LLAMBU SHUNGU CANACA minishtirishcami can

Saraa shuti paniguca ninmi: “Ñucaca shujcunahuan parlanataca ninandami manllani. Chaimi culirashpa imatapash shinllita nijlla gentecunahuan parlanataca na gushtani. Pero llambu shungu, humildecunahuan canataca gushtanimi. Paicunahuan cashpaca ñuca imashina sintirijushcata, ima problemacunata charishcatapash tucuitami villani. Ñucapa amigocunaca llambu shungu, humildecunami can”.

Panigu Sara nishcashnami llambu shungu cajpica shuj gentecunapash ñucanchipa amigo cangapaj munan. Jehová Diosca llambu shungu cachunmi munan. Bibliapica ninmi: ‘Llambu shungu cangapaj mushujta churajunshna’ causapaichi nishpa (Col. 3:12, NM ). Shinapash llambu shungu canaca ¿imata can? Jesusca ¿imashinata llambu shungu cashcata ricuchirca? Llambu shungu canaca ¿imashinata cushilla causachun ayudan?

Llambu shungu gentecunaca shungu ucupi alimi sintirin. Shujcunatapash respetohuan, llaquishpami tratan. Shinallata ima problemacunata charishpapash na yapata preocuparinllu.

Griego shimipi “llambu shungu” nishpaca shuj millai caballota mansoyachina cashcatami ningapaj munan. Caballo mansoyashca cashpapash, fuerza illaj cashcataca na ningapaj munanllu. Shina cuendami llambu shungu gentecunaca nimapa na sirvij gente cashcataca na ningapaj munanllu. Ashtahuangarin llambu shungu caimandami shujcunataca ali tratan. Tucuicunahuanbash ali llevarin.

Juchayucuna caimandami llambu shunguta charitaca na ushanichu nishpa pensarinchi. Culirashpa imatapash shinllita nijlla gentecunapurapimi causanchi. Chaimandami llambu shunguta charinaca difícil can (Rom. 7:19). Llambu shunguta charingapaj esforzarinami canchi. Chaipaca Jehová Diosmi paipa espíritu santohuan llambu shunguta charichun ayudanga (Gál. 5:22, 23). ¿Imamandata llambu shunguta charingapaj esforzarina capanchi?

Llambu shunguta charijcunahuanmi cangapaj munapanchi. Callari parrafopi parlashca Sara panigushnami tucuicunallata llambu shunguta charijcunahuan cangapaj munapanchi. Jesusca llambu shungutami charirca. Shujcunatapash llaquishpami tratan carca (2 Cor. 10:1). Chaimi huahuacunapash Jesushuan cangapaj munan carca (Mar. 10:13-16).

Llambu shunguta charinaca ñucanchita, shujcunatapashmi ayudan. Llambu shunguta charishpaca na ñapash culirashunllu (Prov. 16:32). Ñucanchi juyashca familiacunata o amigocunatapash imacunatapash nishpaca na llaquichishunllu. Ñucanchicunapash alimi sintirishun. Llambu shunguta charinaca tucuicunatallatami ayudan. Llambu shunguta charishpaca ñucanchi familiacunata, amigocunataca siempremi ali tratashun.

Jesusca ocupado, ashtaca ruranacunata charishpapash llambu shungumi carca. Ashtaca gentecunaca paicuna charishca problemacunahuanga ñana ushanshnami causan carca. Chaimi paicunataca Jesuspa cai shimicuna ninanda animashcanga. Jesusca nircami: “Ñucapajman tucuilla shamuichi [...] Ñucallami, na ñapash fiñarij, jariyanata na yarij shunguta charini” nishpa (Mat. 11:28, 29).

¿Imashinata Jesushna llambu shungu caita ushapanchi? Primero, Bibliatami liina capanchi. Bibliapimi Jesús gentecunata imashina trataj cashcata, llaquicunata charishpapash imata ruraj cashcata yachajushun. Segundo, ima problemacunata, llaquicunata charishpapash Jesushnallatami llambu shungu cangapaj esforzarina capanchi (1 Ped. 2:21). ¿Imata Jesustaca llambu shungu cashpa catichun ayudarca? Chaipaca 3 yuyaicunata yachajupashunchi.

Jesusca humildemi carca. Paica nircami: “Ñucallami, na ñapash fiñarij, jariyanata na yarij shunguta charini” nishpa (Mat. 11:29). Bibliapica llambu shungu cashpaca humildepashmi can ninmi (Efes. 4:1-3). ¿Imamandata shina nipanchi?

Humilde cashpaca ñucanchipillaca na pensarishunllu. Shinallata imagumandapash na ñapash resintirishunllu. Jesusta “yapata micuj runami, vinotapash ufiaj runami” can nijujpica ¿imatata Jesusca rurarca? Jesusca paipa ruraicunahuanmi chai shimicunaca llulla cashcata ricuchirca. Chaimi paica nirca: “Diospaj ali yachaitaca, tucui paipaj huahuacunallami, imatapash cashcatapacha rurashpa ricuchinajun” nishpa (Mat. 11:19).

Pipash ñucanchimanda nalicachishpa rimajujpica llambu shunguta charimandami paicunataca ali tratashun. Sudáfrica llactamanda Peter shuti anciano huauquica ninmi: “Pipash nalita nishpa nali sintichihuajpica, Jesusca imatashi ruranman carca nishpami pensarini. Shinallata ñucapilla ama yapata pensaringapami esforzarini” nishpa.

Gentecuna juchayucuna cajtaca Jesusca alimi intindirca. Jesuspa catijcunaca alitami rurangapaj munan carca. Shinapash juchayucuna caimandami huaquinbica nalitara ruran carca. Por ejemplo, Jesús huañuna tutapica Pedro, Santiago, Juanbash Jesustaca na animarcachu. Chaimi Jesusca nirca: “Cangunapaj espirituca, Diosta mañangapaj munanmi. Ashtahuangarin cangunapaj cuerpomi shaijunlla” nishpa (Mat. 26:40, 41). Paipa catijcuna juchayucuna cajtaca alimi intindirca. Chaimi paicunahuanga na culirarca.

Cunanga Mandy panigumanda yachajupashunchi. Mandy panigu nara Testigo cashpaca tucuicuna imatapash ali rurachunmi munan carca. Shinapash cunanbica Jesushnami llambu shungu cangapaj esforzarin. Paica ninmi: “Tucuicunallata juchayucuna cashcata yaringapami esforzarini. Shinallata shujcunata Jehová Dioshna ricungapami esforzarini” nishpa. Mandy paniguca Jesushna llambu shunguta charimandami shujcunapa pandarishcataca na ricurca. Ñucanchicunapashmi llambu shunguta charishpaca shujcunataca ali tratai ushashun.

Jesusca Jehová Dios ayudanapimi confiarca. Jesús cai Alpapi cajpica gentecunaca paitaca nalimi tratarca, yangamandami juchachirca. Llaquichitapash ninandami llaquichirca. Shina tratajpipash Jesusca siempremi llambu shungu cashpa, ‘imatapash cashcatapacha ruraj Diosman, tucuita mingarca’ (1 Ped. 2:23). Jesusca alimi yacharca Jehová Dios paita cuidajujta. Shinallata ima llaquitapash Jehová Diospa maquipimi saquirca.

Huaquinbica ñucanchitaca yangamandami juchachita ushan. Shina juchachijpimi talvez ninanda culirashpa imapash nalicunatara ruraita ushanchiman. Chaimandami Bibliapica cashna nin: “Pipash fiñarishpaca, imatapash cashcatapacha rurachun Taita Dios munashcatami na pactachijun” nishpa (Sant. 1:20). Juchayucuna caimandami imatapash rurajpi, imatapash nijpica culira vencijpi imatapash nalita ruranchilla o nalita ninchilla.

Alemania llactamanda Cathy paniguca paita respetachun munaimandami, imatapash shinllillata ninlla carca. Shinapash Jehová Diospi ashtahuan confiaimandami paica cambiarca. Paica ninmi: “Pipash ñucata imatapash nijpica ñana shinallata tigrachinichu. Jehová Dios tucuita ricujushcata yarinami llambu shungu cachun ayudahuashca” nishpa. Pipash ñucanchita yangamanda juchachijpica Jesushnallatami Jehovapa maquipi tucuita saquina capanchi. Chaimi Jehová Diosca llambu shungu cachun ayudanga.

Jesusca nircami, llambu canami cushilla causachun ayudan nishpa. Paica nircapashmi: “Na ñapash fiñarijllacunaca, ninandami cushijun” nishpa (Mat. 5:5). Cunanga llambu shungu canaca imacunapilla ayudajta ricupashunchi.

Cusahuarmi cushilla causachunmi ayudan. Australia llactamanda Robert huauquica ninmi: “Ñuca huarmigutaca culira cashpaca yangatami imacunatapash ninlla carcani. Shina nishca jiparami paita llaquichishcata, nali sintichishcatapash cuenta japin carcani. Chaimi ñucallata ninanda nali sintirin carcani” nin.

“Tucuicunami, imatapash pandata nishpa llaquichinchilla” (Sant. 3:2). Yangata parlanaca cusahuarmipura cushilla causachunga na ayudanllu. Llambu shungu canami aliguta pensarishpara parlachun ayudan. Shinallata tranquilo, cushilla causachunbashmi ayudan (Prov. 17:27).

Huauqui Robertca tranquilo, pensarishpara parlangapami ninanda esforzarishca. Chaita rurashcamandami, cunanbica ali causan. Paica ninmi: “Cunanbi ñuca huarmiguhuan imacunamandapash culirashpaca paita ali uyangapaj, aliguman parlangapami esforzarini. Chaimi cunanbica ashtahuan ali causanchi” nin.

Shujcunahuan ali llevarichunmi ayudan. Ñapash resintirij gentecunaca amigocunataca na charinllu. Pero llambu shungu gentecunaca ‘casilla aliguta causashpami, shujllashnalla causan’ (Efes. 4:2, 3). Cathy paniguca ninbashmi: “Llambu shunguta charishcamandami tucuicunahuan ali llevarini” nishpa.

Ñucanchi shungu ucupi ali sintirichunmi ayudan. Bibliapica “jahua pachamanda shamujuj ali yachaica” llambu shunguta charichun, casilla tranquilo causachunbashmi ayudan nin (Sant. 3:13, 17). Llambu shunguta charij gentecunaca ‘cushillami’ causan (Prov. 14:30). Martin huauquiguca llambu shunguta charingapami ninanda esforzarishca. Paica ninmi: “Cunanbica na ñapash culiranichu chaimi cushilla, shungu ucupipash ali sintirini” nishpa.

Tucuicunallatami llambu shungu cangapaj esforzarina capanchi. Shuj huauquica: “Cunanbipashmi huaquinbica imacunamandapash ñapash culiranilla” nin. Shinapash Jehová Diosca llambu shungu gentecuna cachunmi munan. Chaimi paillata llambu shungu cachun yachachin. Shinallata llambu shungu cashpa catichun fuerzata cun (Is. 41:10; 1 Tim. 6:11; 1 Ped. 5:10, NM ). Apóstol Pabloca ‘Cristoshna ali shunguta charingapaj, ninanda llaquishpa’ tratangapami esforzarirca. Chaitallatami ñucanchicunapash rurana capanchi (2 Cor. 10:1).