“Ñucanchipashmi, cangunahuan ringapaj munapanchi”

1, 2. a) Cunan punllacunamanda parlashpaca ¿imatata Jehová Diosca nirca? b) ¿Ima tapuicunatata yachajupashun? (Callari dibujota ricupangui).

JEHOVÁ DIOSCA cunan punllacunamanda parlashpaca nircami: “Shuj llactacunamanda shuj shuj rimaita rimaj chunga runacunami, Judá llactamanda runapaj jahualla churajushcapi charirishpa, cashna ninajunga: ‘Ñucanchipashmi, cangunahuan ringapaj munapanchi. Taita Diosca, cangunahuan cajtami yachapanchi’ ninajungami” nishpa (Zacarías 8:23). ‘Judá llactamanda runaca’, Jehová Dios paipa espirituhuan agllashca ungidocunatami ricuchijun. Bibliapica paicunataca mushuj Israel llacta ninbashmi (Gálatas 6:16). Cutin, ‘chunga runacunaca’ cai Alpapi para siempre causana esperanzata charij gentecunatami ricuchijun. Chai gentecunaca, ungidocuna Jehovapa ñaupajpi ali ricurishcata yachashpa, paicunahuan Jehovata sirvina shuj jatun bendición cashcata yachashpami ungidocunata catingapaj munan.

² Jesusca profeta Zacarías shinami, Jehova Diosta sirvijcunaca tucuillacunami shujllashna sirvinga nishpa yachachirca. Jahua cieloman rina esperanzata charijcunataca, Jesusca ‘ashalla llamacuna’ nircami. Cutin, cai Alpapi causana esperanzata charijcunataca ‘shuj llamagucuna’ nircami. Shinapash Jesusca nircami, tucui paicunataca ‘shujlla corraltashnami ñucalla michijusha’ nishpa (Lucas 12:32; Juan 10:16). Shinapash cashnachari tapurinchi: ¿Cunanbi causashca tucui ungidocunapa shutitachu yachana canchi? Ungidocunaca ¿imashinata cana can? Jesús Huañushcata Yarina Tandanajuipi pipash tandata micujta, vinota ufiajta ricushpaca ¿imatata rurana canchi? Ungidocunami canchi nijcuna ashtahuan mirajujta ricushpaca ¿preocuparinachu canchi? Cai chuscu tapuicunatami cai temapica yachajushun.

 3. ¿Imamandata picunalla jahua cieloman ciertopacha rina cashcataca na yachai ushanchi?

³ Ñucanchica cunanbi causajushca tucui ungidocunapa shutita yachanataca na minishtinchichu. ¿Imamandata na minishtinchi? Ñucanchica tucui ungidocuna jahuan cieloman ciertopacha rinataca na yachai ushanchi^[1] (cai tema tucuripi notata ricupangui). Ungidocunaca jahua cieloman rina esperanzata charishpapash, paicunapa tucui causaipi Jehovata ali sirvishpallami jahua cielopi causaita ushanga. Chaita yachashpami Diabloca ‘Diosmanda llullashpa villajcunata’ utilizashpa ungidocunata pandachingapaj munan (Mateo 24:24). Ñucanchicunaca maijan ungidocunalla ciertopacha jahua cieloman rina cashcataca na yachai ushanchichu. Jehovallami jahua cieloman pi rina cashcataca ricuchi ushan. Chaica shuj ungido ña huañungrijujpi, o Jatun Manllanai Llaqui punllacuna ña callarigrijujpimi pactarin (Apocalipsis 2:10; 7:3, 14).

 4. Ungidocunapa shutita na yachashpapash ¿imamandata ‘shuj llamagucuna’ nishcacunaca, ‘cangunahuanmi ringapaj munanchi’ nin?

⁴ Cunanbi causajuj ungidocunapa shutita na yachashpaca ¿imamandata ‘shuj llamagucuna’ nishcacunaca, ‘cangunahuanmi ringapaj munapanchi’ nin? Bibliapi nishca shinaca, ‘chunga runacunaca Judá llactamanda runapa jahualla churajushcapi charirishpami nin: “Ñucanchipashmi, cangunahuan ringapaj munapanchi. Taita Diosca, cangunahuan cajtami yachapanchi”’ nishpa. Chai textopica, Judá llactamanda runaca tucui ungido huauquicunatami ricuchijun. Chaita ali intindishpami shuj llamagucuna nishcacunaca, ungidocunata catijuj cuenda paicunahuan tandanajushpa Jehovata sirvinajun. Ungidocunahuan Jehovata sirvingapaca, paicunaca cada ungido ima shuti cashcata yachanataca na minishtinllu. Bibliapi nishca shinaca, tucuicunami Jesusta catina canchi (Mateo 23:10).

 5. a) ¿Ima shimicunatata ungidocunaca na cungana can? b) ¿Imamandata 1 Corintios 11:27-29​pi shimicunataca cazunapacha can?

⁵ Ungidocunaca 1 Corintios 11:27-29​pi shimicunataca na cunganachu can (cai textota liingui). Ungido cashpapash Jehovapa ñaupajpi nali cashca jahua, Jesús Huañushcata Yarina Tandanajuipi tandata micushpa, vinota ufiashpaca na respetashpami ‘juchata rurajunman’ (Hebreos 6:4-6; 10:26-29). Ungidocunaca 1 Corintios 11:27-29​pi shimicunata na cazushpaca, ‘Jesushuan shujlla tucushcamanda, jahua pachapi aliguta carajpi japigrinataca’ na chasquingachu (Filipenses 3:13-16).

 6. Ungidocunaca ¿imashinata cana can?

⁶ Apóstol Pabloca ungidocunataca nircami: “Cangunataca, Dios agllashca cajpimi, pai munashcashna aliguta causana capanguichi” nishpa. Chaita pactachingapaca ¿imatata rurana can? Apóstol Pabloca nircami: “Na jariyashpa, ali shunguhuan caishujhuan chaishujhuan na ñapash fiñarishpami, juyarishpa aliguta causana canguichi” nishpa. Ashtahuanbash nircami: ‘Casilla aliguta causashpa shujllashnalla causangapami’ esforzarina canguichi nishpa (Efesios 4:1-3). Espíritu santoca humilde cachunmi ayudan (Colosenses 3:12). Chaimandami ungidocunaca na nin: “Ñucami shujcunatapash ashtahuan yali cani. Ñucami shujcunatapash yali espíritu santota charini” nishpa. Shinallata, ñucami shujcunatapash ashtahuan ali Bibliata intindini nishpaca na jariyanllu. Ashtahuanbash, ungidocunaca pipash ungidomi cani yarin nijpica, tandata micuna, vinota ufianami cangui nishpa na ninllu. Ungidocunaca jahua cieloman picuna rinata Jehovalla agllana cashcatami crin.

7, 8. a) Ungido huauquicunaca ¿imacunatata na ruran? b) ¿Imamandata chaicunata na ruran?

⁷ Jahua cielopi causangapaj rina cashcata ali yachashpapash, ungidocunaca shujcuna paicunata ninanda alicachishpa tratachunga na shuyanllu (Efesios 1:18, 19; Filipenses 2:2, 3, liingui). Paicunaca Jehová paicunata agllashcata na tucui gentecuna yachashcataca alimi yachan. Chaimandami, ciertopachachu ungido cangui nishpa pipash tapujpica na manllarin. Bibliapi nishca shinaca, ungidomi cani nijpi, gentecuna na ñapash crinataca alimi yachan (Apocalipsis 2:2). Ashtahuanbash, ungidocunaca shuj huauquita o shuj panita rijsishcandica, ungidomi cani nishpaca na villajunllu. Paicunaca na munanllu, ungido cashcamandalla shujcuna ninanda alicachichun. Chaimandami, huaquinbicarin ungido cashcataca villaitallapash na villan. Ashtahuanbash, ñucaca jahua cielopi caita o chaita ruragrini nishpaca na parlanllu (1 Corintios 1:28, 29; 1 Corintios 4:6-8, liingui).

⁸ Ungido huauquicunaca, ungidopuralla agllarishpami tandanajuna canchi nishpaca na pensarinllu. Shinallata, ungidopuralla parlanata, Bibliata yachajunataca na mascanllu (Gálatas 1:15-17). Ungidopuralla tandanajushpaca, tucui huauquipanicunapura shujllashna Jehovata sirvichunga na ayudanmanllu. Ashtahuanbash, espíritu santo munashcashna tucuicunapura tranquilo, shujllashna tandanajushpa causanajushcataca na ricuchijunmanllu (Romanos 16:17, 18, liingui).

 9. ¿Imamandata ungido huauquicunataca na yapata alicachina canchi? (“Juyaita charishpaca, na imatapash pinganayaita ruranllu” nishca recuadrota ricupangui).

⁹ Jesusca paipa catijcunataca nircami: ‘Cangunaca tucuillami huauquicuna canguichi’ nishpa. Chai jipaca nircami: “Jatun tucushpa purijtaca, yangapimi churanga. Ashtahuangarin na jariyashpa purijca, jatunyachi tucungami” nishpa (Mateo 23:8-12). Chaimandami, ungido cajpipash na yapata alicachina canchi. Bibliapica anciano huauquicunapa fe imashina cashcata ricushpa, paicunapa ejemplota catichunmi animan. Shinapash, shuj gentetara catichunga na ninllu (Hebreos 13:7). Bibliapica ninmi, huaquingunataca ‘ashtahuan alicachi tucunami’ can nishpa. ¿Imamandata shina nin? Huaquingunaca na ungidocuna cashpapash villachingapaj, yachachingapami ninanda esforzarin. Chai ruraicunamandami alicachina canchi (1 Timoteo 5:17). Ungido cashcamandalla yapata alicachijpica, ungidocunaca pingaipimi quedanga o huaquinbicarin jariyangami (Romanos 12:3). Chaimandami, ungido huauquicuna ama juchapi urmachun ñucanchipash esforzarina canchi (Lucas 17:2).

10. Ungidocunata respetashcata ¿ricuchingapaca imatata rurana capanchi?

¹⁰ Jahua cieloman richun Jehová agllashca huauquicunata respetashcata ricuchingapaca ¿imatata rurana canchi? Ñucanchica na tapujunachu canchi, imashinata ungido cashcataca yachai chayarcangui nishpa. Chaitaca paillami yachan, ñucanchica imatapash na ricunata charinchichu (1 Tesalonicenses 4:11; 1 Pedro 4:15). Shinallata, ungidocunapa huarmita o familiacunataca, cangunapash ungidocunachu cangui nishpaca na tapuchijunachu canchi. Ungido cana bendiciondaca na pimanbash herenciata cuenda saqui usharinllu (1 Tesalonicenses 2:12). Ashtahuanbash, quiquinba cusa jahua cieloman rijpi, quiquinlla cai Alpapi quedanata yachashpaca, imashinata sintiripangui nishpaca na tapuchijunachu canchi. Paraisopi cajpica tucui ñucanchi minishtishcata Jehová cunatami crinchi (Salmo 145:16).

11. ¿Imamandata discípulo Judaspa consejotaca yaria causana capanchi?

¹¹ Ungido o na ungido cajpipash tucui huauquipanicunata igual tratanaca, ñucanchipash ali cachunmi ayudan. ¿Imamandata shina ninchi? Bibliapi nishca shinaca, ‘huaquingunaca crij huauquicunashnalla’ tucushpami, ñucapash ungidomi cani nishpa ñucanchita umachi ushan (Gálatas 2:4, 5; 1 Juan 2:19). Ashtahuanbash, huaquin ungido huauquicunaca Jehovata sirvinata saqui ushanmi (Mateo 25:10-12; 2 Pedro 2:20, 21). Discípulo Judasca nircami: “Imatapash aliguta japingapajllami, pitapash cushi cushi rimanajun” nishpa. ¿Imatata ningapaj munarca? Pitapash ungido cashcamandalla o ashtaca huauquipanicunapa rijsi cashcamandalla, o Jehovata ashtaca huatacunata sirvijushcamandalla yapata alicachijunaca na alichu can. Chaimandami, discípulo Judaspa consejotaca yaria causana canchi. Shinami, Jehovamanda maijan huauqui caruyajpipash, ñucanchicunaca Jehovapi feta charishpa paita sirvishpa catishun (Judas 16).

12, 13. Jesús Huañushcata Yarina Tandanajuipi tandata micujcuna, vinota ufiajcuna ashtahuan mirajujta ricushpaca ¿preocuparinachu capanchi?

¹² Ashtaca huatacunatami Jesús Huañushcata Yarina Tandanajuipi tandata micujcuna, vinota ufiajcunaca ashallacuna carca. Shinapash, cai tucurimui punllacunapica ashtahuanmi mirajushca. Chaita ricushpaca ¿preocuparinachu canchi? Na. Chaita intindingapaca chuscu yuyaicunata ricupashun.

¹³ “Jehová Diosca paipa agllashcacunataca rijsinmi” (2 Timoteo 2:19, NM). Jehová Diosca pi ungido cashcata o na ungido cashcataca alimi yachan. Shinapash, Jesús Huañushcata Yarina Tandanajuipi picuna tandata micujta, vinota ufiajta cuentaj huauquicunaca, pi ciertopacha ungido cashcataca na yachanllu. Chaimandami, ungidomi cani yarin nij huauquicunapash cuentashca can. Huaquingunaca tauca huatacunata tandata micushpa, vinota ufiashpapash jipamanga saquinmi. Cutin shujcunaca, paicunapa yuyaipi na sano caimanda o nali sintirijuimandami ungidomi cani nishpa cri callarin. Imashinami ricunchi, cunanbi mashna ungidocuna tiashcataca na cabal yachai usharinllu.

14. Jatun Manllanai Llaqui punllacuna callarijpi, mashna ungidocuna cai Alpapi causajunamandaca ¿imatata Bibliapica nin?

¹⁴ Jahua cieloman apangapaj Jesús shamujpica, ungidocunaca shuj shuj llactacunapimi canga. Bibliapica Jesusca ninmi: “Ñuca angelcunatami, trompetata ninanda tocachun cachamusha. Paicunami, ñuca agllashcacunataca cai pacha tucuri chuscundi ladomanda tandachimunga” nishpa (Mateo 24:31). Shinallata Bibliapica ninmi, cai tucurimui punllacunapica ashalla ungidocunami cai Alpapica tianga nishpa (Apocalipsis 12:17). Shinapash, Jatun Manllanai Llaqui punllacuna callarijpi mashna ungidocuna cai Alpapi causajunataca na imatapash ninllu.

15, 16. Ungidocunamandaca ¿ima ishcai yuyaicunatata intindina capanchi?

¹⁵ Ungidocunata ima hora agllanataca Jehovallami yachan (Romanos 8:28-30). Jehová Diosca Jesús causarishca jipami, huaquin ungidocunataca agllai callarirca. Apostolcunapa punllacunapica Jesusta tucui catijcunami ungidocuna cashcanga. Chai jipa huatacunamanga, ashtaca gentecunami Jesusta ali catijcunami canchi ninajurca. Shinapash, ashacunallami Jesustaca ali catinajurca. Chai huatacunapipashmi Jehová Diosca paipa espirituhuan ungidocunata agllarca. Jesús nishca shinaca, chai ungido huauquicunaca ashtaca nali jihua chaupipi trigo viñashcashnami carca (Mateo 13:24-30). Jehová Diosca cai tucurimui punllacunapipashmi, 144 milpurapi cachun ungidocunata agllashpa catijushca^[2] (cai tema tucuripi notata ricupangui). Tucuri punlla chayamungapaj ashalla faltajujpi Jehová huaquin ungidocunata agllajpipash, ñucanchica paipi confiashpami catina canchi (Isaías 45:9; Daniel 4:35; Romanos 9:11, 16, liingui)^[3] (cai tema tucuripi notata ricupangui). Ñucanchica shuj chimbapuraipi Jesús parlashca trabajadorcuna cuendaca na canachu canchi. Chai trabajadorcunaca, punlla tucurijujpi trabajangapaj shamujcunata amo ali tratajta ricushpaca, amota nalicachishpami rimai callarirca (Mateo 20:8-15, liingui).

¹⁶ Na tucui ungidocunachu ‘aliguta cazushpa aliguta yarishpa sirvij’ esclavopura can (Mateo 24:45-47). Jehovapash, Jesuspash apostolcunapa punllacunapishnami, cunanbipash ashtacacunaman micunata caranshna Bibliamanda yachachingapaca, huaquin ungidocunata utilizan. Apostolcunapa punllacunapica, huaquin ungidocunallami Escrituras Griegas Cristianas nishca librocunata escribirca. Cunanbipash, huaquin ungidocunallami ‘micuna horas chayajpi, micunaguta caranshna’ Jehovata sirvijcunamanga yachachishpa catin.

17. ¿Imatata yachajupashcanchi?

¹⁷ ¿Imatata yachajushcanchi? Jehová munashca shinami cai Alpapica ashtacacuna causanga. Cutin huaquingunaca, jahua cielomanda Jesushuan mandangapami ringa. Imashinami ricunchi, ‘chunga runacunapura’ cajpipash, ‘Judá llactamanda runapura’ cajpipash Jehová Diosca paipa tucui sirvijcunatami bendician. Chaimandami, Jehová Diosca tucuicunallata paipa leycunata cazuchun, tucui shunguhuan paita sirvichun munan. Ashtahuanbash, tucuicunallatami humildecuna cana can, Jehovatalla sirvina can, congregacionbi shujllashna ali cangapaj esforzarina can. Tucuri punlla chayamungacamanga, Jehovata sirvishpa ‘shujlla corralshna’ Jesusta catishunchi.