¿Tucui nalita ruraicunamandaca culquichu culpata charin?

Bibliapica culqui nali cajtaca na ninllu. Shinallata tucui nalita ruraicunamandaca culquica na culpata charinllu. “Culquimandami ima nalitapash ruranchi” nishca yuyaica, Blibliamandami can yashpami gentecunaca yuyan. Shinapash Bibliapica chaitaca na yachachinllu. Ashtahuangarin cashnami nin: “Culquita juyashpa causanami, imatapash nalitalla ruranataca sapishna callarichin” (1 Timoteo 6:10).a

• Culquimandaca Bibliapica ¿imatata yachachin?

• Culquita juyanaca ¿imamandata nali can?

• Culquimanda Bibliapi imata nijta cazunami ali can

• Culquimandaca Bibliapimi consejocunata cun

Bibliapica culquita aliguta utilizanata yachashpaca, ñucanchitallatami ayudaita ushan ninmi. Shinallata ñucanchi minishtirishcacunata charingapapashmi ayudan (Eclesiastés 7:12). Shinallata culquita charijcuna, imagutapash caranata yachajcunamandaca Bibliapica alimi parlan (Proverbios 11:25).

Bibliapica yachachinmi, ñucanchi causaipica culquitaraca na pundapi churana cashcata. Hebreos 13:5​pica: “Culquita charinatalla munashpaca na causanachu canguichi, chaipa randica imaguta charishpapash, chaihuanlla cushijushpami causana causanguichi” ninmi. Caimandaca ¿imatata yachajunchi? Culquita ministishpapash, culqui ñucanchi causaipi ashtahuan importante cachunga na saquinachu canchi. Maipi causanaguta, micunaguta, ropaguta charishpallatami cushilla causaita ushapanchi (1 Timoteo 6:8).

Culquita charinapilla yuyashpa causaj gentecunaca, para siempre causaitaca na japingachu (Efesios 5:5). Callaripica, culquita yapata munanaca, yanga dioscunata adorajunshnami can (Colosenses 3:5). Catipica, paicuna munashcata chariyangapaj munaimandami Taita Diospa mandashcacunatapashmi na cazun. Proverbios 28:20​pica “ucha chariyangapaj munaj runaca, llaquichi tucungapachami” ninmi. Culquita ashtahuan charingapaj munaimandami, imatapash nishpa llullana, pitapash secuestrana o pitapash huañuchina tentacionbi urmaita ushan.

Ima nalita na rurashpapash, culquita juyashpaca shuj llaquicunapipashmi urmaita ushanchi. Bibliapica cashna nishpami advirtin: “Chariyangapaj munajcunaca, imatapash nalita yarichijuj nali munaicuna urmachingapaj shamujpimi, lazupishna urmashpa imatapash nalitara ruranajun. Shinamandami shinlli shungu tucushpa, gentecunataca ninanda llaquichin” (1 Timoteo 6:9).

Culquimandalla imatapash nalita na rurashpaca Taita Diospa mandashcacunatami respetashun, shujcunapa ñaupajpipashmi ali ricurishun. Shinallata Taita Diosca ñucanchimandaca ninandami cushijunga. Taita Diosta cazungapaj esforzarijpica, Taita Diosca: “Candaca na jichushachu, na saquishachu” ninmi (Hebreos 13:5, 6). Tucuita aliguta rurajpica, Taita Diosca ninandami bendiciasha nin (Proverbios 28:20).