Romanos

13 Ñucanchita mandanajuj autoridadcunataca* tucui gentecunami* cazuna capanchi. Porque chai autoridadcunaca Taita Dios tiachun saquijpillami tian. Cunanbi tiashca autoridadcunaca, Taita Dios tiachun saquijpi mandanajushpapash, na tucui autoridadtaca charinllu. 2 Autoridadcunata na cazungapaj munajcunaca Taita Diospa contrami tucunajun. Taita Dios churashca autoridadcunata na cazungapaj munajcunaca llaquichi tucungami. 3 Alita rurajcunaca, autoridadcunataca na manllanllu. Pero nalita rurajcunaca manllanami can. ¿Autoridadcunata na manllashpa causangapachu munapangui? Shinaca alita rurashpa catipangui. Chaimi autoridadcunaca alicunata quiquinmandaca parlanga. 4 Autoridadcunaca Taita Diospa sirvijcunashnami can. Paicunataca quiquinba alipallatami Taita Diosca churashca. Pero nalicunata rurajushpaca, autoridadcunataca manllanami capangui. Porque paicunaca rasonbimi quiquinda castigaitaca ushan. Paicunaca nalita rurajcunata castigashpami Taita Diosta sirvinajun.

5 Chaimi autoridadcunataca cazuna capanguichi. Pero na castigana manllaimandallachu cazuna capanguichi. Sino quiquingunapa concienciapi ali sintirinamandapashmi cazuna capanguichi. 6 Chaimi quiquingunaca impuestocunatapash paganguichi. Autoridadcunaca tucui tiempo gulpi gentecunata sirvinajuimandami, Taita Diospa sirvijcuna can. 7 Tucuicunamanmi imata cuna cashcataca cuna capanguichi. Impuestota cobradorcunamanga tucui clase o tucui laya impuestota pagapaichi. Cazuchun munaj gentecunataca cazupaichi. Respetachun munaj gentecunataca respetapaichi.

8 Nipiman na imatapash dibinachu canguichi. Caishujhuan chaishujhuan juyarishcatallami dibina canguichi. Porque shujcunata juyajcunaca ñami leyta pactachishca. 9 Porque Leypica cashna nishpami mandajun: “Cazarashca jahuaca na shujhuan canachu cangui. Na huañuchinachu cangui. Na shuanachu cangui. Na ansiarinachu cangui” nijunmi. Porque cai Leypash y Leypi tiaj shuj mandamientocunapash shujlla mandamientomanmi apajun. Chai mandamientopica nijunmi: “Canba projimotaca* quiquin juyarinshnallatami juyana cangui” nishpa. 10 Juyashpa causajcunaca na pitapash nalitaca ruranllu. Porque juyashpa causajcunaca Leytaca alimi pactachinajun.

11 Ima tiempopi causanajushcata yachaimandami, chaitaca rurana capanguichi. Puñujunshna causanajushca tiempomanda ña rijcharina cashcataca yachanguichimi. Porque Jesuspa discipulocuna tucushca tiempohuan ricujpica, cunanbimi ñucanchi salvarina tiempoca ashtahuan chayamujun. 12 Tutaca ñami tucurishca. Ñallami punllayagrijun. Shinaca tutapi ruranacunata saquishpami, macanajungapaj punllapi churajunata churajuna capanchi. 13 Punlla cajpishnami aliguta portarishpa causana capanchi. Nali fiestacunataca* na ruranachu capanchi. Ni machaitapash na machanachu capanchi. Huainayana juchacunapipash* na urmanachu capanchi. Nalicunata rurashpa nimata na pinganayachishpaca* na causanachu capanchi. Ni macanajuitapash na macanajushpa, envidiaitapash na envidiashpami causana capanchi. 14 Chaipa randica, Señor Jesucristopa ejemplotami aliguta catina capanchi. Quiquingunapa nali munaicunata imashina pactachinataca na pensarijunachu capanguichi.