CALLARI TEMA | ¿TAITA DIOSCA QUIQUINDA YARINLLU?
Taita Diosca quiquinda cushichinmi
‘Llaquilla causajcunata cushichij Taita Diosmi, ñucanchitaca ninanda cushichirca.’ (2 CORINTIOS 7:6)
‘Taita Diospa Churica ñucamandami huañurca.’ (GÁLATAS 2:20)
¿IMATATA GENTECUNACA NIN? Llaquicunahuan na aguantajushpapash huaquingunaca yanmi, llaquicunapilla Taita Diosta mañanaca nalichu can nishpa. Raquelca ninmi: “Mundo enteropica ashtaca ashtaca gentecunami jatun llaquicunata charin. Chai llaquicunahuan ricujpica ñuca llaquicunaca na imapash canllu yashpami ayudahuai nishpa Taita Diosta mañanataca saquishcani” nishpa.
¿IMATATA BIBLIACA YACHACHIN? Juchayu nacirimandami Diospa mandashcacunata aliguta pactachitaca na ushanchi. Shinapash Taita Diosra ñucanchita juyashpami ‘paipa Churita ñucanchi juchacunamanda huañuchun cachamurca’ (1 Juan 4:10). Jesús paipa causaita cushcamandami Taita Diosca ñucanchi juchacunata perdonan, ali concienciata chari ushanchi, shuj juyailla paraíso Alpagupipash para siempre causaita ushashun.a Jesusta Alpaman cachamushpaca ¿quiquindapash juyashcatachu ricuchirca?
Apóstol Pablopa ejemplota ricushun. Pabloca Jesús huañushca punllacamanbash nara Jesusta catijurcachu. Shinapash Jesusta cati callarishpaca Taita Diosta ninanda agradicishpami nirca: ‘Taita Diospa Churica ñucamandami huañurca’ nishpa (Gálatas 2:20).
Taita Diosca quiquindapash ninanda juyaimandami Jesusta cai Alpaman cachamurca. Shinallata Jesús ñucanchimanda huañushcamandami ‘causaita causaicaman cushijushpa causashun’, esperanzatapash charishun, ‘imata parlashpapash aliguta parlashun, imata cashpapash aliguta rurashpa catishun’ (2 Tesalonicenses 2:16, 17).
Jesusca casi 2 mil huatacuna huashamanmi huañurca. Shinaca ¿imashinata yachai ushanchi cunanbipash Taita Dios ñucanchita juyajujta?
a Gentecunamanda Jesús huañushcata ashtahuan yachangapaca ¿Imatata Bibliaca yachachin? libropi capítulo 5ta ricupangui. Caitaca testigo de Jehovacunami llujchishca.