‘Canba cumba runagutaca juyanami’ cangui

1, 2. a) Leypa cati mandashcamanda parlashpaca ¿imatata Jesusca nirca? b) Cai temapica ¿maijan tapuicunatata yachajugripanchi?

MAIJAN mandashcata ashtahuan yali nishpa shuj fariseo tapujpimi Jesusca nirca: ‘Canba Taita Diostaca, tucui shunguhuan, tucui almahuan, tucui yuyaihuan juyangui’ nishpa. Taita Diosta imashina tucui shunguhuan, tucui almahuan, tucui yuyaihuan juyanataca punda temapimi yachajurcanchi. Cai shimicunata nishca jipapash Jesusca nircami: ‘Cati mandashca shimipash nijunmi: “Canba cumba runagutaca imashina can juyarinshnallata juyangui”’ nishpa (Mat. 22:​34-39).

² Jesús nishca shinaca, imashinami ñucanchillata juyarinchi shinallatami cumba runagutapash juyana canchi. Shinapash ¿pitata Jesusca cumba runagu nirca? ¿Imashinata cumba runaguta juyashcataca ricuchishun? Cai ishcai tapuicunata yachajupashunchi.

3, 4. a) Pita ñuca cumba runagu nijpica ¿imatata Jesusca nirca? b) Samaritano runaguca ¿imashinata macai tucushca judío runagutaca ayudarca? (Callari dibujota ricupangui.)

³ Shuj runaca Jesustaca tapurcami: “¿Pita ñuca cumba runaguyari?” nishpa. Shina tapujpimi Jesusca shuj samaritano runagumanda parlashpa nirca, judío runagutami shuhuacuna japishpa casi huañujta macashpa ñanbi shitashpa saquirca nishpa (Lucas 10:​29-37, liingui). Chai runagu sirijujta ricushpaca shuj levita runapash, shuj sacerdote runapash yangata yalishpa rircallami. Shinapash samaritano runagu yalijushpaca judío runaguta ayudarcami. Chai punllacunapica samaritanocunapash judiocunapash contracunami carca (Juan 4:9).

⁴ Samaritano runaguca aceiteta, vinota churashpami judío runagutaca jambirca. Ashtahuangarin, posada huasiman apashpami, huasi cuidadormanga judío runaguta jambingapaj minishtinguimi nishpa ishcai punlla trabajashca culquita saquirca (Mat. 20:2). Cumba runagu nishpaca Jesusca tucui gentecunamandami parlajurca. Maijan llactamanda cashpa, ima costumbrecunata charishpapash cumba runagumi can nijurcami. Shinaca, samaritano runagushna ali cumbagu cangapaca tucui gentecunatami juyana, llaquina canchi.

 5. Shuj jatun llaqui tiajpica ¿imashinata testigo de Jehovacunaca tucui gentecunata juyashcata ricuchirca?

⁵ Cai ‘tucuri punllacunapi’ gentecunaca millai millai, nalicunami can. Shuj gentecunapica na preocuparinllu (2 Tim. 3:​1-3). Shuj ejemplota ricupashun. Huata 2012, octubre quillapica Sandy nishca shuj jatun acapanami Nueva York llactata yalirca. Shuj pushtuca gaspash illa, michapash illa, yacupash illami quedarca. Shina llaqui apanajujpipash huaquin gentecunaca huasicunaman yaicushpami shuhuanajurca. Shinapash testigo de Jehovacunapa organizacionga tucui Testigocunata shuj gentecunatapash ayudanajurcami. Testigo de Jehovacunaca tucui gentecunata juyaimandami ayudanajurca. Shinapash tucui gentecunata juyaimandaca ¿imacunatapashta rurana canchi?

 6. ¿Imamandata ali villaicunata villachishpaca tucui gentecunata juyashcata ricuchinchi?

⁶ Bibliahuan ayudashunchi. Villachishpami gentecunataca Diospa Shimihuan cushichinajunchi (Rom. 15:​4, NM). Bibliapa ali villaicunata villachishpami gentecunata juyashcata ricuchinchi (Mat. 24:14). Taita Diosca ali causaitami caranga nishpa villanaca shuj jatun privilegiomi can (Rom. 15:13).

 7. a) Jesusca ¿imatata mandarca? b) Jesús mandashcata cazushpaca ¿imashinata causashun?

⁷ Jesús mandashcashnami gentecunataca ali tratana canchi. Jesusca nircami: ‘Shuj gentecuna imatapash aliguta cangunaman rurachun munashpaca, chashnallatami cangunapash shujcunaman aliguta rurana canguichi. Mandashca shimipipash, Diospa [profetacuna] villashca shimipipash, chashnallatami mandajun’ nishpa (Mat. 7:12). Jesús mandashcashna gentecunata ali tratashpaca Mandashca shimipi nijushcacunata, Diospa profetacuna villachishca shimicunatami cazunajunchi. Mandashca shimi nishpaca Génesis, Éxodo, Levítico, Números, Deuteronomio librocunamandami parlajun. Cutin profetacuna villachishca shimicuna nishpaca Escrituras Hebreaspi profeciacunata villajun librocunamandami parlajun. Jehová Diosca ñucanchita juyashpa, ñucanchicunapash shuj gentecunata juyachunmi chai librocunataca curca. Profeta Isaiastaca Jehová Diosca nircami: ‘Pimanbash alita ruraj runaca ninandami cushijun’ nishpa (Is. 56:​1, 2). Shinaca, tucui gentecunata juyashpa, ali tratashpaca cushillami sintirishun.

 8. a) ¿Imamandata contracunatapash juyana capanchi? b) Contracunatapash juyaihuan tratajpica ¿imata pasan?

⁸ Contracunatapash juyanami canchi. Jesusca nircami: ‘Canba cumba runagutaca juyangui, ashtahuangarin canda na ricunayachij runataca fiñangui nishcataca uyarcanguichimi. Ashtahuangarin ñucami, cangunataca cashna nini: Cangunata fiñajcunatapash, juyanami canguichi.’ Cangunata catishpa llaquichij gentecunamandapash, Diosta mañanami canguichi. Chashna causashpami, jahua pachapi Taitapa huahuacunapacha canguichi’ nishpa (Mat. 5:​43-45). Apóstol Pablopash nircami: ‘Canda fiñaj runa yarjaihuan cajpica, micunaguta caranguilla. Yacunayaihuan cajpipash yacuta caranguilla’ nishpa (Rom. 12:20; Prov. 25:21). Israelitacunaman cushca Leypica nijurcami, contrapa animal llaquipi cajpica ayudanami canguichi nishpa (Éx. 23:5). Shinami contracuna cashpapash ali tucuita ushan carca. Cunan punllacunapipash contracunata o catiriashpa llaquichijcunata juyashpa ali tratajpica paicunapashmi ashata cambiashpa huaquinbicarin testigo de Jehovacuna tucun.

 9. Ñucanchi huauquipanicunahuanbash aliguta causachunga ¿imatata Jesusca nirca?

⁹ ‘Tucuicunahuan aliguta causaichi.’ (Heb. 12:14.) Tucuicunahuan aliguta causana cashpaca ñucanchi huauquipanicunahuanbashmi aliguta causana canchi. Jesusca nircami: ‘Taita Diosman imagutapash carangapaj, altarman ña chayajushpa, canba huauqui canda fiñashpa purijushcata yarishpaca, carangapaj apamushcataca altar ñaupajpi saquishpa, canba cumbahuanra ali tucungapaj ringui. Chai jipami Diosman carangapaj apamushcataca’ caranalla cangui nishpa (Mat. 5:​23, 24). Shuj huauquihuan imapash problemata charishcandi arreglangapaj esforzarijpimi Jehová Diosca bendicianga.

10. ¿Imamandata na shujcunataca nalicachishpa rimajuna capanchi?

¹⁰ Na shujcunataca nalicachishpa rimajunachu canchi. Jesusca nircami: ‘Pitapash na yangamanda juchachinachu canguichi. Shujcunata imashnami nalicachinguichi, chashnallatami cangunatapash Diosca llaquichinga. Shujcunata imata rurajpipash, chashnallatami cangunamanbash Diosca tigrachinga. Canba huauquipa ñavipi uchilla jupashna tiajujtara ricungapaj randica ¿imashpata na canba ñavipi caspishna tiajujtara ricungui? Canba ñavipi shuj jatun caspishna tiajujtara nara anchuchishpaca ¿imashinata canba huauquitaca: ‘Shuyai, canba ñavipi uchilla jupashna tiajujta anchuchisha’ nitaca ushanguiyari? Mishqui shimi jayaj shungumi cangui. Canba ñavipi jatun caspishna tiajujtara anchuchiyari. Chai jipami, canba huauquipa ñavipi uchilla jupashna tiajujtaca ali ricushpa, anchuchi ushangui’ (Mat. 7:​1-5). Shinaca ñucanchicunallata ninanda pandarinajushpaca ¿ima ñavihuanda shujcunapa uchilla pandarishcacunatara nalicachishpa rimajuna canchi?

11, 12. ¿Imashinata gentecunata ciertopacha juyashcataca ricuchinchi?

¹¹ Jesusca yachachircami, ali villaicunata villashpami gentecunata juyashcata ricuchingui nishpa (Luc. 8:1). Paipa catijcunataca mandarcami: ‘Ñucapa yachajujcuna tucuchunmi gentecunapaman rishpa, villana canguichi’ nishpa (Mat. 28:​19, 20). Jesusta cazushpami gentecunataca huañuiman apaj ancho ñanmanda caruyachishpa causaiman apaj quichiji ñanbi purichun ayudanchi (Mat. 7:​13, 14). Gentecunaman yachachingapaj esforzarijujta ricushpaca Jehová Diosca bendiciangami.

¹² Jesuspa ejemplota catishpami gentecunataca Jehová Diosmanda yachajuna munaita charichun ayudanchi (Mat. 5:3). Gentecuna yachajungapaj munajpica ‘ali villaicunata’ intindichishpami Taita Diosmanda yachachinchi (Rom. 1:1). Ali villaicunata chasquij gentecunaca Jesús paipa causaita cushcamandami Taita Dioshuan ali tucuita ushan (2 Cor. 5:​18, 19). Shinaca, ali villaicunata villachishpami tucui gentecunata ciertopacha juyashcata ricuchinchi.

13. Ali villaicunata villachinamandaca ¿imatata pensapashcangui?

¹³ Gentecunata cutin visitangapaj o Bibliamanda yachachingapaj aliguta prepararishpami gentecunataca Taita Diospa mandashcacunata pactachichun ayudanchi. Huaquingunaca jatun cambiocunatami rurana can (1 Cor. 6:​9-11). Ali shungu gentecunataca Jehová Diosmi paipaman quimirishpa, cambiashpa paipa ñaupajpi ali ricurichun ayudan (Hech. 13:​48, NM). Shinami, huaquingunaca llaquicunahuan na ushanajushpapash cushilla causai callarishca. Jehová Diospi ashtahuan ashtahuan confiashpami llaquicunata huashaman saquishpa ñaupaman catin. Imashinami ricunchi, gentecunaman ali villaicunata intindichinaca shuj jatun bendicionmi can.

14. Juyaimanda parlashpaca ¿imatata apóstol Pabloca 1 Corintios 13:​4-8​pica nirca?

¹⁴ Apóstol Pabloca imashina juyanatami Bibliapica escribirca. Apóstol Pablo yachachishca shina, tucui gentecunata juyashpaca Jehová Diospa ñaupajpica alimi ricurishun, ashtaca llaquicunamandapash caruyashunmi, cushilla causaitapash ushashunmi (1 Corintios 13:​4-8, liingui). Shinaca apóstol Pablopa shimicunata asha asha yachajushpa chai shimicunata imashina pactachinata ricupashun.

15. a) ¿Imamandata llaquita apashpa shujcunataca llaquina capanchi? b) ¿Imamandata enviadiajuna, jariyajunaca nali can?

¹⁵ ‘Juyaita charishpaca llaquita apanllami, shujcunatapash llaquinmi.’ Jehová Diosca gentecuna juchayu cajpipash tucuicunatami llaquishpa ricun. Na ñapash culiranllu. Shinaca shujcuna pandarijpi o imatapash nishpa ñucanchita llaquichijpica ¿nachu Jehová Diospa ejemplota catishpa paicunataca llaquina cashcanchi? ‘Juyaita charishpaca shujcuna imata charijtapash, ñucapa cashcanman yashpaca na ricunllu.’ Ñucanchi huauquipanicunata ciertopacha juyashpaca paicunapa charishca cosascunata o congregacionbi responsabilidadcunataca na envidiashpa ricujunachu canchi. Ciertopacha juyashpaca, na imacunamandapash jariyashpa parlajunachu canchi. Bibliapica ninmi: ‘Jariyashpa ricujunatapash, shungupi ninanda jariyajunatapash’ Taita Diosca na ricunayachinllu nishpa (Prov. 21:4).

16, 17. ¿Imashinata 1 Corintios 13:​5, 6​pi shimicunataca pactachinchi?

¹⁶ ‘Juyaita charishpaca na imapash pinganaicunata ruranllu.’ Shujcunata ciertopacha juyashpaca na llullashunllu, na shuhuashunllu. Jehovapa ñaupajpi nali ricurishca cosascunatapash na rurashunllu. Juyaimandami ñucanchimanda preocuparishpapash shujcunamandapash preocuparishun (Filip. 2:4).

¹⁷ Juyaita charishpaca ‘na ñapash fiñarinllu, na fiñashcalla causangapaj munanllu’. Juyaita charishpaca na ñapash culiranachu canchi. Mashna viajeta llaquichishcatapash na yaria causanachu canchi (1 Tes. 5:15). Llaquichishcata yaria causashpaca Jehová Diosta cushichitaca na ushashunllu. Ashtahuangarin ñucanchi shungupash huaglijpimi ñucanchillata nali sintirishpa shujcunatapash llaquichishun (Lev. 19:18). Llaquichishcata yaria causanapa randica perdonashpami cungana canchi. Ashtahuangarin, ñucanchita llaquichijcuna llaquipi cajpica na cushijunchichu (Proverbios 24:​17, 18, liingui).

18. Juyaimanda parlashpaca ¿imatata 1 Corintios 13:​7, 8​pica yachachin?

¹⁸ Apóstol Pabloca nircapashmi juyashpaca ‘tucui llaquita apanllami [aguantanllami]’ nishpa. Pipash llaquichishca jipa disculpahuai nijpica juyaimandami perdonanchi. Ashtahuangarin juyashpaca ‘tucuita crinllami’. Tucuita crishpami Bibliapi yachachishcata Jehovapa organizacionba yachachishcacunatapash ninanda agradicishpa chasquinchi. Juyashpaca ‘tucuitami shuyan’. Juyaimandami Jehová Diospa nishcacunaca pactaringami nishpa shuyanajunchi. Gentecunata juyaimandaca ali causai tianatapashmi villachinchi (1 Ped. 3:15). Ashtahuangarin, llaquicunapi cashpaca Jehová Diosta mañashpami pai ayudanata shuyanajunchi. Juyashpaca ‘imata rurajpipash saquinllami’. Chaimandami shujcuna catiriashpa llaquichijpipash aguantanchi. ‘Juyaica ima horapash na tucurinllu.’ Jehová Diosta sirvijcunaca mashna huatacuna yalijpipash shujcunata juyashpa catishunllami.

19, 20. ¿Maijan textocunapita shuj gentecunatapash juyashpa catina cashcata ricuchijun?

¹⁹ Bibliapi mandashcata cazushpaca shuj gentecunataca juyai ushashunmi (Mat. 22:39). Jehová Diospash Jesuspash munanmi maijan llactamanda cajpi, ima costumbrecunata charijpipash tucui gentecunata juyachun. Shujcunata na juyai ushashpaca Jehovata mañashunchi espíritu santota carahuai nishpa. Paica cushijushpami shujcunata juyana munaita charichun ayudanga (Rom. 8:​26, 27).

²⁰ Discípulo Santiago nishca shinaca, shujcunata juyanaca minishtirishcapachami can (Sant. 2:8). Israelitacunaman Leyta cushpami Jehová Diosca shuj gentecunata juyanami canguichi nishpa mandarca. Jipa huatacunamanga apóstol Pablopash nircami: ‘Maijan mandashca shimicunapipash, “canllata juyarinshnallatami cumba runagutapash juyana cangui” nijunmi. Juyaita charishpaca cumba runagutaca, ima nalitapash na ruranllu. Juyashpami mandashca shimita pactachijun’ nishpa (Rom. 13:​8-10). Shinaca shujcunata juyashpa catishunchi.

21, 22. ¿Imamandata Jehová Diostapash, shuj gentecunatapash juyana capanchi?

²¹ Shuj gentecunata juyana cashcata ashtahuan ali intindichunmi Jesusca nirca, Taita Diosllatami ‘inditaca nali causajcunamanbash, ali causajcunamanbash punllayachijun. Paillatami tamiatapash tamiachimujun’ nishpa (Mat. 5:​43-45). Imashinami ricunchi, tucui gentecunatami juyana canchi. Ashtahuanbachaca ali villaicunata villachishpami paicunata juyashcataca ricuchina canchi. Uyashpa chasquishpaca Diosman quimirita ushangami. ¿Nachu gentecunata chashna ayudanaca shuj jatun bendición can?

²² Imashinami ricupashcanchi, Jehová Diostaca tucui shunguhuan, tucui almahuan, tucui yuyaihuanmi juyana canchi. Tucui gentecunata juyashcatapash ricuchinami canchi. Shinaca, Jehová Diostapash shuj gentecunatapash juyashpami Jesusta cazunajunchi. Ashtahuangarin, shina rurashpami ñucanchi Taita Jehová Diosta cushichishun.