Jehová Diospa “ali cumbagumi carca”

1, 2. a) ¿Imashinata yachanchi, ñucanchicunapash Jehovapa ali cumbagu tucuita ushashcata? b) ¿Imatata cai temapica yachajupashun?

GENTECUNACA nacirishca punllamanda huañungacamanmi juyaita minishtinchi. Pipash ñucanchihuan ali cumbagu tucushpa ñucanchita juyachunmi minishtinchi. Shinapash Jehová Dios ñucanchita juyachunmi ashtahuanbachaca minishtinchi. Ashtaca gentecunaca Taita Diosta na ricui ushashpa, Taita Diosca ashtaca podertami charin nishpami, Taita Diospaman quimirishpa paipa ali cumbagu tucunataca na crin. Shinapash Taita Diospa ali cumbagu caitaca ushanchimi.

² Taita Diospa ali cumbagu tucuita ushashcataca ¿imashinata yachanchi? Bibliapica Taita Diospa ali cumbagucunamandami parlan. Chai gentecunapi pensarishpa, paicunapa ejemplota catishpami Taita Diospa ali cumbagu tucuitaca ushashun. Chaimandami cai temapica Abrahanba ejemplomanda yachajushun (Santiago 2:23, liingui). Abrahanga feta charimandami Taita Diospa ali cumbagu carca. Chaimandami Bibliapica nin, Abrahanga ‘tucui crijcunapa [o feta charijcunapa] taitami tucurca’ nishpa (Romanos 4:11). Cai temata yachajujushpaca tapuripashunchi: “Abrahanshna shinlli feta charingapaj, Jehovapa ali cumbagu cangapaca ¿imatata rurana cani?” nishpa.

3, 4. a) ¿Ima horata Abrahanga shinlli feta charishcata ricuchirca? b) Shinlli feta charimandaca ¿imatata Abrahanga seguro carca?

³ Abrahanbi pensaripashun. Paica 125 huatacunata charishpami shuj cuchillotapash, ninata japichingapaj cosascunatapash apashpa shuj urcuta asha asha vichai rijurca^[1] (cai tema tucuripi notata ricupangui). Abrahanba huashataca paipa churi Isaacmi yandata apashpa catijurca. Isaacca casi 25 huatacunatallami charirca. Abrahanga ña mayorllagu cashpapash shinllilla caimandami urcumanga vichai rircalla. Shinapash Jehová mandashca shina paipa churita huañuchinaca shinllipachami cashcanga (Génesis 22:1-8).

⁴ Abrahanga Jehová Diosta cazushpami shinlli feta charishcata ricuchirca. Huaquin gentecunaca ninmi, Diosca nali caimandami Abrahandaca paipa churita huañuchichun cachashcanga nishpa. Cutin shujcunaca ninmi, Abrahanga paipa churita na juyaimandami Taita Diostaca cazushcanga nishpa. Shina nij gentecunaca feta na charimanda, fe ima cajta na yachaimandami shina nin (1 Corintios 2:14-16). Shinapash Abrahanga ali yuyashpa, shinlli feta charimandami Jehová Diostaca cazurca. Paipa alipallata Jehová Dios mandajushcataca Abrahanga alimi yacharca. Cazujpi paitapash, paipa churitapash Jehová Dios bendicianataca seguromi carca. Abrahanga Jehová Diosta rijsishpa, paipa causaipi ima pasashcata ricushpami shinlli feta charirca. Shinapash ¿imashinata Abrahanga Jehovata rijsi usharca? ¿Ima cosascunata paipa causaipica pasarca?

 5. a) Abrahanga ¿imashinashi Jehová Diostaca rijsirca? b) Jehová Diosta rijsishpaca ¿imatata Abrahanga rurarca?

⁵ ¿Imashinata Jehovataca rijsirca? Abrahanga Ur nishca llactapimi nacirirca. Chaipi gentecunapash, Abrahanba taitapash yanga dioscunatami adoran carca (Josué 24:2). Shinaca ¿imashinata Abrahanga Jehová Diosta rijsirca? Bibliapica yachachinmi, Abrahanga Noepa churi Sem shutipa familiami carca nishpa. Semga Abrahán casi 150 huatacunata charijpimi huañurca. Semga shinlli fetami charirca. Paimi paipa familiamanga Jehovamanda parlashcanga. Shinaca Sem yachachijpimi Abrahanga Jehovata rijsishpa, juyashpa, shinlli feta charirca.

6, 7. Paipa feta shinlliyachingapaca ¿imatata Abrahanga rurarca?

⁶ Abrahanba causaipica ¿imallata pasarca? Huaquin gentecunaca ninmi, pitapash ali rijsishca jipami juyanchi, juyashpami imatapash ruranchi nishpa. Abrahanbash ‘jahua pachapi causajuj Mandaj Taita Diosta’ ali rijsishpami tucui shunguhuan respetarca (Génesis 14:22). Tucui shunguhuan respetaimandami Abrahanga, Jehová nalicachishca cosascunata rurashpa paita llaquichinataca manllarca. Shina manllaimandami Jehovataca siempre cazurca (Hebreos 5:7). Ñucanchicunapash Jehová Diospa ali cumbagucuna cangapaj munashpaca tucui shunguhuanmi paitaca respetana canchi (Salmo 25:14).

⁷ Jehová Diosmi Abrahanda, Sarataca Ur llactamanda llujshishpa na rijsishca llactapi causangapaj richun mandarca. Paicunaca ñana joven carcachu. Shinapash paicunapa tucuilla causaipimi carpa huasicunapi causana carca. Chaicunapi ashtaca peligrocuna tianata yachashpapash Jehovata cazungapami esforzarirca. Chaimandami Jehová Diosca Abrahanda bendiciarca cuidarcapash. ¿Imashinata cuidarca? Bibliapica ninmi, Saraca juyaillagu caimandami ishcai viajetaca casi apai tucurca nishpa. Chai ishcai viajepimi Abrahanga casi huañuita tarirca. Shinapash Jehová Diosca shuj milagrota rurashpami ama imapash pasachun Abrahandapash Saratapash cuidarca (Génesis 12:10-20; 20:2-7, 10-12, 17, 18). Paipa causaipi Jehová imashina cuidashcata ricushpami Abrahanga shinlli feta charirca.

 8. ¿Imashinata Jehová Diosmanda yachajushpa, ñucanchi causaipi imashina cuidajujta ricushpapash paipa ali cumbagucuna tucuita ushapanchi?

⁸ Ñucanchicunapash Jehovapa ali cumbagucuna cangapaca Abrahanshnami Jehovata ali rijsina canchi. Paita ali rijsingapaca paimanda yachajuna, pai ñucanchi causaipi imashina cuidajujtapash ricunami canchi. Abrahanga na Bibliata charircachu. Shinapash ñucanchica ñami Biblia enterota charinchi (Daniel 12:4; Romanos 11:33). Bibliapi yachachishcacunami ‘jahua pachapi Taita Diosta’ rijsichun, juyachun, tucui shunguhuan respetashpa cazuchun ayudan. Shinami ñucanchicunapash Jehová Dios ñucanchi causaipi imashina cuidashcata ricushpa ñucanchi feta shinlliyachishun, cushijushpa, tranquilo Jehová Diostaca tucui shunguhuan sirvishun (Salmo 34:8; Proverbios 10:22). Jehová Diosmanda ashtahuan yachajushpa, ñucanchi causaipi cuidajujta sintishpami Jehovapa ashtahuan ali cumbagucuna tucushun.

9, 10. a) Ali cumbagucuna cashpa catingapaca ¿imatata rurana capanchi? b) Jehovapa ali cumbagu cashpa catingapaca ¿imatata Abrahanga rurarca?

⁹ Ali cumbagucunaca alipachami can (Proverbios 17:17, liingui). Ali cumbagu canaca pircapi huarcushpalla saquina valishca cuadroshnaca na canllu. Chaipa randica shuj plantaguta cuendami cuidashpa viñachina can. Chaimandami Abrahanga Jehová Dioshuan ali cumbagu canataca ninanda alicachishpa cuidariarca. Shinapash ¿imashinata cuidariarca?

¹⁰ Abrahanga siempremi Jehová Diosta cazurca, respetarcapash. Shuj ejemplota ricupashun. Jehová ri nishca llactaman Abrahán paipa familiandi, paipa sirvijcunandi rijushpaca, uchilla decisiongunata, jatun decisiongunata agllana cashpapash siempremi Jehová Diospa ayudata mascarca. Isaac naciringapaj shuj huata faltajpica, Jehová Diosca Abrahandaca mandarcami, paipa familiapi, paipa sirvijcunapurapi jaricunata circuncisión nishcata rurachun (“¿Imatata nisha nin?” nishca recuadrota ricupangui). Chai punllacunapi 99 huatacunata Abrahán charishpapash ¿imatata rurarca? Jehovataca tapujurcachu ¿imamandata shina mandahuangui nishpa? ¿Na cazungapaj munashpa imatapash nij tucujurcachu? Na. Ashtahuangarin Jehovapi confiashpami “chai punllallata” Jehovapa mandashcata pactachirca (Génesis 17:10-14, 23).

11. a) ¿Imamamandata Abrahanga llaquirijurca? b) ¿Imashinata Jehová Diosca Abrahanda ayudarca?

¹¹ Abrahanga Jehová Dioshuan ali cumbagu caimandami Jehovapi confiashpa tucuita paiman parlan carca. Na intindishca cosascunamandapashmi parlanlla carca. Shuj ejemplota ricupashun. Shuj punllaca Jehová Diosca nircami Sodoma, Gomorra llactacunatami tucuchigrini nishpa. Shina nijpimi Abrahanga, ali gentecunatapash, nali gentecunatashna igualmi tucuchigrin nishpa llaquirirca. Abrahanga Sodoma llactapi paipa sobrino Lot, paipa familiahuan chaipi causanajujpimi pinarishpa llaquirijushcanga. Shinapash Abrahanga, Jehová Dios ‘tucui cai pachapi causajcunapa’ ali Juez cashcata confiashpami respetohuan tucui imata pinarijushcata paiman villarca. Shina rurajpimi Jehová Diosca na ñapash fiñarishpa Abrahanmanga intindichirca, nalicunata tucuchishpapash alicunata salvashpa llaquij Dios cashcata (Génesis 18:22-33).

12, 13. a) ¿Imashinata Abrahandaca Jehovamanda yachajunapash, paipa causaipi Jehová imashina cuidashcata yarinapashmi Jehovapa mandashcata pactachichun ayudarca? b) ¿Imamandata yachanchi, Abrahanga Jehovapi feta charishcata?

¹² Abrahandaca Jehovamanda yachajuna, paipa causaipi Jehová imashina cuidajujta yarinami Jehovapa ali cumbagu cashpa catichun ayudarca. Shinallata, Jehová Dios na ñapash fiñarij, llaquij, ali Dios cashcataca Abrahanga seguromi carca. Chaimandami canba churi Isaacta huañuchishpa ñucaman carahuai nijpica, Jehovapa mandashcata pactachingapaj munarca. Shinapash ¿imamandata Abrahanga Jehová Dios siempre ali cashcataca seguro carca?

¹³ Ricupashun. Isaachuan urcuman nara vichai rishpaca Abrahanga paipa sirvijcunataca nircami: ‘Cangunaca burrohuan caipi shuyaichilla. Ñucahuan huambraguhuanga, Diosta chaipi ninanda alicachishpa tigramushunllami’ nishpa (Génesis 22:5). ¿Imamandata Abrahanga tigramushunllami nirca? ¿Llullashpallachu shina nijurca? Na. Abrahanga ña rucullagu cajpi shuj huahuaguta charichun Jehová ayudashcataca yariami carca. Chaimandami chai punllapi ima pasanata nali yachashpapash, Abrahanga Jehová Dios Tucuita Rurai Ushaj cashcata crishpa Isaacta causachinataca seguro carca (Hebreos 11:11, 12, 18, 19, liingui). Shina rurashcamandami Bibliapica Abrahandaca nin: ‘Tucui crijcunapa [o feta charijcunapa] taitami tucurca’ nishpa.

14. a) Jehovata huaquin sirvijcunaca ¿ima llaquicunatata charin? b) ¿Imashinata Abrahanba ejemploca ñucanchita ayudan?

¹⁴ Cunanbica Isaacta cuenda huahuacunata paiman carachunga, Jehová Diosca na munanllu, paita cazuchunmi munan. Huaquinbica Jehová imata rurachun mandashcata na intindishpa, o chaita pactachinaca shinllimi can yashpami na cazungapaj munanchi. Huaquingunaca yapata pinganayachimandami na rijsishca gentecunaman villachinataca manllan. Cutin shujcunaca manllaimandami colegiopi o trabajopi cumbacunamanda shican cashcata ricuchingapaca na munan (Éxodo 23:2; 1 Tesalonicenses 2:2). Shina sintirinajushpaca ¿imatata rurashun? Shina sintirinajushpaca Abrahán shinlli feta charishcata, Abrahán na manllashcatami yarina capanchi. Jehovata ali sirvijcunapa ejemplopi pensaringapaj tiempota llujchishpaca paicunapa ali ejemplota catishpami Jehovapa ali cumbagu cashpa catishun (Hebreos 12:1, 2).

15. Abrahanga ¿Jehovata cazushcata arripintirircachu? Imamandata shina nipangui.

¹⁵ Abrahanga ¿Jehovata cazushcataca arripintirircachu? Na. Paica huañungacamanmi Jehovata ali sirvishpa causarca (Génesis 25:8). Abrahanga 175 huatacunata charishpaca ñami rucullagupacha carca. Shinapash paipa tucuilla causaipi Jehovapa ali cumbagu cashcata yarishpa, shamuj punllacunapi ali causai tianapi pensarishpami cushilla huañurca.

16. Paraisopi cashpaca ¿imamandata Abrahanga ashtacata cushijunga?

¹⁶ Bibliapica ninmi, Abrahanga ‘shinllitapacha churashca pueblopi causagrinatami shuyajurca. Chai pueblotaca, Taita Diosllata aligutapacha callarichishca, shinllita huasichishcami’ carca nishpa (Hebreos 11:10). Chai “puebloca” Diospa Reinotami ricuchijurca. Abrahanga chai “pueblo” tucuilla gentecunata mandanataca seguromi carca. Shinaca pensaripai, paraíso Alpagupi cashpa, Jehovapa ashtahuan ali cumbagu tucushpaca ashtacatami Abrahanga cushijunga. Paipa ejemplota catishpa shujcunapash Jehovata ali sirvinajushcata yachashpaca cushijungami. Shinallata, chaipimi Abrahanga paipa churi Isaacta urcuman apashpa, shamuj punllacunapi ima pasanata ricuchijushcata yachanga (Hebreos 11:19). Ashtahuangarin Jesús huañujpi Jehová Dios llaquilla sintirishcata intindichun, paipa ejemplohuan ashtaca gentecunata ayudashcatami Abrahanga yachanga (Juan 3:16). Abrahanba ejemplomi ñucanchitaca ayudashca, gentecunata ninanda juyaimanda paipa Churita Jehová cai Alpaman cachamushcata intindishpa agradicichun.

17. a) ¿Pipa ejemplota catingapajta esforzarina capanchi? b) Shamuj temapica ¿imatata yachajupashun?

¹⁷ Shinaca Abrahanshna shinlli feta charingapaj esforzaripashunchi. Jehovamanda yachajunata, ñucanchi causaipi imashina ayudajushcata yaria causapashunchi. Jehovamanda yachajushpa, cazushpallami Jehová imashina bendiciajta, cuidajtaca ricushun (Hebreos 6:10-12, liingui). Shina rurajpimi Jehová Diospash ñucanchipa ali cumbagu cashpa catinga. Chaimandami shamuj temapica Jehovapa quimsa ali cumbagucunapa ejemplota yachajupashun.