Apocalipsis

16 Santo nishca cuartomanda* shinllita parlamushpami, 7 angelcunataca cashna nirca: “Taita Diospa ninan culirashcata charij 7 tasongunata alpapi talingapaj richi” nircami.

2 Primer angelca paipa tasonbi imata charijushcataca cai alpapimi talirca. Chaimi manllanai sacha animalpa señalta charijcunapash y sacha animalpa estatuata adorajcunapash ninanda nanachij, ninan nali llagacunahuan sufrirca.

3 Cati angelca paipa tasonbi imata charijushcataca mar yacucunapimi talirca. Chaimi yacucunaca, huañuchi tucushca runapa yahuarshna tucurca. Mar yacucunapi causanajuj tucui animalcunapashmi* huañurca.

4 Tercer angelca paipa tasonbi imata charijushcataca, riocunapi y pugyucunapimi talirca. Chaimi yacucunaca yahuarman tigrarca. 5 Shinallata yacucunata mandangapaj autoridadta charij ángel cashna nijtami uyarcani: “Taita Dios, quiquinmi causajuj y pundapash causajushca capangui. Quiquinmi Tucui Shunguhuan Ayudashpa Catijuj Taita Dios capangui. Quiquinmi cai juiciocunataca apamushcangui. Chaimandami quiquinga tucuita ali ruraj* Taita Dios capangui. 6 Quiquinba separashcacunapa* y quiquinba profetacunapa yahuarta jichashcamandami paicunataca yahuarta ufiachircangui. Paicunaca chaitami miricirca” nircami. 7 Chai jipami altarmanda cashna nijta uyarcani: “Jehová* Diosca Tucui Poderta Charij Taita Diosmi can. Pai apamushca juiciocunaca na pandarinllu y alimi can” nijurcami.

8 Cuarto angelca paipa tasonbi imata charijushcataca indipimi talirca. Chaimi indica, gentecunata ninahuan rupachina poderta chasquirca. 9 Ninan calormi gentecunataca rupachirca. Chai gentecunaca Taita Diospa shutitami nalicachishpa o na ricunayachishpa rimarca. Shina rurashpapash paicunaca na arripintirircachu. Cai plagacunata apamungapaj poderta charij Taita Diostaca na alabarcachu.

10 Quinto angelca, paipa tasonbi imata charijushcataca, manllanai sacha animal mandangapaj tiajuj pushtu* jahuapimi talirca. Chaimi pai mandajushca gobiernoca tucuilla yana yana tucurca. Nanaimandami gentecunaca jalluta caniri callarirca. 11 Shinapash paicunapa nali ruraicunamandaca na arripintirircachu. Sino nanachinajuimanda y llagacunapa culpamandami jahua cielopi Taita Diostaca nalicachishpa o na ricunayachishpa rimanajurca.

12 Sexto angelca paipa tasonbi imata charijushcataca Éufrates nishca yacucunapimi talirca. Chaimi chai yacucunaca chaquirirca. Indi llujshimuj ladota shamunajuj reycunaman ñanda alistangapami shina chaquirirca.

13 Chai jipaca dragonda, manllanai sacha animalta y llullashpa villachij profetatami ricurcani. Paicunapa shimimandaca quimsa mapa villaicunami* llujshirca. Chai mapa villaicunaca sapocunashnami carca. 14 Chai villaicunaca demoniocunamandami shamun. Chai villaicunatami gulpi alpa enteropi reycunaca uyan. Chai mapa villaicunaca* jatun señalcunata rurashpami reycunataca macanajuchun tandachin. Chai macanajuica Tucui Poderta Charij Taita Diospa jatun punllapimi tianga.

15 Chai jipaca cashna nijujmi uyarimurca: “Uyaichi. Ñucaca shuashnami shamusha. Rijchariashna causajcuna y ropata* na quichuchun saquijcunaca ninandami cushijunga. Porque paicunaca na lluchulla puringachu y gentecunapash paicunapa pingaitaca na ricungachu” nircami.

16 Chai mapa villaicunami* reycunataca hebreo shimipi Armagedón* nishca pushtuman tandachirca.

17 Séptimo angelca paipa tasonbi imata charishcataca airepimi talirca. Chaipimi santo nishca cuartopi tiajuj mandangapaj tiarina pushtumandaca shinllita cashna nij uyarirca: “Ñamari tucurirca”. 18 Shinallata shinllita culun nijujpash, parlocunapashmi uyarirca, rayocunapashmi ricurirca. Shinllipacha terremotopashmi tiarca. Gentecuna cai alpapi tiai callarishca punllamandapachaca nunca na chashnapacha terremotoca tiashcarcachu. Chai terremotoca shinllipacha shinllimi carca. 19 Jatun llactaca quimsapimi separarirca. Chaimi mundo enteropi tucuilla llactacunaca tucurirca. Taita Diosca Importante Babilonia Llactaman vino copata ufiachinatami yarirca.* Chai copaca Taita Diospa ninandapacha culirashcahuan jundami carca. 20 Shinallata tucuilla islacunami pacajushpa rirca. Urcucunapashmi chingarirca. 21 Chaipimi jahua cielomandaca jatun rumi runducuna gentecunapa jahuapica urmarca. Y cada rumimi más o menos 20 kilota* pesajurca. Chai runduhuan plaga manllanaita tucuchijpimi, gentecunaca Taita Diosta nalicachishpa o nalicunata rimanajurca.