Lucas

2 Chai punllacunapimi Roma llactapa rey* Augustoca chai llactamanda tucuilla gentecuna paicunapa shutita anotachingapaj richun mandarca. 2 Siria llactata Quirinio shuti runa mandajuj punllacunapimi, tucuilla gentecunataca paicunapa shutita anotachingapaj richun, por primera vez mandarca. 3 Chaimi tucuilla gentecunaca paicuna nacirishca llactapillata paicunapa shutita anotachingapaj rinajurca. 4 José runagupashmi Galilea llactapa Nazaret pueblomanda, Judea llactaman rirca. Paica Davidpa familiamanda caimandami chai llactaman rina tucurca. David nacirishca puebloca Belén shutimi carca. Belén puebloca, Judea llactapimi carca. 5 José runaguca paipa huarmi Mariandimi paicunapa shutita anotachingapaj Belén llactaman rinajurca. María huarmiguca ungunallami carca. 6 Paicuna chai llactapi cajpimi, María huarmigupaca huahuaguta unguna punlla chayarca. 7 Shinami Mariaca shuj jari huahuaguta ungurca. Chai huahuaguca paipa primer churimi carca. Chai huahuagutaca, shuj telaguhuan pilluchishpami animalcunaman micunata carana pushtugupi sirichirca. Porque maipi mingarina pushtutaca paicunaca na tarishcarcachu.

8 Chai llactapica, llamagucunata michij runacunapashmi paicunapa llamagucunata cuidashpa, tutacunaca pambapi pacarishpa causanajurca. 9 Shinapash na yashcapimi Jehová* Diospa shuj angelca ricurirca. Shinallata Jehová* Diospa michagumi paicunapa muyundipica ninanda brillajurca. Chaimi ninanda manllarinajurca. 10 Shinapash chai angelca nircami: “Ama manllaichichu, ali villaicunatami cangunamanga villagrini. Chai villaicunami tucuilla gentecunata cushichinga. 11 Porque cunanmi David nacirishca llactapica shuj huahuagu nacirishca. Paimi cangunataca salvanga. Paica Cristo* ñucanchi Señormi can. 12 Cangunaca, animalcunaman micunata carana pushtupimi telaguhuan pilluchishca shuj huahuagu sirijujta ricunguichi. Chaita ricushpami pai cajtaca rijsinguichi” nircami. 13 Chaipica, na yashcapimi chai angelhuanga ashtaca angelcuna* ricurirca. Paicunaca Taita Diosta alabashpami ninajurca: 14 “Taita Diosca jahua cielopi alabai tucushca cachun. Y cai alpapi Taita Diospa ñaupapi ali ricurishca gentecunapash tranquilo ali causaiguta charichun”.

15 Shina nishpami angelcunaca chaimanda rishpa jahua cieloman tigrarca. Chai jipami llamagucunata michij runacunaca paicunapura cashna parlari callarirca: “Jehová* Dios ñucanchiman villashcashna Belén pueblopi ima tucushcata ricungapaj ucha jacuchi”. 16 Shina nishpami paicunaca uchalla rirca. Chaiman chayashpaca animalcunaman micunata carana pushtupi shuj huahuagu sirijujtami ricurca. Chaipica José y Mariatapashmi ricurca. 17 Chaita ricushpami llamacunata michij runacunaca, chai huahuagumanda shuj ángel imata nishcata parlanajurca. 18 Y chai runacunata uyajcunaca tucuillami manllarishpa uyanajurca. 19 Cutin Mariaca chai tucui nishcacunata paipa shungupi churashpami, chaicuna ima cashcata intindingapaj aliguta pensarijurca. 20 Chai jipami llamacunata michij runacunaca chaimanda rirca. Paicunaca angelcunapa villashcacuna tucui pactarijta ricushpa y uyashpami Taita Diosta alabashpa tigranajurca.

21 Nacirishcamanda 8 punllacuna pactajpimi huahuagutaca circuncisión* nishcata rurarca y huahuagutaca Jesús shutitami churarca. Chai shutitaca María nara vijsayu* cajpillatami shuj ángel ña villashcarca.

22 Shinallata Moisesman Cushca Leypi nishcashnaca, Taita Diospa ñaupapi limpio cana punllacunami paicunapaca chayashcarca. Chaimi chai huahuagutaca Jehová* Diospa ñaupapi ricuchingapaj Jerusalenman vichai rirca. 23 Shinami Jehová* Diospa Leypi shimicunaca tucuilla pactarirca. Chaipica nijurcami: “Tucui primer churicunami Jehová* Diospalla canga” nishpa. 24 Shinallata, Jehová* Diospa Leypi nishcashnami paicunaca shuj sacrificiota* curca. Chai Leypica, “ishcai urpigucunata o ishcai huahua palomagucunata” cunallami can nijurcami.

25 Chai punllacunapica alita ruraj* Taita Diosta sirvij Simeón shuti runagumi Jerusalén llactapica causajurca. Paica Israel llactata Taita Dios ayudanatami shuyajurca. Chai runaguca Taita Diospa espíritu santo jundami carca. 26 Ashtahuangarin, Taita Diospa espíritu santomi paimanga, Jehová* Dios agllashca Cristota nara ricushpallataca, na huañuna cashcata ricuchishcarca. 27 Simeón runaguca Taita Diospa espíritu santo yuyachijpimi Taita Diospa templo huasiman yaicurca. Chai templo huasimanmi José y Mariaca Moisesman Cushca Leypi nishcata pactachingapaj paicunapa huahuagutaca apashpa yaicurca. 28 Chaimi Simeón runaguca Jesusta marcashpa Taita Diosta alabashpa nirca: 29 “Tucuita Mandaj Taita Dios quiquin nishcataca pactachipashcanguimi. Cunanga, canda sirvij ñucaca tranquilomi huañupashalla. 30 Porque gentecunata salvangapaj imata ruragrijushcataca ñami ricushcani. 31 Paitaca tucuilla gentecuna ricuchunmi cachamushcangui. 32 Paica na judío gentecuna ricuchunmi michagushna ayudanga. Paimi canba Israel llactapica michagushna punchalla canga” nirca. 33 Chai huahuagumanda Simeón runagu imatalla nishcata uyashpaca José y Mariaca ninandami manllarinajurca. 34 Ashtahuanbash, Simeón runaguca paicunamanda Taita Diosta mañashca jipami, huahuagupa mama Mariataca nirca: “Israel llactamanda ashtaca gentecuna urmachun, cutin shujcunaca cutin jatarichunmi cai huahuagutaca cachamushca. Taita Diosca paihuan cashcata gentecunaman ricuchijpipash, ashtaca gentecunaca paitaca na ricunayachishpami rimanga. 35 Ashtaca gentecuna imatapacha pensajta ricuchichunmi paitaca agllashca. Shinapash María quiquinga* shuj espadahuan tujsishpa clavajpishnami ninanda llaquiringui” nircami.

36 Shinallata Ana shuti mayorlla profeta huarmigumi chaipi carca. Paica Fanuel shuti runagupa ushimi carca. Fanuel runaguca Aser runagupa jatun familiapuramandami carca. Anaca cazarashca jipaca 7 huatacunatallami paipa cusahuanga causarca. 37 Anaca ñami 84 huatacunata charirca y viudami carca. Paica siempremi Taita Diospa templo huasipi tuta y punlla Taita Diosta sirvijurca. Shinallata ayunashpa* Taita Diosta tucui shunguhuan mañashpami causarca. 38 José y Mariapash Taita Diospa templo huasipi cajpimi, Anaca paicunapaman quimirishpa Taita Diosta alabai callarirca. Chai jipaca Jerusalén llactata Taita Dios salvachun shuyanajuj gulpi gentecunamanmi Anaca chai huahuagumanda parlai callarirca.

39 José y Mariapash Jehová* Diospa Leypi nishcata tucuita pactachishca jipami, paicuna causanajushca Galilea llactapi, Nazaret puebloman tigrarca. 40 Chai huahuaguca ashtahuan shinlli tucushpa, ashtahuan alipacha yachajushcami viñajurca. Paitaca siempremi Taita Diosca ayudajurca.

41 Cada huatami Jesuspa taitamamacunaca Jerusalenbi Pascua* Fiestaman rina costumbreta charirca. 42 Jesús 12 huatacunata charijpica paicuna costumbrashca shinami chai fiestaman Jerusalenman vichai rinajurca. 43 Pascua Fiesta punllacuna tucurijpimi paicunaca tigranajurca. Shinapash Jesusca Jerusalén llactapillatami quidarca.* Chaitaca paipa taitamamacunaca na cuenta japishcarcachu. 44 Jesuspa taitamamacunaca paicunahuan shamunajuj gentecunahuanmi Jesusca shamujunga yashpami, punlla enterota cungashca tigranajurca. Jesús na ricurijpimi familiacunapapi y rijsicunapapi mascai callarirca. 45 Shinapash Jesusta ñana tarishpami José y Mariaca Jerusalenman tigrashpa tucui ladocunapi mascanajurca. 46 Quimsa punllacuna jipaca, Taita Diospa templo huasipimi Jesustaca tarirca. Paica yachachijcunapa chaupipimi paicunata uyashpa, tapuicunata rurashpa tiajushcarca. 47 Jesusta uyanajuj gentecunaca pai alipacha intindijta y alipacha imatapash tigrachijta ricushpami manllarishca uyanajurca. 48 Jesusta chaipi ricushpami paipa taitamamaca ninanda manllarirca. Chaimi paipa mamaca Jesustaca nirca: “Ñuca huahualla, ¿imashpata chashna llaquichinguiyari? Canba taitapash, ñucapash ninanda pinarishpami candaca mascanajushcanchi”. 49 Shinapash Jesusca nircami: “¿Imashpata ñucataca mascanajurcanguichiyari? Ñuca Taitapa huasipi cana cashcataca ¿nachu yacharcanguichi?” nircami. 50 Shinapash Jesús imata nijujtaca paicunaca na intindircachu.

51 Chai jipami Jesusca paipa taitamamahuan Nazaret puebloman tigrashpa, paicunata tucuipi cazushpa causajurca. María huarmiguca chai tucui shimicunatami paipa shungupi alichishpa o huacaichishpa causajurca. 52 Shinami Jesusca ashtahuan aliguta yachajushpandi viñajurca. Paitaca Taita Diospash y gentecunapashmi juyashpa catirca.