Diospa Gobiernoca ¿imata can?

Bibliapica Diospa Gobiernomandami ashtahuanbachaca parlan. Cai Gobiernohuanmi Jehová Diosca cai alpapi paipa munaita pactachinga. Pero Diospa Gobiernoca ¿imata can? Cunanbi ña mandajushcataca ¿imashinata yachapanchi? Cunangamanga ¿imatata rurashca? Y shamuj punllacunapica ¿imatashi ruranga? Cai tapuicunataca cai leccionbi y cati ishcai lecciongunapipashmi contestapashun.

1. Diospa Gobiernoca ¿imata can? Chai Gobiernopica ¿pishi mandajun?

Diospa Gobiernotaca Jehovallatami churarca. Y chai Gobiernopi mandachunga Jesustami agllarca. Paica ñami cielomanda mandajun (Mateo 4:17; Juan 18:36). Bibliapica Jesusca “para siempre mandanga” ninmi (Lucas 1:​32, 33). Jesusca Diospa Gobiernopa rey cashcamandami tucui gentecunata mandanga.

2. Jesushuanga ¿picunata mandanajun?

Jesusca na paillachu mandajun. Paihuanga “shuj shuj idiomacunata parlajcunamanda, shuj shuj pueblocunamanda, shuj shuj llactacunamanda” gentecunami mandanga (Apocalipsis 5:​9, 10). Pero ¿mashna gentecunata Jesushuanga mandanga? Jesús cai alpapi causajushca tiempomanda cunangamanga, ashtaca millón gentecunami paipa catijcuna tucunata decidishca. Shinami cristianocuna tucushca. Pero Jesushuanga solo 144 mil gentecunallami jahua cielopi mandanga (Apocalipsis 14:​1-4, liipangui). Y resto gentecunaca cai alpapi Taita Diospa Gobierno mandajujpimi para siempre causanga (Salmo 37:29).

3. ¿Imamandata Jehovapa Gobiernoca gentecunapa gobiernocunata yali ali can?

Cai alpapi gobiernocunaca gentecunata ayudangapaj munaita charishpapash chaita pactachitaca na ushashcachu. Y tiempohuanga paicunapa jipaca shujcunami ña mandangapaj yaicun. Pero chai mushuj presidentecunaca gentecunamandaca talvez na preocuparingachu. Cutin Jehovapa Gobiernopica, Jesusca para siempremi mandanga. Paitaca na cambiangachu. Porque “Taita Diosca, ima horapash na tucuchi tucuna” Gobiernotami churashca (Daniel 2:​44). Jesusca pitapash na agllashpa tucuicunata igualmi mandanga. Paica juyaj, ali trataj, justomi can. Y gentecunamanbashmi chaitallata yachachinga (Isaías 11:​9, liipangui).

4. Ashtaca poderta charij Gobiernomi cai alpapica mandanga

Jesusca cai alpapi gobiernocunata yali podertami charin. Mateo 28:18​ta liishpa, cai tapuita contestapangui:

• ¿Imamandata Jesusca cai alpapi gobiernocunata yali ashtahuan autoridadta charin?

Cai alpapi gobiernocunaca shujlla llactata mandana autoridadtami charin. Shinallata paicuna mandana tiempoca tucurinmi. Pero Diospa Gobiernohuanga ¿lo mismochu pasanga? Daniel 7:​14​ta liishpa, cai tapuicunata contestapangui:

• Jehovapa Gobierno na tucuchi tucuna cashcamandaca ¿ima bendiciongunatata charishun?

• Jehovapa Gobierno mundo enterota mandajpica ¿imashinata beneficiarishun?

5. Gentecunapa gobiernocunaca tucuchi tucunami can

¿Imamandata Taita Diospa Gobierno gentecunapa randi mandachun minishtinchi? VIDEOTA ricushpa, cai tapuita contestapangui:

VIDEO: Taita Diospa Reinoca ¿imata can? (uchilla video) (1:​41)

• Cai alpapi gentecunapa gobiernocuna mandajushcamandaca ¿ima llaquicunallata tiashca?

Eclesiastés 8:9​ta liishpa, cai tapuita contestapangui:

• ¿Gentecunapa gobiernocunapa randi Taita Diospa Gobierno mandana cashcataca cripanguichu? ¿Imamandata shina pensapangui?

6. Jehovapa Gobiernopi mandajcunaca ñucanchitaca ali alimi intindin

Jesucristo cai alpapi causashca cashcamandami ‘ñucanchicuna pandarijlla cashcataca intindinmi’ (Hebreos 4:​15). Jehová Diosca 144 mil gentecunatami Jesushuan mandachun agllashca. Paicunaca, “shuj shuj idiomacunata parlajcunamanda, shuj shuj pueblocunamanda, shuj shuj llactacunamanda” gentecunami can (Apocalipsis 5:​9).

• Jesuspash, paihuan mandajcunapash gentecunapa causaita ali rijsishcata yachashpaca ¿imashinata sintiripangui?

7. Jehovapa Gobiernopi tiashca leycunami gentecunapa leycunata yali ali can

Cai alpapi gobiernocunaca gentecunata ayudangapaj o cuidangapaj nishpami tauca leycunata churashca. Jehová Diospa Gobiernopipashmi tauca leycuna tian. Y chai leycunataca tucuicunami cumplina canchi. 1 Corintios 6:9​manda 11​caman liishpa, cai tapuicunata contestapangui:

• Tucuilla gentecuna Diospa mandashcacunata ña pactachijpica ¿imashinashi causashun?a

• Taita Diosca paita sirvijcuna paipa mandashcacunata cazuchunmi munan. Chaita cazunaca ¿imashpata alicanman?

• Jehovapa mandashcacunata na cazuj gentecunapash cambiai ushashcataca ¿imashinata yachapanchi? (Versículo 11​ta ricupangui).

YARINGAPAJ

Diospa Gobiernoca ciertopachami tian. Chai Gobiernoca jahua cielomandami tucui gentecunata mandanga.

¿Imatata yachajupashcanchi?

• Taita Diospa Gobiernopica ¿picunallata mandanga?

• Taita Diospa Gobierno ¿imashpata gentecunapa gobiernocunata yali ashtahuan ali can?

• Jehová Diosca paipa Gobiernopi causajcuna ¿imashina causachunda munan?

CAITAPASH RICUPAI

Diospa Gobierno maipi cagrijushcamanda Jesús imata yachachishcata ricupai.

“Diospa Gobiernoca ¿ñucanchi shungu ucupichu can?” (jw.org paginapi ricupangui)

Testigo de Jehovacunaca cai alpapi gobiernocunata apoyanapa randica ¿imamandata Diospa Gobiernotalla apoyangapaj esforzarinchi?

Taita Diospa Reinotallami apoyanchi (1:43)

Jehová Dios agllashca 144 mil gentecunamanda Bibliapi ima nijta ricupai.

“¿Picunata cielomanga rin?” (jw.org paginapi ricupangui)

Carcelpi caj shuj señoraguta Taita Diospa Gobiernolla tucui llaquicunata tucuchina cashcata imapacha convencishcata ricupai.

“Tucuicunata igual tratachun Taita Dios imata ruragrijushcatami yachajurcani” (Rijcharipaichi revista, noviembre de 2011)