Jovenguna ¿imashinata causangapaj munapanguichi?

 1. Jehoás, Uzías y Josiasca ¿ima responsabilidadtata pactachina tucurca?

PENSARIPAI: Quiquin uchilla huahuagu cashpa o joven cashpa Jehová Diospa pueblota mandajupashcanguiman. ¿Imashinashi chai autoridadta utilizapanguiman? Bibliapica Judá llactata huaquin mandajcunaca chairalla viñai joven cashpa mandai callarishcatami ricuchin. Por ejemplo, Jehoasca 7 huatagutallami charirca, Uziasca 16​ta, y Josiasca 8 huatagutalla charishpami mandai callarirca. Paicunaca shuj jatun responsabilidadtami charirca. Caita pactachina shinlli cajpipash, paicunaca minishtirishca ayudatami charirca. Shinami paicunapa causaipica alita ruraita usharca.

 2. Jehoás, Uzías y Josiaspa causaita estudianaca ¿imamandata ali can?

² Cunanbica ñucanchicunaca rey o reinacunaca na capanchichu. Shinapash cai quimsa reycunamandaca ashtacatami yachajuita ushapanchi. Paicunapa ali y nali decisiongunamandapashmi ashtacata yachajuita ushapanchi. Paicunapa causaimandaca ali amigocunata mascanata, humilde canata y Jehová Diospa ayudata siempre mascana importante cashcatami yachajuita ushapanchi.

 3. Sumo sacerdote Jehoiadá runagupa ejemploca, Jehoás ¿imata rurachunda ayudarca?

³ Jehoás runagushna ali decidipangui. Jehoás uchilla huahuagu cajpimi, paipa taitaca huañurca. Chaimandami sumo sacerdote Jehoiadá runaguca Jehoasta japishpa paipa huahuagutashna viñachirca. Shinallata Jehová Diosmandapashmi yachachirca. Jehoasca Jehoiadapa consejoguta aliguman uyashpami ali yachaita charishcata ricuchirca. Jehoiadá runagupa ali ejemplomi Jehoás Jehová Diosta sirvinata decidichun ayudarca. Shina ruraimandami israelitacunapash Jehová Diosta sirvichun ayudaita usharca. Shinallata Jehová Diospa templo huasiguta cutin alichingapami aliguta organizarca (2 Crón. 24:​1, 2, 4, 13, 14).

 4. Jehovapa mandashcacunata alicachichunga ¿imata ayudanga? (Proverbios 2:​1, 10-12).

⁴ Quiquinba taitacuna o shuj persona Jehová Diosta juyachun y paipa mandashcata cazuchun yachachishpaca shuj valishca regalota carajuj cuendami can (Proverbios 2:​1, 10-12​ta liipangui). Taitamamacunaca paicunapa huahuacunataca huaquin cosascunahuanmi yachachita ushan. Por ejemplo, Katia shuti panigu ali decisiongunata japi ushachunga paipa taita imashina ayudashcata ricupashun. Paica cada punllami paipa ushiguta escuelaman saquingapaj rijushpaca, cada punlla liina textota liishpa comentangapaj aprovechan carca. Paniguca: “Ñuca taitahuan parlashcacunami chai punllapi imapash shinlli cosascuna pasajpi chimbapurachun ayudashcatami yuyarin”. Shinapash talvez quiquinba taitamamacunaca Bibliapi nishcashna huaquin instrucciongunatami quiquinmanga cun. Shinapash chai instrucciongunaca yapapacha cajtashna, imatapash na ruraita ushajtashnami talvez sintipangui. Shinapash cai ayudata chasquichunga ¿imata ayudanga? Panigu Anastasiaca ninmi: “Ñuca taitacunaca huaquin instrucciongunata churashpapash, imamanda chai instrucciongunata churashcata parlangapami tiempota llujchin carca” ninmi. Paniguca ninbashmi: “Ñuca taitacuna chaita ruranami, paicuna churashca instrucciongunahuanga ñucata na controlangapaj munashcata, ashtahuangarin ñucata juyaimanda cuidangapaj munashcata intindichun ayudahuarca”.

 5. Quiquinba decisiongunaca ¿imashinata quiquinba taitacunata y Jehová Diostapash sintichita ushan? (Proverbios 22:6; 23:​15, 24, 25).

⁵ Bibliapa consejocunata nishpa quiquinba taitacuna consejajpi aliguman cazujpica paicunaca cushillami sintiringa. Ashtahuanbachaca Jehová Diostami cushichipangui. Shinallata paihuanga para siempre amigo cashpami catita ushapangui (Proverbios 22:6; 23:​15, 24, 25​ta liipangui). Shinaca ¿nachu Jehoás jovenba ejemplota catingapaca alipacha razonguna can?

 6. Jehoasca ¿pitata uyarca? Chaita decidishcamandaca ¿imata pasarca? (2 Crónicas 24:​17, 18).

⁶ Jehoaspa nali decisionmanda yachajupai. Sumo sacerdote Jehoiadá huañushca jipaca Jehoasca nali amigocunatami agllarca (2 Crónicas 24:​17, 18​ta liipangui). Jehoasca Jehová Diosta na sirvij Judá llactapi mandajcunapa consejocunata uyanatami decidirca. Paicunata cazushpaca ¿alitachu rurarca? (Prov. 1:10). Paica nali amigocunapa rurashcata cazushpami nalita rurarca. Shinapash Jehoasta paipa primo Zacarías corregingapaj munajpica paica Zacariasta huañuchichunmi mandarca (2 Crón. 24:​20, 21; Mat. 23:35). Jehoasca primeroca alitami rurajurca. Shinapash jipamanga apóstata y huañuchidorpashmi tucurca. Asha tiempo jipaca paitaca paipa sirvijcunallatami huañuchirca (2 Crón. 24:​22-25). Jehoás Jehová Diospa consejocunata cazushpa y Jehovata sirvijcunata cazushpaca paipa causaica diferentemi canman carca. Shinaca caimandaca ¿imatata yachajupanchi?

 7. ¿Ima amigocunatallata agllana capangui? (Fotota ricupangui).

⁷ Jehoaspa nali decisiongunamandaca ashtacatami yachajuita ushapanchi. Ñucanchita ayudaj ali amigocunata agllana cashcatami yachajupanchi. Cai amigocunaca Jehová Diosta sirvij y paita cushichingapaj munajcunami cana can. Paicunaca diferente edadcunatapashmi charita ushan. Yaripai: Jehoasca sumo sacerdote Jehoiadahuan ricujpica ashtahuan jovenmi carca. Quiquinba amigocunata yarishpa cashna pensaripai: “¿Paicunaca Jehová Diospi ashtahuan feta charichun ayudahuanllu? ¿Jehovapa mandashcacunata cazuchun animahuanllu? Jehová Diosmanda y Bibliata yachajunamanda ¿parlanata gushtanllu? ¿Jehovapa mandashcacunata respetanllu? Ñuca pandarijpica ¿corregihuanllu? O na cashpaca ¿ñuca uyangapaj munashcatallachu nihuan?” (Prov. 27:​5, 6, 17). Quiquinba amigocuna Jehová Diosta na sirvijcuna cajpica paicunataca quiquinga na minishtipanguichu. Pero quiquinba amigocuna Jehová Diosta tucui shunguhuan juyajcuna cajpica paicunahuan ashtahuan ali amigo cashpa catipangui. Cashna amigocunata charinaca alipachami can (Prov. 13:20).

 8. Redes sociales nishcata utilizajushpaca ¿imatata yaipi charina capangui?

⁸ Redes sociales nishcacunaca familiacunahuan, amigocunahuan parlachun y tiempota yalichunmi ayudaita ushan. Ashtacacunami imata randishcata, imata rurashcacunata shujcuna alicachishpa ricuchunlla fotocunata, videocunata redes sociales nishcacunapica churan. Quiquinbash redes sociales nishcata utilizashpaca cashna pensaripai: “¿Shujcuna alicachishpa ricuchunllu munani? ¿Imata rurangapata munani? ¿Shujcunata animangapaj o ñucata alicachishpa ricuchunllachu munani? Redes sociales nishcata utilizaj gentecuna ¿ñucapa pensashcacunapi, ruraicunapi, y parlocunapi afectachun saquijunichu?” Shuj viajeca Cuerpo Gobernantemanda Nathan Knorr huauquiguca: “Gentecunapa ñaupapilla ali quidangapaj imatapash rurashpaca na imatapash gananguichichu. Ashtahuangarin Jehová Diospa ñaupapi ali ricuringapaj esforzarishpallami paita juyajcunapa ñaupapipash ali ricuri ushanguichi” nishpami consejarca.

 9. Jehová Diospa ayudahuanga Uzías runaguca ¿imatata rurai usharca? (2 Crónicas 26:​1-5).

⁹ Uzías runagushna ali decidipashunchi. Rey Uzías joven cashpaca humildemi carca. Shinallata ‘Mandaj Diostalla mascashpa causanatami’ yachajurca. Paica 68 huatacunatami causarca. Paitaca paipa cazi tucui causaipimi Jehová Diosca bendiciarca (2 Crónicas 26:​1-5​ta liipangui). Uzías runaguca contra llactacunata mishashpami Jerusalenda pipash ama llaquichichun asegurarirca (2 Crón. 26:​6-15). Uzías runaguca Jehová Diospa ayudahuan tucui ali llujshijushcamandaca de seguromi cushilla sintirijushcanga (Ecl. 3:​12, 13).

10. Uziashuanga ¿imata pasarca?

¹⁰ Uzías runapa nali decisionmanda yachajupai. Rey Uziasca shujcunata mandashpa causanata yacharishcami carca. Chaimandami pai ima munashcata siempremi rurai ushani nishpa pensashcanga. Shuj punllaca Jehovapa templo huasiman yaicushpami inciensota rupachirca. Chaitaca reycunaca na ruranachu carca (2 Crón. 26:​16-18). Sumo sacerdote Azarías chaitaca na ruranachu carcangui nijpica Uziasca ninandami culirarca. Uziasca Jehová Diosta cazushpami causashcarca. Shinapash chai viaje Jehová Diosta na cazujpimi Jehová Diosca lepra unguihuanmi castigarca (2 Crón. 26:​19-21). Rey Uzías humilde cashpa catishpaca chai llaquitaca na apanmanllu carca.

11. Humilde cashpaca ¿imatata rurapashun? (Fotocunata ricupangui).

¹¹ Rey Uzías mandangapaj ashtahuan poderta chari callarishpaca Jehovapa ayudahuanlla tucuita rurai ushashcatami cungarca. Caimandaca ¿imatata yachajupanchi? Imapash bendiciongunata o privilegiocunataca Jehová Dios carajpilla charishcataca na cunganachu capanchi. Imagutapash ali rurashpa jariyajunapa randica Jehová Diospa ayudahuan chaita rurai ushashcata yarina capanchi (1 Cor. 4:7).b Humilde cashpaca ñucanchita corregichun minishtishcatami reconocina capanchi. 60 huatacunata yali charij shuj huauquiguca cashna nishpami escribirca: “Shujcuna ñucata corregijpi na risintirishpa, na desanimarishpa quidanatami yachajupashcani. Ñucapa pandarishcacunamanda pipash corregijpica, mejorashpa ñaupaman catingapami esforzarini”. Humilde cashpa catingapaj y Jehová Diosta siempre cazushpa catingapaj esforzarishpaca ñucanchillata cushillami causapashun (Prov. 22:4).

12. Josías joven cashpallata Jehová Diosta mascangapaca ¿imatata rurarca? (2 Crónicas 34:​1-3).

¹² Josías runagushna ali decidipashunchi. Josías runaguca joven cashpallatami Jehová Diospa ayudata mascanata yachajurca. Paica Jehová Diosta ashtahuan rijsingapaj y paipa voluntadta rurangapami ashtahuan munarca. Shinapash Josiaspaca rey canaca na facilchu carca. Porque chai tiempopica mayoría gentecunami yanga dioscunata adorashpa causan carca. Chaimandami Josiasca na manllashpa gentecuna Jehová Diosta ali adorachun ayudana tucurca. Paica nara 20 huatacunata charishpallatami Jerusalenbi yanga dioscunata adorangapaj tucuilla cosascunata tucuchi callarirca (2 Crónicas 34:​1-3​ta liipangui).

13. Jehová Diostalla sirvisha nishca promesata ruranaca ¿imashinata quiquindaca ayudanga?

¹³ Joven cashpapash ¿imashinata rey Josiashna caita ushapangui? Chaipaca Jehová Diospa ayudata mascana y paipa cualidadcunamandami yachajuna capangui. Y shina ruranami Jehová Diostalla sirvisha nishca promesata rurangapaj munachun ayudanga. Chai promesata ruranaca ¿imashinata quiquinba causaipica ayudanga? Luke huauquiguca 14 huatata charishpami bautizarirca. Paica: “Cunanmandaca ñuca causaipica Jehová Diosta primero churashpa y paita siempre cushichingapami esforzarisha” nircami (Mar. 12:30). Quiquinbash chai promesata ruranata decidishpaca ashtaca bendiciongunatami charipangui.

14. Huaquin jovengunaca ¿imashinata rey Josiaspa ejemplotaca catin?

¹⁴ Jehovata sirvij jovengunaca ¿imacunatallata chimbapurana tucun? Johan shuti huauquiguca 12 huatacunata charishpami bautizarirca. Paica “clasemanda ñuca compañerocunaca tabaco samaita shuj aparatomanda chupachunmi ninanda atichihuan carca” ninmi. Shina atichinajujpica Johan huauquiguca ¿imatata rurarca? Huauquiguca tabaco samaita chupana paipa saludta imashina afectaita ushashcata y Jehová Dioshuanbash ñana amigo cashpa cati ushanapimi pensarirca. Rachel shuti jovenga 14 huatacunatalla charishpami bautizarirca. Paica pai estudiajushca pushtupi imapash problemacuna ricurijpi chai problemacunata mishangapaj imacunatalla ruran cashcatami parlan: “Imata ricushpapash espiritual cosascunata yaringapami esforzarini” ninmi. “Huaquinbica historiamanda clasesta charijushpaca ñapashmi Bibliapa ejemplomanda o profeciacunamanda yarini. Cutin huaquinbica pihuanbash parlajushpaca Bibliapa versocunata yarishpami compartita ushashcani” ninmi. Quiquinba problemacunaca rey Josiaspashnallataca talvez na cangachu. Shinapash paishnallatami Jehová Diosta tucui shunguhuan sirvita y ali yachaitapash charita ushapangui. Jovenguna, cunanmandallata quiquinba problemacunata mishashpaca jipa punllacunapi problemacuna ricurijpica preparadomi capangui.

15. Rey Josías Jehová Diosta tucui shunguhuan sirvichunga ¿imata ayudarca? (2 Crónicas 34:​14, 18-21).

¹⁵ Rey Josías 26 añosta charishpami, Jehová Diospa templota arreglai callarirca. Jehová Diospa templo huasita arreglanajushpami “Mandaj Dios mandashcata escribichishpa Moisesman cushca librota tarirca”. Rey Josías chai libropi ima nishcacunata uyashpaca Jehovapa Leyta pactachingapami ñapash cambiocunata rurai callarirca (2 Crónicas 34:​14, 18-21​ta liipangui). Jovenguna ¿Bibliata liina costumbreta charingapaj munapanguichu? Chai costumbreta charingapaj esforzarijushpaca ¿ñachu alicachijupangui? Quiquinda ayudaj textocunata ama cungangapaca ¿imatapash rurajupanguichu? Párrafo 13​pi parlashca Luke jovenga pai gushtashca textocunata tarishpaca shuj cuadernogupimi anotan. Quiquinbash quiquinba gushtashca textocunata o shuj yuyaicunata yarichunga ¿nachu chaitallata rurana ayudapanga? Shinaca Bibliata ashtahuan yachajushpaca ashtahuanmi alicachipangui. Shinallata Jehová Diosta ashtahuan sirvina munaitapashmi charipangui. Imashinami rey Josiasta Jehová Diospa Ley alita rurachun ayudarca, shinallatami quiquindapash ayudapanga.

16. Rey Josiasca ¿imata nalita rurarca? Caimandaca ¿imatata yachajupanchi?

¹⁶ Rey Josiaspa nali decisionmanda yachajupai. Rey Josiasca 39 huatacunatami charirca. Paica nali decidishcamandami huañuita tarirca. Paica Jehová Diospa ayudata mañanapa randica paipillatami confiarca (2 Crón. 35:​20-25). Caimandaca ¿imatata yachajui ushapanchi? Ima edadta charishpapash o Bibliata ashtaca tiempota yachajushca cashpapash, Jehová Diospa ayudataca siempremi mascashpa catina capanchi. Chaipaca Jehová Diospa ayudata siempre mascana, Bibliata estudiana y experienciata charij huauquipanicunapa consejotapashmi uyana capanchi. Shina rurashpaca imapash nalita ruranamanda jarcarishpami alita rurai ushashpa cushilla causai ushapashun (Sant. 1:25).

17. Cai quimsa reycunamandaca ¿imatata yachajuita ushapanchi?

¹⁷ Jovenguna, quiquingunaca ashtaca ali cosascunatami ruraita ushapanguichi. Jovengunapaca Jehoás, Uzías y Josiaspa causaimanda yachajunami ali decisiongunata agllashpa, ali causashpa, Jehová Diosta cushichita ushachun ayudanga. Paicunaca nali decisiongunata japimandami llaqui aparca. Shinapash quiquinga paicunapa ali rurashcacunata yachajushpa y paicuna nali rurashcacunata na rurangapaj esforzarishpaca alimi causaita ushapangui.

18. Ali causaita chari ushangapaca Bibliapa ¿ima ejemplocunata ayudanga? (Dibujota ricupangui).

¹⁸ Bibliapica shuj jovengunapash Jehovapa amigo tucushcata, paipa ñaupapi ali ricurishpa, ali causai ushashcatami ricuchin. Por ejemplo rey Davidca joven cashpallatami Jehová Diosta sirvinata decidirca. Tiempohuanga shuj ali reymi tucurca. Rey Davidca huaquin viajecunatami pandarirca. Shinapash paica Jehová Diospaca shuj alipacha sirvijmi carca (1 Rey. 3:6; 9:​4, 5; 14:8). Davidpa causaimanda yachajushpaca Jehová Diosta imashina tucui shunguhuan sirvinatami yachajuita ushapangui. Shinallata quiquinga Marcos y Timoteo jovengunamanda yachajungapaj ashtahuan informaciondami mascaita ushapangui. Paicunaca joven cashpallatami Jehová Diosta sirvinata decidirca. Shina ruraimandami Jehová Diostaca alipacha sirvi usharca. Paicunaca Jehová Diosta cushichishpa, ali causaigutapashmi charirca.

19. Quiquinga ¿imashina causaiguta charingapata munapangui?

¹⁹ Quiquinga ¿imashina causaiguta charingapata munapangui? Chaipaca cunanmandallatami imatapash rurana capangui. Na quiquinbillata confiashpa, Jehová Diospi confiajpica paillatami ali decisiongunata japichun ayudanga (Prov. 20:24). Quiquinga cushilla ali causaigutami charita ushapangui. Shinallata Jehová Dios quiquinba rurashcacunata ninanda valichijtaca na cunganachu capangui. Ñucanchita juyaj Jehová Diosta sirvishpa causanaca shuj jatun bendicionmi can.