Taita Diosca siempremi juyanga

1, 2. Quiquinga ¿imamandata Jehová Diosta juyapangui?

¿QUIQUINGA Taita Diosta juyapanguichu? Juyashpami quiquinba causaitaca paiman mingapariangui. Tal vez yuyapanguimi, paimi ñucapa ashtahuan ali amigo can nishpa. Shinapash, paita nara juyajpillatami paica ña quiquinda juyarca. Bibliapica ninmi: ‘Diosra ñucanchita juyajpimi, ñucanchipash paitaca juyanchi’ nishpa (1 Juan 4:19).

² Taita Diosca ñucanchita juyaimandami, shuj juyailla Alpaguta carashca. Shinallata, cushilla causachunmi ñucanchi imata minishtishcacunatapash carashca (Mateo 5:43-48; Apocalipsis [Revelación] 4:11). Paita rijsichun, paipa amigo cachunmi munan. Bibliata liishpami Jehová Diosta uyanajunchi. Mañajpimi paipash ñucanchita uyajun (Salmo 65:2). Shinallata, ali ñanda catichun, shinlli tucuchunmi paipa espíritu santota cun (Lucas 11:13). Ashtahuangarin juchamanda, huañuimanda quishpichingapami paipa juyashca Churita cai Alpaman cachamurca (Juan 3:16; Romanos 5:8, liipangui).

 3. Taita Dioshuan ali amigo cashpa catingapaca ¿imatata rurana capanchi?

³ Shuj ali amigoca siempremi llaquipipash, cushijuipipash cumbajun. Imashinami ali amigocunahuan ali llevarishpa catingapaca esforzarina capanchi, shinallatami Jehovahuan ali amigo cashpa catingapaca esforzarina capanchi. Paimi ñucanchipa ashtahuan ali amigo can. Paihuanga para siempremi ali amigo caita ushapanchi. Chaimi Bibliapica nin: “Taita Diospaj juyaitaca, na cunganachu canguichi” nishpa (Judas 21). Chaipaca ¿imatata rurana capanchi? Bibliapica ninmi: ‘Taita Diospa mandashcacunata pactachishpa causanajushpallami, paita juyanajushcataca yachanchi. Paipa mandashcacunaca pactachi ushanallami’ can nishpa (1 Juan 5:3).

4, 5. Quiquinga ¿imamandata Jehovata juyai callariparcangui?

⁴ Apóstol Juanga ñucanchicuna Taita Diosta juyashcatami escribirca. Shinaca ¿imamandata Jehová Diosta juyai callariparcangui? Yaripashun.

⁵ Shuj paraíso Alpagupi para siempre causanata yachajushpaca ¿imashinata sintiriparcangui? Quiquin chaipi causachun imatalla rurashcata yachajushpa, paipa Churita cai Alpaman cachamushcata intindishpaca ¿imashinata sintiriparcangui? (Mateo 20:28; Juan 8:29; Romanos 5:12, 18). ¿Nachu ninanda juyajta cuenta japishpa, quiquinbash paita juyai callariparcangui? (1 Juan 4:9, 10, liipangui).

 6. a) Pitapash juyashpaca ¿imatata rurapashcanchi? b) Jehovata juyaimandaca ¿imatata rurapashcangui?

⁶ Juyaita sintinaca, callarillami can. Pitapash juyashpaca, “juyanimi” nishpallaca na quedanchichu. Chaipa randica, pai cushilla cachunmi, pai gushtashca cosascunata rurapanchi. Quiquinbash Jehovata juyaimandami, pai alicachishca cosascunata rurashpa causangapaj munapashcangui. Jehovata ashtahuan juyashpami, candallami para siempre sirvisha nishpa tal vez paiman mingarishpa bautizaripariangui (1 Corintios 6:20; 1 Pedro 4:2, liipangui). Shinaca, Jehovaman imata nishcata pactachingapaca ¿imatata rurana capangui?

 7. a) Jehovata juyaimandaca ¿imatata rurana capanchi? b) ¿Imacunatallata Jehová Diosca na ruranachu canguichi nishpa mandashca?

⁷ Jehovata juyashcata ricuchingapaca, paipa mandashcacunata ‘pactachina’ o cazunami capanchi. Bibliapimi Jehová Diosca mandashca na machanachu, na shuhuanachu, na llullanachu canguichi nishpa. Shinallata mandashcami, nara cazarashpaca na pihuanbash puñunachu canguichi, ñucapa randica na imacunatapash o pitapash adoranachu canguichi nishpa (1 Corintios 5:11; 6:18; 10:14; Efesios 4:28; Colosenses 3:9).

8, 9. Na tucuipa shuj ley tiajpipash ¿imashinata Jehovapa munaita pactachijushcataca seguro caita ushapanchi? Shuj ejemplota churapai.

⁸ Jehová Diosca huaquin cosascunata mandashpapash, na tucuipachu imatapash mandashca o shuj leyta churashca. Shinaca, Jehová Dios alicachishca decisiongunata agllangapaca ¿imatata rurana capanchi? (Proverbios 2:1-5). Bibliapica, Jehová Dios imata pensajta intindingapami, Jehovapa yachachishcacunataca ashtaca textocunapi tari ushapanchi. Bibliata liishpami, Jehová Dios imashina cajta, imata alicachijta, imata millanayachijta, imata pensajtapash intindi ushapanchi (Salmo 97:10, liipangui; Proverbios 6:16-19; nota 1​ta ricupangui).

⁹ Shuj ejemplota ricupashun. Televisionbi o Internetpi imata ricunataca ¿imashinata agllapanchi? Jehová Diosca na tucuipachu shuj leyta cushca. Shinapash, ali decisiongunata agllachunmi pai imata pensashcataca tauca textocunapi intindichijun. Ashtaca peliculacunapi, programacunapica shujcunata yahuarsapa macajta, huañuchijta, jarihuan huarmihuan mapayanajujcunatami ricuchin. Bibliapica ninmi, ‘ninandapacha llaquichingapajlla munaj runataca, tucui shunguhuanmi’ Jehová Diosca ‘millanayachin’ nishpa. Shinallata ninmi, ‘huainayashpa causajcunataca Taita Diosmi ninanda llaquichinga’ nishpa (Salmo 11:5; Hebreos 13:4). Chai textocunapi intindichishca shinaca, ali decisiongunata agllangapaca Jehová millanayachishca cosascunamandami caruyana capashcanchi.

10, 11. ¿Imamandata Jehová Diosta cazunchi?

¹⁰ Na cazujpica llaquichihuangami yashpa, o nali decisiongunata agllashpaca ¿ñucallatami llaqui apasha yashpallachu Jehová Diosta cazunchi? Na (Gálatas 6:7). Jehovata juyaimandami cazunchi. Imashinami huahuacunaca, taitacuna cushijuchun cazun, shinallatami ñucanchipash Jehová Dios cushijuchun cazunchi. Paipa ñaupajpi ali ricurishpami ñucanchipash ninanda cushijunchi (Salmo 5:12; Proverbios 12:2; nota 2​ta ricupangui).

¹¹ Jehová Diostaca ¿cazuna cashcamandalla, o fácil cajpillachu cazunchi? Na, shinlli cajpipashmi cazunchi. Shinallata ima leycunatalla cazunatapash na agllanajunchichu (Deuteronomio 12:32). Chaipa randica tucuipimi cazunchi. Salmo librota escribij runagushnami, Jehovapa ‘mandashcacunapi cushijunchi. Chai mandashcacunatami juyanchi’ (Salmo 119:47; Romanos 6:17). Noeshnami Jehovata tucuipi cazungapaj munapanchi. Bibliapica ninmi, Noeca ‘Taita Dios mandashcashnami tucuita rurarca’ nishpa (Génesis 6:22). ¿Nachu quiquindapash alicachishpa Jehová Dios shina nichun munapanguiman?

12. Jehová Dios cushijuchunga ¿imatata rurana capanchi?

¹² Cazujpimi Jehová Diosca ninanda cushijun (Proverbios 11:20; 27:11). Cazushpami Tucuita Ruraj Jehová Diosta cushichita ushapanchi. Shinapash, paita cazuchunga nunca na obliganllu. Chaipa randica, ñucanchillata ima ali cajta, ima nali cajta agllashpa cazuchunmi munan. Paita juyaimanda ali decisiongunata agllashpa, ñucanchillata ali causachunmi munan (Deuteronomio 30:15, 16, 19, 20; nota 3​ta ricupangui).

13, 14. ¿Imamandata Jehovapa mandashcacuna pactachinalla cashcataca seguro capanchi? Shuj ejemplota churapai.

¹³ ¿Pensanachu capanchi, Jehovapa mandashcacunaca shinllimi can, libre cachunga na saquinllu nishpa? Bibliapica ninmi: ‘Paipa mandashcacunaca pactachi ushanallami’ can nishpa (1 Juan 5:3). Shinaca, Jehová Diospa mandashcacunata pactachinaca na shinllichu can.

¹⁴ Shuj ejemplota ricupashun. Quiquinba amigoca, shuj ladopi causangapaj rijuimanda, paipa cosasgucunataca cajacunapi churashpa apajushcanman. Huaquin cajacunaca fangallagumi can. Cutin shuj cajacunaca ishcaipura apai ushanacuna, llashajmi can. ¿Quiquinba amigoca chai llashaj cajacunata apapai ninmanllu? Na. Quiquin ama llaqui apachunga, quiquin ushashcagutallami apapai ninman. Jehovapash chai ali amigoshnami can. Ñucanchi rurai ushashcagutallami rurachun mandan (Deuteronomio 30:11-14). Jehová Diosca ‘ñucanchicuna imashina cajtaca rijsinmi, ñutu alpa cajtapash yarinmi’ (Salmo 103:14).

15. Jehovapa mandashcacuna ñucanchipallata ali cashcataca ¿imamandata seguro capanchi?

¹⁵ Moisesca israelitacunataca nircami, Jehovapa mandashcacunaca siempremi cangunapa alipallata can, cazushpaca causashpa catinguichimi nishpa (Deuteronomio 5:28-33; 6:24). Cunanbipashmi Jehovapa mandashcacunaca ñucanchipa alipallata can (Isaías 48:17, liipangui). Jehová Diosca siempremi ñucanchipa ima ashtahuan ali cajta yachan (Romanos 11:33). Bibliapica ninmi: “Taita Diosca, ninandapacha juyajmi” can nishpa (1 Juan 4:8). Shinaca, ñucanchita juyaimandami imatapash nishpa yachachin, o imatapash mandan.

16. Diablo mandajuj mundopi causashpapash, juchayucuna cashpapash ¿imamandata Jehová Diosta cazuita ushapanchi?

¹⁶ Jehová Diosta cazunaca huaquinbica shinllimi can. Cai mundotaca Diablo mandajuimandami, gentecunamanga nali cosascunata yachachin (1 Juan 5:19). Juchayucuna caimandami, juchapi ama urmangapaca nali pensamientocunahuan, nali munaicunahuan shuj macanajuipishna causapanchi (Romanos 7:21-25). Shinapash Jehovata juyaimandami alita rurangapaj esforzarinchi. Cazungapaj esforzarijujta ricushpami, Jehová Diosca paipa espíritu santota cushpa ayudan (1 Samuel 15:22, 23; Hechos 5:32). Jehovapa espíritu santo ayudajpimi, imagupipash mejorashpa paita cazui ushapanchi (Gálatas 5:22, 23).

17, 18. a) ¿Imatata cai libropica yachajupashun? b) ¿Imatata shamuj capitulopica yachajupashun?

¹⁷ Cai libropica Jehová munashcashna causanata, paipa yachachishcacunata pactachinata, limpio causaita charinatami yachajupashun. Siempremi yarina capanchi, Jehová Diosca paita cazuchunga na obliganllu. Paita cazunata agllashpaca, cunanbillatami ashtahuan cushilla causashun, shamuj punllacunapipash ali causaitami charishun. Ashtahuangarin, Jehovata juyashcatami ricuchishun (nota 4​ta ricupangui).

¹⁸ Ima ali cajta ima nali cajta yachachunmi Jehová Diosca concienciata cushca. Ali concienciata charishpaca, Jehovata cazui ushashunmi. Shamuj capitulopimi conciencia ima cajta, ali concienciata charingapaj imata rurana cashcata ricupashun.