Marcos

15 Ña punllayajujpimi importante sacerdotecunapash, llactapi autoridadta charijcunapash y Leyta yachachijcunapash tandanajurca. Shuj shimipi nishpaca, tucuilla Sanedrín enteromi Jesusta imata ruranata ricungapaj tandanajurca. Chai jipami, maquicunatapash huatashpa Jesustaca Pilatopaman aparca. 2 Chaimi Pilatoca Jesustaca tapurca: “¿Canllu judiocunapa rey cangui?”. Shina tapujpimi Jesusca nirca: “Ari, ñucami cani”* nishpa. 3 Shinapash importante sacerdotecunaca ashtaca cosascunamandami Jesustaca juchachinajurca. 4 Chaimi Pilatoca cutin Jesustaca tapurca: “¿Nachu imatapash nigringui? Imacunamandalla canda juchachinajujtaca ¿nachu uyajungui?” nirca. 5 Shinapash Jesusca ñana imatapash nircachu. Chaimandami Pilatoca manllarishpa ricujurca.

6 Pilatoca cada Pascua Fiestapimi, gentecuna agllashca prezota libre saquina costumbreta charirca. 7 Chai punllacunapica, Barrabás nishca runami tiarca. Paipash y shuj runacunapash gobiernopa contra tucushpa, gentecunata huañuchishcamandami prezo carca. 8 Pilatoca shuj prezota libre saquina costumbretami charirca. Chaimi ashtaca gentecunaca Pilatopaman rishpa, shuj prezota libre saquipai nishpa mañai callarirca. 9 Chaimi Pilatoca paicunataca tapurca: “¿Cangunaca judiocunapa reytachu libre saquichun munanguichi?” nishpa. 10 Importante sacerdotecuna envidiamanda Jesusta prezo churashcatami Pilatoca cuenta japirca. 11 Shinapash importante sacerdotecunaca, Barrabás runata libre saqui nichunmi gentecunataca yachachinajurca. 12 Pilatoca cutinmi gentecunataca nirca: “Cangunaca judiocunapa rey nishpami cai runataca rijsinguichi. Shinaca ¿imatata paitaca rurasha?”. 13 Shina nijpimi gentecunaca caparishpa cutin ninajurca: “Jatun racu caspipi* huarcushpa saquichi”. 14 Shina ninajujpimi Pilatoca nirca: “¿Imamandata shina ninajunguichiyari? Cai runaca ¿ima nalitata rurashcayari?”. Shina nijpicarin chai gentecunaca ashtahuan shinllita caparishpami ninajurca: “Jatun racu caspipi* huarcushpa saquichi”. 15 Chaimi Pilatoca, gentecuna ama culirachun Barrabastaca libre saquirca. Chai jipaca Jesusta azialachun mandashpami, jatun racu caspipi* huarcushpa huañuchichun paitaca chai soldadocunaman curca.

16 Soldadocunaca, Pilatopa huasi patiomanmi Jesustaca aparca. Tucuilla soldadocunatapashmi cayachun cacharca. 17 Jesusmanga yanalla puca* telatapashmi churachirca y cashacunahuan rurashca coronatapash umapi churachirca. 18 Jipamanga cashna nishpami capari callarirca: “Ali punlla, judiocunapa rey” nishpa. 19 Chai jipaca, vara caspihuan umapi huactashpami, Jesustaca tucashpa* saquinajurca. Ashtahuanbash paipa ñaupapimi cungurinajurca. 20 Jesusmanda burlarishca jipaca, yanalla puca telata llujchichishpami, cutin paipa ropata* churachirca. Chai jipaca jatun racu caspipi* clavangapami chaimanda llujchishpa aparca. 21 Chai ñandaca Cirene llactamanda Simón shuti runagumi pambamanda shamujushcarca. Paica Alejandropa, Rufo shuti runagupa taitami carca. Paitami chai jatun racu caspita* aparishpa richun mandarca.

22 Shinami Jesustaca Gólgota nishca pushtuman aparca. Chai pushtutaca “Calavera Pushtu” nishpami rijsin carca. 23 Chaipimi, mirra nishcahuan chapushca* vinota Jesusmanga ufiachingapaj munarca. Pero paica na ufiangapaj munarcachu. 24 Jatun racu caspipi* clavashca jipaca, Jesuspa jahualla churajushcata partiringapami, paicunapura suerteta ruranajurca. Cada uno imata japinata ricungapami shina ruranajurca. 25 Ña las 9 de la mañana tucujujtami Jesustaca jatun racu caspipi* clavarca. 26 Imamanda huañushcata yachachunmi shuj tablapica, “judiocunapa reymi can” nishpa escribirca. Chai tablataca Jesuspa uma jahua ladopimi churarca. 27 Shinallata, Jesuspa ladopica ishcai shua runacunatapashmi jatun racu caspipi* clavashpa saquirca. Shujtaca ali ladopi, chaishujtaca lluqui ladopimi huarcurca. 28 * 29 Chaita yalij gentecunaca, umatapash cuyuchishpami nalicachishpa* cashna rimanajurca: “Canga, Taita Diospa templo huasita urmachishpapash, quimsa punllapillami cutin shayachisha ninmi carcangui. 30 Shinaca chai jatun racu caspimanda* uriajushpa salvariyari” nishpa. 31 Importante sacerdotecunapash y Leyta yachachijcunapash shinallata burlarishpami paicunapura ninajurca: “Shujcunataca salvarcami. Pero paillata salvaritaca na ushanllu. 32 Si es que Israel llactapa rey, Cristo cashpaca, cai rato chai jatun racu caspimanda* uriajuchun. Chaimanda uriajujta ricushpaca paipi crishunmi” ninajurca. Jesuspa ladopi jatun racu caspipi clavashca runacunapashmi, paitaca nalicunata nishpa rimanajurca.

33 Cazi las 12 tucujujtami alpa entero amsa amsa tucurca. Y cazi las 3 la tardecamanmi shina carca. 34 Ña cazi las 3 cajpimi Jesusca shinllita caparishpa, “Éli Éli ¿láma sabajtháni?” nirca. Shina nishpaca: “Ñuca Taita Dioslla, ñuca Taita Dioslla ¿imashpata saquihuashcanguiyari?” nijunmi. 35 Chaita uyashpami, chai ladollapi shayanajuj huaquin gentecunaca ninajurca: “Uyaichi, Eliastami cayajun” nishpa. 36 Chaimi shuj runaca, shuj esponjata japishpa agrio agrio vinopi satingapaj calpashpa rirca. Chai jipaca shuj caspipi churashpami, Jesús ufiachun ricuchishpa nirca: “Saquichilla, Elías shamushpa uriajuchinllu imami” nishpa. 37 Shinapash Jesusca shinllita caparishpami huañurca.* 38 Chai ratomi Taita Diospa templo huasipi cortinaca, jahuamanda urai llujshijta liquirirca. 39 Jesuspa ñaupapi shayajuj soldadocunapa capitanga* ima pasashcata ricushpa y Jesús ña huañushcata ricushpami nirca: “Ciertopachami cai runaca Taita Diospa Churi cashca” nishpa.

40 Chaipica huaquin huarmigucunapashmi tucui ima pasajta caru carulla ricunajurca. Paicunaca María Magdalena, Salomé y María shuti huarmigucunami carca. Mariaca Santiagopa* y Josés shuti runagupa mamami carca. 41 Jesús Galileapi cajpica, chai huarmigucunami paitaca imagupipash ayudashpa, cumbashpa purin carca. Jesusta cumbashpa Jerusalenman vichai shamushca huarmigucunapashmi chaipi carca.

42 Ñami amsayajurca. Chai punllaca Alistana* Punllami carca. Chai cayandi punllaca sabadomi cagrijurca. 43 Arimatea llactamanda José shuti runaguca, manllaitapash ladoman saquishpami, Jesusta pambangapaj munashpa Pilatohuan parlangapaj rirca. Paica, Sanedrinmanda respetashca runami carca. Taita Diospa Gobierno mandanatapashmi shuyajurca. 44 Pilatoca Jesús ña huañushcata o nara huañushcata yachangapaj munashpami, soldadocunapa capitanda cayachun cachashpa tapurca. 45 Soldadocunapa capitán ña villajpimi, Pilatoca Jesús huañushcata yachashpa Josetaca Jesuspa cuerpota apachun saquirca. 46 Chai jipami Joseca fino lino telaguta randirca. Paica Jesuspa cuerpota jatun racu caspimanda* uriajuchishpami chai telaguhuan pilluchirca. Chai jipaca, jatun rumipi utujuchishca bovedapimi Jesuspa cuerpota churarca. Bovedaman yaicunatapash shuj jatun rumihuan tapashpami* saquirca. 47 Shinapash María Magdalena y Josespa mama Mariapashmi, Jesusta maipi churashca pushtuta ricushpa quidarca.