Punda tiempopica ¿imashinata horastaca ricun carca?

IMA HORAS cajta yachangapaj munashpaca ¿imatata ruranchiman? Tal vez relojtami ricunchiman. Shinapash chaupi punllamanda ña 1 hora y 45 minutos yalishca cajpica ima horasta can nishpa pipash tapujpica ¿imatata ninchiman?

Shina tapujpica la 1:45 o las 2​paca cuarto de hora faltanra ninchimanmi. Cutin punllata 24 horastami charin nij llactapi causashpaca 13:45​mi can ninchimanmi.

Bibliata liishpaca tapuringuipashchari: “Punda tiempopi gentecunaca ¿imashinata horasta ricun carca? nishpa. Chai punllacunapica horasta ningapaca “tutamanda”, “chaupi punlla”, “chishi horas”, “amsayagrin” nishpami parlan carca. Chaitami Escrituras Hebreaspica ricuchin (Gén. 8:11; 19:27; 43:16; Juec. 19:9). Bibliapica horasmanda parlashpaca huaquinbica ima horaspacha cashcatami nin.

Punda tiempocunapica tucui tuta cuidashpa pacarichunmi pitapash churan carca. Chaimi israelitacunapa punllacunapica indi huashajushcamanda las 10 de la nochecamanga shuj jarimi cuidan carca. Ña las 10manda las 2 de la mañanacamanga shujmi cuidan carca. Ña las 2 de la mañanamanda indi llujshingacamanga shujmi cuidashpa pacarin carca. Chai punllacunapica Jesús cai alpapi nacirichunga ashtaca huatacunami faltarca. Por ejemplo, “chaupi tutamanda cuidaj soldadocunapaj cuidana horas chayajpi” nishpami Jueces 7:19​pica churashca. Cutin Jesuspa punllacunapica griegocuna, romanocuna cuendami judiocunaca horastaca ricun carca. Chaimi tutataca chuscu partepi shicanyachin carca.

Mateo, Marcos, Lucas, Juan librocunapica judiocuna horasta imashina ricun cashcatami parlan. Por ejemplo, Mateo 14:25​pica ninmi: “Ña punllayanalla tucujujpimi Jesusca, yacu jahuata purishpa”, paipa catijcunapaman shamujurca nishpa. Shinallata shuj viajeca Jesusca nircami: “Rijcharianajujta paicunapaj amo japij shamujpica, servijcunaca ninandami cushijun”. “Chaupi tuta cashpa, punllayajujta cashpapash, rijchariajujta paicunapaj amo japij shamujpica, servijcunaca ninandami cushijun” nishpa (Luc. 12:37,38).

Judiocuna tutata chuscu partecunapi shicanyachin cajpimi Jesusca paipa catijcunamanga cashna nirca: ‘Huasiyu runa ima horas tigramunata na yachashcamandaca, na puñushpami chapariana canguichi. Paica, ña amsayajujpi, chaupi tuta, gallo candai horas, indi llujshinallapi cashpapashmi shamungalla’ nishpa (Mar. 13:35). “Ña amsayajujpi” nishpaca indi huashajushcamanda las 9 de la nochecaman cashcatami parlajun. “Chaupi tuta” nishpaca las 9 de la nochemanda las 12 de la nochecaman cashcatami parlajun. Shinallata “gallo candai horas” nishpaca chaupi tutamanda casi las 3 de la mañanacaman cashcatami parlajun. Shinaca “gallo candai horaspimi” Jesustaca paipa contracunaca japishcanga (Mar. 14:72). Cutin “indi llujshinallapi” nishpaca casi las 3 de la mañanamanda indi llujshingacaman cashcatami parlajun.

Punda tiempocunapica cunanbishna na relojta charishpapash ima horas cajtaca yachanmi carca.