‘Shaijushcacunamanga paimi ushaita cun’

 1. a) ¿Ima llaquicunatallata chimbapurapashcanchi? b) Jehová Diosca ¿imamandata paita sirvijcunataca alicachishpa ricujun? (Callari fotocunata ricupangui).

CAI MUNDOPICA ashtaca ashtaca llaquicunami tian. Tal vez quiquingunapashmi millai ungüicunata charipanguichi. Shuj huauquipanicunaca ña mayorlla cashpapash familia ucupi pipash mayorlla cajpimi paicunata cuidana tucushca. Cutin shujcunaca familia ucupi minishtirishca cosascunahuanlla causangapami esforzarinajun. Huaquingunaca caicunatami chimbapurashca. Chaimi tiempopash, culquipash ñana pactajpi llaquilla sintirishca. Shinapash shamuj punllacunapi Jehová Dios ali causaiguta caranapimi tucui shunguhuan crishpa ñaupaman catinajun. Jehová Diosca chai huauquipanicunataca alicachishpami ricujun.

 2. a) Isaías 40:29​ca ¿imashinata ayudan? b) Llaquicunata charishpaca ¿Jehovata sirvijcunaca imatata saquishca?

² Ashtaca problemacunata charishpaca ¿nachu huaquinbica shaijushca sintirishcangui? Ashtacacunami quiquinshnallata sintirishca. Huaquin Jehovata sirvijcunapash shinallata sintirishcatami Bibliapica parlan (1 Rey. 19:4; Job 7:7). Shina sintirishpapash ñaupaman catingapami Jehová Diospa ayudata mañashca. Jehová Diosca paicunataca ayudarcami. Chaimi Bibliapica nin: Jehová Diosca ‘shaijushcacunamanga ushaitami cujun’ nishpa (Is. 40:29). Shinapash huaquin huauquipanicunaca llaquicunata charishpami Jehovaman quimirinapa randica caruyaitara caruyashca. Chaimi Bibliata liinata, tandanajuicunaman rinata, villachinaman rinatapash saquishca. Diabloca chai cosascunata saquishpa Jehovamanda caruyachunmi munan.

 3. a) Espiritualmente shinlli cangapaca ¿imatata rurana capanchi? b) Cai temapica ¿imatata yachajupashun?

³ Jehovata sirvijcunaca Bibliata liishpa, tandanajuicunaman rishpa, villachinaman llujshishpami espiritualmente shinlli caita ushan. Chaitaca Diabloca alimi yachan. Chaicunata saquishpa espiritualmente chiriyachunmi Diabloca munan. Chaimi llaquicunata charishpa shaijushca o llaqui llaqui sintirijushpaca Jehovaman quimiringapaj esforzarina capangui. Bibliapi cai shimicunatapash yaripangui, Jehovami ‘shinlliyachishpa ushaitapash caranga’ (1 Ped. 5:10; Sant. 4:8). Huaquinbica ñucanchi munashcashna Jehovata sirvingapaj munajpipash shuj shuj jarcaicunami ricurin. Cai temapica ishcai jarcaicunamandami yachajupashun. Shinallata llaquicunata aguantachun Bibliapa consejocuna ayudajtapashmi ricupashun. Shinapash caicunata nara yachajushpallata Isaías 40:26-31​manda yachajupashun. Chai textopica Jehová Dios ñucanchita imashina ayudajtami ricuchijun.

 4. Isaías 40:26​mandaca ¿imata yachajui ushapanchi?

⁴ (Isaías 40:26, liingui). Jahua pachapi tiaj tucuilla estrellacunataca nipi na cuentai ushashcachu. Huaquin cientificocunaca ninmi, ñucanchi causajuj planeta jahuapica casi 400 mil millón estrellacunami tian nishpa. Chai tucui estrellacunatami Jehová Diosca shutipi rijsin. Caimandaca ¿imatata yachajui ushapanchi? Jehová Diosca paita sirvichunga nipita na obliganllu. Ñucanchicunaca juyaimandami Jehovataca sirvinchi. Shinaca estrellacunata shutipi rijsishpaca ¿nachu quiquinmandacarin ashtahuan preocuparinga? (Sal. 19:1, 3, 14). Jehová Diosca quiquindaca alimi rijsin. Jesuspash cashnami nirca: “Cangunapaj uma ajchatapash, tucuillata cuentashcallami” can nishpa (Mat. 10:30). Shinallata Salmo librota escribijpash cashnami nirca: ‘Ima nalitapash na rurajcunapa causaitaca Diosca rijsinmi’ nishpa (Sal. 37:18). Cai shimicunaca ricuchinmi, ñucanchicuna ima llaquicunata charijpipash Jehová Dios ali yachashcata. Chaimi Jehová Diosca chai llaquicunata aguantachun ayudanga.

 5. Llaquicunata aguantachun Jehová Dios ayudanataca ¿imamandata seguro caita ushapanchi?

⁵ (Isaías 40:28, liingui). Jehová Diosca tucui ushaita charij Diosmi can. Jehová Diosca ashtaca ushaitami Indimanga cun. David Bodanis shuti cientificoca nircami, Indipica cada segundomi imapash micha corrientecuna cuenda chocarishpa ushashcata tujyan. Shina tujyashpaca ashtaca millón bomba atómica nishcacuna tugyajuj cuendami can nishpa. Cutin shuj cientificoca nircami, ‘Indica cada segundomi ashtaca ashtaca corrienteta cun. Chai corrienteta japi ushashpaca 200 mil huatacunapami corrientetaca charinchiman’ nishpa. Shinaca Jehová Dios Indiman ushaita cushpaca ¿nachu ñucanchicunatapash llaquicunata aguantachun ayudanga?

 6. a) Jesusca ñuca yugoca fangalla nishpaca ¿imatata ningapaj munarca? b) Chaita yachashpaca ¿imashinata sintiripanchi?

⁶ (Isaías 40:29, liingui). Jehová Diosta sirvijushcamandami cushilla sintirinchi. Jesusca paipa catijcunamanga cashnami nirca: “Ñuca yachachishcataca, yugota aparinshna yachajuichi” nishpa. Caitapashmi nirca: “Ñucamandami cangunapaj almaca, samanata taringa. Ñucapaj yugoca fangallagumi, aparijpipash na llashachingachu” nishpa (Mat. 11:28-30). Huaquinbica villachinaman, tandanajuicunaman rishpaca shaijushcami sintirinchi. Shina shaijushca cashpapash ¿nachu huasiman tigrashpa fangalla, cushilla sintirishcanchi? Shinami ñucanchillata ricupanchi Jesuspa yugoca fangalla, apashpa rinalla cashcata.

 7. Mateo 11:28-30​pi shimicuna cierto cashcataca ¿imashinata yachapanchi? Shuj experienciata parlapai.

⁷ Shuj paniguca shaijushca shaijushca cana ungüita, depresión ungüita, uma nanaitapashmi charirca. Chaimi chai panigupaca tandanajuicunaman rinaca shinlli ricurin. Shinapash shuj punllaca tandanajuiman rishca jipaca cashnami escribirca: “Chai tandanajuipica desanimarishca canamandami parlarca. Discursota cuj turi juyaihuan, ali shimicunahuan cujpimi huacaitapash huacarcani. Chaimi tandanajuicunaman na faltana cashcata cuenda japircani” nishpa. Chai paniguca tandanajuicunaman ringapaj esforzarishcamandaca cushillami sintirirca.

8, 9. Apóstol Pabloca “imata na rurai ushashpapash, ashtahuanmi shinlli cani” nishpaca ¿imatata ningapaj munarca?

⁸ (Isaías 40:30, liingui). Ñucanchi imata rurai ushashpapash shujcuna ayudachunmi minishtinchi. Chaitaca tucuicunami yachajuna capanchi. Apóstol Pablopi pensaripashunchi. Paica huaquin cosascunata ali rurashpapash tucuita pactachitaca na usharcachu. Apóstol Pablo pai imashina sintirijujta villajpimi Taita Diosca cashna tigrachirca: “Imata na rurai ushaj cashpapash, ñuca ninan ushaita charijtaca, alimi ricuchijungui” nishpa. Chaimi apóstol Pabloca cashna nirca: “Imata na rurai ushashpapash, ashtahuanmi shinlli cani” nishpa (2 Cor. 12:7-10, MTQI). Apóstol Pabloca ¿imatata ningapaj munarca?

⁹ Apóstol Pabloca cuenta japircami paillaca na imatapash rurai ushashcata. Shinalla pai llaquilla cajpica Taita Diospa espiritu santo ayudatami intindirca. Ashtahuanbash paipa fuerzahuanlla imatapash na rurai ushashcata rurai ushachunmi Taita Diospa espiritu santo ayudanapi confiarca. Ñucanchipash Taita Diospa espiritu santo ayudajpica ñaupamanmi cati ushashun.

10. Rey Davidtaca ¿imashinata llaquicunata chimbapurachun Jehová Diosca ayudarca?

¹⁰ Rey Davidpashmi Taita Diospa espiritu santo ayudashcata cuenta japirca. Chaimandami cashna escribirca: “Canhuanga [o, canba ayudahuanga] ashtaca soldadocunatapash mishashallami. Ñuca Taita Dioshuanga, jatun pircacunatapash urmachishpa yalishallami” nishpa (Sal. 18:29). Huaquinbica ñucanchi llaquicunaca shuj jatun pirca cuendami can. Chaimandami chai llaquicunata ñucanchilla chimbapuraitaca na ushanchi. Chaimi Jehová Dios ayudachun minishtinchi.

11. Jehová Diospa espiritu santoca ¿imashinata problemacunata chimbapurachun ayudan?

¹¹ (Isaías 40:31, liingui). Cai textopi jatun anga nishpaca aguilamandami parlajun. Chai aguilaca paipa fuerzahuanllaca jahua jahuataca na volai ushanllu. Cunujlla huaira tiajpica unaitami volaita ushan. Shinallata na shaijushpa volachunmi chai cunujlla huairaca ayudan. Quiquinguna jatun llaquicunata charishpaca chai aguilata yaripanguichi. Shinallata llaquicunata aguantashpa catingapaca Jehová Diospa ‘espiritu santota’ mañapangui (Juan 14:26). Tutapash, punllapashmi Jehová Diospa espiritu santotaca mañai ushapangui. Shinapash ñucanchi huauquipanicunahuan imapash problemacunata charishpami ashtahuan Jehová Diosta mañana capanchi. ¿Imamandata shina problemacunata chari ushapanchi?

12, 13. a) ¿Huauquipanicunahuanga ¿imamandata problemacunata charipanchi? b) Joseta Jehová Dios na ayudashcamandaca ¿imatata yachajupanchi?

¹² Tucuicunallata juchayu caimandami huauquipanicunapura imapash problemacunata charinchi. Chaimi huaquinbica huauquipanicuna imatapash nishpa o rurashpa ñucanchita nali sintichin. Shinallatami ñucanchipash nali sintichi ushanchi. Chaica llaquipachami can. Jehová Diosca paita tucui shunguhuan sirvijushcata ricuchichunmi munan. Shinallata huauquipanicunapura na culirarishpa ali tratarichunmi munan. Ñucanchicuna juchayucuna cajpipash Jehová Diosca tucuicunatallatami juyan.

¹³ Jehová Diosca paita sirvijcunataca na tucuipi ayudanllu. Josepa causaimanda yachajupashunchi. José joven cajpica paipa huauquicunami envidiamanda Egipto llactaman rijcunaman jatushpa cacharca (Gén. 37:28). Joseca imatapash alitalla rurashpami causarca. Chaimandami Jehová Diosca paipa amigo José llaqui apajujpica ninanda llaquirishcanga. Shina llaquipi cajpipash Jehová Diosca na ayudarcachu. Shinallata, Potifarpa huarmi yangata juchachishpa carcelpi churajpipash na ayudarcachu. Shinaca ¿Jehová Diosca Josetaca cungashpachu saquirca? Na cungashcarcachu. Bibliapica ninmi: ‘Imata pai rurajpipash, Mandaj Diosca tucuipimi’ ayudarca nishpa (Gén. 39:21-23).

14. Yapata culirajpica ¿imata pasan?

¹⁴ Cunanga rey Davidmanda yachajupashunchi. Paica Taita Diospa amigomi carca. Paishnaca nipi na sufrishcarcachu. Shina sufrishpapash paica resintirishcallaca na causajurcachu. Chaimandami cashna escribirca: “Ninanda fiñarinata saquishpa, chai fiñarinataca shitai. Nalita ruranataca, ama ninanda munajuichu” nishpa (Sal. 37:8). Ama culirashcalla catingapaca Jehová Diospa ejemplotami yarinami capanchi. Jehová Diosca “ñucanchi nalita rurashcamandaca, na chashnallata llaquichishcachu” (Sal. 103:10). Ama culirangapaj esforzarinaca ñucanchi saludpallatami ali can. Yapata culirashpaca presión alta, vijsa nanai, hígado, páncreas nanaitapashmi chari ushanchi. Shinallata respiraitapashmi na ushashun. Culirashpaca imatapash yangata ninchillami. Chaimi huaquinbica llaqui llaqui sintirinchi. Bibliapica cashnami nin: “Cushilla shunguca, cuerpomambash causaita cunmi” nishpa (Prov. 14:30). Shina cashpaca ñucanchi huauquipanicuna imatapash nishpa o rurashpa nali sintichijpica ¿imatata rurana capanchi? Bibliapa mandashcacunatami ñucanchi causaipi pactachina capanchi.

15, 16. Pipash nali sintichijpica ¿imatata rurana capanchi?

¹⁵ (Efesios 4:26, liingui). Jehová Diosta na sirvijcuna ñucanchita nali tratanataca alimi yachanchi. Shinapash ñucanchi familia, huauquipanicuna nali tratajpica shungu ucupimi ninanda llaquirishpa nali sintirinchi. Imata nishcata o rurashcataca na facil cungai ushanchichu. Chaimanda cashna tapuripashunchi, ¿nali sintichishcataca siemprechu yarishpa causajuni? Na cashpaca ¿Bibliapa mandashcacunata ñucanchi causaipi pactachishpachu ñapash perdonajuni? nishpa. Imapash problemata charishpa na uchalla parlashpaca shujcunahuan ali tucunaca ashtahuan shinllimi canga.

¹⁶ Shuj huauqui o shuj pani quiquinda nali sintichishcamanda na cungai ushajushcanguiman. Chai huauquihuan o chai panihuan ali tucungapaca ¿imata ayudanga? Pundapica caita rurapangui, chai huauquihuan ali parlangapaj ayudahuai nishpami Jehová Diosta tucui shunguhuan mañana capangui. Shinallata chai huauquipash Diospa amigo cajta, paitapash Jehová juyajtaca na cunganachu capangui (Sal. 25:14). Jehová Diosca paipa amigocunataca juyaihuanmi tratan. Shinallata ñucanchi huauquipanicunata juyaihuan tratachunmi munan (Prov. 15:23; Mat. 7:12; Col. 4:6). Jipaca caita rurapangui, imata nigrijushpapash ali pensarishpami nina capangui. Na pensanachu capangui chai huauquica ñucata na ricunayachimandami shina nihuarianga nishpa. Caita yaripangui huaquinbica ñucanchillatami culpata charinchi. Ali tucungapaca cashna ni ushapangui: “Ñucaca jaicatami nali sintirinilla. Chaimandami cainaca ashata nali sintirircani” nishpa. Shina parlajpipash na ali tucungapaj munajpica shuj punlla parlangapami saquinalla capangui. Chaicamanga chai huauquimandami Jehová Diosta mañana capangui. Shinallata chai huauquipa ali rurashcacunata ricungapaj ayudahuai nishpami Jehová Diostaca mañanalla capangui. Quiquin chai huauquihuan ali tucungapaj munajujtaca Jehová Diosca alicachishpami ricujun. Chai huauquipashmi Jehová Diospa amigo can.

17. a)  Shuj jatun juchapi urmashca cashpaca ¿ima ayudacunatata charipanchi? b) ¿Imamandata chai ayudacunataca ali chasquina capanchi?

¹⁷ Jatun juchacunapi urmashcamandami huaquin huauquipanicunaca pensan, Jehová Diosta sirvitaca na ushanichu nishpa. Shina llaqui llaqui caimandami nimata na rurangapaj na munashpa, tranquilopash na causaita ushan. Rey Davidpashmi shinallata sintirirca. Chaimi cashna nirca: “Ñuca juchata Diosman na villajpimi, ñuca tullucunaca rucuyarca. Tucui punllami, aij nijurcanilla. Punllandi, tutandimi cambaj maquica ashtahuan ashtahuan llaquichihuarca” nishpa. Rey Davidca espiritualmente shinlli caimandami chai llaquitaca chimbapurai usharca. Chaimandami cashna nirca: “Ñuca juchataca canmanmi villarcani [...]. Canga, ñuca nalita rurashca juchataca cungahuarcanguimi” nishpa (Sal. 32:3-5). Quiquin jatun juchapi urmashca cajpica Jehová Diosca ayudangapami munan. Chaipaca ancianocuna ayudangapaj munajpica chai ayudatami quiquinga aliman chasquina capangui (Prov. 24:16; Sant. 5:13-15, NM). Chai consejocunata aliman chasquishpallami para siempre causai ushangui. Ña Jehová Dios perdonashca jahuapash chai juchata yarishpa cutin cutin nali sintirijushpaca ¿imatata rurana capangui?

18. Punda pandarishcacunata yarishpa llaqui llaqui sintirijujpica ¿imashinata apóstol Pablopa ejemploca ayudanga?

¹⁸ Huaquinbica apóstol Pablopashmi punda pandarishcacunata yarishpa llaqui llaqui sintirirca. Chaimandami cashna nirca: “Villachun cachashca runacunapajpash jipa jipami cani. Taita Diospajlla tandanajushca crijcunata catiriashpa llaquichishcamandami, villachun cachashcami cani ningapaca, pinganayai cani” nishpa. Shinallata nircapashmi: “Cunambi ñuca imashna cashpapash, Taita Dios ninanda juyajpimi shina cani” nishpa (1 Cor. 15:9, 10). Apóstol Pablo juchayu cajpipashmi Jehová Diosca chasquirca. Jehová Diosca apóstol Pablo paita juyashcata yarichunmi munarca. Quiquinba juchamanda tucui shunguhuan arripintirishpa Jehová Diosman, ancianocunamanbash villajpica Jehová Diosca perdonangami. Chaimandami Jehová Dios perdonashcata tucui shunguhuan confiashpa, pai perdonashcatapash ali chasquina capangui (Is. 55:6, 7).

19. Huatapa 2018 textoca ¿maijanda can? ¿Imamandata chai textoca alipacha can?

¹⁹ Tucurimui punllacunapi causanajuimandami ashtahuan llaquicunaca mirashpa catijun. Llaquicunata aguantachun Jehová Dios ayudanataca seguromi cana capangui. Chaimandami Bibliapica cashna nin: “Shaijushcacunamambash, paimi ushaita cun. Ima ushai illajcunamambash, ashtaca ushaitami cun” nishpa (Is. 40:29; Sal. 55:22; 68:19). Huata 2018​pa textota Tandanajui Huasicunapi ricushpami llaquicunata aguantachun Jehová Dios ayudanataca yaripashun. 2018 huatapa textoca ninmi: Jehová Diostalla shuyashpa causajcunaca cutinmi shinlli tucunga nishpa (Is. 40:31)