Huañuipash tucuringami

1, 2. a) Callaripica ¿imashinata Adán y Evaca causarca? b) Cai temapica ¿ima tapuicunatata yachajupashun?

ADÁN y Evata rurashpaca shuj juyailla paraíso Alpagupimi Jehová Diosca churarca. Paicunaca jucha illajmi carca. Jehová Diospa huahuacuna caimandaca paipa ali amigocunami carca (Gén. 2:7-9; Luc. 3:38). Shinapash ¿mashna tiempotata causana carca? Jehová Diosca paicunataca mandarcami: ‘Cai Alpapi gentecunata mirachishpa cai Alpata ricurianguichi. Cai Alpapi tucuilla animalcunatapash cuidanguichi’ nishpa (Génesis 1:28, NM). Cai Alpapi gentecunata mirachingapaj, cai Alpata ricuriangapaca unai unaita causanaca na minishtirircachu. Shinapash cai Alpapi tucuilla animalcunata cuidangapaca para siempremi Adán y Evaca causana carca. Chai punllacunapica shuj contratallapash paicunaca na charircachu.

² Shinaca ¿imamandata cunan punllacunapica tauca contracunata charinchi? ¿Imashinata huaquin contracunaca na cushilla causachun saquin? Huañuica ñucanchipa contra cuendami can. Huañuica ¿imashinata tiai callarirca? Ñucanchi contracunata tucuchingapaca ¿imatata Jehová Diosca ruranga? Chai tapuicunatapash shuj tapuicunatapash yachajungapaca Bibliapi ricupashun.

3, 4. a) Jehová Diosca ¿imata nishpata Adán y Evataca advirtirca? b) ¿Imamandata Adán y Evaca Jehová Diosta cazuna carca?

³ Para siempre causana esperanzata charishpapash causashpa catingapaca samaita, micunata, yacutami Adán y Evaca minishtirca. Ashtahuanbachaca causashpa catingapaca Jehová Diospa ñaupajpi ali ricurishpa, Jehová Diostami cazuna carca (Deut. 8:3). Evata nara rurashpaca cashna nishpami Jehová Diosca Adandaca advirtirca: “Huertapi tiaj tucui yuracunapi fucushcataca micui ushanguimi. Ashtahuangarin alita, nalita yachaita cuj yurapi fucushcataca ama micunguichu. Ima punlla cashpapash, chai yuramanda micushpaca huañunguipachami” nishpa (Gén. 2:16, 17).

⁴ ‘Alita, nalita yachaita cuj yuraca’ Jehová Dioslla ima ali cajta, ima nali cajta decidina cashcatami ricuchijurca. Adanbash Taita Diosman rijcha cashcamandaca paipashmi paipa concienciapica ima ali cajta, ima nali cajta yacharca. Shinapash chai yuraca Adán y Evamanga ricuchijurcami, Jehová Dios paicunata ñaupaman pushachun siempre minishtijushcata. Chai yuramanda micushpaca, Jehová Diostaca na minishtinchichu, ñucanchi munashcata rurashunllami nijuj cuendami cana carca. Paicunapa munashcata rurashpaca paicunapash, paicunapa huahuacunapash jatun llaquicunapimi urmana carca. Ashtahuangarin, Jehová Dios nishca shinami huañuna carca.

 5. Adán y Evaca ¿imamandata Jehová Diostaca na cazurca?

⁵ Evaca, Adán villajpimi shuj culebra parlachijpica Jehová Dios mandashca shimicunataca casi tucuita igual nirca (Gén. 3:1-3). Shinapash chai culebrataca Diablomi parlachijurca. Diabloca pai munashcata rurangapaj, pai mandangapami munarca (Santiago 1:14, 15huan chimbapurashpa ricupangui). Evataca nircami, Taita Diosca llullajunmi, Taita Diosta na cazushpaca na huañunguichu, Taita Dios cuendami tucungui nishpa (Gén. 3:4, 5). Evapash Diablo nishcata crishpami na japina nishca yuramanda japishpa micurca. Jipamangarin, micui nishpami Adanmanbash curca (Gén. 3:6, 17). Shinami Diabloca alipacha Evataca umachirca (1 Timoteo 2:14, liingui). Na micunachu cangui nishca yuramanda na micuna cashcata ali yachashpapash Adanga Evapa nishcata uyashpami chai yuramanda micurca. Chai culebra alitashnalla nijujpipash chai culebrataca shuj jatun nali contra, Diablomi parlachijurca. Taita Diosta na cazuimanda ima llaquicuna tianataca Diabloca alimi yacharca.

6, 7. Jehová Diosca ¿imashinata Adán y Evamanga ali juez cashcata ricuchirca?

⁶ Causaita carajpi, tucuita carajpipash Adán y Evaca Jehová Diostaca na cazurcachu. Shinapash Jehová Diosca tucuitami ricujurca (1 Crón. 28:9; Proverbios 15:3, liingui). Paica Adanbash, Evapash, Diablopash paicunapa shungupi imata charishcata ricungapami munarca. Paicunapa Taita caimandaca Adán y Eva na cazujpica ninandami Jehová Diosca llaquirirca (Génesis 6:6huan chimbapurashpa ricupangui). Taita cashpapash Jehová Diosca juezmi can. Juez caimandaca ¿imatata rurarca?

⁷ Jehová Diosca Adandaca nishcarcami, ‘alita, nalita yachaita cuj yurapi’ fucushcata micushpaca ‘ima punlla cashpapash huañunguipachami’ nishpa. Chai shimicunata uyashpaca Adanga crishcangami, chai yuramanda micushpaca chai punllapillata Indi nara huashajujpillatami huañusha nishpa. Shinapash na chai punllallatachu huañurca. ¿Imamandata shina ninchi? Chai punlla chishipillatami Jehová Diosca cutin Adahuan Evahuanga parlarca (Gén. 3:8). Ali juez caimandacarin, paicuna ima nijta uyashca jipami Jehová Diosca huañunguichimi nirca (Gén. 3:9-19). Chai ratopillata paicunata huañuchijpica, cai Alpapi miranguichi nishca shimicunaca na pactarinmanllu carca (Is. 55:11). Shinaca juchata rurashcamanda llaquicunata chai ratopillata chasquishpapash paicunaca huahuacunata charishpa catircarami. Paicunapa huahuacunami shamuj punllacunapica ali causaita chari ushana carca. Huahuacunata charichun saquishpapash Jehová Diospa ñaupajpica Adán y Evaca huañushca cuendami carca. Jehová Diospaca 1.000 huatacunaca shuj punlla cuendami can. Chaimandami Adán y Evaca Jehová Diospa ñaupajpica micushca punllapillata huañushca cuenda carca (2 Ped. 3:8).

8, 9. Adán juchata rurajpica ¿imashinata paipa huahuacunapash llaquichi tucurca? (Callari dibujota ricupangui.)

⁸ Adán y Evapa culpamandaca paicunapa huahuacunapashmi llaquichi tucurca. Romanos 5:12​pica apóstol Pabloca nircami: ‘Juchata ruranaca, shujlla runamandami cai pachapica callarirca. Chai juchamandami, huañuipash callarirca. Shinallata tucuicuna juchata rurashcamandami huañuipash tucuicunaman yalijun’ nishpa. Pundapica Jehová Diosta ali sirvij Abelmi huañurca (Gén. 4:8). Jipamanga Adán y Evapa shuj churicunapash, nietocunapashmi rucuyashpa huañurca. Adanga paipa huahuacunamanga juchatapashmi chimbachirca. Chaimandami Bibliapica nin: “Shujlla runa na cazujpimi, ashtacacuna juchayu tucushca” nishpa (Rom. 5:19). Adán y Evaca tucui gentecunamanmi juchatapash huañuitapash chimbachishpa saquirca. Juchapash, huañuipash ñucanchipaca contra cuendami can. Chaicunamanda salvaritaca na ushanchichu. Ñucanchi cuerpoman, yahuarman jucha imashina chimbashcataca na cabal yachanchichu. Shinapash juchamandami tucuicuna llaqui apanajunchi.

⁹ Tucui gentecuna llaqui apanajujpimi Bibliapica nin, juchapash huañuipash ‘tucuicunatami jahualla quilpajun. Tucui llactacunapi causajcunapa ñavita quilpashca telashnami’ can nishpa (Is. 25:7). Huañuica pitapash shuj racu telahuan quilpashpa samaita na cacharichun saquijuj cuendami tucuicunata llaquichijun. Chaimandami Bibliapica nin: ‘Adán runapa miraicunaca tucuicunami huañunajun’ nishpa (1 Cor. 15:22). Apóstol Pablopash nircami: ‘Huañuchun charijuj cai cuerpomandaca ¿pita cacharichihuanga?’ nishpa (Rom. 7:24). Shinaca ¿pita apóstol Pablotaca huañuimanda salvai ushana carca?

10. a) ¿Maijan textocunapita ricuchijun, Jehová Diosca huañuita tucuchinata? b) Chai textocunaca ¿imatata Jehová Diosmandapash Jesusmandapash yachachin?

¹⁰ Jehová Diosllami apóstol Pablotaca ayudai usharca. ¿Imashinata yachanchi? Huañuica tucui gentecunatami quilpajun nishca jipaca profeta Isaiasca nircami: “Huañuitapash, causaita causaicamanmi tucuchinga. Mandaj Jatun Diosca, tucuicunapaj ñavimandami viquita fichanga” nishpa (Is. 25:8). Pensaripashunchi. ¿Nachu taitacunaca huahuacunata imapash llaquichijujpica chai llaquicunata anchuchishpa huacajujpicarin viquita fichachin? Shinallatami Jehová Diosca gentecuna Adanba culpamanda ama llaqui apanajuchunga huañuitapash tucuchinga. Llaquicunata tucuchingapaca Jesusmi ayudanga. 1 Corintios 15:22​pica ninmi: ‘Imashinami Adanba miraicunaca tucuicuna huañunajun. Chashnallatami Cristomandaca tucuicuna causachi tucunga’ nishpa. Apóstol Pablopash huañuimandaca ¿pita cacharichihuanga? nishca jipaca nircami: ‘Ñuca Taita Diostami, ñucanchi Apunchi Jesucristomanda pagui’ nini nishpa (Rom. 7:25). Adán y Eva na cazujpipash Jehová Diosca gentecunata juyanmi. Jesuspash Adán y Evata rurashpa ayudashcamandami tucuilla gentecunata juyashpa catin (Prov. 8:30, 31). Shinapash ¿imashinata gentecunaca juchamandapash, huañuimandapash salvari ushana carca?

11. Gentecunata ayudangapaca ¿imatata Jehová Diosca rurarca?

¹¹ Adán na cazujpica Jehová Diosca huañunami cangui nircami. Chaimandami tucui gentecuna juchatapash huañuitapash chasquishcanchi (Rom. 5:12, 16). Bibliaca ninmi: “Shujlla runa na cazushcamandami, llaquichi tucunaca callarirca” nishpa (Rom. 5:18). Huañuimanda salvangapaca ¿imatata Jehová Diosca rurarca? Jesusca nircami: ‘Tucuicunata quishpichingapami japi tucushpa huañurcani’ nishpa (Mat. 20:28). Jesusca jucha illaj caimandami gentecunataca Adanba juchamanda salvai ushana carca. Shinapash paipa causaita cushpaca ¿imashinata Jesusca Jehová Dios justo cashcata ricuchirca? (1 Tim. 2:5, 6.)

12. Jesús paipa causaita cushpaca ¿imashinata Jehová Dios justo cashcata ricuchirca?

¹² Jesusca Adanshnallata jucha illajmi carca. Yaripashun. Jehová Diosca munarcami, Adanba jucha illaj huahuacuna cai Alpapi mirashpa jundachun. Shinaca, jucha illaj causaita Adán chingachijpipash Jesusca Jehová Diosta juyaimanda, Adanba huahuacunata juyaimandami paipa causaita cushpa huañurca. Paipa causaita cushpa huañujpipash Jehová Diosca ‘huañushcacunapa chaupimandami’ Jesustaca espíritu cuerpohuan ‘causachishpa jahua pachaman pusharca’ (Efes. 1:20). ¿Imashinata Jesusca Jehová Dios justo cashcata ricuchirca? Adán juchata rurashpaca, paipa huahuacunaman jucha illaj causaitaca ñana cui usharcachu. Adanba tucui huahuacuna juchayucuna cajpimi Jesusca paipa jucha illaj yahuarhuan randinshna gentecunataca juchamanda salvarca. Apóstol Pabloca nircami: ‘Escribishcapica nijunmi: “Punda rurashca Adanga causajuj almami carca” nijunmi. Ashtahuangarin jipa Adanga, causaita caraj espiritutami charin’ nishpa (1 Cor. 15:45).

13. Jesusca ¿imashinata huañushcacunataca ayudanga?

¹³ Ñallami Jesusca causaita caraj espíritu cashcata ricuchishpa Adanba huahuacunamanga jucha illaj causaita caranga. Adanba huahuacuna ashtacacuna huañushca cajpipash cai Alpapi causachunmi paicunataca causachinga (Juan 5:28, 29).

14. Gentecunaca ¿imashinata juchamandapash salvai tucunga?

¹⁴ ¿Imashinata gentecunataca juchamandapash salvanga? Jehová Diosca paipa Reinopi mandachunga Jesustami churashca. Jesús mandajujpica cai Alpamanda 144 mil agllashca gentecunami ayudanga (Apocalipsis 5:9, 10, liingui). Cai 144 milcunaca paicunapashmi juchayucuna carca. Chaimandami juchayu gentecuna imashina cashcataca aliguta intindishpa mandanga. Mil huatacuna pactangacamanga Jesuspash, 144 milcunapashmi tucui gentecuna jucha illajcuna cachun ayudanga (Apoc. 20:6).

15, 16. a) ‘Tucuripi tucuchi tucuna huañui’ nishpaca ¿imatata nijun? b) Huañuica ¿ima horata ñana tianga? c) 1 Corintios 15:28​pi nishca shinaca ¿imatata Jesusca ruranga?

¹⁵ Ña mil huatacuna pactajpica Jehová Diosta cazujcunaca tucuillami juchamandapash huañuimandapash salvaringa. Apóstol Pabloca ninmi: ‘Imashinami Adanba miraicunaca tucuicuna huañunajun. Chashnallatami Cristomandaca tucuicuna causachi tucunga. Pundaca Cristomi causarirca. Chai jipami Cristo tigramujpica paipalla tucushcacuna causaringa. Ashtahuan chai jipamanmi, tucurimui canga. Tucuilla mandajcunatapash Cristo tucuchishpami, pai mandajushcataca Taita Diosman cutin tigrachinga. Cristota na ricunayachijcunata paipa chaqui sarunapi Dios churana punllacamanmi Cristoca mandajunga. Tucuripi tucuchi tucuna fiñaj [ o contraca] huañuimi’ can nishpa (1 Cor. 15:22-26). ‘Tucuripi tucuchi tucuna huañui’ nishpaca Adanmanda ñucanchicuna huañuita chasquishcatami nijun. Huañuica tucuilla gentecunata quilpashca charijushpapash tucuringami (Is. 25:7, 8).

¹⁶ Apóstol Pabloca nircapashmi: ‘Cristomanga Taita Diosmi tucuita mandachun paipa ñaupajpi churanga. Chai jipami Taita Diospa ñaupajpi paipa Churipash urai cumurijunga. Shina rurajpimi Taita Diosca imata cashpapash tucuita aligutapacha cutin mandajunga’ nishpa (1 Cor. 15:28, Mushuj Testamento Quichua Imbabura). Shinami Jesusca Taita Diospa munaita pactachishca jipa, mandana autoridadtapash, jucha illaj gentecunatapash cushijushpa Jehová Diosman tigrachinga.

17. Mil huatacuna jipaca ¿imata Diablohuanga pasanga?

¹⁷ Mil huatacuna jipaca gentecunata llaquichij Diablohuanga ¿imata pasanga? Apocalipsis 20:7-15​pica ninmi, mil huatacuna jipaca cutinmi Diabloca jucha illaj gentecunata umachingapaj munanga nishpa. Shinapash chai punllacunapica Diablopash paita catij gentecunapash “jipa huañui” nishcatami taringa. Bibliapi “jipa huañui” nishpaca tucuchitapacha tucuchi tucunatami nijun (Apoc. 21:8). Jipa huañuimandaca pipash na causaringachu. Shinapash Jehová Diosta juyashpa tucui shunguhuan sirvijcunaca “jipa huañui” tianataca na manllanachu can. Jipa huañuica paicunataca na llaquichingachu.

18. Adanman mandashca shimicunaca ¿imashinata pactaringa?

¹⁸ Tucuilla gentecunami jucha illaj canga. Jehová Diospa ñaupajpi ali ricurijcunaca para siempremi causai ushanga. Chai punllacunapica Adanman mandashca shimicunata pactachingapaca Adanga na minishtiringachu. Adanba huahuacunami tucuilla Alpatapash animalcunatapash Jehová Dios munashcashna cuidanga. Huañuitapash Jehová Dios tucuchinata yachashpaca ninandami cushijunchi.