huntˈaq sonqoyoq llapa akllasqa cristianokunatan. Paykunaqa willakuypi 2 kamachikuna hinan anchatapuni predicacionpi llankˈarqanku, astawanqa 1919 watamantapacha. Ichaqa, ¿akllasqa cristianokunallachu anchata predicacionpi llankˈananku? Manan. Ovejakunamanta cabrakunamantawan willakuymi rikuchiwanchis kay pachapi kawsayta suyakuqkunapas predicananku kasqanta, huntˈaq sonqo kanankuta, akllasqa cristianokunata yanapanankutapas. Chay ruwaytan paykunaqa ancha kusisqa chaskikunku. Akllasqa cristianokunapas, kay pachapi kawsanankupaq suyakuyniyoqkunapas ‘chˈulla tˈaqa’ hinallan anchata kallpachakunku predicanankupaq, Diospa llaqtanman runakunata pusamunankupaqpas (Juan 10:16).

10. ¿Iman rikuchiwanchis tukukuy pˈunchaykunapi kawsashasqanchista?

¹⁰ Jesusqa munarqan llapa qatikuqninkuna predicacionpi anchata llankˈanankutan. Chaytan ñawpa cristianokunaqa ruwarqanku. Ichaqa, bolsa qolqemanta willakuyqa kay tiempopin huntˈakushan. Chhaynaqa, ¿imaynatan kay tiempopi cristianokuna llankˈashanku? Sinchitan llankˈashanku. Manan kay tiempopi hinaqa haykˈaqpas predicakurqanchu. Chayraykun watan-watan waranqanpi runakuna bautizakunku, hinaspa paykunapas predicallankutaq. Chaykunata qhawarispa, ¡maytachá Jesusqa kusikun! Chaymi rikuchiwanchis tukukuy pˈunchaykunapi kawsashasqanchista.

11. ¿Imaynapin yachanchis manchay ñakˈariy tiempopi Jesús kutimunanta?

¹¹ Jesusmi nirqan: “Unaymantataq chay kamachikunaq patronninqa kutimurqan, hinaspan paykunamanta cuentata mañarqan”, nispa (Mat. 25:19). Chhaynaqa, ¿haykˈaqmi patrón otaq Jesús kutimunqa? Manchay ñakˈariy tiempo tukunanña kashaqtinmi. ¿Imaynapin chayta yachanchis? Mateo 24, 25 textokunapin askha kutita willan Jesuspa kutimunanmanta. Hukninpin Jesús nirqan: “Runaq Churintan rikunqaku hatun atiywan lliphlli-kaywan phuyupi hamushaqta”, nispa. Chaymi huntˈakunqa manchay ñakˈariy tiempopi runakunata juzgananpaq Jesús hamuqtin. Chaymantapas tukukuy pˈunchaykunapi kawsaq cristianokunatan Jesús nirqan: “Makilla kashaychis, manan yachankichischu ima horatachus Señorniykichispa kutimunanta”, nispa. Nillarqantaqmi: “Runaq Churinqa hamunqa mana yachasqaykichis horatan”, nispa (Mat. 24:30, 42, 44). Chaypin rikunchis patronpa kutimusqanmanta Jesús willaspaqa, runakunata juzgananpaq kutimunanmanta, kay millay pachata tukuchinanmantawan rimashasqanta.g

12, 13. a) ¿Ima nirqanmi patrón iskaynin huntˈaq kamachinkunata? b) ¿Imaraykun chayta nirqan? c) ¿Haykˈaqmi akllasqa cristianokuna hukpaqkama sellasqa kanqaku? (Qhaway “Wañunankupaqña kashaqtinkun sellasqa kanku” nisqa recuadrota.) d) ¿Imatan chaskinqaku akllasqa cristianokunata yanapaq cristianokuna?

¹² Willakuypi nisqan hina, patronmi viajasqanmanta kutimuspa iskaynin huntˈaq kamachikunata nirqan: “Kusapuni, allin huntˈaq kamachi, pisi llankˈanapipas allintan huntˈarqanki, chaymi hatun llankˈanaman churasqayki”, nispa (Mat. 25:21, 23). ¿Imaraykun chay hinata nirqan? Allinta llankˈasqankuraykun. 5 bolsa qolqe chaskiq kamachin 5 bolsatawan ganasqa, 2 bolsa chaskiqtaq 2 bolsatawan ganasqa. ¿Imatan chaykuna representan? ¿Imatan Jesús ruwanqa kutimuspa?

¹³ Manaraq manchay ñakˈariy qallarishaqtinmi, kay pachapiraq kaq akllasqa cristianokunata Jehová Diosqa hukpaqkama sellanqa. Chaymi rikuchin Jehová Dios allinpaq paykunata qhawarisqanta (Apo. 7:1-3). Manaraq Armagedón qallarishaqtintaq, hanaq pachaman Jesús paykunata pusapunqa. Ichaqa, ¿imatan chaskinqaku akllasqa cristianokunata yanapaq cristianokuna? Jesusmi juzgaspa ovejata hina paykunata qhawarinqa, chaymi kay pachapi tiyanankupaq bendecinqa (Mat. 25:34).

14, 15. ¿Wakin akllasqa cristianokuna mana allinman tukupunankutachu Jesús nisharqan bolsa qolqe willakuywan, imaynapin chayta yachanchis?

¹⁴ Bolsa qolqemanta willakuypiqa kallarqantaqmi mana allin kamachipas. Chay kamachiqa manan bolsa qolqe chaskisqanwan imallatapas ruwasqachu nitaqmi chay qolqeta astawan ganananpaq bancoman apasqachu, aswanpas pˈamparqosqan. Patronninmi nirqan mana serviq qella kamachi kasqanta, chaymi qolqe bolsa qosqanta qechuspa 5 bolsa qolqe ganaq kamachiman qopurqan, qella kamachitataq wasinmanta qarqomurqan “hawa laqhayaqman”. Chaypin khuyayta waqarqan (Mat. 25:24-30; Luc. 19:22, 23).

¹⁵ Rikusqanchis hina, chay willakuypin huknin kamachi mana serviq karqan. Chayta Jesús willaspa, ¿nisharqanchu kinsa akllasqa cristianomanta huk mana allin kananta? Manan. ¿Imaynapin chayta yachanchis? Huntˈaq kamachimanta willakuywan tupanachispan. Chay willakuypin Jesusqa nirqan huknin kamachi wakin kamachikuna qatiykachasqanta, chhaynaqa, ¿kay tiempopi huntˈaq kamachichu mana allinman tukupunan karqan? Jesusqa manan chaytachu nisharqan. Aswanpas chay willakuywanmi anyasharqan ama chay hina kanankupaq. Chhaynatan ruwallarqantaq 10 sipaskunamanta willakuywanpas. Nirqanmi chay sipaskunamanta kuskan mana yuyayniyoq kasqankuta. Chhaynaqa, ¿llapa akllasqa cristianokunamantachu kuskan mana allinman tukupunanku karqan? Manan. Aswanpas Jesusqa akllasqa cristianokunatan yachachisharqan listolla, makilla kashanankupaq.h Bolsa qolqemanta willakuywanpas chay hinatan yachachisharqan. Jesusqa manan nisharqanchu tukukuy pˈunchaykunapi wakin akllasqa cristianokuna mana allinman tukupunankutachu. Aswanpas llapa akllasqa cristianokunatan anyasharqan anchatapuni llankˈanankupaq amataq qella kamachi hinachu kanankuta (Mat. 25:16).

16. a) ¿Imatan yachanchis bolsa qolqe willakuymanta? b) ¿Imatan entienderqanki bolsa qolqemanta willakuypi? (Qhaway “¿Imaynatan entiendenchis bolsa qolqemanta willakuyta?” nisqa recuadrota.)

¹⁶ ¿Imatan yachanchis bolsa qolqemanta willakuywan? Jesusmi akllasqa cristianokunaman encargarqan predicacionta, Diospa llaqtanman runakuna apamunankutapas. Chaywanpas Jesusqa munan llapallanchis predicacionpi anchata llankˈananchistan. Sichus tukuy tiempo predicasun Jesuspa llapa kamachisqantataq kasukusun chayqa, bendeciwasunmi (Mat. 25:21, 23, 34).