Ancianocuna Jehovapa Jesuspa ejemplota catipaichi

1, 2. a) Llamagucunata aliguta ricuriashpa cuidajpica ¿imashinata chai llamagucunaca viñan? b) Jesuspa tiempopi gentecunaca ¿imamandata michij illaj llamagucunashca causanajurca?

MICHIJCUNA llamagucunata aliguta cuidajpica llamagucunaca juyaillagutami viñan. Shuj libroca ninmi: “Llamagucunata jihua tiashca pushtupilla saquishpa na aliguta ricuriajpica, jipamanga llamagucunaca ungunllami” nishpa. Shinaca llamagucunata aliguta ricuriashpa cuidajpica llamagucunaca racu racu, sano, juyaillagutami viñan.

² Congregacionbi huauquipanicunatapash llamagucunatashna cada unota aliguta ricuriashpa ancianocuna cuidajpica paicunapash espiritualmenteca shinllimi tucun. Jesuspa punllacunata yaripashunchi. Chai punllacunapi ñaupajman pushajcunaca Taita Diospa Leytaca nali yachachinajurcachu. Paicunaca millai millai, maipash cachun mandajcuna, gentecuna ricuchunlla alita rurajcunami carca. Gentecunaman aliguta yachachishpa ayudanapa randica ‘shuj jatun quipita’ apachishpa cuendami saquin carca (Mat. 23:​4). Gentecuna chashna llaquinaita causanajujta ricushpami Jesusca ninanda llaquirishpa nirca: ‘Michij illaj, jichushca llamacunashnami causanajupan’ nishpa (Mat. 9:36).

 3. Ancianocunaca ¿imatata yaria causana can?

³ Cunan punllacunapi ancianocunapash shuj jatun responsabilidadtami charin. Paicunaca Jehová Diospa Jesuspa llamagucunatami cuidanajun. Jesusca chai llamagucunata ninanda juyaimandami paipa causaita cushpa paicunataca salvarca. Paicunataca paipa ‘juyailla yahuarhuanmi’ randirca (1 Cor. 6:20; 1 Ped. 1:​18, 19). Jesusca nircami: ‘Ñucami aliguta michij cani’ nishpa (Juan 10:11). Jesusca ‘jatun Michij’ caimandami ancianocuna congregacionbi huauquipanicunata imashina tratanajujtaca ricuriajun. Jesús paicunata ricujushcataca yariami ancianocunaca causana can (Heb. 13:20).

 4. Cai temapica ¿imatata yachajupashun?

⁴ Shinaca ¿imashinata ancianocunaca congregacionbi huauquipanicunata tratana can? Congregacionbi huauquipanicunataca Bibliapica ninmi: ‘Cangunata michijcunataca cazushpami causana canguichi’ nishpa. Cutin congregacionbi ancianocunataca ninmi: ‘Cangunaman mingashca tandanajushca llamagucunataca na yapata mandanachu canguichi’ nishpa (Heb. 13:17; 1 Pedro 5:​2, 3, liingui). Shinaca ¿imashinata ancianocunaca huauquipanicunata na maipash cachun mandashpa ñaupajman pushana can? O shuj shimipi nishpaca ¿imashinata ancianocunaca autoridadta charishpapash huauquipanicunataca aliguta ricuriashpa ayudana can?

 5. Isaías 40:​11​pica ¿imatata Jehová Diosmandaca yachajupanchi?

⁵ Jehová Diosmanda parlashpaca profeta Isaiasca nircami: ‘Paica llamata michinshnami paipa llamagucunata michijunga. Huahua llamagucunatapash paipa rigrapi churashpami marcashpa apanga. Chairalla huachashca llamagucunataca aliguta cuidariashpami michijunga’ nishpa (Is. 40:11). Cai textopi nishca shinaca, Jehová Diosca irquilla, llaquilla huauquipanigucuna imata minishtijujta ricushpami cuidariajun. Imashinami llamata michijcunaca cada llamagu imata minishtijujta yachashpa ayudangapaj listo can, shinallatami Jehová Diospash congregacionbi huauquipanicunataca cada uno imata minishtijushcata ricushpa cushijushpa ayudan. Ashtahuangarin imashinami michijcunaca chairalla huachashca huahua llamagutaca japishpa marcan, shinallatami ‘ñucanchita ninanda llaquij’ Jehová Diospash ñucanchi llaquicunapi cajpi o imatapash minishtijujpica shinlliyachishpa cushichishpa, llaquicunata aguantachun fuerzata cunga (2 Cor. 1:​3, 4).

 6. Ancianocunaca ¿imashinata Jehovapa ejemplota catishpa huauquipanicunataca michina can?

⁶ Jehová Diosca shuj ali ejemplotami ancianocunamanga saquishca. Jehovapa ejemplota catishpami ancianocunaca huauquipanicuna imata minishtijujta ricuriajuna can. Shinapash ¿imamandata ricuriajuna can? Huauquipanicuna ima llaquicunata charijta yachashpami ancianocunaca imashina animanata, ayudanata yachanga (Prov. 27:23). Shinaca congregacionbi huauquipanicunahuan parlangapaj, ima nijta uyangapami ancianocunaca tiempota llujchina can. Paicunapa causaipi na satirijuna cashpapash imata ricushpa, imata uyashpaca ¿imatata rurana can? Paicunaca ‘na shinlli’ caimandami ayudachun minishtijun yashpami juyaihuan ayudana can (Hech. 20:​35, NM; 1 Tes. 4:11).

 7. a) Profeta Ezequielpa, Jeremiaspa tiempopi yachachijcunaca ¿imashinata Jehovapa llamagucunataca tratanajurca? b) Nali yachachijcunata Jehová Dios nalicachishpa ricushcamandaca ¿imatata ancianocunaca yachajuna can?

⁷ Profeta Ezequielpa, profeta Jeremiaspa tiempopi yachachijcunaca Jehovapa llamagucunataca nali tratanajurcachu. Pipash na cuidajpimi llamagucunaca chingarinajurca. Ashtahuangarin ‘chai michijcunaca paipurallata michirishpami’ causanajurca. Chaita ricushpami Jehová Diosca ninanda nalicachirca (Ezeq. 34:​7-10; Jer. 23:​1). Cunan punllacunapipash Jesusta catinchi nij tucushca religiongunapi yachachijcunapash chai tiempopi yachachijcunashnallatami can. Chaimandami Jehová Diosca paicunatapash nalicachishpa ricun. Shinaca ancianocunaca juyaihuanmi Jehovapa llamagucunataca cuidana can.

 8. Paipa catijcuna pandarinajujpica ¿imashinata Jesusca ayudarca?

⁸ Jehovapa llamagucunaca juchayucuna nacirimandami Jehovapa mandashcacunataca nali pactachi ushan. Huaquinbica Bibliapi consejocunata nali catishpa o espiritualmente nara shinlliyashpami Jehovataca nali sirvi ushan. Shina huauquipanicunata ricushpaca ¿imashinata ancianocunaca ayudana can? Ancianocunaca Jesuspa ali ejemplotami catina can. Jesuspa yachajujcunaca ashtahuan importante cangapaj munashpami paicunapura fiñanajun carca. Chaita ricushpa culiranapa randica Jesusca aliguman yachachishpa, consejashpami humilde canata yachachishpa catirca (Luc. 9:​46-48; 22:​24-27). Ashtahuangarin, paipa catijcunapa chaquicunata maillachishpami Jesusca humilde canata yachachirca. Shinaca tucuilla ancianocunami humilde canata yachajuna can (Juan 13:​12-15, liingui; 1 Ped. 2:21).

 9. Paipa apostolcuna pandarinajujpica ¿imashinata Jesusca yachachirca?

⁹ Apóstol Santiago, Juanbash paicunarami Diospa Reinopica ashtahuan importante cangapaj munarca. Chaita ricushpami Jesusca nalicachishpa cashna nirca: ‘Llactacunata jatun mandajcunami, shuj llactapi causajcunataca ninanda mandashpa charin. Mandajpuracunapash caishujcunataca mandanajunmi. Cangunapurapica na chashna tucunachu. Ashtahuangarin maijanbash mandaj tucungapaj munashpaca, cangunapurapi sirvishpa causachun ninimi’ nirca (Mat. 20:​25, 26). Shinaca cumbacunata mandashpa purina munaita charishpaca apostolcunaca chai nali munaicunamanda jarcarinami carca.

10. a) Jesusca ¿congregacionbi huauquipanicunata ancianocuna imashinata tratachunda munan? b) Apóstol Pabloca ¿ima ejemplotata ancianocunamanga saquishca?

¹⁰ Jesusca ancianocuna paipa ejemplota catishpa congregacionbi huauquipanicunapa sirvijcuna tucushpa ayudachunmi munan. Huauquipanicunata maipash cachun mandashpa millayajuchunga na munanllu. Apóstol Pablopash na jariyashpa, na millayashpa mandanllu carca. Chaimandami Éfeso llactamanda ancianocunataca nirca: ‘Asia llactaman ñuca chayamushca punllamandapacha, imashna cangunahuan causashcataca alimi yachanguichi. Na jariyashpami Apunchi Jesustaca sirvijushcani’ nishpa. Huauquipanicunata na jariyashpa mandachun munashpami apóstol Pabloca chai ancianocunataca nirca: ‘Cashna imatapash rurashpa causashpami na shinllicunatapash ayudana canguichi nishpa yachachijurcani’ nishpa (Hech. 20:​18, 19, 35, NM). Cutin Corinto llactamanda huauquipanicunataca nircami, cashna, chashna crishpami catina canguichi nishpaca na mandanichu. Canguna ninanda cushijushpa causachunmi ayudangapaj munani nishpa (2 Cor. 1:24). Imashinami ricupanchi, apóstol Pabloca na jariyashpa mandana cashcatami cunanbi ancianocunamanga yachachishpa saquirca.

11, 12. Ancianocunaca ¿imashinata huauquipanicunataca ali decisionda agllachun ayudana can?

¹¹ Ancianocuna yachachinajushpaca ‘Diospa Shimi na llulla cajtami yachachina can’ (Tito 1:​9). Shinapash ‘na fiñashpa, ali shunguhuanmi yachachina can’ (Gál. 6:​1). Cashna chashnami rurana canguichi nishpa obliganapa randica shunguman imashina chayanata yashpami ali shimicunahuan ayudana can. Shunguman chayangapaca Bibliapi consejocunahuan, publicaciongunapi temacunata ricuchishpa, alita o nalita agllajpi Jehová Dios imashina sintirijtami ricuchina can. Shinallata imatapash nara decidishpallata Jehovata mañanatami yachachina can (Prov. 3:​5, 6). Shina ayudashca jipaca huauquipanicunallata decidichunmi ancianocunaca saquina can (Rom. 14:​1-4).

¹² Ancianocunaca Bibliahuanllami huauquipanicunataca consejana, yachachina can. Chaimandami ancianocunaca Bibliata aligutapacha rijsishpa, imata yachachishpapash Bibliapa yuyaitalla yachachina can. Shinami ancianocunaca na jariyashpa mandanajunga. Paicunaca Jesuspa cati mandajcunallami can. Ashtahuangarin, imata decidishpapash congregacionbica cada unomi Jehovaman, Jesusman imata rurashcataca ricuchina canchi (Gál. 6:​5, 7, 8).

13, 14. Ancianocunaca ¿imacunapita ali ejemplota ricuchina can?

¹³ ‘Cangunaman mingashca llamagucunata na yapata mandanachu canguichi’ nishca jipaca apóstol Pedroca nircami, ‘cangunata ricushpa catichunmi aliguta causana canguichi’ nishpa (1 Ped. 5:​3). Shinaca ¿imashinata ancianocunaca ali ejemplota ricuchina can? Anciano nombramientota charingapaca ‘aligutapacha yarishpa purijmi’ cana can. Aligutapacha yarijcunaca na paicuna imata pensashcataca yangata ninllachu. Ashtahuangarin Bibliapi consejocunata aliguta intindishpa, aliguta pactachishpami causan. Shinallata anciano nombramientota charingapaca ‘paipa huasipi causajcunatapash aligutami mandana can’. Paipa huasipi causajcunatapash nali mandai ushashpaca Taita Diospa tandanajushcacunatacarin ¿imashinata aliguta ricuriashpa cuidai ushanga? (1 Tim. 3:​1, 2, 4, 5.) Ancianocuna aliguta causanajujta ricushpaca congregacionbi huauquipanicunapash paicunapi confiangami.

¹⁴ Shinallata villachingapaj llujshishpami ancianocunaca ali ejemplota ricuchina can. Jesuspash cai Alpapi cashpaca Diospa Reinota pundapi churashpa, imashina villachinata yachachishpami ali ejemplota saquirca (Mar. 1:38; Luc. 8:​1). Cunan punllacunapipash huauquipanicunaca ancianocuna paicunahuan villachingapaj llujshijpica ninandami cushijun. Ancianocuna imashina villachinajujta ricushpami huauquipanicunapash ashtahuan yachajun. Ancianocuna ashtacata ocupado cashpapash villachingapaj tiempota llujchijpica congregacionbi huauquipanicunapashmi paicunapa ejemplota catingapaj munan. Shinallata ancianocunaca tandanajuicunapa prepararina can, comentariocunata cuna can, Tandanajui Huasita fichanapi, arreglanapipash ayudanami can (Efes. 5:​15, 16; Hebreos 13:​7, liingui).

15. ¿Imamandata ancianocunaca cutin cutin huauquipanicunata visitana can?

¹⁵ Imashinami ali michijcunaca shuj llamagu ungushca o chugrishca cajpica uchalla ayudan, shinallatami shuj huauqui llaquilla cajpi o animachun minishtijujpica uchalla ancianocunaca ayudana can. Huaquingunaca ña mayorllagucuna caimanda o ungushcacuna caimandami espiritualmente animashpa shinlliyachichun minishtinajun (1 Tes. 5:14). Joven huambragucunapash ‘chairalla viñaicunapa nalita rurana munaicunamanda anchuringapami’ ayudata minishtinajun (2 Tim. 2:22). Shinaca congregacionbi huauquipanicunata cutin cutin visitashpami ayudana can. Shinami ancianocunaca huauquipanicuna ima llaquicunata charishcata yachashpa Bibliapi textocunahuan ayudanga. Problemacunata charijpi uchalla ayudajpica huauquipanicunaca na jatun llaquicunapi urmangachu.

16. Congregacionbi shuj huauqui o pani espiritualmente irquiyashca cajpica ¿imatata ancianocunaca rurana can?

¹⁶ Problemacuna ashtahuan mirajpi espiritualmente irquiyajushpaca ¿imatata rurana can? Discípulo Santiagoca nircami: ‘Cangunapurapi maijanbash huañujuj tiajpica mandaj rucucunata [“ancianocunata”, NM] cayachun. Paicunami chai huañujujmandaca Jesuspa shutipi aceiteta talishpa Diosta mañanga. Ima juchata rurashcatapash Diosca anchuchingami’ nishpa (Sant. 5:​14, 15). Espiritualmente ungushca cashpa na cayajpipash, ancianocunaca nali cajta yachashcandimi ucha ayudangapaj rina can. Ancianocunaca espiritualmente ungushcacunamanda Taita Diosta mañashpa, llaqui horascuna ayudashpami paicunaman mingashca llamagucunata ali michinajushcata ricuchin (Isaías 32:​1, 2, liingui).

17. Ancianocuna Jesuspa ejemplota catijpica ¿imashinata huauquipanicunaca beneficiarin?

¹⁷ Ancianocunaca paicunapa “jatun michij” Jesuspa ejemplota tucuipi catingapami esforzarin. Ancianocunami congregacionbi huauquipanicunataca aliguta ayudashpa espiritualmente ñaupajman catichun ayudan. Ancianocunata congregacionbi charishcamandami ñucanchita ashtahuan Jatun Michij Jehovata pagui nishpa alabangapaj munanchi.