Lucas

24 Semanapa primer punlla* tutamandatami chai huarmigucunaca Jesusta churashca bóveda jatun utujuman rirca. Paicunaca rurashcalla charijushca mishquilla ashnajuj jihuacunatami apashpa rinajurca. 2 Shinapash chaiman chayashpaca, bovedata tapajuj rumita cuyuchishcatami ricurca. 3 Bovedaman yaicushpaca, Jesuspa cuerpotaca na tarircachu. 4 Chaimi chai huarmigucunaca imata ruranatapash na atinanajurca. Shinapillatami, punchapamba brillajuj ropata* churajushca ishcai runacuna paicunapa ladopi ñapash ricurimurca. 5 Shina ricurimujpimi chai huarmigucunaca ninanda manllarishpa, alpata ricushpa cumuria quidarca.* Chaimi chai ishcai runacunaca nirca: “¿Imamandata causajuj runataca cai bovedapi mascanajunguichi? 6 Paica ñana caipi canllu. Ñami causachi tucushca.* Galilea llactapi cashpallata cangunaman imata nishcata yaripaichi.* 7 Paica nircami, Runapa Churica* pecadorcunapa maquipi entregai tucushpami, jatun racu caspipi* huañuchi tucunga. Pero quimsa punllahuanga causachi tucungami” nirca. 8 Chaipimi chai huarmigucunaca Jesús imata nishcata yarirca. 9 Chai jipallami chai huarmigucunaca chai bovedamanda tigrashpa, 11 apostolcunamanbash y chaishuj discipulocunamanbash tucuita villarca. 10 María Magdalena, Juana, Santiagopa mama María y paicunahuan shamushca shuj huarmigucunapashmi ima pasashcataca apostolcunaman parlanajurca. 11 Pero apostolcuna y chaishuj discipulocunaca, cai huarmicunaca maitapashmi ninajun yashpami, paicunataca na crinajurca.

12 Shinapash Pedroca jatarishpami bóveda utujumanga calpashpa rirca. Ucuman ricungapaj cumurishpaca, lino telacunatallami ricurca. Chaimi paica imashi pasarca nishpa pensarishpandi rijurca.

13 Chai punllallatami, Jesuspa ishcai discipulocunaca, Emaús puebloman chaquilla rinajurca. Chai puebloca Jerusalenmanda cazi 11 kilometrocuna* carupimi carca. 14 Paicunaca tucui ima pasashcata parlashpandimi rinajurca.

15 Shina parlashpandi rinajujpillatami, Jesusca paicunapaman quimirishpa paicunahuan igual ri callarirca. 16 Paicunaca paita ricushpapash, Jesús cajtaca na rijsi usharcachu. 17 Paica cashna nishpami paicunataca tapurca: “¿Imatata quiquingunaca parlashpa rinajupanguichi?”. Chaimi paicunaca ñavipash llaqui llaqui tucushpa shayarishpa quidarca. 18 Chaipimi Cleopas shuti runaguca cashna tapurca: “¿Nachu cai punllacunapi ima pasashcataca yachangui? ¿Caru llactamandachu cangui?”.* 19 Chaimi Jesusca nirca: “¿Imacunallata pasashcayari?”. Shina nijpimi paicunaca nirca: “Nazaret llactamanda Jesushuan ima pasashcatami ninajunchi. Paica Taita Diospa ñaupapipash y tucui gentecunapa ñaupapipashmi ninan poderta charij profeta cashcataca paipa parlocunahuan y ruraicunahuan ricuchirca. 20 Shinallata importante sacerdotecunapash y llactata mandajcunapashmi Jesustaca jatun racu caspipi* clavashpa huañuchichun entregarca. 21 Pero ñucanchica paimi Israel llactataca salvanga yashpami shuyanajurcanchi. Y shina pasashcamandaca ñami quimsa punlla can. 22 Shinallata, ñucanchipuramanda huaquin huarmigucunaca tutamandatami bovedaman rishcarca. Chaipi ima pasashcata parlajpimi ñucanchica manllarishpa quidarcanchi. 23 Paicunaca Jesuspa cuerpota na tarishpami angelcunatami ricurcanchi nirca. Y Jesusca causajunmi nishpa angelcuna villajpimi villangapaj shamunchi nirca. 24 Chaimi ñucanchipuramanda huaquingunaca bovedata ricungapaj rirca. Chaiman chayashpaca, chai huarmigucuna nishcashnami chai bovedataca chushajta ricurca. Pero Jesustaca na ricurcachu”.

25 Chaimi paicunataca nirca: “Na intindingapaj munajcuna, shinlli shungucuna ¿imashpata profetacuna tucui imata villashcataca na cringapaj munanguichi? 26 ¿Nachu Cristoca chashna sufrishca jipa jahua cielopi poderta chasquina carca?” nirca. 27 Jesusca, Taita Dios escribichishca shimipi paimanda imata nijujtami tucuita intindichirca. Paica Moisespa escribishcacunamanda callarishpami, tucui Profetacunapa escribishcacunatapash intindichijurca.

28 Shinami paicuna rinajushca puebloman chayarca. Chaipimi Jesusca ashtahuan caruman rijunshna rij tucurca. 29 Shinapash paicunaca caipi quidapai nishpami cashna roganajurca: “Ñamari tutayagrijun, caipi ñucanchihuan quidapayari” nishpa. Chaimi Jesusca huasiman yaicushpa paicunahuan quidarca. 30 Paicunahuan micujushpami, tandaguta japishpa Taita Diosta mañarca. Chai jipami chai tandaguta partishpa paicunaman carai callarirca. 31 Chaimi paicunaca ñavi pascarijpishna Jesús cajta rijsirca. Pero ñapashmi paicunapa ñaupamandaca chingarca. 32 Chai jipallami paicunapura ninajurca: “Taita Dios escribichishca shimita intindichishpandi ñanda shamujushpaca ¿nachu ñucanchi shungu ucuman chayajta paica parlarca?” ninajurcami. 33 Chai ratomi Jesuspa ishcai discipulocunaca jatarishpa Jerusalén llactaman tigrarca. Chaipimi paicunaca 11 apostolcunatapash y paicunahuan tandanajushca chaishuj discipulocunatapash cashna ninajujta uyarca: 34 “Ñucanchi Señorca ciertopachami causachi tucushpa Simonman ricurishca” nishpa. 35 Paicunaca ñanbi tucui ima pasashcatapash y tandaguta imashina partijta ricushpa Jesusta rijsishcatapashmi parlanajurca.

36 Paicuna shina parlanajujpillatami, Jesusca paicunapa chaupipi ricurimushpa nirca: “Tranquilo ali causaiguta charipaichi”.* 37 Pero paicunaca, shuj angeltami* ricunajunchi yashpami ninanda manllarirca. 38 Chaimi paicunataca nirca: “¿Imamandata manllarinajunguichiyari? ¿Imamandata cangunapa shungupi dudanajunguichiyari? 39 Ñuca maquita, ñuca chaquitapash ricupaichi. Ñucallatamari cani. Tacarishpa ricupaichi. Angelcunaca na ñucashna aichayu y tulluyu canllu”. 40 Shina nishpami maquita y chaquita ricuchirca. 41 Shinapash paicunaca yapata cushijushpa, manllarishpami na crishca shayanajurca. Shinapillatami Jesusca paicunataca nirca: “¿Nachu imapash micunaguta charipanguichi?”. 42 Chaimi paicunaca cusashca pescado pedazoguta cararca. 43 Shina carajpimi paica japishpa paicuna ricujta micurca.

44 Chai jipami paicunataca nirca: “Yaripaichi, cangunahuan cashpaca ñucaca nircanimi, Moisesman Cushca Leypipash, Profetacunapa escribishcacunapipash y Salmos libropipash ñucamanda escribishca tucui shimicunaca pactarinapachami can”. 45 Shina nishca jipami, Taita Dios escribichishca shimita aliguta intindi ushachun paicunataca ayudarca. 46 Shinallata nircami: “Taita Dios escribichishca shimipica nijunmi, Cristoca llaquichi tucungami y quimsa punllahuanga huañushcacunapuramanda jataringami. 47 Jerusalenmanda callarishpa tucui llactacunapimi paipa shutipi predicanajunga. Shinami gentecunaca paicunapa pecadocunamanda arripintirishpa perdonai tucunga. 48 Cangunami cai tucui cosascunataca villanguichi.* 49 Ñuca Taita cangunaman imata prometishcatami cangunaman caramusha. Shinapash, jahua cielomanda poderta chasquingacamanmi Jerusalenbi quidana canguichi” nirca.

50 Chai jipaca, llactamanda llujshishpami paicunataca Betania pueblocaman pushashpa Jesusca rirca. Chaipimi paipa maquita alzashpa paicunata bendiciarca. 51 Shina bendiciajushpallatami paicunamanda caruyashpa, jahua cieloman rirca. 52 Chaimi paicunaca cumurishpa paita alabanajurca. Chai jipaca, ninanda cushijushpami Jerusalén llactaman tigrarca. 53 Paicunaca cada punllami Taita Diospa templo huasipi Taita Diosta alabanajurca.