Jehová Diospa carashcacunataca tucui shunguhuanmi alicachina capanchi

1, 2. a) Jehová Diospa ¿ima quimsa carashcacunata oroshna ninan valishca can? b) ¿Imatata cai temapica yachajupashun?

JEHOVÁ DIOSCA tucuitami charin. Tucuillami paipa can (1 Crón. 29:11, 12). Paita alicachijcunamanga ashtacatami carashca. Jehová Diospa carashcacunaca oroshna ninan valishcami can. Shinapash ¿imatallata carashca? Quimsa yuyaicunata ricupashun. Pundapica paipa Reinota, shinallata villachinata, ashtahuangarin Bibliapi na llullashpa yachachishcacunatami carashca. ¿Nachu Jehová Diospa carashcacunataca tucui shunguhuan agradicipanchi? Ari, agradicinchimi. Shinapash tiempo yalijpica, Jehová Diospa carashcacunataca imapash yangallata cuendami ricui callarinchiman. Ama shina pasachunga Jehová Diospa carashcacunataca ninan valishca orotashna ricushpa, tucui shunguhuan alicachishpami catina capanchi. Jesusca nircami: “Maipi imata charishpapash, shungupica chaita yariajllami purinajunguichi” nishpa (Luc. 12:34).

² Shinaca, Jehová Diospa quimsa carashcacunata imashina alicachishpa catinata, imashina agradicina cashcatami yachajupashun. Yachajunajushpaca pensaripashunchi, Jehová Diospa quimsa carashcacunataca ¿imashinata tucui shuguhuan alicachishcata ricuchi ushapani? nishpa.

 3. Ninan valishca perlasguta randingapaca ¿imatata negociante runaca rurangapaj munarca? (Callari dibujota ricupangui).

³ (Mateo 13:45, 46, liingui). Jesusca juyailla perlascunata jatushpa randij runamandami parlarca. Chai runaca ashtaca perlascunatami randishpa jaturianga. Shinapash shuj punllaca shuj juyailla perlasgutami ricurca. Chaimandami paipa tucui charishcacunata jatushpa chai perlasguta randingapaj munarca. Chai perlasguca paipa ñavipica valishcapachami carca.

 4. Jesús parlashca runagushna Diospa Reinota tucui shunguhuan alicachishpaca ¿imatata rurangapaj munapashun?

⁴ Jesús parlashca chimbapuraipica yachachircami, Diospa Reino mandajpi tiana bendiciongunaca ninan valishca juyailla perlasgushnami can nishpa. Chai bendiciongunata tucui shunguhuan alicachishpaca, Jesús parlashca negociante runagushnami Diospa Reino mandajpi causangapaca tucuita huashaman saquingapaj munashun (Marcos 10:28-30, liingui). Cunanga ishcai ejemplocunata ricupashun.

 5. Diospa Reinota ninanda alicachishpaca ¿imatata Zaqueoca rurangapaj munarca?

⁵ Zaqueo shuti runaguca, impuestocunata cobrashpami trabajan carca. Paica gentecunata umachishpami charij tucushcarca (Luc. 19:1-9). Shinapash, Diospa Reinomanda Jesús parlajpica, chaita ninanda alicachishpami Zaqueoca uchalla nirca: ‘Jesús, ñuca imata charishcatapash chaupitami, imagutapash na charijcunaman caragripani. Maijandapash umashpa, culquita japijushcatapash, chuscucamanmi tigrachigrini’ nishpa. Zaqueoca tucuita tigrachishpami, ansiozo canataca saquirca.

 6. a) Rose shuti huarmiguca ¿imacunatata huashaman saquirca? b) ¿Imamandata shina rurarca?

⁶ Cunanga Rose shuti huarmigumanda parlapashun. Paica shuj huarmihuanllatami jarihuanshna causajurca. Huaquin huatacuna huashamanga Diospa Reinomanda ali villaicunatami uyarca. Ashtahuangarin, homosexualcunapa organizacionbi presidentami carca. Bibliata yachajui callarishpaca, Diospa Reino mandajpi tiana bendiciongunata ninanda alicachishpami paipa causaipi cambiana cashcata cuenta japirca (1 Cor. 6:9, 10). Shinami, presidenta canata saquishpa, paihuan causajuj huarmitapash jichurca. Ashtahuangarin, 2009 huatapi bautizarishpami, cati huataca precursora regular tucurca. Paipa nali munaicunata saquina shinlli cajpipash, Jehová Diosta ashtahuan juyaimandami cambiaita usharca (Mar. 12:29, 30).

 7. Diospa Reinota tucui shunguhuan alicachinata ama saquingapaca ¿imatata rurana capanchi?

⁷ Ñucanchicunapash Diospa Reino mandajpi causangapaj munaimandami jatun cambiocunata rurashcanchi (Rom. 12:2). Shinapash esforzarishpa catinami capanchi. Na cuidadota charijpica, ashtahuan charina munaicunamanda, shuj huarmihuan shuj jarihuan cana munaicunamandami, Diospa Reinota tucui shunguhuan alicachinataca saquinchiman (Prov. 4:23; Mat. 5:27-29). Paipa Reino mandajpi ima tianata tucui shunguhuan alicachichunga, ¿imatata Jehová Diosca ashtahuan cushca? Ricupashun.

 8. a) ¿Imamanda apóstol Pabloca nirca, villachinataca ‘alpa mangapi shuj ninan valishcatashnami charinchi’ nishpa? b) ¿Imashinata apóstol Pabloca villachinata tucui shunguhuan alicachishcata ricuchirca?

⁸ Jesusca Diospa Reino mandajuj ali villaicunata villachichun, yachachichunmi ñucanchitaca mandarca (Mat. 28:19, 20). Apóstol Pablopaca, villachinaca ninan valishca oroshnami carca. Chaimandami nirca, Mushuj Pactomanda villachinaca ‘alpa mangapi shuj ninan valishcata charishcashnami’ can nishpa (2 Cor. 4:7; 1 Tim. 1:12). Juchayucuna caimandaca alpa mangashnami canchi. Shinapash villachishpami salvarita ushanchi, shujcunapash salvarichun ayudaita ushanchi. Chaimandami apóstol Pabloca villachingapaj esforzarijuimanda nirca: ‘Ali villaita villangapami chashna causajuni’ nishpa (1 Cor. 9:23). Paica villachinata tucui shunguhuan alicachishpami shuj gentecunapash Jesusta catichun shinllita esforzarirca (Romanos 1:14, 15; 2 Timoteo 4:2, liingui). Ali villaicunata tucui shunguhuan alicachimandami shujcuna catiriashpa llaquichijpipash aguantarca (1 Tes. 2:2). ¿Imashinata ñucanchicunapash ali villaicunata alicachishcata ricuchi ushapanchi?

 9. ¿Imashinata ali villaicunata alicachishcata ricuchi ushapanchi?

⁹ Pabloca tucui gentecunahuan parlangapaj esforzarishpami ali villaicunata alicachishcata ricuchirca. Apostolcunashna, chai punllacunapi Jesusta catijcunashnami ñucanchicunapash huasin huasin rishpa, maipi cashpapash villachingapaj esforzarina capanchi (Hech. 5:42; 20:20). Usharijpicarin, precursor auxiliarcuna, precursor regularcuna cangapaj esforzaripashunchi. Shinallata, shuj shimita yachajungapaj, ñucanchi llactapillata o shuj llactapi sirvigringapaj esforzaripashunchi (Hech. 16:9, 10).

10. Ali villaicunata villachingapaj shinllita esforzarishcamandaca ¿ima bendiciongunatata Ireneca charishca?

¹⁰ Estados Unidosmanda Irene shuti soltera panigumanda parlapashun. Paica shuj llactamanda shamushca ruso shimita parlaj gentecunamanmi villachingapaj munarca. 1993 huatapi villachi callarijpica, ruso shimita parlaj grupopica casi 20 publicadorcunallami Nueva York llactapica tiarca. Paica casi 20 huatacunatami shinllita esforzarishca. Ireneca ninmi: “Cunangamanmi ruso shimita na ali parlani. Shinapash, Jehová Diospa bendicionhuanga ñami cunanbica sucta congregacionguna Nueva York llactapica tian”. Paihuan yachajushca 15 gentecunaca huaquingunaca Betelpimi sirvinajun, shujcunaca precursorcuna, ancianocunami can. Paica ninmi: “Huaquinbica pensarinimi, shuj cosascunata ruraimanbashchari carcani nishpa. Shinapash, gentecunata ayudana cushijuitaca na charimanllu carcani” ninmi. Imashinami ricupanchi, Ireneca ali villaicunata villachinataca tucui shunguhuanmi alicachirca.

11. Catiriashpa llaquichijpipash villachishpa catijpica ¿imata pasashca?

¹¹ Ali villaicunata tucui shunguhuan alicachishpaca, imashinami apóstol Pablota catiriashpa llaquichijpipash villachishpa catirca, shinallatami villachishpa catichun (Hech. 14:19-22). 1930 huatamanda 1944​camanga, Estados Unidospi huauquipanicunaca ashtacatami catiriashpa llaquichi tucurca. Shinapash villachishpami catirca. Villachishpa catinamandami huaquinbica tribunalcunaman rishpa huaquin juiciocunata ganarca. 1943 huatapica Estados Unidosmanda Tribunal Supremo nishcapi juiciota ganashpami, Nathan Knorr huauquica nirca: “Quiquin huauquipanicuna na villachishpa catijpica juiciota catishpa Tribunal Supremopi presentaritaca na ushanchimanllu carca. Chaimandami, mundo enteropi ashtaca huauquipanicunaca villachishpa catita ushan” nishpa. Shuj llactacunapi huauquipanicunapashmi, villachishpa catingapaj juiciocunata ganashca. Villachinata tucui shunguhuan alicachishpaca catiriashpa llaquichijpipash villachishpa catishunmi.

12. ¿Imatata rurangapaj munapanchi?

¹² Villachinataca Jehová Diosmi imapash ninan valishcatashna carahuashca yashpaca, na tauca horascunata villachinamandallachu villachishun. Ashtahuangarin, ‘ali villaicunata tucuicunaman villachishpa ali pactachinatami’ yaipi charishun (Hech. 20:24, NM). Shinapash villachinajushpaca ¿imatata yachachishun? Chaipaca Jehová Dios imata ashtahuan carashcata ricupashun.

13. Mateo 13:52​pica ¿imatata Jesusca ninan valishca orohuan chimbapurarca?

¹³ Bibliapi na llullashpa yachachishcacunataca “na llullaj” Jehová Diosmi carashca. Chaicunapash oroshna ninan valishcacunami can (2 Sam. 7:28; Sal. 31:5). Paita juyajcunamanga, Bibliapi na llullashpa yachachishcacunatami na mitsashpa carashca. Bibliata yachajui callarishca punllamandaca, Bibliatapash publicaciongunatapash liishpa, tandanajuicunaman rishpaca ashtacatami yachajushcanchi. Shinami Jesús nishca shinaca, mushuj yachachishcacunata, mauca yachachishcacunataca imapash ninan valishca orotashna alichishpa charinajushcanchi (Mateo 13:52, liingui). Imapash pacashca orota mascanshna yachajungapaj munajcunataca, mushuj yachachishcacunata ashtahuan yachajuchun ayudashpami Jehová Diosca ñucanchi yachajushcacunata mirachichun ayudanga (Proverbios 2:4-7, liingui). Pacashca orota mascanshna yachajungapaca ¿imatata rurana capanchi?

14. Bibliapi yachachishcacunata ashtahuan yachajushpa catingapaca ¿imatata rurana capanchi?

¹⁴ Orota mascanshna yachajushpa catingapaca Bibliatapash publicaciongunatapash yachajushpami ali ali intindingapaj esforzarina capanchi. Shinami, ñucanchicuna na yachashca mushuj yuyaicunata yachashun (Jos. 1:8, 9; Sal. 1:2, 3). Julio de 1879 huatapi llujshishca cai revistapica nijurcami: ‘Bibliapi na llullashpa yachachishcacunaca chaquishca chaquishca pambapi shuj juyailla uchilla sisa cuendami can. Panda yachachishcacunaca na ali jihua cuendami ushashcata viñashpa chai juyailla sisagutaca tapangapaj munan. Chai juyailla sisaguta taringapaj munashpaca, esforzarinami can. Shuj sisaguta tarishpapash, shuj sisacunatapash taringapami mascashpa catina can’ nishpa. Ñucanchicunapash, Bibliapi na llullashpa shuj shuj yachachishcacunata taringapami esforzarishpa catina capanchi.

15. a) ¿Bibliapi ima yachajushcacunatata mauca yachajushcacuna ninchi? b) ¿Bibliapi maijan yachajushcacunatata quiquinga ashtahuan alicachipangui?

¹⁵ Bibliata yachajui callarishpami ninan valishca oroshna yachachishcacunata yachajurcanchi. Chai yachajushcacunatara pundapi yachajushpa alicachishcamandami chai yachajushcacunataca mauca yachajushcacuna ninchi. Shinaca ¿imatallata callaripica yachajuparcanchi? Callaripica Jehová Dios ñucanchita rurashcata, gentecunata imapa rurashcatami yachajurcanchi. Shinallata, gentecunata ninanda juyaimanda paipa Churita huañuchun cachamushpa ñucanchita juchamanda, huañuimanda salvashcatami yachajuparcanchi. Ashtahuanbash, Diospa Reino mandajpi tucui llaquicuna tucurinata, para siempre tranquilo, ali causai ushanatami yachajurcanchi (Juan 3:16; Apoc. 4:11; 21:3, 4).

16. Bibliamanda imapash mushuj entendimiento llujshijpica ¿imatata rurana capanchi?

¹⁶ Huaquinbica, huaquin profeciacunata, Bibliapi huaquin textocunata ashtahuan ali intindina minishtirishca cashcamandami mushuj entendimiento nishcacuna llujshishca. Mushuj entendimientocuna tiajpica, chai informacionda ali intindingapaj, chaipi aliguta pensaringapami tiempota llujchina capanchi (Hech. 17:11; 1 Tim. 4:15). Mushuj entendimiento llujshijpi ashtahuan importante partecunata intindina ali cajpipash, uchilla yuyaicunata intindinapash alimi can. Shinallata, punda intindishcahuan, cunanbi intindishcahuan imapi shican cajta intindinapash alimi can. Mushuj entendimientota ali intindishpami, chai mushuj yachajushcacunatapash ninan valishca orotashna alichishpa charishun. Shinapash ¿imamandata aliguta intindingapaj esforzarina capanchi?

17, 18. ¿Imashinata espíritu santoca ayudan?

¹⁷ Jesusca nircami, Taita Diospa espíritu santomi imata yachajushcata yarichun ayudanga nishpa (Juan 14:25, 26). ¿Imashinata espíritu santoca ‘mandashca shimita yachachij runataca’ ayudan? 1970 huatapi Peter shuti huauqui ima tucushcata ricupashun. Chai punllacunapica paica 19 huatacunatami charirca. Gran Bretaña Betelmanbash chaira yaicushcami carca. Shuj punllaca huasin huasin villachijujpimi, casi 50 huatacunata charij, barbasyu runa llujshirca. Peterca ¿nachu Bibliata yachajungapaj munapanguiman? nishpami tapurca. Chai runaca judiocunata yachachijmi carca. Paica shuj jovenllu ñucataca Bibliata yachachisha nihuanga yashpami paitaca tapurca: “Huambragu, Daniel librota ima shimipi escribishcata yachanguichu” nishpa. Peterca nircami, Daniel libropa huaquin partecunaca arameo shimipimi escribishca carca nishpa. Shina nijpimi judiocunata yachachijca manllarishpa quedarca. Shinapash Petermi ashtahuanga manllarishca carca. ¿Imashinata paica chaita yachashcarca? Paica huasiman rishpami, último quillacuna llujshishca Villajun, ¡Despertad! revistacunata cutin ricujurca. Chaipimi ricurca, Daniel librotaca arameo shimipi escribishcata shuj revistapi intindichijushcata (Dan. 2:4). Imashinami ricupanchi, imatapash liishpaca valishca orotashnami alichinajunchi. Chai alichishcacunata yarichunmi espíritu santoca ayudan (Luc. 12:11, 12; 21:13-15).

¹⁸ Jehová Diospa yachachishcacunata ninan valishca orotashna alicachishpaca, mushuj yachachishcacunata, mauca yachachishcacunata mascangapami munashun. Shinami Jehová Diospa ali yachaitaca ashtahuan alicachishpa, agradicishpa catishun. Ashtahuangarin, shujcunaman yachachingapapash ali yachajushcacunami cashun.

19. ¿Imamandata Jehová Diospa carashcacunata tucui shunguhuan alicachishpa catingapaj esforzarina capanchi?

¹⁹ Imashinami cai temapi yachajupashcanchi, Diospa Reinopash, villachinapash, Bibliapi na llullashpa yachachishcacunapash ninan valishca oroshnami can. Diablopash, cai mundopash chai quimsa cosascunata imapash yangallata cuenda ricuchunmi munan. Chaimandami ashtahuan culquita, cosascunata charina munaicunamanda cuidarina capanchi. Apóstol Juan nishca shinaca, cai mundopash, cai mundopi tiashca munaicunapash tucuringami (1 Juan 2:15-17). Chaimandami, Jehová Diospa carashcacunata tucui shunguhuan alicachishpa catingapaj esforzarina capanchi.

20. Jehová Diospa carashcacunata tucui shuguhuan alicachishpa catingapaca ¿imatata rurangapaj munapangui?

²⁰ Imacunamandapash Diospa Reinota tucui shunguhuan alicachinataca na saquinachu capangui. Shinallata villachinatapash na saquishpa, tucui shunguhuanmi alicachina capangui. Bibliapi na llullashpa yachachishcacunatapash ninan valishca orota mascanshna yachajushpa catipangui. Shinami, ‘jahua pachapi imagutapash alichishpa charijpica, shuhuacunapash na yaicunga, polilla jurucunapash na micushpa tucuchinga’. Jesús nishca shinaca, ‘maipi imata charishpapash, shungupica chaita yariajllami purinajunchi’ (Luc. 12:33, 34).