Biblia cabalta villajushcataca seguromi capanchi

 1. ¿Imamandata ashtaca gentecunaca Bibliapica na confian?

CUNAN punllapi ashtaca gentecunaca picunapi confianataca na yachanllu. Ashtaca gentecunaca politicocunata, cientificocunata, jatun negociota charij gentecunataca alicachishpa, respetashpami ricun. Pero paicunapi ciertopacha confiai ushashcataca na seguro canllu. Shinallata Jesusta catinchi nij religiongunata ñaupaman pushajcunataca casi na respetanllu. Chaimandami paicuna Bibliata utilizajpipash gentecunaca Bibliapica na confian.

 2. Salmo 119:160​pi nishcashnaca ¿imatata seguro cana capanchi?

² Jehovata tucui sirvijcunaca Jehová Dios ‘na llullaj Mandaj Taita Dios’ cashcataca seguromi capanchi. Shinallata ñucanchicuna ali cachun munashcatapash seguromi capanchi (Sal. 31:5; Is. 48:17). Bibliapa yachachishcacunaca “napacha llullachu” can. Chaimandami Bibliapi nishcacunapi confiai ushashcataca seguro capanchi (Salmo 119:160​ta liipangui). Bibliata ali estudiashca shuj runaca cashna nishpami escribin: “Taita Diospa nishcacunaca na llullachu. Shinallata paipa nishcacunapash siempremi pactaringa. Diosta sirvijcunaca Taita Diospimi confian. Chaimandami paipa nishcacunapica tucui shungu confian” nircami. Ñucanchipashmi shinallata pensapanchi.

 3. Cai temapica ¿imatata yachajupashun?

³ Ñucanchishnallata shuj gentecunapash Bibliapi confiachunga ¿imashinata ayudaita ushapanchi? Quimsa yuyaicunata ricupashun: Bibliapa nishcacunaca na cambiashcachu. Bibliapa profeciacunaca siempremi pactarin. Shinallata gentecunapa causaitapashmi cambiaita ushan.

 4. ¿Imamandata huaquin gentecunaca “Bibliapa yachachishcacunaca cambiashcami can” nishpa pensarin?

⁴ Jehová Diosca 40 runagucunatami Bibliata escribichunga utilizarca. Pero cunanbica chai runacuna escribishcacunatapachaca na charipanchichu.b Chai manuscritocunapa copiacunapa shuj copiacunatallami charipanchi. Chaimandami huaquin gentecunaca “Bibliapa yachachishcacunahuan y cai runacuna escribishcacunahuanga ¿igualcha can?” nishpami pensarin. Shinaca ¿imashinata Bibliapa yachachishcacuna na cambiashcataca seguro caita ushapanchi?

 5. Escrituras Hebreaspa copiacunataca ¿imashinata rurarca? (Callari paginapi dibujota ricupangui).

⁵ Jehová Diosca Bibliapa nishcacuna ama chingarichunga Bibliapa copiacunata rurachunmi mandarca. Israel llactata mandajcunataca Taita Dios cushca leycunapa copiacunata rurachunmi mandarca. Shinallata levitacunataca israelitacunaman cai leycunamanda yachachichunmi mandarca (Deut. 17:18; 31:24-26; Neh. 8:7). Judío gentecuna Babilonia llactamanda llujshishca jipaca huaquin jaricunaca Escrituras Hebreas nishcacunapa ashtaca copiacunata rurashpami trabajai callarirca (Esd. 7:6). Cai jaricunaca chai copiacunata ruranajushpa ama pandaringapaj nishpami palabracunata y hasta letracunatapash cuentai callarirca. Shinapash paicuna juchayucuna cashcamandaca huaquin cosasgucunapica pandarircallatami. Shinapash cai escribishcacunapa ashtaca copiacunata rurashcamandami maipi pandarishcataca cuenta japi usharishca. Imashina cuenta japishcata ricupashunchi.

 6. Bibliapa copiacunata ruranajushpa imapi pandarishcataca ¿imashinata yachai usharishca?

⁶ Cunanbi Bibliamanda alipacha estudiashcacuna Bibliata copiajcuna imapi pandarishcata ali yachangapaj imata rurajta ricupashunchi. Caita ali intindingapaca primeroca cai ejemplota ricupashunchi. Shuj textotami 100 jaricuna copian. Y chai jaricunamanda shujca paipa copiata rurajushpaca pandarinmi. ¿Pero imashinata maipi pandarishcataca yachai ushapanchi? Chaipaca tucui copiacunatami comparashpa ricuna can. Shina cuendami Bibliata alipacha estudiashca gentecunaca Bibliapa manuscritocunata copiajcuna imapi pandarishcata ricungapaj o imata anchuchishcata yachangapaca Bibliapa ashtaca manuscritocunata comparan.

 7. Bibliata copiajcuna Bibliata copianajushpa ama pandaringapaj ninanda esforzarishcataca ¿imashinata yachapanchi?

⁷ Bibliata copiajcuna Bibliata copianajushpa ama pandaringapaj ninanda esforzarishcataca shuj ejemplopi ricupashunchi. Escrituras Hebreaspa ashtahuan antiguo pero completo manuscritoca Códice de Leningrado nishcami can. Chai manuscritoca 1008 o 1009 huatamandami can. Shinapash huaquin huatacuna huashamanllami Bibliapa ashtaca manuscritocunata o Bibliapa huaquin partecunapa manuscritocunata tarishca. Chai manuscritocunaca Códice de Leningrado nishcatapash yali mil huatacuna antiguomi can. Chai manuscritocunata cutin cutin copiajushcamandami huaquin gentecunaca “Códice de Leningrado nishcacunahuanga ¿maitashi igual canga?” nishpa pensaita ushanman. Shinapash cai manuscritocunata comparashca jipaca Bibliata alipacha estudiashcacunaca ¿imatata cuenta japishca? Paicunaca cai manuscritocuna huaquin palabracunapi asha diferente cajpipash Bibliapa nishcacuna na cambiashcatami cuenta japishca.

 8. Shuj librocunapa copiacunahuan ricujpica Escrituras Griegas Cristianaspa copiacunaca ¿imapita diferente can?

⁸ Apostolcunapa tiempocunapi cristianocunaca Escrituras Hebreasta copiashca jaricunapa ejemplota catishpami Escrituras Griegaspa 27 librocunataca ali copiangapaj ninanda esforzarirca. Chai copiacunataca reuniongunapi y predicacionbipashmi utilizan carca. Bibliata alipacha estudiashca shuj jarica Escrituras Griegaspa manuscritocunatami chai tiempopillata escribishca shuj librocunahuan compararca. Paica Bibliapa manuscritocunamanda parlashpami: “Casi siempremi ashtahuan copiacuna tian. Y casi siempremi completocuna canata yachan” nircami. Escrituras Griegasmanda parlashpaca shuj libropica cashnami nin: “Cunan punllacunapi shuj ali traducishca Bibliata liishpaca Bibliata escribishca punda jaricuna escribishca yuyaicunatallata liijushcataca seguromi cai ushapanchi” ninmi (Anatomy of the New Testament).

 9. Isaías 40:8​ta liishpaca ¿imatata seguro cai ushapanchi?

⁹ Bibliata copiajcuna Bibliata copianajushpa ama pandaringapaj ninanda esforzarishcamandami cunanbica Bibliata liishpa y estudiajushpaca Biblia cabal cashcata seguro cai ushapanchi.c Shinaca Jehová Diosca paipa yachachishcacuna cunan punllacaman ama cambiarichunmi asegurarishca (Isaías 40:8​ta liipangui). Pero huaquingunaca Bibliapa yuyaicuna na cambiashca cajpipash Taita Diospa Shimimi can nijtaca na ushanchichu ningapashchari. Cunanga Biblia Taita Diospa Shimi cashcata imamanda confiai ushashcata ricupashunchi.

Izquierda: C. Sappa/DeAgostini/Getty Images; derecha: Image © Homo Cosmicos/Shutterstock

10. 2 Pedro 1:21​pi shimicuna cierto cashcata ricuchingapaj shuj profecía imashina pactarishcata parlapai (fotocunata ricupangui).

¹⁰ Bibliapi parlashca profeciacunamandaca ashtacacunami pactarishca. Cai profeciacunaca ashtaca ashtaca huatacuna huashamanmi ña escribishca carca. Y cai tucui huatacunapi pasashcacunata ricushpami chai profeciacuna pactarishcata ricupanchi. Cai profeciacunaca Jehová Diosmandami shamun. Chaimandami pactarishca (2 Pedro 1:21​ta liipangui). Babilonia jatun llactahuan ima pasashcapi pensaripashunchi. Jesús cai alpaman shamuchun 800 huatacuna faltajpillatami Jehová Diosca profeta Isaiasta utilizashpa Babilonia llacta llaquichi tucunata nirca. Profeta Isaiasca Babilonia llactata Ciro shuti runa atacanata y imashina llaquichi tucunatapashmi nirca (Is. 44:27-45:2). Shinallata Babilonia llacta tucuchi tucunata y chaipi pipash nunca más ña na causanatapashmi nirca (Is. 13:19, 20). Profeta Isaías nishcashnami Jesús cai alpaman nara shamushca huata 539​pica Babilonia jatun llactataca medos y persas soldadocuna tucuchishpa saquirca. Y cunanbica chai pushtupica rumicunallami tian (Cushilla causapashunchi libropi, lección 3 punto 5​pica Bibliaca Babilonia llacta tucuchi tucunatami villarca nishca videota ricupangui).

11. Daniel 2:41-43​pi shimicunaca ¿imashinata cunanbica pactarijun?

¹¹ Bibliapi profeciacunaca punda huatacunapillaca na pactarircachu. Cunan punllacunapipashmi pactarishpa catijun. Cunan punllacunapica Daniel libropi parlashca profeciami pactarijun. Chai profeciaca Reino Unido y Estados Unidos llactacunapimi pactarijun (Daniel 2:41-43​ta liipangui). Daniel libropa profeciapica cai llactacunaca chaupica jirrushna “shinlli” y chaupica turu alpashna “urmanalla” canga nircami. Chai shimicunaca cunanbimi pactarijun. Cai ishcai llactacunaca Primera y Segunda Guerra Mundial nishcacunata ganangapaj ayudaimanda y ashtaca armacunata y soldadocunata cunangaman charimandami jirrushna shinlli cashcata ricuchishca. Pero chai llactacunamanda gentecuna shuj shuj organizaciongunahuan paicunapa derechocunata difindishpa o huelgacunata rurashpa na cazujpimi chai gobiernocunaca paicunataca ñana pundashna mandaita ushashca. Politicamanda estudiaj shuj jarica: ‘Ashtaca llactacunapica gentecunami presidenteta agllan. Chai llactacunamandaca Estados Unidosmi política cosascunapi ashtahuan dividido llacta can’ nircami. Cutin Reino Unidohuanga ¿imata pasajun? Reino Unidomanda gentecunaca Unión Europea llactacunahuan tandanajunata o na tandanajunata na de acuerdo cashcamandami dividido cashcata ricuchishca. Reino Unido y Estados Unidos llactacunapi gentecuna dividido cashcamandami chai llactacunapa gobiernocunaca imata rurangapapash una sola shuj decisionda japitaca na ushashca.

12. Bibliapi profeciacuna pactarinajushcata ricushpaca ¿imatata seguro cai ushapanchi?

¹² Bibliapi parlashca ashtaca profeciacuna pactarijushcata ricunami jipa punllacunapi Taita Diospa promesacuna pactarinata seguro cachun ayudan. Ñucanchipash Salmista runagushnami sintiripanchi. Salmista runaguca Jehová Diosmanga cashnami nirca: “Can quishpichinata shuyashpami, ñuca almaca ña huañunashna tucushca. Shina cashpapash, cambaj Shimipi nijujta yariashpami shuyajuni” nircami (Sal. 119:81). Juyaimandami Jehová Diosca “canguna shuyanajushcatami caragrini” nishpa Bibliapica ricuchin (Jer. 29:11). Jehová Diospa promesacuna pactarijpimi jipa punllacunaman cushilla causaitaca chari ushashun. Cushilla causaita charichunga gentecunaca na imatapash rurai ushanllu. Bibliapa profeciacunata estudiashpa catipashunchi. Shinami Bibliapica ashtahuan confiai ushashun.

13. ¿Imamandata Bibliapica confiaita ushapanchi? (Salmo 119:66, 138).

¹³ Bibliapa consejocunami ashtaca gentecunata ayudashca. Chaimandami ñucanchicunaca Bibliapica confiaita ushapanchi (Salmo 119:66, 138​ta liipangui). Por ejemplo huaquin matrimoniocuna divorciarigrinajushpapashmi Bibliapa consejocunata catishpaca cutin cushilla causaita ushashca. Y paicunapa huahuacunapash cristiano taitamamacunahuan viñashpaca paicunata juyashcata ricushpami seguro y cushilla sintirin (Efes. 5:22-29).

14. ¿Ima ejemplota Bibliapa consejocuna ali gentecuna tucuchun ayudai ushashcataca ricuchin?

¹⁴ Bibliapa consejocunaca peligroso gentecunapa causaitapashmi cambiashca. Jack shuti jaripa experienciamanda ricupashunchi.d Paica carcelpi huañungapaj sentenciashcacunamandaca tucuita yali millai millai, peligrosomi carca. Shuj punllaca paica Bibliamanda yachachinajujta uyangapaj tiarishpami Bibliamanda yachachijcuna cushi cushi, ali alicuna cajta ricurca. Chaimandami paipa shunguman chayarca. Shinami paipash Bibliamanda yachajui callarirca. Bibliapa consejocunata paipa causaipi pactachishpami paica asha asha cambiocunata rurashpa, ashtahuan mejorashpa catirca. Tiempohuanga publicador tucushpami bautizarirca. Paica ninanda cushijushpami carcelpi caj gentecunamanga predican carca. Shinami carcelpi cajcunamandaca chuscupurata Bibliamanda yachachishpa ayudarca. Paita huañuchina punlla chayajpica paica ñana pundashna carcachu. Chaimi paipa shuj abogadoca: “Hace 20 años paita rijsishcashnaca na canllu. Paica ninandami cambiarishca. Testigo de Jehovacunahuan Bibliata yachajuimandami shina cambiocunata rurarca” nircami. Aunque Jack huauquigu huañushca cajpipash paipa ejemploca Taita Diospa Shimi Bibliapi confiai ushashcata y Biblia gentecunapa causaita cambiangapaj poderta charishcatami ricuchin (Is. 11:6-9).

15. Testigo de Jehovacunaca ¿imamandata diferente capanchi? (Fotocunata ricupangui).

¹⁵ Bibliapa consejocunata cazuimandami Jehovata sirvijcunaca shujllashna tandanajushca tranquilo, ali causapanchi (Juan 13:35; 1 Cor. 1:10). Pero cai mundopi gentecunaca política cosascunamanda, charij cashcamanda o shujcunata na ricunayachimandami dividido causan. Shinapipash testigo de Jehovacuna unido cajta ricushpami África llactamanda Jean shuti jovenguca manllarishca quidarca. Pai causajushca llactapi guerra callarijpica paipashmi chai guerrapi participangapaca soldado tucurca. Shinapash jipamanga shuj llactamanmi pacajushpa rirca. Chai llactapimi testigo de Jehovacunata rijsirca. Jeanga cashnami nin: “Bibliapa yachachishcacunata ciertopacha pactachijcunaca na politicacunapi chapurin cashcata, tucuicuna unido cashcatami yachajurcani. Shinallata tucuicuna randimanda juyarin cashcatami yachajurcani” nircami. Paica: “Ñucaca ñuca llactata difindishpa causan carcani. Pero Bibliata yachajushpami ñuca causaipica Jehová Diosta sirvinata decidircani” ninbashmi. Cai jovenga tucuipimi cambiarirca. Paica shuj llactamanda gentecunahuan macanajushpa causanapa randica cunanbica Jehová Diospa tranquilo ali causaigumandami gentecunamanga yachachin. Bibliapa consejocuna shuj shuj gentecunata ayudashcata ricuimandami Bibliapi confiai ushashcataca seguro capanchi.

16. ¿Imamandata Bibliapi ashtahuan confiangapaj esforzarina capanchi?

¹⁶ Cai mundo ashtahuan ashtahuan huaglishpa catijushcamandami ñucanchicunaca Bibliapi confiashcata o na confiashcata ricuchina tucupanchi. Huaquin gentecunaca Bibliapa yachachishcacuna na cierto cashcata crichunmi munan. Shinallata ñucanchita ayudachun aliguta cazushpa, aliguta pensarishpa sirvij esclavotaca Jehová Diosca na agllashcachu nishpa pandachingapami munan. Pero Taita Diospa Shimi Biblia cabalta yachachishcata seguro cashpaca chashna nishcacuna pandachichunga na saquipashunllu. Jehová Diospa mandashcacunata ñucanchi “tucui causaipi” cazungapaj decididomi capashun (Sal. 119:112). Shina decidido cashpaca Bibliapa yachachishcacunata shujcunaman yachachishpa Bibliapa consejocunata catichun animanataca na pinganayachishunllu (Sal. 119:46). Ashtahuanbash catiriashpa llaquichina tiempocuna chayamujpipash “cushijushpa, pacienciahuanmi” aguantashpa cati ushapashun (Col. 1:11; Sal. 119:143, 157).

17. 2023 huatapa textoca ¿imashinata ayudan?

¹⁷ Bibliamanda yachajuchun Jehová Dios ayudashcamandaca ninandami agradicipanchi. Bibliapa yachachishcacunami tranquilo, ali sintirichun ayudan. Shinallata cai nali tiempocunapi causashpapash imashna ali causaita charinatami yachachin. Taita Diospa Gobierno cai alpata ña mandajujpica shuj tranquilo, ali causaigu tianatami Bibliapica yachachin. 2023 huatapa textoca Taita Diospa Shimi napacha llulla cashcata ashtahuan seguro cachunmi ayudan (Sal. 119:160).