Huahuacuna espiritualmente ñaupaman catichun, bautizarichun ayudapaichi

 1. Huahuacuna nara bautizarishpallata ¿imatata ali intindichun taitamamacunaca munan?

BLOSSOM BRANDT shuti paniguca ninmi: “Tauca quillacunatami ñuca taitamamataca bautizaringapami munani nin carcani. Bautizarina shuj jatun responsabilidad cashcata intindichunmi ñuca taitamamaca cutin cutin ñucahuan parlan carca. 31 de diciembre de 1934 huatapimi ña bautizarircani. Chai punllami ñucapaca ashtahuan importante carca” nishpa. Cunan punllapi Testigo taitamamacunapash paicunapa huahuacuna ali decisiongunata agllachunmi ayudangapaj munan. Huahuacuna bautizaringapaj munajpipash taitamamacuna yangamanda jarcajpica, Jehovata ali sirvitaca na ushangachu (Sant. 4:17). Shinapash huahuacuna nara bautizarishpallata Jesusta ali catina shuj jatun responsabilidad cashcata ali intindichunmi taitamamacunaca munan.

 2. a) ¿Imatata huaquin superintendente huauquicunaca ricushca? b) ¿Imatata cai temapica yachajupashun?

² Testigo taitamamacunahuan viñashca cashpapash 20 huatacunata charij jovenguna nara bautizarishcata ricushpaca, huaquin superintendente de circuito huauquicunaca preocuparishcami can. Chai jovengunaca casi tucuicunami tucuilla tandanajuicunaman rin, villachinamanbash llujshin, testigo de Jehovami cani ninmi. Shina rurashpapash Jehovaman mingarishpa, bautizaringapaca nara munashcachu. ¿Imamandata nara bautizaringapaj munashca? Huaquin jovengunataca paicunapa taitamamacunallatami nara bautizarinachu canguichi nishca. ¿Imamandata huaquin Testigo taitamamacunaca paicunapa huahuacuna bautizarichunga jarcashca? Chaita yachangapaca cai temapimi chuscu yuyaicunata ricupashun.

 3. Blossom panigupa taitamamacunaca ¿imapita pensarinajurca?

³ Imashinami ricupanchi, Blossom shuti panigupa taitamamacunaca preocuparishca caimandami cashna pensarinajurca: Ñucanchi ushiguca bautizarina ima cashcata, imamanda importante cashcataca alichu intindin nishpa. Huahuacuna Jehovaman mingaringapaj listo cashcataca ¿imashinata taitamamacunaca yachaita ushan?

 4. Mateo 28:19, 20​pi Jesuspa shimicunaca ¿imashinata taitamamacunataca ayudan?

⁴ (Mateo 28:19, 20, liingui). Imashinami callari temapi ña ricuparcanchi, mashna huatacunata charishpa bautizarinataca Bibliapica na nijunllu. Shinapash taitamamacunaca Mateo 28:19​pi shimicunataca alimi intindina can. Jesusca paipa catijcunataca nircami, “ñucapaj yachajujcuna tucuchun” yachachigrichi nishpa. Jesusmanda yachajushpa, chai yachajushcacunata intindishpa pactachingapaj munajcunami Jesuspa catijcuna can. Shinaca Testigo taitamamacunaca paicunapa huahuacuna bautizarishpa, Jesusta ali catijcuna tucuchunmi llullu huahuamandapacha yachachina can. Llullu huahuacunaca bautizaringapaj imacunatalla ruranataca na pactachi ushanllu. Shinapash Bibliapica ricuchinmi uchilla huahuacunapash Bibliapa yachachishcacunata intindishpa alicachishcata.

5, 6. a) Timoteomanda yachajushpaca ¿imatata bautizarinamandaca intindipanchi? b) ¿Imashinata taitamamacunaca paicunapa huahuacunata ayudaita ushan?

⁵ Timoteoca joven cashpallatami Jehová Diosta sirvi callarirca. Timoteomanda parlashpaca apóstol Pabloca nircami, ‘Diospa Shimitaca huahuamandapachami yachajushca’ nishpa. Timoteomanga paipa mama, paipa abuelami Diospa Shimita alicachichun yachachirca. Chaimi Timoteoca shinlli feta charirca. Shinapash paipa taitaca Jehová Diosta sirvijca na carcachu (2 Tim. 1:5; 3:14, 15). Timoteoca 20 huatacunata charishpami, caru llactacunapi villachingapaj apóstol Pablota cumbashpa rirca (Hech. 16:1-3).

⁶ Cada huahuami diferente can. Huaquin huahuacunaca uchillamandapachami Diospa Shimita ali intindishpa, ali decisiongunata agllashpa bautizaringapaj munan. Cutin shuj huahuacunaca ña viñarishca cashpapashmi bautizaringapaca nara munan. Taitamamacuna chaita ali intindishpami huahuacuna bautizarichunga na obligana can. Chaipa randica huahuacunallata espiritualmente ñaupaman catishpa bautizarichunmi ayudana can. Taitamamacunaca paicunapa huahuacuna Proverbios 27:11​pi shimicunata pactachijpica ninandami cushijun (chai textota liingui). Shinapash taitamamacunaca paicunapa huahuacunata Jesuspa ali catijcuna tucuchun ayudana cashcataca na cunganachu can. Chaimi cashna tapurina can: “Ñuca huahuaca Diosman mingarishpa bautizaringapaca ¿Bibliapa yachachishcacunata alichu intindin?” nishpa.

 7. ¿Bautizaringapaca Bibliamanda tucuita yachanachu minishtirin? Intindichipai.

⁷ Taitamamacunaca paicunapa huahuacuna Bibliapa yachachishcacunata ali intindichun munaimandami yachachin. Bibliapa yachachishcacunata ali intindishpallami huahuacunaca Jehovaman mingaringapaj munanga. Shinaca Jehovaman mingarishpa bautizaringapaca Bibliapa yachachishcacunataca ¿tucuitachu ali yachana can? Tucuita alipacha yachanaca na minishtirinllu. Bautizarishca jipapashmi Taita Diosmanda yachajushpa catina can (Colosenses 1:9, 10, liingui). Shinaca ¿bautizaringapaca Bibliamanda tucui tucuita yachanachu minishtirin?

8, 9. Apóstol Pablomanda, carcelta cuidajmandapash ¿imatata yachajui ushapanchi?

⁸ Apostolcunapa punllacunapi causashca shuj familiamanda ricupashunchi (Hech. 16:25-33). Huata 50​pimi apóstol Pabloca Filipos llactapi villachingapaj rirca. Chaipimi yangata juchachishpa paitapash, paipa cumba Silastapash carcelpi churarca. Chai tuta alpa mama cuyujpimi carcelpa pungucunapash pascarirca. Carcelta cuidajca tucui prezocuna llujshishca yashpami huañuchiringapaj munarca. Shinapash apóstol Pablomi paitaca jarcarca. Chaipimi apóstol Pabloca, Silas runagundi carcelta cuidajman, paipa familiamanbash villachirca. Chaimi carcelta cuidaj, paipa familiapash Jesusmanda imata yachajushcata alicachishpa uchalla bautizarirca. Caimandaca ¿imatata yachajupanchi?

⁹ Carcelta cuidajca romano soldadomi cashcanga. Paica Diospa Shimimandaca na yacharcachu. Chaimandami Jesusta catingapaca Bibliapa minishtirishca yuyaicunata yachajushpa, Jehovata sirvina ima cajtapash ali intindina carca. Shinallata Jesuspa yachachishcacunatapashmi pactachina carca. Chaita ñapash ali intindimandami carcelta cuidajca bautizarirca. Bautizarishca jipapashmi paica yachajushpa catina carca. Shinaca Jehovata juyaimanda, paipa mandashcacunata cazungapaj munaimanda huahuacuna bautizaringapaj munani nijpica ¿imatata taitamamacunaca rurana can? Ancianocunahuan huahuacuna parlachunmi taitamamacunaca animana can. Chaimi ancianocunaca bautizari ushashcata o na ushashcatapash ricunga.a Chaishuj bautizarishca huauquipanicunashnami huahuacunaca bautizarishca jipapash Jehová Diosmanda yachajushpa catinga (Rom. 11:33, 34).

10, 11. a) Huaquin taitamamacunaca ¿imatata pensan? b) Huahuacuna cai mundopi ama chapurichunga ¿imata ayudanga?

¹⁰ Huaquin taitamamacunaca pensanmi ashtahuan estudiashpa, ali trabajotara charishpami huahuacunaca bautizarina can nishpa. Taitamamacunaca alita ruranchi yashpami shina pensarin. Shina pensanaca ¿huahuacuna cushilla causachunllu ayudan? ¿Bibliapica chaitachu yachachin? Jehová Diosca ñucanchi causaipi ¿imata rurachunda munan? (Eclesiastés 12:1, liingui).

¹¹ Caitapashmi yarina capanchi. Cai mundopi gentecunaca Jehovapa munaitaca na pactachinllu. Jehová pensashcashnaca na pensanllu (Sant. 4:7, 8; 1 Juan 2:15-17; 5:19). Diablopa nali yuyaicunahuan, nali ruraicunahuan huahuacuna ama chapurichunga ¿imata ayudanga? Jehová Dioshuan ali amigo canami ayudanga. Culquitara o shuj cosascunatara taitamamacuna pundapi churajta ricushpaca huahuacunaca ¿imatashi pensanman? Jehovapa ali amigo canapa randica cai mundopa cosascunara ashtahuan importante cajtami pensanga. Testigo taitamamacunaca paicunapa huahuacuna cai mundopa yuyaicunatara catichunga na munanmanllu. Ñucanchi causaipi Jehovata pundapi churashpallami cushilla causashun (Salmo 1:2, 3, liingui).

12. ¿Imamandata huaquin taitamamacunaca churita o ushita nara bautizarinachu canguichi nishca?

¹² Shuj Testigo mamami paipa ushitaca nara bautizarinachu cangui nirca. ¿Imamandashi shina nirca? Paica ninmi: “Bautizarishca jipa ñuca ushigu expulsai tucunga yashpami shina nircani. Chaita nishcataca pinganayanmi” nishpa. Huaquin taitamamacunaca, chai panigushnallatami huahuacunataca ña viñarishpa ali decisiongunata agllai ushashparami bautizarina canguichi nishca (Gén. 8:21; Prov. 22:15). Huaquin taitamamacunaca pensanbashchari, ñuca churi o ñuca ushi nara bautizarishca cashpaca na expulsai tucungachu nishpa. Shina pensashpaca taitamamacunaca pandarinajunmi. ¿Imamandata shina nipanchi? (Sant. 1:22).

13. ¿Pipash nara bautizarishca cashpaca Jehovapa ñaupajpi paipa rurashcacunata ricuchinachu can? Intindichipai.

¹³ Imashinami ricupanchi, Jehovaman mingaringapaj ña listo cajta ricushpami huahuacuna bautizarichun taitamamacunaca munan. Shinapash huahuacuna nara bautizarishca cashpa nalita rurajpica Jehová Dios imatapash na rurangachu nishpaca na pensanachu can. Huahuacunaca ima ali cajta, ima nali cajta yachajushca punllamandapachami paicunapa rurashcacunata Jehová Diospa ñaupajpi ricuchina can (Santiago 4:17, liingui). Huahuacunata nara bautizarinachu cangui nijunapa randica taitamamacunaca ali ejemplotami ricuchina can. Huahuacuna Jehovapa mandashcacunata alicachishpa causachunga uchillamandapachami taitamamacunaca yachachina can (Luc. 6:40). Huahuacunaca Jehová Diosta juyaimandami paipa mandashcacunata cazungapaj munanga. Shinami juchapipash na urmanga (Is. 35:8).

14. Congregacionmanda ancianocunaca ¿imashinata taitamamacunata ayudaita ushan?

¹⁴ Congregacionmanda ancianocunapashmi taitamamacunataca ayudaita ushan. ¿Imashinata ayudaita ushan? Ancianocuna huahuacunahuan parlajushpaca, Jehovata ashtahuan sirvingapaj espiritual metacunata charina ali cashcatami parlana can. Shuj paniguca ninmi, 6 huatacunata charijpimi turi Russellca 15 minutocunapi ñuca espiritual metacunamanda parlangapaj tiempota llujchirca nishpa. Chai paniguca 70 yali huatacunatami precursora shina sirvirca. Imashinami ricupanchi shujcunata animana, ali yuyashpa parlanaca tucui causaipimi ayudan (Prov. 25:11). Ancianocunaca taitamamacunatapash, huahuacunatapash Tandanajuna Huasipi imapash ruraicunapi ayudachunmi mañanalla can. Shinapash huahuacuna rurai usharishcagutalla rurachunmi mandana can.

15. ¿Imashinata shuj huauquipanicunapash jovengunataca ayudaita ushan?

¹⁵ Cutin shuj huauquipanicunaca ¿imashinata ayudaita ushan? Jovengunamanda preocuparishcata ricuchishpami ayudaita ushan. Shinallata espiritualmente ñaupaman catinajujta o na catinajujtapashmi ricuna can. Tandanajuipi alipacha comentajpi, tandanajuipi shuj asignacionda cujpi, imapash jarcaicunata mishashpa shinlli feta charishcata ricuchijpi, escuelapi o colegiopi villachijpipashmi jovengunataca tucui shunguhuan felicitana capanchi. Shinallata tandanajui jipa o tandanajui nara callarijpillata jovengunahuan parlangapami esforzarina capanchi. Shina rurajpimi jovengunaca congregacionbica ali sintiringa (Sal. 35:18).

16, 17. a) ¿Imamandata huahuacunaca bautizarina can? b) Testigo taitamamacunaca ¿imamandata cushijun? (Callari fotota ricupangui).

¹⁶ Huahuacunata “aliguta yarichishpa [Jehová Dios, NM] munashcashna viñachina” responsabilidadtami Testigo taitamamacunaca charin (Efes. 6:4; Sal. 127:3). Israel llactapi huahaucunaca nacirishca punllamandapachami Jehová Dios agllashca llactapura tucun carca. Shinapash cunanbi huahuacunahuanga na shinachu can. Taitamamacuna Jehovata juyajpilla, Diospa Shimita alicachijpillaca huahuacunapash na shinallata cangachu. Taitamamacunaca paicunapa huahuacuna nacirishca punllamandapachami Jesusta ali catichun, Jehovaman mingarishpa bautizarichun ayudana can. Chaita ruranami taitamamacunapaca ashtahuan importante can. ¿Imamandata shina nipanchi? Huahuacunaca Jehovaman mingarishpa bautizarishpami Jehovata tucui shunguhuan sirvina can. Shina rurashpallami Ninan Manllanai Llaqui Punllacunapica salvari ushanga (Mat. 24:13).

¹⁷ Callari parrafopica, Blossom Brandt shuti panigumandami ricuparcanchi. Bautizaringapaj munani nijpica chai panigupa taitamamacunaca bautizaringapaj listo cajta o na listo cajtami ricurca. Ña bautizaringapaj listo cajta ricushpaca paipa taitamamacunaca apoyarcami. Blossom Brandt paniguca ninmi: Bautizaringapaj shuj punlla faltajpimi ñuca taitaca tucuicunata cungurichishpa Diosta cashna mañarca, “Jehová Dios canman ñuca ushigu mingarina decisionda agllashcamandaca ninandami cushijupani” nishpa. Ña 60 yali huatacuna jipaca chai paniguca nircami: “Ñuca taita shina rurashcataca nunca na cungashachu” nishpa. Shinaca huahuacuna Jehovaman mingarijta, bautizarijta ricushpaca taitamamacunaca ninandami cushijun.