Rut

2 Noemica cusapa partemandami shuj parienteta charirca. Chai parienteca Boaz shutimi carca. Paica Elimelecpa familiamanda charij charij runami carca.

2 Rut shuti moabita huarmiguca cashnami Noemitaca nirca: “Cozechashca pambacunapi quidashca granocunata pipash pallachun saquihuangapashchari, chaiman richun saquihuai” nircami. Chaimi Noemica “rilla ñuca huahualla” nirca. 3 Shina nijpimi Rutca pambacunapi cozechadorcuna saquishca granocunata pallajungapaj rirca. Y justomi Boaz shuti runapa pambamanbacha chayashcarca. Boazca Elimelecpa familiamandami carca. 4 Chai ratopipachami Boazpash Belén pueblomanda chayamurca. Y paipa cozechadorcunataca “Jehová Dios bendiciapachun” nircami. Chaimi paicunapash “Jehová Dios bendiciapachun” nirca.

5 Boazca cozechadorcunapa encargadotaca “¿chai huarmica pita can? ¿Maijan familiamandata can?” nishpami tapurca. 6 Shina tapujpimi cozechadorcunapa encargadoca cashna nirca: “Chai huarmica Noemihuan shamushca Moab llactamandami can. 7 Paica ‘¿nacha cozechadorcuna saquishca granocunata* pallachun saquihuanguiman?’ nishpami tapuhuarca. Paica tutamandata chayamushcamandapachami cunangaman trabajajushcalla. Ñajagullami chujlla ucupi ratoguta samangapaj tiarirca” nircami.

8 Jipamanga Boazca Ruttaca nircami: “Ñuca huahualla. Ama shuj pambacunamanga pallangapaj rijunguichu. Caimandaca ama ringuichu. Ñucapa cozechashpa trabajanajuj huarmicunapa ladolla purijunguilla. 9 Paicuna maijan pambacunapi cozechanajujta ricushpa paicunata catiria ringuilla. Caimanda jovengunataca, canda ama molestanajuchunmi* ña mandarcani. Yacunayachishpaca jarracuna tianajuj ladoman rishpa chaipi jovenguna llujchinajun yacuta ufianguilla” nircami.

10 Shina nijpimi Rutca cungurishpa alpacaman chayajta cumurishpa Boaztaca cashna tapurca: “¿Ima nishpata ñucataca ayudahuajungui? ¿Imashpata ñucamandaca preocuparipangui? Ñucaca shuj llactamandamari capani” nircami. 11 Shina nijpimi Boazca paitaca nirca: “Canba cusa huañushcamandapacha canba suedramanda imatalla rurashcatapash yachanimi. Shinallata canba taitamamata y can nacirishca llactatapash saquishpa cai na rijsishca llactaman causangapaj shamushcatapash yachanimi. 12 Can tucui imatalla rurashcamandaca Jehová Dios bendiciapachun. Porque canga Israel llactapa Jehová Diospa alas ucupimi pacajungapaj shamushcangui. Shina rurashcamandaca paillata canda ninanda bendiciapachun” nircami. 13 Chaimi Rutca cashna nirca: “Ñuca amolla, pagui ñucata ayudashcamanda. Ñucaca quiquinba sirvientepurallapash na capanichu. Shinapashmi quiquinga quiquinba shimicunahuan ñucataca cushichishpa tranquilizahuashcangui”* nircami.

14 Micuna horas chayajpimi Boazca Ruttaca cashna nirca: “Caiman quimirimushpa asha tandaguta japishpa vinagrepi satishpa micupai” nirca. Chaimi Rutca cozechadorcunapa ladopi tiarirca. Camllashca granoguta Boaz runagu carajpimi Rutca vijsa pactangacaman micurca y hasta puchuitapashmi puchurca.* 15 Saquishca granogucunata pallangapaj Rut jatarijpimi, Boazca paipa trabajadorcunataca cashna nishpa mandarca: “Saquishca granocunata* pallachun saquinguichilla, paitaca ama molestanajunguichichu. 16 Cebadata cuchunajushpaca pai pallachunmi cebada cuchushcataca ashaguta saquishpa rina canguichi. Paitaca ama imatapash nijunguichichu” nircami.

17 Rutca chishicamanmi pambapi quidashca granocunataca pallajurca. Tandachishca cebadata limpiashpa* ricujpica más o menos 30 librami* cashcarca. 18 Tandachishca cebadata apashpami llactaman tigrashpa mashnaguta tandachishcataca paipa suedraman ricuchirca. Shinallata paiman carashca micuna puchushcagutapashmi paipa suedramanga cararca.

19 Paipa suedra Noemica cashna nishpami tapurca: “¿Cunanga maipita pallangapaj rircangui? ¿Maipita trabajarcangui? Canmanda preocuparishca personata Taita Dios bendiciapachun” nircami. Shina nijpimi Rutca paipa suedraman maipi trabajashcata villashpa cashna nirca: “Boaz shuti runapa pambapimi trabajarcani” nircami. 20 Chaita uyashpami Noemica nirca: “Huañushcacunatapash y causacunatapash ninanda juyaj* Jehová Dios chai personata bendiciapachun. Chai personaca ñuca cusapa parientemi can. Paimi cai situacionbica ñucanchitaca ayudaita* ushan” nircami. 21 Shinallata Rut shuti moabita huarmiguca caitapashmi nirca: “Paica ‘gulpi granota cozechangacaman ñuca trabajadorcunapa ladopi purijunguilla’ nihuarcami” nircami. 22 Chaimi Noemica paipa jachundaca cashna nirca: “Shinami can huahualla. Shuj pambacunaman rishpa ama rimai tucujungapaca, mejor paipa trabajadora huarmicunahuan purijuilla” nircami.

23 Rutca cebadata y trigota cozechana tiempo tucuringacamanmi, Boazpa trabajadora huarmicunapa ladopi granocunata pallashpa catirca. Paica paipa suedrahuanmi causashpa catirca.