Hebreos

4 Taita Diosca, paipa samana punllapica yaicui ushanguichirami nijunmi. Chaimandami chai samana punllapi yaicui ushangapaca, cuidarishpa catina capanchi. Na cuidadota charishpaca, pactara quiquingunapuramanda pipash chai samana punllapi yaicuita na ushanguichiman. 2 Ali villaicunataca ñucanchipashmi israelitacunashnallata uyarcanchi. Pero paicunaca, ali villaicunataca na cazurcachu. Chaimandami chai ali villaicunaca, nimapi na paicunataca beneficiarca. Paicunaca, ali villaicunata cazujcunashna na shinlli feta charimandami na cazurca. 3 Shinapash tucui shunguhuan crijcunaca, Taita Diospa samana punllapi yaicuitaca ushanchimi. Chaitaca yachanchimi porque Taita Diosca cashnami nirca: “Ñucaca ninanda culirashpami cashna nishpa jurarcani: ‘Ñuca samana punllapica paicunaca na yaicungachu’ nishpa”. Aunque cai mundo* tiai callarishcapi Taita Diospa rurashcacuna ña completarishca cajpipashmi paica shina nirca. 4 Séptimo punllamanda parlashpaca, Taita Dios escribichishca shimipi shuj partepica cashnami nijun: “Séptimo punllapimi, Taita Diosca paipa rurashcacunata tucuchishpa samarca” nijunmi. 5 Shinallata “ñuca samana punllapica na yaicungachu” nijunmi.

6 Ali villaicunata primero uyashcacunaca na cazuimandami, Taita Diospa samana punllapica na yaicurca. Pero huaquingunaca, Taita Diospa samana punllapica todavía yaicuita ushanrami. 7 Taita Diosca, ashtaca tiempo jipami, David escribishca salmopica shuj punllata cutin agllashpa chai punllataca “cunan” nin. Imashinami cai cartapi ña niparcanchi: “Ñuca imata nishcata cunan uyashpaca, na rumi shungu tucunachu canguichi” niparcanchimi. 8 Porque si israelitacunata Josué samana pushtuman apashca cajpica, jipacunamanga Taita Diosca na shuj samana punllamanda parlanmanllu carca. 9 Shinaca, Taita Diospa llactapaca shuj samana punllaca* todavía tianrami. 10 Taita Diospa samana punllapi yaicujcunaca, imashinami Taita Diosca paipa rurashcacunamanda samarca, shinallatami paicunapash paicunapa rurashcacunamandaca samashca.

11 Shinaca, chai samana punllaman yaicungapami ninanda esforzarina capanchi. Shinami na cazujcunapa ejemplotaca na catishun. 12 Porque Taita Diospa shimica causajmi can. Ashtaca podertami charin. Ishcandi ladoman filo filo espadatapash yali ashtahuan filomi can. Ñucanchi shungu ucucaman chayashpami, ñucanchi imashina persona cashcata y ñucanchi shungu ucupi imashina cashcatapash ricuchita ushan. Tullu ucupi tiaj ñutujutapashmi, tullucunamandaca separaita ushan. Shinallata ñucanchicuna imata pensajta, ñucanchi shungupi imata munajtapashmi ricuchita ushan. 13 Taita Diospa ñavipica nimapash na pacalla canllu. Sino tucui cosascunami paipaca shutilla can. Taita Diospa ñavipica tucuimi claro claro ricurinalla can. Y paimanmi ñucanchicuna tucui imata rurashcataca ricuchina capanchi.

14 Ñucanchica, shuj alipacha sacerdote principaltami* charinchi. Paica Taita Diospa Churi Jesusmi can. Paica ñami jahua cieloman rishca. Chaimandami Jesuspi crishcataca parlashpa catina capanchi. 15 Ñucanchi sacerdote principalca, ñucanchicuna pandarijlla cashcataca intindita ushanmi. Porque paica ñucanchi charishca llaquicunatallatami charirca. Pero Jesusca ni shuj pecadotallapash na rurarcachu. 16 Shinaca, Taita Dios mandangapaj tiarina pushtuman quimirishunchi. Paica ñucanchitaca ninandami juyan.* Na manllashpami paitaca mañana capanchi. Paica ñucanchita llaquishcamanda, ninanda juyashcamandami minishtijuj tiempopipacha ñucanchitaca ayudanga.