Jueces

20 Shina pasashcamandami Danmandapacha, Beer-Sebacaman tucuilla israelita jaricunaca paicunapa llactacunamanda llujshirca. Shinallata Galaad alpacunamanda tucuilla israelita jaricunapashmi llujshirca. Tucuilla israelitacunaca* Jehová Diospa ñaupapimi shujlla shina* Mizpá llactapi tandanajurca. 2 Taita Diospa llactapa tandanajuipica* Israel llactapa jefecuna, shinallata Israel llactapa tucuilla jatun familiacunapashmi tandanajurca. Paicunaca espadahuan macanajunata yachaj 400 mil soldadocunami* carca.

3 (Benjaminita gentecunaca israelitacuna Mizpá llactaman vichai rishcatami yachai chayarca).

Israelita jaricunaca cashnami ninajurca: “Chashna nalipachaca ¿imashnata pasashcayari? Parlaichi” ninajurcami. 4 Chaimi huañuchishca huarmipa* cusa levita runaca cashna nirca: “Benjaminbi tiaj Guibeá llactapi pacaringapami ñuca huarmindi chayarcanchi. 5 Shinapimi Guibeá llactapi causajcunaca* ñucata llaquichingapaj tuta shamushpa huasi muyundipi shayarirca. Paicunaca ñucata huañuchingapami munarca. Pero chaipa randica ñuca huarmitami* violashpa saquirca. Chaimi paica huañuparca. 6 Chaimandami ñuca huarmipa* huañushca cuerpota japishpa huaquin pedazocunapi fitircani. Cada pedazotaca Israel llactapa tucui jatun familiacunamanmi cacharcani. Israel llactapi jatun nalitapacha, millanaitapacha rurashcamandami shina rurarcani. 7 Shinaca gulpi israelitacuna cunanga ¿imata ninguichi? ¿Imata ruranatata decidishcanguichi?” nircami.

8 Tucuicuna shujlla shina* jatarishpami cashna ninajurca: “Ñucanchipuramandaca nipi na paipa carpa huasimanga ringachu, shinallata nipi na paipa huasimanga tigrangachu. 9 Caitami ruragrinchi: Guibeá llactahuan macanajungapaj picunalla vichai rigrijujta yachangapami sorteota ruragrinchi. 10 Israel llactapa jatun familiacunamanda 100 jaricunamandaca 10 jaricunatami agllashun. Shinallata mil jaricunamandaca 100 jaricunata, 10 mil jaricunamandaca mil jaricunatami agllashun. Paicunami soldadocunamanga micunata apanga. Shinami soldadocunaca Benjaminbi tiaj Guibeá llactamanda gentecunataca Israel llactapi jatun nalitapacha, millanaitapacha rurashcamanda atacaita ushanga” ninajurcami. 11 Shinami tucuilla israelita jaricunaca Guibeá llactahuan macanajungapaj shujllashna* tandanajurca.

12 Chaimi Israel llactapi jatun familiacunaca Benjaminba jatun familiamanda jaricunaman cashna nichun mensajerocunata cacharca: “Cangunapurapica ¿imashpata shina millanai nalitapacha rurashcanguichi? 13 Cunanga Guibeá llactamanda chai nali jaricunata huañuchishpa Israel llactamanda chai nali ruraita anchuchingapaj ñucanchiman entregaichi” ninajurcami. Pero shinapash benjaminita gentecunaca paicunapa huauqui israelitacunataca na cazurcachu.

14 Israelita jaricunahuan macanajungapami benjaminita gentecunaca paicunapa llactacunamanda llujshishpa Guibeá llactapi tandanajurca. 15 Chai punllami benjaminita gentecunaca paicunapa llactacunamandaca espadacunahuan macanajunata yachaj 26 mil jaricunata tandachirca. Shinallata Guibeá llactamanda alipacha macanajunata yachaj 700 soldadocunatapashmi tandachirca. 16 Chai soldadocunapurapica 700 alipacha soldadocunami tiarca. Paicunaca imagutapash lluqui maquihuanmi ruran carca. Paicunaca huaracahuan rumita alipacha shitanata yachaimandami shujlla ajchapipash na fallashpa chayachita ushanlla carca.

17 Benjaminita gentecunata na cuentashpami israelitacunaca, espadahuan macanajunata yachaj 400 mil jaricunata tandachirca. Paicunaca gulpimi alipacha macanajunata yachaj jaricuna carca. 18 Paicunaca Taita Diosta tapungapami Betel llactaman vichai rirca. Israelitacunaca cashna nishpami Taita Diostaca tapurca: “Benjaminita gentecunahuan macanajungapaca ñucanchipuramandaca ¿pita primero ñaupashpa ringa?” nishpami tapunajurca. Chaimi Jehová Diosca “Judapa jatun familiami ñaupashpa ringa” nirca.

19 Chai jipami israelitacunaca madrugadota jatarishpa Guibeá llactahuan macanajungapaj chai llacta ladopi carpacunata shayachirca.

20 Chai jipami israelita jaricunaca benjaminita gentecunahuan macanajungapaj llujshirca. Israelitacunaca Guibeá llacta ñaupapimi macanajungapaj listo shayarirca. 21 Chai punllaca benjaminita gentecunaca Guibeá llactamanda llujshishpami 22 mil israelitacunata huañuchirca. 22 Shinapashmi israelitacunaca primer punllapi macanajungapaj shayarishca pushtupillata, na manllashpa cutin macanajungapaj listo shayarirca. 23 Israelitacunaca Betel llactaman vichai rishpami Jehová Diospa ñaupapi tutayangacaman huacanajurca. Shinallata Jehová Diostaca cashnami tapunajurca: “Benjaminba jatun familiamanda, ñucanchi huauquicunahuan macanajungapaca ¿cutinllu rina canchi?” ninajurcami. Chaimi Jehová Diosca “ari richilla” nirca.

24 Segundo punllapimi israelitacunaca benjaminita gentecunapaman quimirirca. 25 Chai segundo punllapica benjaminita gentecunapashmi Guibeá llactamanda llujshishpa espadahuan macanajunata yachaj 18 mil israelitacunata huañuchirca. 26 Chaimi gulpi israelita jaricunaca Betelman vichai rirca. Chaipimi paicunaca huacashpa Jehová Diospa ñaupapi tiarirca. Chai punllaca tutayangacamanmi imagutapash na micushpa ayunanajurca.* Shinallata Jehová Diosmanga rupachina ofrendacunata* y paihuan amigo cashpa catingapaj ofrendacunatami* cunajurca. 27 Chai jipami israelitacunaca Jehová Diostaca imata ruranata tapunajurca. Porque chai punllacunapica chai pushtupimi Taita Diospa* Arca del Pactoca* tiajurca. 28 (Chai punllacunapica Aarón runapa churi Eleazar runapa churi Finehasmi chai Arca ñaupapica sirvijurca).* Israelitacunaca cashna nishpami tapunajurca: “¿Benjaminba jatun familiamanda ñucanchi huauquicunahuan macanajungapaca, cutinllu rina canchi o chaipillachu saquina canchi?” ninajurcami. Chaimi Jehová Diosca cashna nishpa tigrachirca: “Richilla, cayaca cangunapa maquipimi paicunataca churasha” nircami. 29 Chaimi israelitacunaca Guibeá llacta muyundipi pacalla soldadocunata churarca.

30 Tercer punllapica, cutinmi israelitacunaca benjaminita gentecunahuan macanajungapaj vichai rirca. Israelitacunaca chaishuj viajecunashnallatami Guibeá llacta ñaupapi macanajungapaj listo shayarirca. 31 Benjaminita gentecuna israelita soldadocunahuan macanajungapaj llujshijpica, israelitacunaca paicunataca Guibeá llactamandami caruyachirca. Chaimi benjaminita gentecunaca chaishuj viajecunashnallata israelitacunata atacashpa huaquingunataca principal ñangunapi huañuchishpa saquinajurca. (Shuj ñanga Betelman, cutin chaishuj ñanga Guibeá llactamanmi vichai rijurca). Benjaminita gentecunaca 30 israelitacunatami chaipica huañuchishpa saquirca. 32 Benjaminita gentecunaca “chaishuj viajecunashnallatami paicunataca mishanajunchi” ninajurcami. Shinapash israelitacunaca cashnami ninajurca: “Ñucanchi caimanda anchurishpa paicunataca llactamandaca caruyachishpa principal ñangunaman llujchishunchi” ninajurcami. 33 Chaimi israelita jaricunaca paicuna cashca pushtumanda llujshishpa Baal-Tamar pushtupi macanajungapaj listo shayarirca. Chai ratollatami, Guibeá llacta ladopi pacajushca israelitacunaca llujshishpa atacai callarirca. 34 Shinami tucui Israel llactamanda alipacha 10 mil soldadocunaca Guibeá llacta ñaupa ladoman chayarca. Chaipica ushashcatami macanajunajurca. Shinapash benjaminita gentecunaca paicuna jatun llaquipipacha urmagrinajushcataca na cuenta japircachu.

35 Jehová Diosca israelitacunapa ñaupapimi benjaminita gentecunataca misharca. Chai punllaca, Benjaminba jatun familiamanda espadahuan macanajunata yachaj 25 mil 100 jaricunatami israelitacunaca huañuchirca.

36 Israelita jaricuna rinajujta ricushpami benjaminita gentecunaca israelitacunata mishanajushcata pensanajurca. Shinapash israelitacunaca Guibeá llacta ladopi pacajushca soldadocuna atacanata yashpami chaimandaca anchurinajurca. 37 Pacajushca soldadocunaca ñapash llujshishpami Guibeá llactataca atacarca. Paicunaca ñapash caita chaita calpashpami chai llactapi causaj tucuilla gentecunata espadahuan huañuchirca.

38 Israelita jaricunaca pacajushca soldadocunahuanmi Guibeá llactamanda cushnihuan shuj señalta ruranata ña parlarishca carca.

39 Israelitacuna macanajuimanda rinajujpimi, Benjaminba jatun familiamanda jaricunaca israelitacunataca atacai callarishpa 30 jaricunata huañuchishpa saquirca. Paicunaca “ultimota paicunahuan macanajushpa mishashcashnallatami cunanbash mishanajunchi” ninajurcami. 40 Shinapimi Guibeá llactamandaca shuj jatun columnashna cushni llujshirca. Chai cushnimi señal carca. Benjaminba jatun familiamanda jaricuna llactaman tigrai ricushpaca, llacta entero rupajujta, ninapash jahua cielocaman chayajta rupajujtami ricurca. 41 Chai ratomi israelita jaricunaca macanajungapaj tigrarca. Cutin Benjaminba jatun familiamanda jaricunaca llaquipi urmashcata ricushpami ninanda manllarinajurca. 42 Chaimandami Benjaminba jatun familiamanda jaricunaca israelitacunamanda pacajushpa desiertoman calpanajurca. Shinapash israelitacunaca paicunata japingapami catishpa rinajurca. Ashtahuangarin chai llactamanda llujshinajuj israelitacunapash benjaminita gentecunata huañuchishpami shamunajurca. 43 Israelitacunaca benjaminita gentecunata muyundita jarcashpami, indi llujshimuj ladota Guibeá llacta ñaupacaman na shaijushpa catishpa chaipi huañuchishpa saquirca. 44 Chaipica Benjaminba jatun familiamanda 18 mil jaricunami huañurca. Chai jaricunaca tucuillami alipacha shinlli soldadocuna carca.

45 Benjaminba jatun familiamanda jaricunaca cutin tigrashpami desiertoman pacajungapaj calpashpa rinajurca. Paicunaca Rimón jaca ladocamanmi calpashpa rirca. Israelitacunaca principal ñangunapimi 5 mil benjaminita gentecunata huañuchirca.* Shinallata Guidom pushtucaman catishpami 2 mil benjaminita gentecunatapash huañuchirca. 46 Benjaminba jatun familiamandaca totalca 25 mil jaricunami huañurca. Paicunaca espadahuan macanajunata yachaj, shinlli alipacha soldadocunami carca. 47 Cutin 600 benjaminita jaricunaca desiertopi, Rimón jacamanmi rirca. Paicunaca 4 quillacunatami Rimón jacapica quidarca.

48 Israelitacunaca, benjaminita gentecunata atacangapaj cutin tigrashpami llactapi quidashca tucuilla gentecunatapash, animalcunatapash espadahuan huañuchishpa saquirca. Shinallata tucui ricurishca llactacunatapashmi rupachishpa saquinajurca.