Lucas

16 Chai jipami Jesusca paipa discipulocunataca nirca: “Shuj charij runagumi, paipa huasipa shuj encargado* runaguta charirca. Chai charij runagumanmi, canba huasipa encargadoca canba charishcacunataca malgastashpa tucuchijunmi nishpa villarca. 2 Chaimi charij runaca paipa huasipa encargadota cayashpa nirca: ‘Canmandaca nalicunatami uyajuni. Ñuca culquita imapilla gashtashcata anotashpa ricuchihuai. Canga ñuca huasipi cuidador caitaca ñana ushanguichu’ nircami. 3 Chaimi huasipa encargadoca paipa shungu ucupilla cashna pensarijurca: ‘Ñuca amoca llujchishpamari cachagrihuan. Cunanga ¿imatata rurashayari? Pambapi trabajangapaca ñana fuerzatapash charinichu. Caridadta mañangapapash pinganayanmari. 4 Shinaca ñuca amo llujchishpa cachajpica, gentecuna paicunapa huasipi chasquihuachun imata ruranataca ñami yachani’ nirca. 5 Shina pensarishca jipami, paipa amoman dibinajuj runacunata shugu shugu cayachun cacharca. Punda shamujtaca cashna nishpami tapurca: ‘Ñuca amomanga ¿mashnatata dibijupangui?’. 6 Chaimi paica, ‘aceite de olivatami cazi 600 galongunata* dibijupani’ nirca. Chaimi huasipa encargadoca nirca: ‘Can mashnata dibijushcataca caipimi firmashcata charijuni. Shinaca tiarishpa, 300 galongunatami dibijuni nishpa uchalla escribilla’ nirca. 7 Chai jipami dibijuj chaishuj runagutapash cashna nishpa tapurca: ‘Cutin canga ¿mashnatata dibijupangui?’ nishpa. Chaimi paica, ‘170 quintal* trigotami dibijuni’ nirca. Shina nijpimi huasipa encargadoca nirca: ‘Can mashnata dibijushcataca caipimi firmashcata charijuni. 136 quintal* trigotami dibijuni nishpa escribilla’ nirca. 8 Amoca paipa huasipa encargadotaca* nali* cashpapash, paipa ruraicunahuan ali yachajushca cashcata ricuchishcamandami paitaca ninanda alicachirca o paimandaca ninanda cushijurca. Cai tiempopi gentecunaca* Taita Diosta sirvijcunata* yali yachajcunami can.

9 ”Cangunataca caitapashmi nini: cai mundopi cangunapa charishcacunata* utilizashpami Taita Diospa amigo tucuna canguichi. Shina rurashpami chai charishcacuna tucurijpica, para siempre causana pushtupi chasqui tucunguichi. 10 Uchilla cosasgucunapi alita rurajcunaca, jatun cosascunapipashmi alita ruranga. Cutin, uchilla cosascunapi nalita rurajcunaca, jatun cosascunapipashmi nalita ruranga. 11 Shinaca cai mundopi charishcacunata* na ali cuidai ushajpica, Taita Diospash ima ciertopacha valishca cashcataca cangunamanga na mingangachu. 12 Shinallata, shujcunapa charishcacunata na ali cuidai ushajpica ¿pita cangunaman cuna cashcataca cunga? 13 Maijan sirvij runagupash ishcai amota sirvitaca na ushanllu. Porque shujtaca juyashpami chaishujtaca na ricunayachinga. Shinallata, shujtaca cazushpami chaishujtaca na cazunga. Shinaca Taita Diostapash y culquitapash esclavoshna ishcandita sirvitaca na ushanguichichu” nirca.

14 Fariseocunaca culquimanda huañunajuj gentecunami carca. Paicunaca Jesús tucui imata nijujta uyashpami nalicachishpa o culira ricunajurca. 15 Chaimi Jesusca paicunataca nirca: “Cangunaca gentecunapa ñaupapica sin culpa justocuna ricuringapaj munashpami imacunatapash ruraj tucunajunguichi. Pero Taita Diosca cangunapa shungu imashina cajtaca alimi yachan. Porque gentecuna ninanda alicachishca o valichishca cosascunaca, Taita Diospa ñaupapica na imapapash sirvinllu.

16 ”Moisesman Cushca Leytapash y Profetacunapa escribishcacunatapash Juan chayamungacamanmi predicarca. Chai tiempomandapachami gentecunaca Taita Diospa Gobiernomanda ali villaicunataca predicanajushca. Shinallata, tucui laya o tucui clase gentecunapashmi Taita Diospa Gobiernoman yaicungapaj ninanda esforzarinajushca. 17 Cielopash y cai alpapashmi tucurita ushanman. Pero Moisesman Cushca Leymanda shuj letragullapash na pactarishpaca na quidangachu.

18 ”Pipash paipa huarmimanda divorciarishpa* shuj huarmihuan cazarashpaca, huainayana juchapimi* urmajunman. Shinallata, paipa cusamanda divorciarishca* huarmihuan cazarashpaca huainayana juchapimi* urmajunman nircami.

19 ”Cai comparaciondapashmi Jesusca nirca, shuj charij runagumi linohuan rurashca yanalla puca telaguta churajun carca. Paica tucui punllacunami cushijushpa, gushtuta causajurca. 20 Shinapash chai charij runapa huasi pungupica, caridadta mañaj Lázaro shuti runagutami saquigrin carca. Lazaroca cuerpo entero llaga jundashca runagumi carca. 21 Paica ninanda yarjachijuimandami, charij runapa mezamanda urmashca micunagutapash micuna ansia tiajurca. Alcucunapash shamushpami chai runagupa llagacunataca lambinajun carca. 22 Tiempohuanga caridadta mañaj Lázaro runaguca huañurcami. Angelcunaca Abrahanba ladomanmi* paitaca pusharca.

”Chai charij runapash huañujpimi paitaca pambarca. 23 Chai runaca Huañushcacunata Pambana Pushtupimi* jatun llaquicunapi carca. Alzarishpa ricushpaca Abrahandami carupi ricurca. Abrahanba ladopica Lázaro runagutami ricurca. 24 Chaimi Abrahandaca cashna nishpa cayajurca: ‘Taita Abrahán, ñucata llaquihuayari. Ñucaca cai ninapimari sufrijuni. Lázaro runa paipa dedota yacupi satishpa asha yacugutallapash ñuca jallupi shutuchichun paita cachamupayari’ nirca. 25 Shinapash Abrahanga paitaca nircami: ‘Huahua ¿nachu yaringui?* Can causajushpaca ashtaca ali cosascunahuanmi cushijushpa causarcangui. Cutin Lazaroca ninanda sufrishpami causajurca. Ashtahuangarin cunanga caipimi cushichi tucujun. Shinapash canga sufrijunguimi. 26 Chai jahuapash shuj jatun utujumi ñucanchicunataca cangunamanda separajun. Chaimi ñucanchi ladomanda cangunapa ladoman chimbangapaj munajcunaca na chimbai ushan. Shinallata cangunapa ladomanda gentecunapash na ñucanchi ladoman chimbai ushanllu’ nirca. 27 Shina nijpimi charij runaca Abrahandaca nirca: ‘Taita Abrahán, shina cashpaca ñuca taitapa huasiman Lazarotaca cachapai nishpami rogapani. 28 Ñucaca 5 huauquicunatamari charipani. Cai llaqui pushtuman ama paicunapash shamuchunmi, advirtishpa paicunaman predicagrichun rogapani’ nirca. 29 Chaimi Abrahanga nirca: ‘Paicunaca Moisespa escribishcacunata y Profetacunapa escribishcacunatapashmi charin. Chaicunatami uyana can’ nirca. 30 Chaimi charij runaca Abrahandaca nirca: ‘Taita Abrahán, ñuca huauquicunaca na paicunataca uyangachu. Shinapash huañushcacunapuramanda pipash causarishpa paicunapaman rijpica, paicunaca arripintiringallami’ nirca. 31 Shinapash Abrahanga paitaca nircami: ‘Moisespa escribishcacunatapash y Profetacunapa escribishcacunatapash na uyashpaca, huañushcacunapuramanda pi jatarijpipash na cringachu’” nirca.