¿Imashinata ñucanchi parlocunahuan Jehová Diosta cushichita ushapanchi?

Ñucanchicunata Jehová Dios rurashpaca parlana ushaitami cararca. Shinaca ¿imashina parlachunda Jehová Diosca munan? (Santiago 1:26, liipangui). Jehová Dios ñucanchi parlocunata alicachichunga ¿imashinata parlana capanchi?

1. Jehová Dios parlana ushaita carashcamandaca ¿imashinata parlana capanchi?

Bibliapica ‘caishuj chaishuj animarishpa, ayudarishpami catina capanguichi’ ninmi (1 Tesalonicenses 5:11). Pipash animashpa ayudachun minishtijujta yachashpaca ¿nachu paita ninanda juyashcata, pai ali cualidadcunata charishcata nishpa animapanguiman? ¿Nachu talvez animachij textocunata nishpa animapanguiman? Animangapaca ashtaca textocunami tian. Shinapash imatapash shinlli shinlli nishpaca llaquichitarami llaquichishun. Chaimandami juyaihuan, ali aliguman parlangapaj esforzarina capanchi (Proverbios 15:1).

2. ¿Ima parlocunamandallata jarcarina capanchi?

Bibliapica: “Quiquingunapa shimimandaca ima nali parlocunapash na llujshinachu can” ninmi (Efesios 4:29, liipangui). Shinaca imapash mapa, malcriado shimicunata o shujcunata llaquichij shimicunahuanga na parlanachu capanchi. Shinallata llullacunata parlanamanda, huasha rimaicunamandapash jarcarinami capanchi (Proverbios 16:28, liipangui).

3. Ali shimicunahuan parlachunga ¿imashi ayudanga?

Ñucanchi parlashcacunaca ñucanchi imashna cajta, imata pensajtami ricuchin (Lucas 6:45). Chaimi ali shimicunahuan parlangapaj esforzarina capanchi (Filipenses 4:8). Chaita rurangapaca diversiongunataca alimi agllana capanchi. Shinallata ali amigocunatami agllana capanchi (Proverbios 13:20). Shinallata imatapash nara parlashpallatami shujcunata imashina sintichinata ali pensarina capanchi. Ñucanchi parlashcacunahuan shujcunata imashina sintichinatapashmi pensarina capanchi. Bibliapica: “Huaquingunaca, imata rimashpapash, espadahuan chugrichinshnami saquinajun. Ashtahuangarin alipacha yachajushcacunapaj shimica, jambigushnami” ninmi (Proverbios 12:18).

ASHTAHUAN YACHAJUPASHUNCHI

4. Ali pensarishpara parlapashunchi

Tucuicunallatami imapash nalita nishcamanda arripintirishcanchi (Santiago 3:2). Gálatas 5:22, 23​ta liishpa cai tapuita contestapangui:

• Aliguman parlai ushangapaca cai textopi nishca cualidadcunamandaca ¿maijanda charingapata Jehová Diostaca ayudahuai nishpa mañapanguiman? ¿Imashinata chai cualidadcunata charinaca ayudanga?

1 Corintios 15:33​ta liishpa cai tapuita contestapangui:

• Nali amigocunata charina y nali cosascunahuan divertirinaca ¿imashinata quiquinba parlocunataca afectaita ushan?

Eclesiastés 3:1, 7​ta liishpa cai tapuita contestapangui:

• ¿Imahorata imatapash na nishpa upalla quidana ashtahuan ali canman?

5. Shujcunamanda alicunata parlapangui

VIDEO: Imata nishpapash “shujcuna shinlli tucushpa catichunmi” parlana canchi (4:07)

• Videopi ricushca huauquiguca shujcunamanda nalicunata parlana costumbreta charishpapash ¿imamandata cambiangapaj munarca?

• Chaita pactachingapaca ¿imatata rurarca?

Eclesiastés 7:16​ta liishpa cai tapuita contestapangui:

• Pimandapash imapash nalita parlagrijushpaca ¿imatata yaipi charina capanchi?

Eclesiastés 7:21, 22​ta liishpa cai tapuita contestapangui:

• Pipash quiquinmanda nalita parlashcata uyashpaca ¿imashinata cai textocunaca quiquinda ayudaita ushan?

6. Quiquinba familiahuan parlajushpaca juyaihuan parlapangui

VIDEO: Juyaita, respetota charinami familiacuna cushilla causachun ayudan (3:08)

• Quiquinba familiata juyaihuan parlachunga ¿imata ayudanga?

Efesios 4:31, 32​ta liishpa cai tapuita contestapangui:

• ¿Imashna parlanata familiapi ali o cushilla causachun ayudan?

Jehová Diosca paipa Churi Jesusta juyashcatami ricuchirca. Mateo 17:5​ta liishpa cai tapuita contestapangui:

• Quiquinba familiahuan parlajushpaca ¿imashinata Jehová Diospa ejemplota cati ushapangui?

YARINGAPAJ

Ñucanchi parlocunahuanga shujcunata llaquichita o animachitami ushapanchi. Chaimandami nara parlashpallata imashina nigrijushcata y imata nigrijushcata aliguta pensarishpa parlana capanchi.

¿Imatata yachajupashcanchi?

• Quiquinba parlocunahuanga ¿imashinata shujcunata ayudaita ushapangui?

• ¿Ima laya parlocunamandata jarcarina capanchi?

• Juyaihuan, respetohuan parlachunga ¿imata ayudanga?

CAITAPASH RICUPAI

Alicunata parlachunga ¿imata ayudanga?

Ali yachajushcashna parlapashunchi (8:04)

Nali, malcriado shimicunahuan ama parlachunga ¿imata ayudanga?

“¿Imamandata mala palabracunata ninaca nali can?” (jw.org paginapi ricupangui)

Shujcunamanda ama huasha rimangapaj imata ruranata ricupai.

Shujcunamanda yangataca na parlanachu cangui (2:36)

Shuj jarigu nali shimicunata ñana utilizashpa catichun Jehová Dios imashina ayudashcata liipai.

“Nalitamari rurashpa causajuni, cambianamari cani nishpami pensarircani” (Villajun revista, 1 de agosto de 2013)