Rut huarmiguca Noemita na saquircachu

Israel llactapica ninan yarjaimi tiarca. Chaimandami, Israel llactamanda Noemí huarmiguca paipa cusandi, paipa ishcai churicunandi Moab llactapi causangapaj rirca. Chaipi causanajujpimi Noemí huarmigupa cusaca huañurca. Cutin churicunaca Moab llactamanda Rut, Orpá shuti huarmicunahuanmi cazararca. Shinapash, asha tiempo jipaca paipa churicunapashmi huañurca.

Noemica Israel llactapi cutin granocuna fucui callarishcatami uyarca. Chaimandami Rutpash, Orpá huarmigupash, Noemipash Israel llactaman tigrarca. Israelman tigranajushpami Noemica paicunataca cashna nirca: ‘Cangunapa mamacunapa huasiman tigrapaichilla. Cangunaca, huañushca ñuca churicunahuan, ñucahuanbash aligutami causarcanguichi’. Cutin cazarashpaca alimi canguichiman nishpa. Noemí shina nijpimi paicunaca cashna nirca: Ñucanchica candaca ninandami juyanchi, ‘canhuanmi ringapaj munapanchi’ nishpa. Shina nijpimi Noemica cangunapa huasiman tigraichilla nijurca. Chaimi Orpá huarmica paipa huasiman tigrarca. Shinapash Rutca paihuanmi quedarca. Chaimi Noemica nirca: Orpá huarmiguca ñami paipa llactaman, paipa dioscunapaman tigrajun. Canbash, paita catishpa ripailla, canbaj mamapa huasiman tigrapailla. Shina nijpimi Rutca nirca: ‘Ama canda saquishpa richun mañahuaichu. Canba llactapash, ñuca llactami canga. Canba Taita Diospash, ñuca Taita Diosmi canga’ nishpa. Rut shina nijpica ¿imashinashi Noemica sintirishcanga?

Chaimi Noemica, Ruthuan Israel llactaman cebadata cozechana punllacunapi chayarca. Shuj punllaca Rutca cebadata pallajungapami Rahab huarmipa churi Boazpa pambacunaman rirca. Boazca Moab llactamanda Rut huarmigu, Noemita na saquishcatami uyashcarca. Chaimandami Boazca paipa trabajadorcunataca, asha cebadata Rut pallajuchun pambapi saquinguichi nishpa mandarca.

Chai tutami Noemica, Rutta cashna tapurca: ‘¿Cunanga maipita pallajurcangui?’ nishpa. Chaimi Rutca nirca: Boaz runapa pambacunapimi trabajarcani nishpa. Noemica nircami: Paica “ñucanchipaj familiamari”. ‘Ñuca huahualla, ama shuj alpacunaman rishpa paipa sirvij huarmicunahuanlla tandanajushpami ali canguiman’ nishpa.

Chaimi Rutca cosechaita tucuchingacaman, Boaz runapa pambacunapi pallajushpa purijurca. Chaipimi Boazca Rut ali ali, trabajadora cajtapash cuenta japirca. Chai tiempopica cusa huañujpi huahuacunata na charishca huarmica, cusapa familiapuramanda shujhuan cazaranallami carca. Chaimi Boazca Ruthuan cazarashpa shuj huahuaguta charirca. Paitaca Obed shutitami churarca. Tiempo yalijpica Obedca rey Davidpa abuelomi tucurca. Noemipa rijsicunaca ninanda cushijushpami cashna ninajurca: Pundapica Jehová Diosca Rut huarmigutami canda ricuriachun curca. Cunanga shuj nietotapashmi charingui. Chaimanda Jehovata alabashunchi nishpa.