Imamantapas iman kaqllata rimay

¿IMAYNAPIN huk cristiano imamantapas mana kaqta rimanman? Yaqapaschá chayta ruwanman uyarisqanman hinalla imatapas rimasqanrayku, otaq mana allinta entiendesqanrayku. Chayraykun kallpachakunanchis imachallamantapas iman kaqtapuni rimananchispaq, chhaynapin uyariqninchiskunaqa tukuy ima rimasqanchista cheqaqpaq hap’inqaku.

Predicacionpi. Wakinqa Bibliamanta manaraq allintachu yachasqankuraykun manchakunku predicayta. Chaywanpas predicaspankuqa reparankun Bibliaq yachachikuyninkunamanta cheqaq kaqta willay atisqankuta. ¿Imaynatan atinku? Allinta preparakuspankun.

Chayrayku manaraq predicaq lloqsishaspaykiqa allinta yuyaykuy imamantachus rimanaykita. Qhawariy imakunatachus runakuna tapusunkikuman chayta, chayman hina preparakuy Bibliaq nisqanman hina kutichinaykipaq, chhaynapin mana manchakuspa iman kaqllata kutichinki. Bibliamanta estudiota qonaykipaqpas allintan preparakunayki, qhawarinaykitaq imaynatachus sapanka parrafoq tapuyninta Bibliaq nisqanman hina kutichikushan chayta.

Sichus huk llank’aqmasiyki otaq predicacionpi huk runa mana yachasqaykimanta tapusunkiman chayri, ¿imatan ruwawaq? Ama yuyaykusqaykiman hinallaqa kutichiychu. Biblian nin: “Chanin runaqa allintan yuyaykun kutichinanpaq”, nispa (Pro. 15:28). Chay tapukuyninta allinta kutichinaykipaqmi qhawawaq Razonamiento a partir de las Escrituras nisqa librota otaq “Temas bíblicos para consideración” nisqata. Chaykunata mana aparqankichu chayqa, niwaqmi huk kutipi allinta t’aqwispayki chayta kutichinaykipaq. Sichus chay runa cheqaqtapuni yachayta munan chayqa, suyakunqan tapukusqanta allinta kutichinaykipaq. Chaymantapas chaypin reparanman mana yachaysapamanchu tukusqaykita.

Allin iñiyniyoq cristianokunamantan yachawaq Bibliamanta allin yachachiq kanaykipaq. Chayrayku allinta qhawariy ima textokunatachus qhawachisqankuta imaynatachus sut’inchasqankutapas. Allin yachachiq kanaykipaq imatapas nisuqtiykikuqa huch’uyaykukuywan chaykunata hap’ikuy. Tukuy sonqo predicaq Apolos sutiyoq cristianoqa hukkunaq yanapayninwanmi aswan allinta yachachirqan. Lucaspa nisqan hina, payqa karqan “kusa rimaq qhari, Diospa Simin Qelqakunata allinta yachaq”. Chaymi “Jesusmanta iman kaqtapuni tukuy sonqo rimaqpas yachachiqpas”. Ichaqa manaraqmi allintachu entienderqan wakin yachachikuykunata. Chayta reparaspankun Aquilawan Priscilawan “wasinkuman payta pusarqanku, hinaspan aswan sut’itapuni Diospa ñanninta yachachirqanku” (Hech. 18:24-28).

‘Cheqaq yachachikuytan hap’ikuna.’ Iñiq t’aqaqa ‘cheqaq-kayta takyachiq waqaychaq’ iman, chayraykun huñunakuykunapiqa ancha respetowan yachachina (1 Tim. 3:15). Diosmanta cheqaq kaqta yachachinapaqqa, allintan entiendena discursopaq akllasqanchis textokunata. Chaypaqqa allintan qhawarina imamantachus chay texto rimashasqanta imapaqchus qelqakurqan chaytapas.

Discursoykita uyariqkunaqa yaqapaschá chaymanta hukkunaman willanqaku. ‘Llapanchisña imaymanapi pantanchis’ chaypas, kallpachakunanchismi iman kaqllata yachachinanchispaq (Sant. 3:2). Bibliamanta Allin Yachachiq Kanapaq Escuelapi matriculasqa qharikunaqa tiempowanmi umalli kapunqaku, umallikunamantaqa ‘aswan askhatan mañakun’ (Luc. 12:48). Sichus chay iñiqmasikuna mana allinta yuyaykuspa pantasqata imatapas yuyaychankuman, chay hawataq iñiq t’aqa sasachakuypi tarikunman chayqa, Diosmi paykunapaq phiñakunman (Mat. 12:36, 37). Chayraykun umalli kayta munaqkunaqa allinta hap’ikunanku ‘cheqaq yachachikuyta’ (Tito 1:9).

Ima yachachisqaykipas Bibliaq ‘cheqaq yachachikuyninkunaman’ hinan kanan (2 Tim. 1:13). Atillankin chay ruwaytaqa. Chaypaqqa qallariyninmanta tukukuyninkaman Bibliata leenayki. Chaykamaqa kallpachakuy qatiqninpi willakusqanman hina ruwanaykipaq, chhaynapi allinta yachachinaykipaq.

Preparakushaspaykin tapukuwaq: “¿Bibliaq yachachisqanman hinachu kashan? Discursoyta uyariqkuna, ¿Jehová Diosmanchu asuykunqaku icha runakunaq yachaynintachu alabanqaku?” nispa. Yuyarinaykin Jesuspa nisqanta, paymi nirqan: “Simiykiqa cheqaq-kaypunin”, nispa (Juan 17:17; Deu. 13:1-5; 1 Cor. 1:19-21). Chaymantapas allin yuyayniyoq hunt’aq kamachiq apachimuwasqanchis qelqakunawanmi yanapachikuwaq, chhaynapi textokunata allinta entiendenaykipaq, uyariqkunapaq hina allin yuyaywan yachachinaykipaqpas. Sichus discursoykikunata qonki Bibliaq ‘cheqaq yachachikuyninkunaman’ hina, allin yuyayniyoq hunt’aq kamachiq ruwamusqan qelqakunaman hinataq textokunatapas sut’inchanki chayqa, cheqaq kaqtan imamantapas yachachinki.

Allinta qhawariy cheqaq kaqtachus yachachishanki chayta. Huk yachachikuyta allinta sut’inchanaykipaq otaq imaynatachus chay yachachikuyman hina ruwankuman chayta rikuchinaykipaqpas, willawaqmi kay tiempopi imakuna sucedesqanmanta, huk qelqaq nisqanmanta, piqpa ima ruwasqanmantapas. Ichaqa imachus kaqllata chaykunamanta rimanayki. Chaypaqqa allintan qhawarinayki maymantachus chaykunata horqoshasqaykita. Ima willakuypas ima yachaypas tiempoq pasasqanman hinaqa cambiashallanmi. Chayraykun allinta qhawarinayki periodicopi, radiopi, televisionpi otaq Internetpi ima yachasqaykipas cheqaqpunichus kashan icha manachus chayta. Proverbios 14:15 texton nin: “Pisi yuyayniyoqqa tukuy uyarisqantan creen, yuyayniyoqmi ichaqa thaskisqankunata allinta qhawan”, nispa. Chaymi tapukunayki: “¿Confianapaq hinachu kashan kay yachasqaykuna? ¿Maypin kay willakuymanta allinta yachallaymantaq?” nispa. Ima willakuymantapas iskayashanki chayqa, amaña chaykunamanta willayñachu.

Chaymantapas allintan yuyaykunayki imaynatachus chay willakuymanta rimanki chayta. Ima willakuymantapas rimasqaykiqa imamantachus willakushan chayman hinan kanan. Sichus chay willakuypi “wakin runakuna” nisqa rikhurin chayqa, ama niychu “yaqa llapan runakuna”, nispaqa. “Askha runakuna” nishaqtinpas, ama niychu “llapanku”, nispaqa, “mayninpi” nishaqtintaq ama niychu “sapa kutillan”, nispaqa. Ima willakuymantapas huknirayta willawaq otaq chayman imaymanata yapaykuwaq chayqa, manan uyariqniykikunaqa confiankumanchu willasqaykipi.

Imamantapas iman kaqtapuni rimanki chayqa, cheqaq kaqtapuni rimaq runamantan reqsisqa kanki. Chhaynapitaq Jehová Diospa testigonkunata ancha allinpaq hap’inqaku, astawanqa “mana llullakuq” Jehová Diostan hatunchanqaku (Tito 1:2).