2 Corintios

10 Ñucaca Pablomi capani. Quiquinguna ñuca imata nijta uyachunmi munapani. Ñucaca Cristopa ejemplota catishpami parlajupani. Paica humilde, ali shungumi can. Quiquingunapuramanda huaquingunaca ñucamanda parlashpaca cashnami ninata yachanguichi, pai ñucanchihuan cashpaca yangalla cuendami ricurin. Pero cartacunata escribishpaca shinllita rimanllami nishpa. 2 Shinapash huaquingunaca gentecunapa yuyaita catishpami causanajun nishpami, ñucanchitaca rimanata yachan. Ñuca chaiman chayajpica shina rimajcunaca, ña cambiashca cachunmi munapani. Porque paicunata shinllita rimangapaca na munapanichu. 3 Porque ñucanchicuna cai mundopi causashpapash, cai mundopi gentecunashnaca na macanajunchichu. 4 Pero ñucanchica cai mundopi gentecunapa armacunahuanga na macanajunchichu. Sino Taita Dios cushca armacunahuanmi macanajupanchi. Chai armacunaca ashtaca podertami charin. Chaimi chai armacunaca alipacha shayachishca pircacunashna caj cosascunataca urmachinlla. 5 Panda yuyaicunata y gentecuna Taita Diosta ama rijsichun tucui jarcaicunatami ñucanchicunaca tucuchinajupanchi. Gentecunapa tucui pensamientocuna Cristota cazuchunmi, prezo churanshna chai pensamientocunataca controlanajupanchi. 6 Ñucanchicunaca, quiquinguna tucuipi cazushcata ricuchishca jipami, na cazungapaj munajcunata castigangapaca listo capanchi.

7 Quiquingunaca ñavita ricushpallami juzganata yachanguichi. Si pipash Cristopa discipulomi cani yashpaca, ñucanchicunapash Cristopa discipulocuna cashcatami yarina* can. 8 Señor Jesusca quiquingunata shinllichichunmi autoridadta cuhuashca y na quiquingunata llaquichichunga autoridadtaca cuhuashcachu. Chai autoridadta cushcamanda ashagutallapash jariyashpaca, na pinganayachimanllu. 9 Pero ñucaca, ñucapa cartacunahuan quiquingunata manllachingapaca, na munapanichu. 10 Huaquingunaca ñucamanda parlashpaca ninmi: “Paipa cartacunaca alipachami can, importante cosascunatami nin. Pero pai en persona ñucanchihuan cashpaca, yanga yangami ricurin. Paipa parlocunapash yanga yangami uyarin” nishpa. 11 Chashna nijcunaca, cartacunapi ñucanchicuna imata nishcata chaipi cashpa ñucanchicuna pactachina cashcatami cuenta japina capanguichi. 12 Porque ñucanchicunaca, paicunallata alabarijcunahuan igualaringapaj, ni paicunahuan compararingapapash na munapanchichu. Paicunapa yuyaipilla ima ali cajta ricushpa, paicunahuanllata compararishpami, alitami ruranajunchi yan. Shinami paicunaca na intindishcata ricuchin.

13 Ñucanchicuna imata na rurashca cosascunamandaca na jariyashunllu. Sino Taita Dios ñucanchiman mingashca obrata rurashpami jariyashun. Chai obrata ruraimandami quiquingunamanbash villachinchi. 14 Ñucanchicuna quiquingunapaman rishpaca, Taita Dios imata mingashcatallami ruraparcanchi. Ashtahuangarin, Cristomanda ali villaicunataca ñucanchimi quiquingunamanga primero villachiparcanchi. 15 Ñucanchicunaca shujcuna rurashca obramandaca na jariyanajupanchichu. Sino quiquinguna ashtahuan crishpa catichunmi munapanchi. Shinami ñucanchicuna rurashca obraca quiquingunapurapi ashtahuan mirashpa catinga. Shina mirashpa catijpimi ñucanchicunaca ashtahuan ruraita ushapashun. 16 Porque ñucanchicunaca quiquingunapa llactamanda ashtahuan carulla llactacunapipashmi, ali villaicunata predicangapaj munapanchi. Shinami shujcuna imata rurashcamandaca na jariyanajushun. 17 Porque Taita Dios escribichishca shimipica nijunmi: “Pipash jariyangapaj munashpaca, Jehová* Diosmanda jariyachun” nishpa. 18 Jehová* Diosca paipa ñaupapi ali ricurijcunatami alipi churan. Y paicunamandallata jariyajcunataca nalipimi saquin.