Navidadta celebranatapash yalimi cushichin

TESTIGO de Jehovacunaca Navidadtaca na celebranllu. Shinapash ¿Navidadta na celebraimandaca paicunaca arripintirinllu? O ¿Navidadta rurashparapashmi ali canchiman ninllu? Paicunapa huahuacunapash ¿imashpata na shujcunashna ñucanchipash Navidadta celebrashpa cushilla yalinchi ninllu? Shuj shuj llactacunamanda huaquin testigo de Jehovacuna imata nijta ricupashunchi.

Jesusta yarinamanda parlashpaca, Australia llactamanda Eve paniguca ninmi: “Nara testigo de Jehová cashpaca Navidadpilla o Pascuapillami ñuca iglesiamanga rin carcani. Chaipash huaquinbillami rin carcani. Chaiman rishpapash Jesustaca na yarinllu carcani. Shinapash cunanbica semanapi ishcai viajeta turiñañagucunahuan tandanajushpami Jesusmanda Bibliapi imata yachachijujta yachajushpa catipani. Shinallata shuj gentecunamanbash Jesusmanda Biblia imata nijtami cabalguta yachachipani”.

Regalocunata caranamanda parlashpaca, Irlanda llactamanda Reubenga ninmi: “Cungashcapi pipash ñucaman shuj regaloguta carajpica, ninandapachami cushijupani. Chaimi ñucapash shinallata shujcunaman imapash dibujogucunata, tarjetagucunata caranata gushtapani. Paicunaman chaigucunata carajpica ninanda cushijujtami ricuni y ñucapashmi ninanda cushijuni”.

Shujcunata ayudanamanda parlashpaca, Australia llactamanda Emily paniguca ninmi: “Ñucanchicunaca pipash huañujujpi o irquilla cajpica uchallami paicunaman imagutapash yanushpa ayudangapaj rinchi. Huaquinbicarin, sisagucunata o imapash micunaguta o shuj regaloguta apashpami rinchi. Chaigucunahuan chayanaca huañujujgucunata ali sintirichunmi ayudan. Ñucanchicunaca chashna caraigucunataca ima punllapi cajpipash caranchillami”.

Familiacunahuan tiempoguta yalinamanda parlashpaca, Islas Caimanmanda Wendy paniguca ninmi: “Ima fechapipash ñucanchi familiacunahuan tandanajunaca alipachami can. Porque chai ratocunapimi huahuacunaca abuelocunahuan, paicunapa primocunahuan, tiocunahuanbash ashtahuan tranquilo, ali yalita ushan. Ñucanchi familiacunaca na costumbrecunata catimandalla paicunata ñucanchicuna visitanajujta ricushpami paicunata juyaimanda visitanajujta sintin”.

Tranquilo, ali causanamanda parlashpaca, España llactamanda Sandra paniguca ninmi: “Navidad punllacunapica ñucaca ocupado ocupadomi yalin carcani. Chaimandami tranquilo, ali causaigupica pensaitallapash na pensan carcani. Shinapash Bibliapica Taita Dios ñucanchicunaman cushilla, ali causaiguta caranatami yachajupashcani. Chaita yachashpami ñucaca tranquila, ali sintiripani. Y ñuca huahuacunapash jipacunaman cushilla ali causanatami yachapani”.