Reuniongunapi randimanda animaripashunchi

 1. Reuniongunapica ¿imamandata comentapanchi?

REUNIONGUNAMANGA ¿imamandata ripanchi? Reuniongunamanga ashtahuanbachaca Jehová Diosta alabangapaj munaimandami ripanchi (Sal. 26:12; 111:1). Reuniongunapica ñucanchi huauquipanicunahuan cunan punllacunapi difícil situaciongunapi causashcamanda caishujmanda chaishujmanda animaringapami ripanchi (1 Tes. 5:11). Comentashpaca cai ishcai cosascunatami pactachi ushapanchi.

 2. Tandanajuicunapica ¿ima horata comentariocunata cungapaca oportunidadta charipanchi?

² Tucui semanacunami reuniongunapi comentangapaca ashtaca oportunidadcunata charipanchi. Por ejemplo, fin de semanapica Villajun revistata estudiajushpami comentangapaj oportunidadta charipanchi. Shinallata chaupi semana tandanajuipica “Bibliapa Valishca Yuyaicunata Mascashunchi” partepi, Diospa Shimimanda Yachajungapaj partepi y shuj partecunapipashmi comentaita ushapanchi.

 3. a) Comentangapaca ¿ima ishcai jarcaicunata ricurita ushan? b) Chai jarcaicunata mishachunga ¿imashinata Hebreos 10:24 y 25​ca ayudan?

³ Tucuicunallatami ñucanchi comentariocunahuan Jehová Diosta alabangapaj, huauquipanicunatapash animangapaj munapanchi. Shinapash yapata manllaimanda o ashtaca viajecunata maquita alzajpipash na comentachijpimi huaquinbica na comentagapaj munapanchiman. Shinapash hebreos huauquipanicunaman apóstol Pablo escribishca shimicunami cai jarcaicunata mishachun ali yuyaicunata cun. Apóstol Pabloca tandanajuicuna importante cashcata parlashpaca: “Caishuj chaishujmi animarina capanchi” nircami (Hebreos 10:24, 25​ta liipangui). Shuj uchilla comentario cajpipash chai comentariohuan ñucanchi huauquipanicunata animaita ushashcata yachashpaca comentanataca na ashta manllashunllu. Huaquinbica ashtacatami comentangapaj munapanchi. Shinapash chashna na comentaita ushashpapash shujcuna comentaita ushashcamandami contento caita ushapanchi (1 Ped. 3:8).

 4. Cai temapica ¿ima quimsa yuyaicunatata ricugripanchi?

⁴ Huaquin congregaciongunapica ashalla huauquipanicuna tiaimandami comentangapaca ashtaca oportunidadcuna tian. Callaripica chashna congregaciongunapi cashpa imashina caishujmanda chaishujmanda animarinatami ricugripanchi. Cutin shuj congregaciongunapica ashtaca huauquipanicuna tiaimandami comentangapapash ashtaca tian. Chashna congregaciongunapi cashpa imashina animarishpa catinatami catipica yachajupashun. Ultimopica shujcunata ciertopacha animangapaj ñucanchi comentariocuna imashina cana cashcatapashmi ricugripanchi.

 5. Ashallacuna cashpa randimanda animaringapaca ¿imatata rurai ushapanchi?

⁵ Shuj grupopi o shuj uchilla congregacionbica comentariocunata cungapaca ashalla huauquipanicunami tian. Chaimandami huaquinbica yachachij huauquiguca pipash maquita alzachunga shuj ratota shuyana can. Chaimandami reuniongunaca yapata paraita ushan. Shina yapata parashcamandami huaquingunaca talvez asha desanimado sintirita ushan. Shina pasajpica ¿imatata ruraita ushapanchi? Ashtaca viajecunata comentangapami prepararishcalla caita ushapanchi. Shinami shujcunapash ashtahuan comentachun animaita ushapashun.

6, 7. Comentashpa ama yapata manllangapaca, ¿imatata rurai ushapanchi?

⁶ Ashtaca huauquipanicunaca reuniongunapi comentanapi pensarishpallatami manllaihuan sintirin. Quiquinda shina pasajujpica ¿imatata rurai ushapangui? Na yapata manllashpa quiquinba comentariocunahuan huauquipanicunata animangapaca huaquin cosascunatami ruraita ushapangui.

⁷ Punda llujshishca Villajun revistacunapi huaquin temacunatami cutin repasaita ushapanchi.b Por ejemplo, chai temacunapica aliguta prepararichunmi animan (Prov. 21:5). Ali prepararishca cashpaca ashtahuan facilmi comentaita ushapashun. Shinallata uchilla comentariocunata ruranapashmi comentachun ayudaita ushan (Prov. 15:23; 17:27). Ashalla shimicunapi comentashpaca na yapata manllapashunllu. Ashtahuanbash shuj comentariopi shuj o ishcai yuyaicunamandalla parlajpica huauquipanicunaca chai comentariotaca ashtahuan facilmi intindipanga. Quiquinba shimicunapillata shuj comentariota nijpica huauquipanicunaca quiquin ali prepararishcata, chai temamanda ali intindishcatapashmi cuenta japinga.

 8. Comentangapaj esforzarijujpica Jehová Diosca ¿imashinata ñucanchitaca ricun?

⁸ Caipi yachajushca consejocunata pactachishca jipapash shuj o ishcai viajetalla comentaita ushashpaca ¿imatata rurai ushapangui? Comentangapaj esforzarijushcamanda Jehová Dios quiquinda valorajtami yarina capangui (Luc. 21:1-4). Shinapash Jehová Diosca quiquin usharishcagutallami imatapash rurachun munan (Filip. 4:5). Shinaca mashna comentariocunata cui ushashcata pensaripangui. Chai jipaca comentangapaj esforzaripangui. Y ama manllashpa comentangapaca Jehová Diosta mañapangui. Callaringapaca uchilla comentariocunata cungapami esforzarita ushapangui.

 9. Shuj jatun congregacionbica ¿imata pasaita ushan?

⁹ Shuj jatun congregacionbi cashpaca ashtaca huauquipanicuna comentangapaj munashcamandami talvez huaquin reuniongunapica shuj viajetallapash na comentaita ushapanchi. Cunanga Daniela shuti panigupi pensaripashunchi.c Paica reuniongunapi comentanataca siempremi gushtashca. Chai paniguca: “Comentashpaca, Jehovata adorajushcata, shujcunata animajushcata y Bibliapa yachachishcacunata ashtahuan fácil yarita ushashcatami sintini” ninmi. Chaimandami paipaca comentanaca importantepacha can. Shinapash chai panigu shuj ashtahuan jatun congregacionbi sirvi callarishpaca pundashnaca ñana comentaita usharcachu. Huaquinbica shuj comentariotallapash na cuita usharcachu. Chai paniguca chashna pasashcamandaca cashnami nin: “Ñucaca llaquillami sintirircani. Shuj privilegiota chingachishcatashnami sintircani. Ashtaca viajecunata maquita alzajpi na comentachijpica, ‘ñucataca yadredemi chaitaca rurahuan’ yashpapashmi pensari callarircani” ninmi.

10. Comentangapaj ashtahuan oportunidadcunata charingapaca ¿imatata ruraita ushapangui?

¹⁰ ¿Párrafo 9​pi parlashca Daniela shuti panigushna sintiripashcanguichu? Shina sintirishpaca, “comentangapaj maquita ñana alzashachu. Uyaitallami uyasha” nishpa talvez pensaripashcangui. Shinapash comentashpa catingapaj esforzarinami capangui. Comentangapaj ashtahuan oportunidadcunata charingapaca ¿imatata ruraita ushapangui? Chaipaca cada reunionbi huaquin comentariocunata cungapami prepararina capangui. Shina rurashpami callari parrafocunapi na comentai ushashpapash, cati parrafocunapi comentai ushapangui. Villajun revistata prepararijushpaca cada párrafo chai temahuan imata ricunata charijta aliguta pensaripangui. Shinami imagutapash siempre comentaita ushangui. Shinallata ashtahuan shinllilla partecunapi comentangapapashmi prepararita ushapangui (1 Cor. 2:10). Chai partecunata explicangapaj ashtahuan difícil caimandami comentariocunaca cazi na tian. Caipi yachachishca consejocunata pactachijushpapash reuniongunapi na comentai ushashpaca ¿imatata rurai ushapangui? Chaipaca nara reunión callarijpillatami Villajun revistata yachachigrijuj huauquigutaca quiquin munashca parrafopi comentachichun mañaita ushapangui.

11. Filipenses 2:4​pica ¿imata rurachunda animajun?

¹¹ (Filipenses 2:4​ta liipangui). Jehová Diosca apóstol Pablotaca cashnami escribichirca: ‘Na quiquingunapa beneficiotallachu mascana canguichi. Shujcunapa beneficiotapashmi mascana canguichi’ nishpa. Reuniongunapi cashpaca ¿imashinata chai consejota pactachita ushapanchi? Chaipaca tucuicunallata comentangapaj munashcatami yarina capanchi.

12. Reuniongunapi huauquipanicunata animangapaca ¿imatata rurai ushapanchi? (Fotota ricupangui).

¹² Caipi pensaripashun: Amigocunahuan parlashpaca na ñucanchillachu parlanchi. Paicunapash parlachunmi saquipanchi. Reuniongunapipash chashnallatami can. Ñucanchilla comentanapa randica, ashtaca huauquipanicuna comentachunmi munapanchi. Shinaca shuj huauquipanicunapash comentachun saquishpami paicunataca ashtahuan animai ushapanchi (1 Cor. 10:24). Cunanga ashtaca huauquipanicuna comentachun imata rurai ushashcata ricupashun.

13. Ashtahuan huauquipanicuna comentai ushachunga ¿imatata rurai ushapanchi?

¹³ Por ejemplo, ashalla shimicunapimi comentaita ushapanchi. Shinami shujcunapash comentachun ashtahuan tiempo tianga. Ancianocuna, experienciata charij shuj huauquipanicunapashmi chashna rurashpa ali ejemplota ricuchita ushan. Shinallata comentariocunapica ashtaca yuyaicunamanda parlanaca na minishtirinllu. Shuj parrafopi tucui yuyaicunata ñucanchilla comentajpica shujcunaca ñana imatapash comentai ushangachu. Por ejemplo, cai parrafopica ishcai yuyaicunami tian. Callaripica, ashalla shimicunapi comentana ali cashcatami nircanchi. Jipaca, ashtaca yuyaicunamanda parlana na minishtirishcatapashmi niparcanchi. Shinaca cai parrafopi ñucanchita primero comentachijpica shuj yuyaimandalla parlanami ali canman.

14. Mashna viajecunata comentanata decidishpaca ¿imatata yarina capanchi? (Fotocunata ricupangui).

¹⁴ Mashna viajecunata comentanataca aliguta pensarishpami decidina capanchi. Tucui parrafocunapi comentangapaj munashpa maquita alzajujpica yachachij huauquiguca talvezpashmi a la fuerza comentariota cunata sintinga. Shina sintirimandami shujcuna na comentashca cajpipash ñucanchimanra comentariotaca cuita ushanman. Shina pasajpica shuj huauquipanicunaca talvezpashmi ñana comentariocunata cungapaj munanga (Ecl. 3:7).

15. a) Shuj reunionbi na comentai ushashpaca ¿imatata na rurana capanchi? b) Yachachij huauquigu tapuicunata rurajushpaca ¿imatata yarina can? (“Tapuicunata rurashpa yachachijushpaca huauquiguca ¿imatata yaipi charina can?” nishca recuadrota ricupangui).

¹⁵ Ashtaca huauquipanicuna comentangapaj maquita alzajpica talvez ñucanchi munashcashnaca comentaitaca na ushapashunllu. Huaquinbicarin shuj comentariotallapash na cuita usharingachu. Shina pasajpica llaquillami sintirita ushapanchi. Shinapash yachachij huauquiguhuanga na culiranachu capanchi (Ecl. 7:9).

16. Shujcuna comentashcamanda paicunata animangapaca ¿imatata ruraita ushapanchi?

¹⁶ Shuj reunionbi ñucanchi munashcashna na comentai ushashpapash shujcunapa comentashcacunatami ali ali uyaita ushapanchi. Y chai jipaca paicuna comentashcamandami felicitaita ushapanchi. Shuj reunionbi comentariocunata na cui ushashca cashpapash shujcuna comentashcamanda ali shimicunahuanmi paicunata animaita ushapanchi (Prov. 10:21). Shinaca shujcunata felicitashpapashmi paicunataca animaita ushapanchi.

17. a) Huahuacuna comentachunga taitamamacunaca ¿imashinata ayudaita ushan? b) Videopi ricushcashnaca shuj comentariota cungapaj prepararishpaca ¿ima chuscu yuyaicunatata yarina capanchi? (Notata ricupangui).

¹⁷ Reuniongunapi randimanda animaringapaca ¿imatata ashtahuan ruraita ushapanchi? Uchilla huahuacunata charishpaca paicuna comentaita ushanalla comentariocunata prepararichun ayudapangui (Mat. 21:16). Huaquin temacunapica matrimoniopi problemacunamanda o limpio causashpa juchacunapi ama urmangapaj imata ruranamandami yachajupanchi. Cashna temacunata yachajujushpapash huaquinbica shuj o ishcai parrafocunapica huahuacuna comentai ushana yuyaicunami tian. Shinallata huahuacunamanga cada comentangapaj maquita alzashcapi na siempre comentachinata yaipi charichunmi ayudana capangui. Shinami paicuna maquita alzashca jahua na comentachijpica jipamanga na llaquilla sintiringa (1 Tim. 6:18).d

18. Comentajushpa ñucanchimandalla ama yapata parlangapaca ¿imatata rurai ushapanchi? (Proverbios 27:2).

¹⁸ Tucuicunallatami Jehová Diosta alabangapaj, ñucanchi huauquipanicunata animangapaj comentariocunata prepararita ushapanchi (Prov. 25:11). Huaquinbica ñucanchipa personalmente pasashca experienciamandami comentaita ushapanchi. Shinapash ñucanchimandallaca na yapata parlanachu capanchi (Proverbios 27:2​ta liipangui; 2 Cor. 10:18). Chaipa randica, Jehovamanda, Bibliapa yachachishcacunamanda, Jehovapa organizacionmanda parlashpami ashtahuanbachaca comentana capanchi (Apoc. 4:11). Huaquinbica shuj parrafopica ñucanchipa experiencia personaltami comentachun mañan. Shina partecunapica ruraita ushapanchimi. Cati parrafopimi shuj ejemplota ricupashun.

19. a) Shujcunapi pensarishpa comentanaca ¿imapata ayudaita ushan? (Romanos 1:11, 12). b) Quiquinga ¿imamandata reuniongunapi comentanataca gushtapangui?

¹⁹ Reuniongunapi imashinapacha comentanamanda shuj ley na tiajpipash tucuicunallatami shujcunata animangapaj comentariocunata cungapaj esforzarita ushapanchi. Huaquin huauquipanicunaca shujcunata animangapaca ashtahuan comentana cashcatami pensan. Cutin shujcunaca paicuna usharishcaguta comentashpa, shujcunapa comentariocunatapash uyashpami cushilla sintirin. Shinaca reuniongunapi comentangapaj shujcunapi pensarishpaca tucuicunallatami cushilla, animarishca sintiripashun (Romanos 1:11, 12​ta liipangui).